Jueces 1:1-36
1 Satepan ijkuak omiki Josué, israelitas okitlajtlanijkej Jehová: “¿Akinmej kinmiktitiuij cananeos?”.
2 Jehová okinnankili: “Yas itribu Judá uan nikmaktilis nochi nin tlali”.
3 Ikinon itribu Judá okilui itribu Simeón, nonmej tribus iknimej: “Touan xitlejkokan itech tlali kanin otechkajteuilijkej uan matikinmiktitij cananeos. Satepan namouan tiaskej itech tlali kanin onamechkajteuilijkej”. Ikinon itribu Simeón inuan oyajkej.
4 Itribu Judá otlejkok uan Jehová okinmaktili cananeos uan perizitas. Ijkuakon ompa Bézec, okintlanilijkej 10,000* tlakamej.
5 Ompa Bézec okajsitoj Adoni-Bézec uan okixnamikej, noijki okintlanilijkej cananeos uan perizitas.
6 Ijkuak ocholo Adoni-Bézec, okikuitlapantokakej uan ijkuak okikitskijkej okintekilijkej imajpiluan uan ikxipiluan tlen tomauakej.
7 Satepan Adoni-Bézec okijto: “Katej 70 tekiuajkej tlen okintekilijkej inmajpiluan uan inmikxipiluan tlen tomauakej uan kololouaj tlakuali itlampa nomesa. Tlen ne onikintokti,* axkan Dios onechtokti”.* Satepan ye okiuikakej altepetl Jerusalén uan ompa omiki.
8 Noijki tlakamej tlen pouij itech itribu Judá okinmiktitoj akinmej chantij Jerusalén uan okimoaxkatijkej non altepetl. Okixnamikej altepetl ika espada uan okichichinojkej.*
9 Satepan tlakamej tlen pouij itech itribu Judá, otemokej para kinmiktiskej cananeos tlen chantij itech tepeyo, Négueb uan Sefelá.
10 Noijki tlakamej tlen pouij itech itribu Judá, okinmiktitoj cananeos tlen chantij Hebrón, achto omotokayotiaya Quiryat-Arbá. Uan okitlanilijkej Sesái, Ahimán uan Talmái.
11 Satepan okinmiktitoj akinmej ochantiayaj Debir, non altepetl achto omotokayotiaya Quiryat-Séfer.
12 Ijkuakon Caleb okijto: “Akin kinmiktiti akinmej chantij altepetl Quiryat-Séfer uan kimoaxkatis, nikmakas nochpoch Acsá para iuan mamonamikti”.
13 Otniel ikone Quenaz ikni Caleb non xokoyotl, okimoaxkati non altepetl, ikinon Caleb okimakak ichpoch Acsá para iuan mamonamikti.
14 Ijkuak yejuan oyayaj inkalijtik, Acsá okilui Otniel makitlajtlanili ipapa seki tlali. Ijkuak Acsá otemok ipan iburro, Caleb okitlajtlani: “¿Tlen tikneki?”.
15 Acsá okilui: “Nimitstlatlaujtia, techteochiua. Te yotechmakak seki tlali ompa Négueb* pero noijki nikneki techmaka Gulot-Maim”.* Ikinon Caleb okimakak Gulot-Alto uan Gulot-Bajo.
16 Ixuiuan imonta Moisés akin okatka quenita, okiskej altepetl Jericó* inuan itribu Judá uan oyajkej kanin tlauaki ik isur Arad tlen inmiaxka itribu Judá. Ompa oajsitoj uan opejki chantij inuan akinmej ompa okatkaj.
17 Tlakamej tlen pouij itech itribu Judá uan itribu Simeón tlen iknimej, oyajkej para kinmiktitiuij cananeos tlen ochantiayaj Zefat uan okipojpolojkej non altepetl. Ikinon non altepetl okitokayotijkej Hormá.*
18 Satepan itribu Judá okimoaxkati altepetl Gaza uan itlal, altepetl Asquelón uan itlal, altepetl Ecrón uan itlal.
19 Jehová okatka iuan itribu Judá, yejuan okimoaxkatijkej kanin tepeyo. Pero amo okinkixtilijkej intlal akinmej ochantiayaj tlamaniktli porque okinpiayaj incarretas tlen okipiayaj tepostli tlen tlateki.
