Diccionario
A B C D E F G H I J K L M N O P Q R S T U X Y Z
A
Acaya.
Itech Escrituras Griegas Cristianas nin okatka se altepetl tlen opouiaya Roma uan okatka ik sur de Grecia. Altepetl Corinto okiyekanaya non altepetl (Hch 18:12).
Acuerdo, pacto.
Nin kijtosneki ijkuak sekimej moyekkauaj itlaj kichiuaskej noso ayakmo kichiuaskej. Ualeua non acuerdo kichiua toTajtsin Dios inuan akinmej chantij tlaltikpak noso ualeua kichiuaj san akinmej chantij tlaltikpak. Ualeua san sekimej moneki kichiuaskej non acuerdo, pero ualeua moneki nochtin kichiuaskej. Biblia kijtoua toTajtsin Dios okichi acuerdos inuan akinmej chantij tlaltikpak. Pero noijki kijtoua sekimej tlakamej, familias, altepemej uan miakej personas okichijkej acuerdos. Acuerdos tlen okachi inpati, toTajtsin Dios okichi iuan Abrahán, iuan David, iuan altepetl Israel (acuerdo tlen omochi ika Tlanauatil), iuan Israel tlen iaxka toTajtsin Dios (yankuik acuerdo) (Gé 9:11; 15:18; 21:27; Éx 24:7; 2Cr 21:7; Lu 22:29; Hch 3:25; 2Co 3:6; Heb 8:6).
Ajenjo.
Tlatlamantli xiuitl tlen sapanoua chichik uan uejka moijnekui. Itech Apocalipsis 8:11 non kijtosneki se tlamantli chichik tlen kipia veneno. Noijki kitokayotiaj absintio.
Akatl.
Akin kikajkayaua isiua noso inamik.
Akin kinchiua konmej.
Kijtosneki ikaj tlen kinchiua xoktsinmej ika sokitl, platos uan okseki tepalkamej. Ika hebreo nin tlajtoli kijtosneki ‘akin itlaj kichiua’. Akin kinchiua konmej kinejneki sokitl ken ye kineki uan ualeua nin kineskayotia ken Jehová kinnauatia akinmej chantij tlaltikpak (Is 64:8; Ro 9:21).
Akin kixnamiki Cristo.
Ika griego nin tlajtoli kijtosneki ome tlamantli. Se, tlen kixnamiki Cristo. Ome, akin mochiua ken Cristo pero amo melauak. Akin kixnamiki Cristo kijtosneki se persona noso miakej personas tlen kitlauelitaj Cristo uan kintlauelitaj idiscípulos. Noijki kijtouaj uitsej ipatka Cristo noso kijtouaj yejuan Mesías (1Jn 2:22).
Akinmej kikauaj toTajtsin Dios uan kixnamikij.
Nin tlajtoli ika griego kijtosneki ‘moxeloua’. Noijki uelis tikijtoskej ‘tekaua’ noso ‘teixnamiki’. Itech Escrituras Griegas Cristianas nin tlajtoli okachi monejneki ijkuak kijtoua akinmej kikauaj religión tlen melauak (Pr 11:9; Hch 21:21; 2Te 2:3).
Akinmej okipaleuiayaj Herodes.
Noijki okinmiluiayaj herodianos. Yejuan okinpaleuiayaj tekiuajkej tlen okinmiluiayaj Herodes pero okinyekanaya tekiua romano. Xamo sekimej saduceos inuan opouiayaj. Herodianos uan fariseos omopaleuijkej ijkuak okixnamikej Jesús (Mr 3:6).
Akinmej otlamachtiayaj tlanauatil.
Yejuan okinchiuayaj copias de Escrituras Hebreas. Ijkuak Jesús okatka tlaltikpak, yejuan kuali okixmatiayaj iTlanauatil Moisés pero okixnamikej Jesús (Esd 7:6; Mr 12:38, 39; 14:1).
Akin techpaleuia.
Akin tlapaleuia.
Alabastro.
Ijkon okintokayotiayaj tekontsitsintin kanin okitlaliayaj ajuiak. Nonmej tekontsitsintin okinchiuayaj ika tetl tlen okatka ik altepetl Alabastrón ompa Egipto. Tekontsitsintin okatkaj tenpitsauakej uan kuali okintsakuayaj para amo makisa ajuiak patio. Satepan ijkon okitokayotijkej tetl tlen ika okinchiuayaj (Mr 14:3).
Alfa uan Omega.
Alma.
Ika hebreo moijtoua néfesh uan ika griego moijtoua psykhḗ. Ijkuak tikitaj ken monejnekij ninmej tlajtolmej itech Biblia tikajsikamati kijtosneki 1) personas, 2) yolkamej noso 3) iyolilis se persona noso se yolkatl (Gé 1:20; 2:7; Nú 31:28; 1Pe 3:20, nota). Itech nin Biblia nonmej tlajtolmej tlatlamantli omotlajtolkopkej, kanaj omotlajtolkopki “yolilistli”, “yoltok”, “persona”, “nochi iyolilis” noso ualeua san moijtoua “ye”. Ualeua itech notas kajki tlajtoli alma. Ijkuak se versículo noso se nota kijtoua alma, moneki tikajsikamatiskej ijkon ken nikan kijtoua. Ijkuak Biblia kijtoua ikaj kichiua itlaj ika nochi ialma, kijtosneki kichiua ika nochi iyolilis noso ika nochi iyolo (Dt 6:5; Mt 22:37). Itech seki textos, nin tlajtoli kijtosneki tlen ikaj kiyoltilana noso tlen kineki kichiuas. Noijki kijtosneki icuerpo akin yoixpoliuik (Nú 6:6; Pr 23:2; Is 56:11; Ag 2:13).
