Apocalipsis 22:1-21
22 Ijkuakon ye onechititi se aueyatl tlen kitemaka yolilistli. Non atl okatka ken vidrio chipauak uan okisaya kanin kajki itrono toTajtsin Dios uan itrono Ichkatsin.
2 Atl opanouaya tlajko ojtli kanin miakej panouaj itech altepetl. Inajnakastlan aueyatl okatkaj kojmej tlen kitemakaj yolilistli. Nonmej kojmej tlakij 12 veces se xiuitl, non kijtosneki sejse metstli kitemakaj intlakilo. Inxijyo kojmej okatka para kinpajtiskej akinmej chantij itech altepemej.
3 Ayakmo kiuijuikaltiskej non altepetl porque ompa yetos itrono toTajtsin Dios uan itrono Ichkatsin. Itlakeualuan kitekichiuiliskej,
4 kitaskej ixko uan inmixkuak kipiaskej itoka.
5 Noijki ayakmo tlayouas. Tlauili uan tonaltsin amo moneki kintlauilis porque toTajtsin Dios Jehová kintlauilis uan yejuan nochipa tlanauatiskej.
6 Ángel onechilui: “Nin tlajtoli melauak uan nochtin uelis kineltokaskej. Profetas otlajtojkej ipatka toTajtsin Dios Jehová uan ye okititlanki iángel para kinmititis itlakeualuan tlen san niman panos.
7 San niman niuits. Paki akin kitlakamati* profecía tlen kajki itech nin rollo”.
8 Ne niJuan, onikkak nochi nin tlamantli uan onikitak. Ijkuak onikitak uan onikkak nin tlamantli, onimotlankuaketski ikxitlan ángel para nikueyichiuas. Ye onechititi nochi non tlamantli.
9 Pero ye onechilui: “¡Amo! ¡Amo ijkon xikchiua! Ne san nitlakeuali ijkon ken te uan mokniuan, profetas uan ken akinmej kitlakamatij* tlen kijtoua nin rollo. Xikueyichiua toTajtsin Dios”.
10 Noijki onechilui: “Amo san ichtaka xiktlati profecía tlen kajki itech nin rollo porque yiajsis tonal tlen omoijto.
11 Akin amo yolkuali makichijto tlen amo kuali uan akin sokio ok mayeto sokio. Pero akin yolkuali nochipa makichiua tlen kuali uan akin yolchipauak nochipa mayeto yolchipauak”.
12 “‘¡Xikkaki! San niman niuits uan nikualikas tetliokolil tlen niktemakas para sejse nikintlaxtlauis ijkon ken okichijkej.
13 Ne niAlfa uan niOmega,* ne niachto uan nisaiktlami.
14 Pakij akinmej kipakaj intlaken ueyak para makinkauilikan kikuaskej intlakilo kojmej tlen kitemakaj yolilistli. Noijki para kalakiskej itech altepetl kanin katej puertas.
15 Kiauak katej itskuintin,* akinmej kichiuaj naualotl, akinmej auilnemij,* akinmej temiktiaj, akinmej kinueyichiuaj dioses uan nochtin akinmej kinpaktia tlakajkayauaskej uan nochipa tlakajkayauaj’”.
16 “‘Ne niJesús, oniktitlanki noángel manamechmatilti nochi nin tlamantli para kuali mayetokan tlanechikolmej. Ne niifamiliar uan niixui David. Noijki nisitlali tlen petlani uan kisa kualkan’”.
17 Espíritu santo uan novia nochipa kijtouaj: “¡Xiuiki!”. Nochtin akinmej kikakij makijtokan: “¡Xiuiki!”. Maualakan nochtin akinmej amikij. Nochtin akinmej kinekij makonikan atl tlen kitemaka yolilistli uan amitlaj kitlaxtlauaskej.
18 “Nochtin akinmej kikakij profecía tlen kajki itech nin rollo, ne nikinmiluia: tla ikaj itlaj kajxitilis nin tlamantli, toTajtsin Dios kiualtitlanilis nochi chauistli tlen ijkuilitok itech nin rollo.
19 Noijki tla ikaj itlaj kikixtilis profecía tlen kajki itech nin rollo, toTajtsin Dios amo kikauilis makiseli nochi tlamantli kuali tlen kijtoua nin rollo. Non kijtosneki toTajtsin Dios amo kikauilis makikua intlakilo kojmej tlen kitemakaj yolilistli uan amo kikauilis makalaki itech altepetl chipauak”.
20 “Akin kitematiltia nochi nin tlamantli kijtoua: ‘San niman niuits’”.
“¡Amén! Xiuiki toTeko Jesús”.
21 ToTeko Jesús makintliokoli tlen kuali akinmej yolchipauakej.
Notas
^ Noso “kiuelkaki”.
^ Noso “kiuelkakij”.
^ Alfa ika opeuaya abecedario griego uan otlamiaya ika omega.
^ Kijtosneki akinmej kichiuaj tlen toTajtsin Dios kitlajyaltia.
^ Xikita diccionario kanin kijtoua auilnemi.
