Okse ilibro Samuel 12:1-31
12 Ijkuakon Jehová okititlanki Natán makitati David, ijkuak Natán okatka ixpan David ijkin okilui: “Itech se altepetl okatkaj ome tlakamej, se okipiaya miak tomin uan okse amitlaj okipiaya.
2 Tlakatl tlen okipiaya miak tomin okinpiaya miakej ichkamej* uan miakej vacas
3 pero okse tlakatl san okipiaya se iborregakone tlen okimokoui. Non borregakonetl kualtsin omoskaltijtiaya porque non tlakatl uan ikoneuan okimaluiayaj. Tlakatl okitlamakaya maski amo miak okipiaya, okimakaya tlen okipiaya ijtik ivaso uan ielpan okochiaya, ye okitaya ken itakotsin.
4 Se tonal tlakatl tlen okipiaya miak tomin ikaj okitlajpaloto pero maski okinpiaya miakej ichkamej uan vacas nion se okimikti para makitlakualchiuilikan akin okitlajpaloto. Ye okikitski borregakonetl tlen iaxka tlakatl tlen amitlaj okipiaya uan ika okitlakualchiuili akin okitlajpaloko”.
5 David okualankamik ijkuak okikak tlen okichi non tlakatl uan okilui Natán: “¡Ijkon ken Jehová melauak yoltok non tlakatl moneki mikis!
6 Porque ijkon okichi uan amo oteiknomatki, moneki kitlaxtlauas non borregakonetl ika naui borregaskonemej”.
7 Ijkuakon Natán okilui David: “¡Te otikchi ken non tlakatl! Ijkin kijtoua Jehová inDios israelitas: ‘Ne onimitspejpenki para xiyeto intekiua israelitas uan onimitsmakixti imak Saúl.
8 Ne onimokuayejyekojka* nimitsmakas nochi tlen iaxka moteko uan noijki isiuauan. Onimitstlali xiknauati altepetl Israel uan noijki Judá. Noijki ok onimokuayejyekouaya* nimitskauilis xikchiua okseki tlamantli.
9 ¿Tleka amo otiktlakaitak tlen omitsilui Jehová uan ixpan otikchi tlen amo kuali? ¡Ika espada otikmikti Urías akin hitita! Satepan ijkuak yotikmikti ika inmiespada ammonitas, otikmokaui isiua uan iuan otimonamikti.
10 Mokalijtik nochipa san nantlajyouiskej porque amo otechtlakaitak uan otikkuili isiua Urías akin hitita uan iuan otimonamikti’.
11 Ijkin kijtoua Jehová: ‘Axkan nikchiuas mamitstlajyouiltikan akinmej mouan chantij. Moixpan nimitsinkuilis mosiuauan uan nikinmakas okse tlakatl, ye inuan motekas ijkuak ok tlanestok.
12 Te san ichtaka tlen otikchi pero tlen nimitsiluijtok nikchiuas inmixpan nochtin israelitas para nochtin yejuan makitakan’”.
13 Ijkuakon David okilui Natán: “Onitlajtlakolchi ixpan Jehová”. Natán okinankili David: “Maski otitlajtlakolchi, amo timikis porque Jehová mitstlapojpoluia.
14 Pero ken amo otiktlakaitak Jehová, mokone tlen oneski* mikis”.
15 Satepan Natán oyajki ikalijtik.
Uan Jehová okichi mamokoko ikone David tlen okipixki iuan isiua Urías.
16 David opejki kitlatlaujtia toTajtsin Dios por ikone, ye omokaltsakuaya uan amo otlakuaya* uan youak omotekaya tlalpan.
17 Akinmej otlayekanayaj ikalijtik inauak omotokiayaj uan okinekiayaj keualtiskej. Pero ye amo okinek uan amo okinekiaya inuan tlakuas.
18 Ijkuak ochikometik, konetl omiki pero itlakeualuan David omomojtiayaj kiluiskej ikone omiki, yejuan okimoluiayaj: “Ijkuak ikonetsin oyoltoka, tekiua amo okinekiaya techkakis ijkuak itlaj otikiluiayaj. ¿Axkan ken tikiluiskej omiki ikonetsin? Uelis kichiuas itlaj amo kuali”.
19 David okajsikamatki* ikonetsin omiki ijkuak okinmitak itlakeualuan omoichtakatlapouijtokaj, David okintlajtlani: “¿Omiki nokonetsin?”. Yejuan okinankilijkej: “Kema, yomiki”.
20 Ijkuakon David omejki, omalti,* okimotlalili aceite, okipatlak itlaken uan oyajki ikaltsin Jehová para kiueyichiuati. Satepan oyajki ipalacio uan otlanauati makitlamakakan.
21 Itlakeualuan okitlajtlanijkej: “¿Tleka ijkon tikchiua? Ijkuak mokonetsin oyoltoka, amo otitlakuaya uan san otichokaya pero ijkuak omiki, otime uan otitlakua”.
22 Ye okinmilui: “Ijkuak nokonetsin oyoltoka, amo onitlakuaya uan san onichokaya porque onimokuayejyekouaya:* ‘Xamo Jehová nechiknomatis uan kikauilis nokonetsin mayolto’.
23 Axkan yomiki nokonetsin ikinon yinitlakuas, ¿kox uelis nikyolitis? Ne se tonal noijki nimikis pero axkan ne amo uelis nikyolitis”.
24 Ijkuakon David okiyolseuito Bat-Seba. Ye omotekak iuan Bat-Seba uan satepan okipixki ikone tlen okitokayotijkej Salomón.* Uan Jehová okitlasojtlaya.
25 Jehová okitlasojtlaya konetsintli ikinon okinauati Natán makitokayoti Jedidías.*
26 Joab okintlanili ammonitas, akinmej ochantiayaj Rába uan okimoaxkati non altepetl.
27 Joab okintitlanki sekimej tlakamej ijkin makiluitij David: “Onikintlanili akinmej chantij Rába uan onikmoaxkati altepetl kanin meya atl.
28 Xikinnechiko mosoldados uan xikinmixnamikiti akinmej ompa chantij uan xikmoaxkati altepetl. Ijkon amo ne nikmoaxkatis altepetl uan amo nechueyitlaliskej”.
29 David okinnechiko nochtin isoldados, okinmixnamikito akinmej chantij Rába, okinmikti uan okimoaxkati altepetl.
30 Ijkuakon David okikuakixtili icorona Malcam.* Non corona okatka de oro, etik kanaj 34 kilos,* okinpiaya temej* kuajkualtsitsintin uan okikuatlalilijkej David. Noijki okiuikak miak tlamantli tlen okitlankej.
31 David okinkixti akinmej ochantiayaj itech non altepetl uan okintlali makintekikan temej, matekipanokan ika tlatlamantli teposmej tlen tlatekij uan hachas, noijki okinnauati makichiuakan adobe. Ijkon okichi ika nochi inmialtepeuan ammonitas. Satepan David uan isoldados omokopkej Jerusalén.
Notas
^ Noso “borregos”.
^ Noso “oniknejneuilijka”.
^ Noso “onimonejneuiliaya”.
^ Noso “otlakatki”.
^ Noso “omosauaya”.
^ Noso “okinejneuili”.
^ Noso “omopakak”.
^ Noso “onimonejneuiliaya”.
^ Ika hebreo kijtosneki “yolseuilis”.
^ Kijtosneki “Jah okitlasojtlaya”.
^ Xikita diccionario.
^ Ika hebreo “se talento”. Se talento okipiaya 34.2 kilos. Xikita apéndice B14.
^ Noso “tepejximej”.