Altar.
Non tlamantli okatka tepitsin uejkapan uan okichiuayaj ika tlali, tetl noso kouitl tlen ixko okipiaya tepostli. Ipan altar okintemakayaj yolkamej noso kopali uan ijkon okiueyichiuayaj toTajtsin Dios. Itech achto cuarto tlen okipiaya tabernáculo uan templo okatka se altar tsikitsin de oro kanin okitemakayaj kopali. Non altar okichijkej ika kouitl uan ixko okipiaya oro. Kiauak okatka se altar de cobre okachi ueyi uan ompa okintlatiayaj yolkamej tlen okintemakayaj. Akinmej okinueyichiuayaj oksekimej dioses noijki okinpiayaj altares (Éx 39:38, 39; 1Re 6:20; Mt 5:23, 24; Lu 1:11; Hch 17:23).
Amén.
Nin tlajtoli kijtosneki ‘ijkon mamochiua’ noso ‘melauak’. Kisa itech tlajtoli hebreo ʼamán uan kijtosneki ‘mochiua’ noso ‘uelis tikneltokaskej’. Yiuejkika ijkon okijtouayaj para kiteititiskiaj kuali okitayaj tlen okijtouayaj noso kuali okitayaj ijkuak omotlatlaujtiayaj. Apocalipsis ijkon kitokayotia Jesús (Dt 27:26; 1Cr 16:36; Ro 1:25; Ap 3:14).
Amo otlakuayaj.
Yiuejkika kanaj keski tonal amitlaj okikuayaj. Israelitas amo otlakuayaj para makintlapojpolui toTajtsin Dios. Noijki amo otlakuayaj ijkuak otlajyouiayaj uan ijkuak okinekiayaj makinyekana toTajtsin Dios. Sejse xiuitl judíos naui uelta amo otlakuayaj para kilnamikiskiaj tlen amo kuali okinpanok. Axkan akinmej kichiuaj ken Cristo ayakmo moneki ijkon kichiuaskej (Esd 8:21; Is 58:6; Mt 4:2; 9:14; Lu 18:12; Hch 13:2, 3; 27:9).
Ángel.
Ika hebreo moijtoua malʼákh uan ika griego moijtoua ágguelos. Nonmej tlajtolmej kijtosnekij ‘akin itlaj kitematiltia’, pero kitlajtolkopaj ken tlajtoli “ángel” ijkuak kijtoua espíritus itlaj kitematiltiaj (Gé 16:7; 32:3; Snt 2:25; Ap 22:8). Ángeles yejuan espíritus chikauakej uan toTajtsin Dios okinchijchi ijkuak ayamo okinchijchiuaya akinmej chantij tlaltikpak. Biblia noijki kintokayotia ‘miles de ángeles’, “ikoneuan toTajtsin Dios” uan “sitlalimej tlen kisaj kualkan” (Dt 33:2; Job 1:6; 38:7; Jud 14). ToTajtsin Dios amo okinchijchi para makinpiakan inkoneuan porque ye sejse okinchijchi. Katej kanaj cien millones de ángeles (Da 7:10). Biblia kijtoua yejuan kipiaj intoka uan tlatlamantli inyelis. Pero yejuan amo kinekij makinueyichiuakan porque yolyamankej uan miakej amo kijtouaj intoka (Gé 32:29; Lu 1:26; Ap 22:8, 9). Sekimej okachi ueyititokej uan kichiuaj tlatlamantli tekitl. Sekimej tekipanouaj ixpan itrono Jehová, sekimej kitematiltiaj tlen ye kijtoua, sekimej kinpaleuiaj akinmej kitekichiuiliaj Jehová nikan tlaltikpak, sekimej tetlajyouiltiaj ipatka toTajtsin Dios uan sekimej tlapaleuiaj mamotematilti kuali tlajtoli (2Re 19:35; Sl 34:7; Mt 4:11; Lu 1:30, 31; Ap 5:11; 14:6). Itech Armagedón yejuan kipaleuiskej Jesús para kimomakaskej (Ap 19:14, 15).
Apóstol.
Arameo.
Nin tlajtoli mokaki ken tlajtoli hebreo. Arameo uan hebreo kinejnekij san se abecedario. Achto san arameos otlajtouayaj arameo pero satepan ijkon opejki tlajtouaj akinmej otlasemanayaj. Noijki ijkon opejki tlajtouaj akinmej ochantiayaj Asiria, Babilonia uan Persia (Esd 4:7). Tlen ijkuilitok itech Esdras, Jeremías uan Daniel seki omoijkuilo ika arameo. Seki tlajtoli ika arameo ijkuilitok itech Escrituras Griegas Cristianas (Esd 4:8-6:18; 7:12-26; Jer 10:11; Da 2:4b-7:28: Mr 14:36; Hch 9:36).
Arca tlen ika omochi acuerdo.
Non se caja tlen okichijkej ika kouitl acacia uan ixko okipiaya oro. Non caja okitlatiayaj kanin Santísimo itech tabernáculo. Satepan okitlatiayaj kanin Santísimo itech templo tlen okichi Salomón. Tlen ika otentsaktoka okatka de oro uan okinpiaya ome querubines tlen omoixnamiktokaj. Ijtik non caja okatkaj ome temej kanin oijkuilitokaj majtlaktli tlanauatilmej (Dt 31:26; 1Re 6:19; Heb 9:4).
Arcángel.
Areópago.