20 Ijkon ken Moisés okijto, Caleb okimakakej altepetl Hebrón uan ye okinkixtili intlal eyi ikoneuan Anac.
21 Pero itribu Benjamín amo okinkixti jebuseos tlen chantij Jerusalén. Ikinon jebuseos hasta axkan chantij Jerusalén inuan benjaminitas.
22 Jehová okatka iuan ixuiuan José ijkuak okinmiktitoj akinmej ochantiayaj Betel.
23 Ixuiuan José okintitlankej sekimej maichtakatlachiatij Betel, achto nin altepetl omotokayotiaya Luz.
24 Akinmej oichtakatlachiatoj okitakej se tlakatl oualkiski itech non altepetl uan okiluijkej: “Techilui ik kanin tikalakiskej itech nin altepetl uan amitlaj timitstoktiskej”.*
25 Tlakatl okinmilui ik kanin kalakiskiaj itech non altepetl. Ijkuakon yejuan okixnamikej altepetl ika espada pero okikauilijkej macholo non tlakatl iuan ifamilia.
26 Non tlakatl oyajki itech tlali kanin chantij hititas, ompa okichi se altepetl tlen okitokayoti Luz uan hasta axkan ijkon itoka.
27 Itribu Manasés amo okinkixti akinmej chantij Bet-Seán uan altepemej tlen ik ompa katej, akinmej chantij Taanac uan altepemej tlen ik ompa katej, akinmej chantij Dor uan altepemej tlen ik ompa katej, akinmej chantij Ibleam uan altepemej tlen ik ompa katej uan akinmej chantij Meguidó uan altepemej tlen ik ompa katej. Pero cananeos ok okinekiayaj chantiskej itech nonmej tlalmej.
28 Ijkuak soldados israelitas omomiakilijkej, chikauak okintekipanoltijkej cananeos pero amo okinkixtijkej kanin chantij.
29 Noijki itribu Efraín amo okinkixti cananeos tlen chantij Guézer, ikinon cananeos inuan chantij ompa Guézer.
30 Itribu Zabulón amo okinkixti akinmej chantij Quitrón nion akinmej chantij Nahalol. Ikinon cananeos inuan chantij uan noijki chikauak okintekipanoltijkej.
31 Itribu Aser amo okinkixti akinmej chantij Akkó, akinmej chantij Sidón, akinmej chantij Ahlab, akinmej chantij Aczib, akinmej chantij Helbá, akinmej chantij Afic uan akinmej chantij Rehob.
32 Aseritas opejki chantij inuan cananeos porque amo okinkixtijkej itech non tlali.
33 Itribu Neftalí amo okinkixti akinmej chantij Bet-Semes nion akinmej chantij Bet-Anat. Ikinon yejuan opejki chantij inuan cananeos tlen ompa okatkaj. Noijki chikauak okintekipanoltijkej akinmej chantij Bet-Semes uan Bet-Anat.
34 Amorreos amo okikauilijkej itribu Dan matemo tlamaniktli, ikinon okichiualtijkej mamokaua itech tepeyo.
35 Amorreos ok okinekiayaj chantiskej itech tepetl Heres, altepetl Ayalón uan altepetl Saalbim. Ijkuak omomiakilijkej soldados tlen pouij itech ixuiuan José, chikauak okintekipanoltijkej amorreos.
36 Intlal amorreos opeuaya ik Acrabim uan desde Sela hasta tlakpak kanin tepeyo.
Notas
^ Diez mil.
^ Noso “onikinchiuili”.
^ Noso “onechchiuili”.
^ Noso “okitlatijkej”.
^ Noso “sur”.
^ Kijtosneki “kanin mamantok atl”.
^ Altepetl tlen kinpia soyakojmej.
^ Kijtosneki “okitemakakej makipojpolokan”.
^ Noso “timitschiuiliskej”. Ika hebreo “tikteititiskej timitstlasojtlaj uan amo timitskauaskej”.
