Josué 1:1-18
1 Jehová omotlapoui iuan Josué* ikone Nun, akin okipaleuiaya Moisés. Ijkuak yomika Moisés itekipanojka Jehová, Josué ijkin okiluijkej:
2 “Yomiki notekipanojka Moisés. Ikinon te uan noaltepe xikpanouikan aueyatl* Jordán, xikinuika israelitas itech tlali tlen nikinmakas.
3 Ijkon ken onikiluijka Moisés, ne namechmakas kanin namajsitiuij.
4 Tlali tlen nankimokauiskej peua kanin tlauaki hasta kanin kajki Líbano noijki ik kanin kajki aueyatl Éufrates, ik kanin katej hititas uan hasta inakastlan mar Grande* ik kanin motlatia tonaltsin.
5 Tikintlanilis nochtin akinmej mitsixnamikiskej. Nimitspaleuis ijkon ken onikpaleui Moisés. Amo keman nimitskauas uan nochipa nimitspaleuis.
6 Ximochikaua uan ximoyolchikaua, porque te tikinyekanas israelitas para makimokauikan tlali tlen onikinmilui nikinmakaskia inuejkatatajuan”.
7 “Ximochikaua, ximoyolchikaua uan xikintlakamati* notlanauatiluan tlen Moisés omitsilui. Nochipa xikintlakamati uan ijkon kuali kisas nochi tlen tikchiuas. Nochipa xikintlakamati tlanauatilmej para tiyetos tiixtlamatki itech nochi tlen tikchiuas.
8 Moneki nochipa tikijtos tlen kijtoua nin Tlanauatil, mojmostla tiktlajtoltis* uan timokuayejyekos* tlen kijtosneki. Tla tiktlakamatis* nochi tlen ompa ijkuilitok, kuali tiyetos uan kuali kisas tlen tikchiuas.
9 Amo ximomojti nion xiteimakasi* porque ne Jehová moDios nochipa mouan niyetos, yonimitsilui moneki timochikauas uan timoyolchikauas”.
10 Ijkuakon Josué okinmilui akinmej okinnauatiayaj israelitas:
11 “Xipanokan ik kanin nochtin katej uan xikinnauatikan: ‘Uiptla nankipanouiskej aueyatl Jordán para nankimoaxkatiskej tlali tlen Jehová namoDios okijto namechmakas, ikinon xikuikakan nochi tlen moneki’”.
12 Josué noijki okinmilui rubenitas, gaditas uan tlajko itribu Manasés:
13 “Xikilnamikikan Jehová namoDios namechmakas nin tlali kanin nanmoyolseuiskej, ijkon ken okijto Moisés itekipanojka Jehová.
14 Namosiuauan, namokoneuan uan namoyolkauan chantiskej itech tlali kanin Moisés okijto namechmakaskej ik inakastlan aueyatl Jordán. Pero nochtin namejuan soldados tlen nanchijchikauakej moneki nanmotekpanaskej* uan nanyaskej inyekapan namokniuan. Moneki nankinpaleuiskej
15 hasta ijkuak Jehová makinyolseui, ijkon ken namejuan onamechyolseui uan ijkon kimokauiskej tlali tlen Jehová kinmakas. Satepan ximokopakan kanin nankatej uan ompa xichantikan, itech tlali tlen Moisés itekipanojka Jehová onamechmakak ik inakastlan aueyatl Jordán”.
16 Yejuan okiluijkej: “Tikchiuaskej nochi tlen otechilui uan tiaskej kanin technauatis.
17 Noijki timitstlakamatiskej* ijkon ken otiktlakamatkej* Moisés ijkuak itlaj otechiluiaya. Jehová moDios mamitspaleui ijkon ken okipaleui Moisés.
18 Moneki mikis akin amo mitskakis nion mitstlakamatis* ijkuak itlaj tikiluis. Ikinon ximochikaua uan ximoyolchikaua”.
Notas
^ Noso “Jehosúa”, kijtosneki “Jehová temakixtia”.
^ Noso “atenko”, “atitla”, “apan”.
^ Kijtosneki mar Mediterráneo.
^ Noso “xikinuelkaki”.
^ Noso “tikpouas”.
^ Noso “timonejneuilis”.
^ Noso “tikuelkakis”.
^ Noso “xitemauili”.
^ Noso “nanmoyekmanaskej”, “nanmoyektlatlaliskej”.
^ Noso “timitsuelkakiskej”.
^ Noso “otikuelkakej”.
^ Noso “mitsuelkakis”.