Non kijtosneki se tepetsintli tlen kajki Atenas ik Acrópolis. Noijki ijkon okintokayotiayaj akinmej ompa omonechikouayaj uan otlaixkomakayaj. Se tonal sekimej ixtlamatkej tlen okinmiluiayaj epicúreos uan estoicos okiuikakej Pablo itech Areópago para makijto tlen okineltokaya (Hch 17:19).
Armagedón.
Nin tlajtoli kisa itech tlajtoli hebreo Har Meghiddóhn uan kijtosneki ‘tepetl Meguidó’. Armagedón mouika iuan guerra tlen mochiuas itech iueyi tonal toTajtsin Dios tlen kipia nochi chikaualistli. Ijkuakon monechikoskej tekiuajkej tlen katej ipan nochi tlaltikpak para kimomakaskej iuan Jehová (Ap 16:14, 16; 19:11-21). Xikita kanin kijtoua UEYI TLAJYOUILISTLI.
Asia.
Itech Escrituras Griegas Cristianas ijkon okitokayotiayaj se altepetl tlen opouiaya Roma. Itech non altepetl okatkaj seki altepemej tlen axkan pouij Turquía uan islas ken Samos uan Patmos. Altepetl Éfeso okiyekanaya Asia (Hch 20:16; Ap 1:4).
Auilnemi.
Ika griego moijtoua pornéia. Nin tlajtoli kijtosneki tlatlamantli auilnemilistli tlen amo kipaktia toTajtsin Dios. Kijtosneki akinmej kikajkayauaj insiua noso innamik, akinmej monemakaj, akinmej san sekan motekaj pero amo monamiktiaj, tlakamej tlen motekaj inuan tlakamej, siuamej tlen motekaj inuan siuamej uan akinmej motekaj inuan yolkamej. Apocalipsis kijtoua se siuatl monemaka uan kineltoka miak tlamantli. Ye kixmatij ken “Ueyi Babilonia” uan kijtosneki mouikaj inuan tekiuajkej para makiueyitlalikan uan makimakakan miak tlamantli (Ap 14:8; 17:2; 18:3; Mt 5:32; Hch 15:29; Gál 5:19). Xikita kanin kijtoua SIUATL TLEN MONEMAKA.
B
Baal.
Cananeos okiueyichiuayaj non dios. Non dios okitayaj ken iaxka iluikak, akin kichiua makiaui, matlatlaki uan mamomiaktilikan yolkamej. Noijki ijkon okintokayotiayaj dioses tlen amo okachi inpati. Ika hebreo non tlajtoli kijtosneki ‘teko’ (1Re 18:21; Ro 11:4).
Belcebú.
Ijkon kitokayotiaj Satanás. Ye kinyekana ejekamej. Xamo nin tlajtoli kisa itech tlajtoli Baal-Zebub. Ye okatka Baal tlen okiueyichiuayaj filisteos ompa Ecrón (2Re 1:3; Mt 12:24).
C
Caldea.
Nin se altepetl tlen okatka itlajko aueyatl Tigris uan aueyatl Éufrates. Yiuejkika ompa okachi oueyititoka altepetl Ur kanin oneski Abrahán (Hch 7:4).
Carreta.
César.
Nin tlajtoli okatka se apellido romano uan satepan ijkon okinmiluiayaj akinmej otlanauatiayaj Roma. Biblia kijtoua intoka miakej tekiuajkej ken Augusto, Tiberio uan Claudio. Nerón noijki kinotsaj ika non tlajtoli maski amo moijtoua itoka. Itech Escrituras Griegas Cristianas tlajtoli César noijki kijtosneki akinmej tlanauatiaj itech se altepetl (Mr 12:17; Hch 25:12).
Circuncisión.
Nin okinchiuiliayaj tlakamej ijkuak okintekiliayaj tepitsin tlen ika kimilitok intlakayo. Abrahán uan ixuiuan omonekiaya kimochiuiliskej circuncisión, pero akinmej kichiuaj ken Cristo ayakmo moneki kimochiuiliskej. Kanaj kanin ijkuilitok nin tlajtoli san itlaj kineskayotia (Gé 17:10; 1Co 7:19; Flp 3:3).
Cristiano.
ToTajtsin Dios ijkon okintokayoti idiscípulos Jesucristo (Hch 11:26; 26:28).
Cristo.
D
Decápolis.
Nin tlajtoli kijtosneki seki altepemej tlen okichiuayaj ken griegos. Achto nonmej altepemej okatkaj majtlaktli (ika griego tlajtoli déka kijtosneki majtlaktli uan pólis kijtosneki altepetl). Noijki ijkon okitokayotiayaj ik kanin kisa tonaltsin itempa mar Galilea uan aueyatl Jordán. Ompa okatkaj miakej altepemej. Itech nonmej altepemej otlanemakayaj uan okinpiayaj costumbres ken griegos. Jesús ik ompa opanok pero amo kanaj kijtoua kox ouia itech se altepetl tlen ompa opouiaya (Mt 4:25; Mr 5:20).
Denario.
Diablo.
Itech Escrituras Griegas Cristianas ijkon kinotsaj Satanás. Non tlajtoli kijtosneki ‘ikaj kiteneua okse para amo kuali makitakan’. Satanás kinotsaj Diablo porque ye okachi kiteneua Jehová para amo kuali makitakan. Noijki san tlakajkayaua, kixnamiki tlen toTajtsin Dios kijtoua uan kichiua amo makitlakaitakan itoka (Mt 4:1; Jn 8:44; Ap 12:9).
Diezmo.
