Carta para Efesios 3:1-21
3 Ikinon ne Pablo tlen nitsaktok porque niktekichiuilia Cristo Jesús uan porque namechpaleuia namejuan akinmej amo nanjudíos...
2 Xamo yinankimatij onikseli tekitl para namechpaleuis xikselikan itetliokolil toTajtsin Dios tlen kuali.
3 Ne yonechmatiltijkej itlaj santo tlen amo omomatiaya ijkon ken yonamechijkuililijka.
4 Ijkuak nankitlajtoltiskej non, nankitaskej ne nikajsikamati itlaj santo tlen amo omomatiaya itech Cristo.
5 Akinmej yiuejkika oyoltokaj amo okinmatiltijkej nin tlamantli tlen amo omomatiaya ken axkan toTajtsin Dios ika iespíritu okinmatilti iapóstoles yolchipauakej uan profetas:
6 akinmej amo judíos tlen katej iuan Cristo Jesús kiseliskej tlen ye kiselis. Noijki pouiskej san itech se cuerpo uan kiseliskej tlen toTajtsin Dios yokijto techmakas porque okiselijkej kuali tlajtoli.
7 Ne namechpaleuia xikajsikamatikan tlen amo omomatiaya, porque toTajtsin Dios nechtliokolia tlen kuali uan ika ichikaualis onechmakak nin tetliokolil.
8 Ne amo okachi nopati innauak tokniuan yolchipauakej, pero toTajtsin Dios onechtliokoli tlen kuali para manikinmatilti kuali tlajtoli akinmej amo judíos. Non kuali tlajtoli kijtoua Cristo sapanoua techteochiua.
9 Noijki para nikinpaleuis nochtin makajsikamatikan toTajtsin Dios kichijtok itlaj santo tlen amo omomatiaya. ToTajtsin Dios okichijchi nochi tlen onka uan miak xiuitl okitlati tlen amo omomatiaya.
10 ToTajtsin Dios ijkon okichi para tlanechikol makinpaleui tekiuajkej uan akinmej tlanauatiaj iluikak makimatikan ye tlatlamantli kiteititia ixtlamatilis.
11 Nin mouika ika tlen toTajtsin Dios okijto kichiuas iuan toTeko Cristo Jesús.
12 Tejuan tikneltokaj Cristo, ikinon tiyolchikauakej ijkuak titlajtouaj uan amitlaj techtsakuilia ijkuak tiktlatlaujtiaj toTajtsin Dios porque tikneltokaj.
13 Ikinon ne namechiluia amo ximoyolkokokan ijkuak namopatka nitlajyouia, porque tlen nikijyouia namechpaleuia manamechtlakaitakan.
14 Ikinon nimotlankuaketsa ixpan toTajtsin Dios.
15 Ye okichi mayetokan nochi familias ompa iluikak uan nikan tlaltikpak.
16 Ne niktlatlaujtia toTajtsin Dios akin sapanoua ueyititok makichikaua namotlayejyekol* uan manamechyolchikaua ika iespíritu.
17 Nimotlatlaujtia para Cristo mayeto namoyolipan ika tlasojtlalistli porque nantlaneltokaj. Noijki nimotlatlaujtia kuali ximoyekketokan ijkon ken se kouitl kuali toktok.
18 Ijkon namejuan uan nochtin tokniuan yolchipauakej kuali nankajsikamatiskej tlen patlauak, ueyak, uejkapan uan tlen uejkatlan.
19 Noijki nankajsikamatiskej ken tetlasojtla Cristo porque non okachi ipati uan amo ixtlamatilistli, para nankipiaskej nochi tlen kuali kitemaka toTajtsin Dios.
20 ToTajtsin Dios techpaleuia ika ichikaualis. Ye uelis kichiuas okachi miak tlamantli uan amo ken tiktlajtlaniliaj noso ken timokuayejyekouaj.*
21 Ye nochipa makiueyichiuakan ika tlanechikol uan ika Cristo Jesús. Amén.
