Génesis 48:1-22
48 Satepan ijkuak opanok non tlamantli, okiluijkej José: “Mopapa ayakmo tlaxikoua”. José okitato uan okinuikak ome ikoneuan, Manasés uan Efraín.
2 Ijkuakon okiluijkej Jacob: “Mokone José omitsitako”. Israel omochijchika uan omotlali ipan cama.
3 Jacob okilui José:
“ToTajtsin Dios akin kipia nochi chikaualis, onechmonextili ompa Luz itech tlali Canaán uan onechteochi.
4 Ye onechilui: ‘Nikchiuas xikinpia mokoneuan uan ximomiakili. Nikchiuas xiyeto miakej altepemej. Nin tlali nikinmakas moxuiuan uan nikchiuas nochipa mayeto inmiaxka’.
5 Axkan noaxkauan ome mokoneuan tlen otikinpixki tlali Egipto, ijkuak ayamo oniualaya nimitsajsiki. Efraín uan Manasés yetoskej nokoneuan ijkon ken nokoneuan Rubén uan Simeón.
6 Pero mokoneuan tlen satepan tikinpias yetoskej moaxkauan. Yejuan kiseliskej seki tlali tlen inmikniuan kinmakaskej para mayeto inmiaxka.
7 Ne onikiski Padán ijkuak Raquel omiki nonauak itech tlali Canaán. Pero ok opoliuiaya para niajsiti Efrat, ikinon oniktokak Raquel ipan ojtli tlen oyaya Efrat, tlen noijki itoka Belén”.
8 Ijkuakon Israel okinmitak ikoneuan José uan otlajtlanki: “¿Akinmej yejuan?”.
9 José okinankili: “Yejuan nokoneuan tlen toTajtsin Dios onechinmakak ipan nin tlali”. Uan ipapa okilui: “Nimitstlatlaujtia xikinualika para manikinteochiua”.
10 Israel ayakmo kuali otlachiaya porque yokokoxkatika.* José okintoki ome ikoneuan uan Jacob okinpipitso* uan okinnapalo.*
11 Satepan Israel okilui José: “Amo keman onimokuayejyeko* oksepa nimitsitaskia. Pero axkan xikita, toTajtsin Dios onechkauili manikinmita mokoneuan”.
12 Satepan José oksekan okinuikak ikoneuan, yejuan okatkaj ik kanin okatkaj itlankuauan ipapa. Uan José omoixtlapacho tlalpan.
13 Satepan José okintoki ome ikoneuan inauak Israel. José okikitski Efraín ika iyekma uan okitlali ik iopochma Israel. José okikitski Manasés ika iopochma uan okitlali ik iyekma Israel.
14 Pero Israel okitlali iyekma ipan itsonteko Efraín maski ye okatka xokoyotl. Uan iopochma okitlali ipan itsonteko Manasés. Ye ijkon okintlali imauan maski yokimatoka Manasés achto oneski.*
15 Satepan okiteochi José uan okijto:
“Akin melauak toTajtsin Dios tlen okitekichiuilijkej nopapanuan Abrahán uan Isaac,akin melauak toTajtsin Dios, tlen nochipa okatka notlajpixki hasta axkan,
16 ángel tlen onechmakixti para amo manechpano tlen amo kuali, makinteochiua telpochmej.
Ika ninmej telpochmej, oksekimej makilnamikikan notoka, noijki itoka noabuelito Abrahán uan itoka nopapa Isaac,uan mamochiuakan se ueyi altepetl”.
17 Pero José okitak ipapa okipixtoka iyekma ipan itsonteko Efraín uan non amo okipakti. Ye okinekiaya kitlalis ima ipapa ipan itsonteko Manasés, para ayakmo mayeto ipan itsonteko Efraín.
18 José okilui ipapa: “Ijkon amo nopapa. Nikan kajki achto nokone, xiktlali moyekma ipan itsonteko”.
19 Pero ipapa amo okinek ijkon kichiuas uan okilui: “Yinikmatok nokone. Ye noijki yetos se altepetl uan noijki ueyititos. Pero ikni xokoyotl okachi ueyititos uan ixuiuan yetoskej sapanoua miakej uan uelis kinchiuaskej miakej altepemej”.
20 Satepan non tonal ok okinteochi uan okijto:
“Ikoneuan Israel makijtokan motoka ijkuak tlateochiuaskej uan kijtoskej:‘ToTajtsin Dios mamitsteochiua ken okinteochi Efraín uan Manasés’”.
Ikinon ye okachi okiueyitlali Efraín uan amo Manasés.
21 Satepan Israel okilui José: “Techkaki, ne yinimikis pero toTajtsin Dios ok namouan yetos uan kichiuas ximokopakan inmintlal namouejkatatajuan.
22 Te nimitsmaka okachi ueyi tlali amo ken mokniuan. Non tlali onikinkixtili amorreos ika noespada uan noarco”.
Notas
^ Noso “youeuejtika”, “yochikajka”, “yitetajtsin”.
^ Noso “okintennamik”.
^ Noso “okinnauajtek”.
^ Noso “onimonejneuili”.
^ Noso “otlakatki”.