Nin kijtosneki se majtlaktli parte tlen okitemakayaj ijkuak otlaueyichiuayaj (Mal 3:10; Dt 26:12; Mt 23:23; Heb 7:5). Sejse xiuitl levitas okiseliayaj se majtlaktli parte tlen otlakiaya uan se majtlaktli parte yolkamej, porque ijkon okijtouaya iTlanauatil Moisés uan ijkon yejuan kipiaskiaj tlen ika mopanoltiskej. Levitas noijki okixelouayaj se majtlaktli parte tlen okiseliayaj para ika mopanoltiskiaj teopixkej tlen okatkaj ixuiuan Aarón. Pero noijki okatka tlatlamantli diezmo. Axkan akinmej kichiuaj ken Cristo amo moneki kitemakaskej diezmo.
Dracma.
Itech Escrituras Griegas Cristianas kijtosneki se tomin de plata tlen okinejnekiayaj griegos. Yiuejkika non tomin okatka etik 3.4 gramos (Mt 17:24).
E
Ejekatl.
Kijtosneki se espíritu amo yolkuali tlen amo mota uan okachi chikauak amo ken tlakamej. Itech Génesis 6:2 kijtoua yejuan “ikoneuan akin melauak toTajtsin Dios” uan itech Judas 6 kijtoua yejuan “ángeles”. Ijkuak toTajtsin Dios okinchijchi okatkaj yolkualmej, pero yejuan amo okitlakamatkej toTajtsin Dios ijkuak okatka Noé uan ijkon ayakmo iuan omouikakej. Yejuan okixnamikej Jehová ijkon ken okichi Satanás (Dt 32:17; Lu 8:30; Hch 16:16; Snt 2:19).
Epicúreos.
Ijkon okinmiluiayaj akinmej okichiuayaj ken ixtlamatki griego Epicuro (341-270 a.i.x. 1). Ye otlamachtiaya okachi ipati san timoyolpaktiskej (Hch 17:18).
Espíritu.
Ika hebreo tlajtoli rúaj uan ika griego tlajtoli pnéuma tlen ualeua motlajtolkopa ken “espíritu” kijtosneki miak tlamantli. Kijtosneki itlaj tlen amo mota uan kiteititia chikaualistli tlen molinia. Ika hebreo uan griego ualeua kijtosneki 1) ejekatl, 2) chikaualistli tlen kichiua mayoltokan personas uan yolkamej, 3) tlen kiyolinia se persona itlaj makichiua noso makijto, 4) tlen kitematiltiaj akinmej amo motaj, 5) espíritus tlen amo motaj uan 6) ichikaualis toTajtsin Dios noso espíritu santo (Éx 35:21; Sl 104:29; Mt 12:43; Lu 11:13).
Espíritu santo.
Estoicos.
Sekimej ixtlamatkej griegos tlen okineltokayaj moneki kuali timokuayejyekoskej para tipakiskej uan moneki tikajsikamatiskej tlen toTajtsin Dios okichijchi. Yejuan okineltokayaj akin ixtlamatki amo kitekipachoua tlen techtlajyouiltia noso tlen techyolpaktia (Hch 17:18).
Éufrates.
Nin okatka se aueyatl tlen okachi ueyi uan okachi ipati ik sur ompa Asia ik kanin motlatia tonaltsin. Ome aueyamej tlen katej Mesopotamia nin se tlen okachi ipati. Nin aueyatl achto moijtoua itech Génesis 2:14 uan poui inuan naui aueyamej tlen okatkaj Edén. Noijki kiluiaj “Aueyatl” (Gé 31:21). Itech non aueyatl otlamiaya tlali tlen okinmakakej israelitas ik norte (Gé 15:18; Ap 9:14; 16:12).
F
Faraón.
Fariseos.
Itech achto siglo judíos okipiayaj se religión miak ipati tlen ijkon omotokayotiaya. Yejuan amo okatkaj teopixkej pero okitlakamatiayaj nochi tlen okijtouaya iTlanauatil Moisés uan nochi tlen okinmachtijkej inuejkatatajuan (Mt 23:23). Yejuan okixnamikiayaj tlen okichiuayaj griegos. Noijki okinnauatiayaj oksekimej porque kuali okixmatiayaj iTlanauatil Moisés uan kuali okimatiayaj tlen okinmachtijkej (Mt 23:2-6). Sekimej opouiayaj itech Sanedrín. Noijki okiteneuayaj Jesús porque amo okitlakaitaya tonal sábado, porque amo okichiuaya tlen otlamachtijkej inuejkatatajuan uan porque omouikaya inuan tominololojkej uan akinmej otlajtlakolchiuayaj. Sekimej fariseos omochijkej cristianos ijkon ken okichi Saulo tlen oualaya Tarso (Mt 9:11; 12:14; Mr 7:5; Lu 6:2; Hch 26:5).
G
Gehena.
Ika griego ijkon okitokayotiayaj ixtlauak Hinón tlen okatka ik sur uan ik kanin motlatia tonaltsin itech altepetl Jerusalén tlen yiuejkika okatka (Jer 7:31). Gehena okatka itempa altepetl uan ompa okitlatiayaj tlajsoli. Profecías kijtouaj non ixtlauak kineskayotia kanin kintlamotlaskej akinmej yoixpolikej (Jer 7:32; 19:6). Amo kanaj kijtoua kox itech Gehena okintlamotlayaj personas noso yolkamej para kintlatiskej noso kintlajyouiltiskej. Ikinon Gehena amo kijtosneki kanin nochipa tlatlatokej personas uan amo mota. Jesús uan idiscípulos okijtojkej tlajtoli Gehena para kineskayotiskej tlajyouilistli tlen kinotsaj “ojpa mikilistli”. Non kijtosneki sepa ixpoliuiskej (Ap 20:14; Mt 5:22; 10:28).
Griego.
Nin kijtosneki intlajtol akinmej chantij Grecia. Noijki ijkon kinmiluiaj akinmej oneskej Grecia noso akinmej pouij itech se familia tlen ompa oneskej. Itech Escrituras Griegas Cristianas nin tlajtoli noijki kijtosneki akinmej amo judíos noso akinmej okichiuayaj uan otlajtouayaj ken griegos (Joe 3:6; Jn 12:20).
H
Hades.
Nin tlajtoli kajki ika griego uan ika hebreo moijtoua “Seol”. Motlajtolkopa ken “Mikatekochtli” uan letra tlen ika peua kajki ika mayúscula para kineskayotis kanin moseuijtokej akinmej yoixpolikej. Xikita kanin kijtoua MIKATEKOCHTLI.
Hebreo.
Ijkon okixmatiayaj Abrán (Abrahán) ijkuak ochantiaya ik kanin okatkaj amorreos. Satepan ijkon okinmiluiayaj ixuiuan Abrahán tlen okatkaj ikoneuan Jacob uan noijki tlajtoli tlen otlajtouayaj. Ijkuak Jesús okatka nikan tlaltikpak, akinmej otlajtouayaj hebreo yokinejnekiayaj miak tlajtoli ika arameo. Cristo uan idiscípulos otlajtouayaj hebreo (Gé 14:13; Éx 5:3; Hch 26:14).
Hermes.
Ye se dios griego tlen okatka ikone Zeus. Yiuejkika okineltokayaj ye okitematiltiaya tlen okijtouayaj dioses uan okineltokayaj ye okatka indios akinmej kuali otlajtouayaj. Ikinon ompa Listra okijtojkej Pablo okatka Hermes (Hch 14:12).
Herodes.
Nin kijtosneki inmiapellido akinmej okinnauatiayaj judíos tlen okintlaliayaj romanos. Herodes el Grande okixmatiayaj porque okiyektlali templo ompa Jerusalén. Noijki okixmatiayaj porque otlanauati makinmiktikan chokotsitsintin ijkuak okinekiaya kimiktis Jesús (Mt 2:16; Lu 1:5). Herodes Arquelao uan Herodes Antipas okatkaj ikoneuan Herodes el Grande. Yejuan okintlalijkej matlanauatikan itech tlatlamantli altepemej kanin otlanauatiaya inpapa (Mt 2:22). Antipas amo otlanauatiaya itech miakej altepemej pero okiluiayaj tekiua. Ye otlanauati eyi xiuitl uan tlajko ijkuak Jesús otetlapoui uan hasta ijkuak opanok tlen kijtoua Hechos capítulo 12 (Mr 6:14-17; Lu 3:1, 19, 20; 13:31, 32; 23:6-15; Hch 4:27; 13:1). Satepan iángel toTajtsin Dios okimikti Herodes Agripa I tlen okatka ixui Herodes el Grande uan amo miak xiuitl otlanauati (Hch 12:1-6, 18-23). Herodes Agripa II okatka ikone Herodes Agripa I. Ye okipatkayoti uan otlanauati hasta ijkuak judíos okixnamikej Roma (Hch 23:35; 25:13, 22-27; 26:1, 2, 19-32).
Hisopo.
Nin se kojtsintli tlen ixijyo uan imamayo amo uejueyij. Okinejnekiayaj para kitsitsikuitsaskej estli noso atl ijkuak omochipauayaj. Itech Biblia ika tlajtoli hebreo uan griego kijtosneki tlatlamantli kojtsitsintin. Hisopo tlen kijtoua Juan 19:29 xamo okatka se kojtsintli tlen uejkapan omoskaltiaya. Ijkon ueli okikixtijkej se tlakotl ueyak kanin okilpijkej se esponja tlen okipiaya vino xokok uan okitlalilijkej ikamak Jesús (Heb 9:19).
I
ICena toTeko.
Non cena kichiuaj ika pan tlen amo kipia levadura uan ika vino. Pan kineskayotia icuerpo Cristo uan vino kineskayotia ieso. Ijkon kilnamikij imikilis Jesús. Biblia kijtoua akinmej kichiuaj ken Cristo moneki kilnamikiskej non tonal, ikinon noijki kiluiaj Conmemoración (1Co 11:20, 23-26).
Ijkuak toTajtsin Dios tlaixkomakas.
Nin kijtosneki se tonal noso se tiempo ijkuak toTajtsin Dios kintlajtlanis tlen okichijkej sekimej personas, akinmej pouij itech altepemej noso nochtin akinmej chantij tlaltikpak. Ijkuakon xamo kinmixpoloskej akinmej yomoijto ixpoliuiskej. Pero ijkuak tlaixkomakaskej, oksekimej kinpaleuis mamomakixtikan uan nochipa mayoltokan. Jesucristo uan iapóstoles okijtojkej toTajtsin Dios kinmixkomakas akinmej yoltokej uan noijki akinmej yiuejkika oixpolikej (Mt 12:36).
Ijkuak yitlamis tlen axkan onka.
Nin kijtosneki se tiempo tlen tlamis ijkuak kipojpoloskej nochi tlen kiyekantok Satanás. Nin panoskia ijkuak Cristo yinikan yetoskia. Jesús kinyekanas ángeles para makinxelokan akinmej yolkualmej uan akinmej amo yolkualmej. Akinmej amo yolkualmej kinmixpoloskej (Mt 13:40-42, 49). Idiscípulos Jesús okinekiayaj kimatiskej keman tlamiskia tlen axkan onka (Mt 24:3). Ijkuak Jesús ayamo oyaya iluikak, okinmilui idiscípulos inuan yetos hasta ijkuak tlamis tlen axkan onka (Mt 28:20). Xikita kanin kijtoua TLEN AXKAN ONKA.
IKone David.
IKone Tlakatl.
Ikuakonuan altar.
Ilírico.
Non se altepetl tlen opouiaya Roma uan okatka ik Grecia. Pablo ompa oajsito ijkuak otetlapouiaya maski uejka okatka. Pero amo momati kox otetlapoui Ilírico noso san ompa oajsito (Ro 15:19).
Iluitl ijkuak okikuayaj pan tlen amo okipiaya levadura.
Iluitl ijkuak okinchiuayaj kaltsitsintin.
Non iluitl okichiuayaj tonal 15-21 metstli etanim porque itlamian xiuitl israelitas okololouayaj tlen otlakiaya ijkuak otlatokayaj. Ijkuakon sapanoua opakiayaj uan okitlasojkamatiliayaj Jehová porque okiteochiuaya tlen okitokayaj. Ijkuak oiluichiuayaj, israelitas ochantiayaj itech kaltsitsintin para kilnamikiskiaj ijkuak okiskej Egipto. Tlakamej omonekiaya yaskej Jerusalén para iluichiuaskiaj eyi uelta uan non se iluitl tlen okichiuayaj (Le 23:34; Esd 3:4; Jn 7:2).
Iluitl para kilnamikiskiaj ijkuak okiyektlalijkej templo.
Sejse xiuitl okilnamikiayaj ijkuak okichipajkej templo porque Antíoco Epífanes okisokioti. Non iluitl opeuaya tonal 25 metstli kislev uan ouejkauaya chikueyi tonal (Jn 10:22).
Imagen, dios.
Se imagen kijtosneki itlaj tlen oksekimej kiueyichiuaj uan kineskayotia itlaj tlen onka noso tlen amo onka. Sekimej kintlakaitaj dioses, kintlasojtlaj, kintekichiuiliaj uan kinueyichiuaj (Sl 115:4; Hch 17:16; 1Co 10:14).
Inpan okintlaliayaj inmauan.
Israel.
ToTajtsin Dios ijkon okitokayoti Jacob. Yiuejkika noijki ijkon okinmiluiayaj nochtin ixuiuan Jacob. Inmixuiuan 12 ikoneuan Jacob okinmiluiayaj ikoneuan Israel, akinmej chantij Israel, altepetl Israel, tlakamej tlen chantij Israel noso israelitas. Noijki okiluiayaj Israel tekiuajkayotl tlen okatka norte uan ompa opouiayaj majtlaktli familias. Non tekiuajkayotl uan tekiuajkayotl tlen okatka sur omoxelojkej. Satepan noijki ijkon okinmiluiayaj tlapejpenalmej “akinmej pouij itech Israel tlen iaxka toTajtsin Dios” (Gál 6:16; Gé 32:28; Hch 4:10; Ro 9:6).
ITekiuajkayo toTajtsin Dios.
Xikita kanin kijtoua TEKIUAJKAYOTL.
Itlaj santo tlen amo omomatiaya.
Itlaj yakauitstik.
Nin kijtosneki se tlakotl ueyak tlen iyakyo de tepostli uan uitstik. Akinmej tlatokaj kinejnekij non tlakotl para ika kinpejtiaskej yolkamej. Tlen kijtouaj ixtlamatkej yetoskia ken itlaj yakauitstik porque kinpaleuia oksekimej makichiuakan tlen kuali. Tlajtoli kitejteliksa itlaj yakauitstik kiteititia se toro iselti mokojkoua ijkuak amo kineki tetlakamatis uan kitejteliksa non tlakotl (Hch 26:14; Jue 3:31).
Itlamian tonalmej.
Itech profecías tlen kinpia Biblia ninmej tlajtolmej kijtosneki se tiempo ijkuak yitlamis seki tlamantli tlen panotok (Eze 38:16; Da 10:14; Hch 2:17). Non uelis panos kanaj seki xiuitl noso miak xiuitl ijkon ken kijtoua profecía tlen mochiuas. Itech Biblia tlajtoli itlamian tonalmej monejneki ijkuak kijtoua yitlamiskia tlen axkan onka uan non mochiuaskia ijkuak yinikan yetoskia Jesús maski amo motaskia (2Ti 3:1; Snt 5:3; 2Pe 3:3).
ITlanauatil Moisés.
J
Jacob.
Okatka inkone Isaac uan Rebeca. Satepan toTajtsin Dios okitokayoti Israel. Ye omochi tlayekanki itech altepetl Israel. Akinmej opouiayaj itech altepetl Israel achto okinmiluiayaj Israelitas uan satepan okinmiluiayaj judíos. Jacob okinpixki 12 ikoneuan. Yejuan uan inmixuiuan opouiayaj itech 12 familias tlen okatkaj itech altepetl Israel. Satepan altepetl Israel ok okiluiayaj Jacob (Gé 32:28; Mt 22:32).
Jehová.
Traducción del Nuevo Mundo kipia 237 veces itoka Jehová itech Escrituras Griegas Cristianas. Okitlalijkej itoka toTajtsin Dios porque:
1. Ijkuak okatkaj Jesús uan iapóstoles, itech Escrituras Hebreas oijkuilitoka Tetragrámaton kanin omonekiaya yetos. Tetragrámaton kijtosneki itoka toTajtsin Dios ika letras hebreas יהוה.
2. Ijkuak okatkaj Jesús uan iapóstoles, itech Escrituras Hebreas tlen okitlajtolkopkej ika griego noijki okipiaya Tetragrámaton.
3. Escrituras Griegas Cristianas kiteititia Jesús miak uelta okijto itoka toTajtsin Dios uan okitematilti (Jn 17:6, 11, 12, 26).
4. Escrituras Hebreas iaxka toTajtsin Dios uan noijki iaxka Escrituras Griegas Cristianas, ikinon amo uelis san ualpoliuis itoka toTajtsin Dios.
5. Itech Escrituras Griegas Cristianas kanaj san tlajko ijkuilitok itoka toTajtsin Dios (Ap 19:1, 3, 4, 6).
6. Libros tlen yiuejkika okinmijkuilojkej judíos kiteititiaj judíos tlen okichiuayaj ken Cristo okinejnekiayaj itoka toTajtsin Dios ijkuak otlajkuilouayaj.
7. Sekimej tlen momachtiaj Biblia kijtouaj itoka toTajtsin Dios okatka itech seki textos tlen katej itech Escrituras Griegas Cristianas uan kisaj itech Escrituras Hebreas.
8. Katej Biblias ika kanaj 100 tlatlamantli tlajtolmej uan kipiaj itoka toTajtsin Dios itech Escrituras Griegas Cristianas.
Tikitaj onka miak tlamantli tlen kiteititia moneki yetos itoka toTajtsin Dios Jehová itech Escrituras Griegas Cristianas. Akinmej okitlajtolkopkej Traducción del Nuevo Mundo okitlalijkej itoka toTajtsin Dios kanin moneki. Yejuan sapanoua kitlakaitaj itoka toTajtsin Dios uan amo kinekij kipojpoloskej nion se tlamantli tlen ijkuilitok (Ap 22:18, 19).
Judá.
Ye okatka inkone Jacob uan Lea. Ijkuak yiixpoliuiskia Jacob, okijto yetoskia se tekiua tlen tlanauatiskia miak xiuitl uan non tekiua yetoskia se ixui Judá. Jesús okatka ixui Judá ijkuak oneski ken se tlakatl. Noijki ijkon omotokayotiaya se familia uan satepan ijkon okitokayotijkej itekiuajkayo Judá (Gé 29:35; 49:10; Heb 7:14).
Judío.
Kijtosneki akin poui itech ifamilia Judá. Nin tlajtoli opejki monejneki ijkuak opojpoliuik tekiuajkayotl kanin opouiayaj majtlaktli ifamilias Israel (2Re 16:6). Ijkuak israelitas okinuikakej Babilonia uan omokopkej Israel, akinmej opouiayaj itech tlatlamantli familias ijkon okinnotsayaj (Esd 4:12). Satepan ijkon okinnotsayaj israelitas ipan nochi tlaltikpak para kinmixmatiskiaj (Est 3:6). Pablo okinejneki nin tlajtoli ijkuak okijto amo okachi ipati kanin inmialtepe akinmej pouij itech tlanechikol (Ro 2:28, 29; Gál 3:28).
K
Kanin mantok tlitl.
Nin tlajtoli san itlaj kineskayotia. Noijki kitokayotiaj “ojpa mikilistli”. Ompa kintlamotlaj akinmej tlajtlakolchiuaj uan amo moyolkopaj. Noijki ompa kintlamotlaskej Diablo, mikilistli uan Mikatekochtli noso Hades. Espíritus, mikilistli uan Mikatekochtli amo tlatlaj ijkuak ompa kintlamotlaj. Non kijtosneki sepa kinmixpoloskej uan amo nochipa tlajyouijtoskej (Ap 19:20; 20:14, 15; 21:8).
Kanin okipatskayaj uva.
Okatka ome tekochtli tlen okinchiuayaj ipan tetl. Se okatka okachi uejkapan uan okse okatka okachi tsikitsin kanin omonechikouaya iayo uva noso aceite. Itech tekochtli ueyi okipatskayaj uvas noso aceitunas. Kanin okipatskayaj uva noijki kineskayotia ijkuak tlaixkomakas toTajtsin Dios (Ap 19:15).
Kanin otetlapojpoluiayaj.
Nin kijtosneki tlen ika otentsaktoka arca tlen ika omochi acuerdo. Teopixki tlen otlayekanaya ompa okitsitsikuitsaya inmieso yolkamej tlen okitemakayaj para makintlapojpolui toTajtsin Dios. Ika hebreo nin tlajtoli kijtosneki ‘kipachoua tlajtlakoli’ noso ‘kipojpoloua tlajtlakoli’. Non tlamantli okatka de oro uan ipan okatkaj ome querubines. Nonmej querubines okatkaj tlanajnakastlan (Éx 25:17-22; 1Cr 28:11; Heb 9:5).
Kanin otlaixkomakayaj.
Ualeua ompa okatka tepitsin uejkapan uan amo otlatsaktoka. Akinmej ompa oyayaj otlejkouayaj itech escalones. Tekiuajkej ompa omotlaliayaj para kinmiluiskiaj oksekimej tlen kichiuaskiaj. Tlajtoli ‘tiyetoskej ixpan toTajtsin Dios para techixkomakas’ uan ‘tiyetoskej ixpan Cristo para techixkomakas’, kijtosneki tlen Jehová kichiuas para kinmixkomakas personas (Ro 14:10; 2Co 5:10; Jn 19:13).
Kanin tlauejkatlan.
Nin tlajtoli ika griego moijtoua ábyssos uan kijtosneki ‘sapanoua tlauejkatlan’, ‘amo kipia kanin tlami’ noso ‘amo tlami’. Itech Escrituras Griegas Cristianas nin tlajtoli kijtosneki kanin ikaj kajki uan amo ueli kisa noso amitlaj ueli kichiua. Xamo kijtosneki kanin toktokej akinmej yoixpolikej pero noijki kijtosneki okseki tlamantli (Lu 8:31; Ro 10:7; Ap 20:3).
Kipejpenaj.
Ika hebreo nin tlajtoli kijtosneki ‘kitlaliliaj aceite’, ‘kixauiliaj aceite’ noso ‘kinokiliaj aceite’. Yiuejkika okitlaliliayaj aceite se persona noso se tlamantli para kiteititiskiaj kipia se tekitl miak ipati. Itech Escrituras Griegas Cristianas nin tlajtoli noijki monejneki ijkuak kijtoua okinmakakej espíritu santo akinmej okinpejpenkej mayakan iluikak (Éx 28:41; 1Sa 16:13; Lu 4:18; Hch 10:38; 2Co 1:21).
Kiyolitiskej.
Nin kijtosneki oksepa kimakaskej iyolilis akin yoixpoliuik. Tlajtoli griego anástasis kijtosneki ‘keualtiaj’ noso ‘kajkokuij’. Biblia kijtoua chiknaui personas okinyolitijkej uan ompa poui Jesús porque Jehová okiyoliti. Elías, Eliseo, Jesús, Pedro uan Pablo okinyolitijkej oksekimej porque toTajtsin Dios okinmakak chikaualistli. Ipan tlaltikpak moneki kinyolitiskej “akinmej yolkualmej uan akinmej amo yolkualmej” para mochiuas tlen Jehová kineki (Hch 24:15). Biblia noijki kijtoua sekimej kinyolitiskej para yaskej iluikak uan yejuan “akinmej achto kinyolitiskej”. Nonmej ikniuan Jesús tlen okinpejpenkej ika espíritu santo (Flp 3:11; Ap 20:5, 6; Jn 5:28, 29; 11:25).
Kopali.
Nin tlamantli okichiuayaj ijkuak okinelouayaj itlaj ken aceite iuan iayo kouitl tlen ajuiak. Non tlamantli yolik otlatlaya uan okatka ajuiak. Itech tabernáculo uan itech templo okinejnekiayaj se kopali miak ipati tlen okichiuayaj ika naui tlamantli. Non kopali okitlatiayaj kualkan uan youak ipan altar kanin okitlatiayaj kopali tlen okatka kanin Santo. Ijkuak toTajtsin Dios otetlapojpoluiaya, kopali okitlatiayaj kanin Santísimo. Kopali kijtosneki ijkuak motlatlaujtiaj akinmej amo keman kikauaj toTajtsin Dios uan ye kinkaki. Akinmej kichiuaj ken Cristo amo moneki kitlatiskej kopali (Éx 30:34, 35; Le 16:13; Ap 5:8).
Kopali istak.
Non tlamantli okikixtiayaj itech kojmej uan itech xiuitl tlen uejka mijnekui. Ijkuak okitlatiayaj, kualtsin omijnekuiaya. Ika non kopali uan ika okseki tlamantli okichiuayaj kopali chipauak tlen okinejnekiayaj itech tabernáculo uan itech templo. Noijki okitlaliayaj ipan semillas tlen okitetliokoliayaj uan ipan pan tlen okitemakayaj ixpan toTajtsin Dios kanin Santo (Éx 30:34-36; Le 2:1; 24:7; Mt 2:11).
Kopalkaxitl.
Korredor tlen itoka Salomón.
Ijkuak okatka Jesús, non korredor okinpiaya miakej tlaketsalmej uan okatka ikiauak templo ik kanin kisa tonaltsin. Sekimej omokuayejyekouayaj non korredor opouiaya itech templo tlen okichi Salomón. Jesús ik ompa onejnenki ijkuak “oseuaya” uan ompa omonechikouayaj akinmej achto opejkej kichiuaj ken Cristo para kiueyichiuaskej toTajtsin Dios (Jn 10:22, 23; Hch 5:12).
Kouitl.
Akinmej okintlajtlakoltiayaj ompa okinpilouayaj. Itech seki altepemej okinejnekiayaj kouitl para kinmiktiskej oksekimej noso ompa okinpilouayaj ijkuak yomikej para makinpinauikan noso para kinnejmachtiskej oksekimej. Asirios okinmixmatiayaj porque amo oteiknomatiayaj itech guerras. Sekimej tlen okintsakuayaj okinkalakiliayaj se kouitl yakauitstik. Non kouitl okinkalakiliayaj inmijtik uan okisaya inmielpan. Pero intlanauatil judíos okijtouaya achto omonekiaya kinmiktiskej ika tetl noso ika okse tlamantli akinmej sapanoua otlajtlakolchiuayaj. Satepan okinpilouayaj itech kouitl para kinnejmachtiskej oksekimej. Ijkon okintoktiayaj akinmej otlauijuikaltiayaj, akinmej okinueyichiuayaj dioses noso akinmej okichiuayaj okseki tlamantli (Dt 21:22, 23; 2Sa 21:6, 9). Ualeua romanos san okinmilpiayaj itech kouitl akinmej okintlajtlakoltiayaj. Ompa omokauayaj miak tonal uan satepan oixpoliuiayaj porque otlajyouiayaj, oamikiayaj, oapismikiayaj noso otonaltlatlayaj. Ualeua akin okitlajtlakoltiayaj okintsoponiliayaj clavos itech imauan uan itech ikxiuan ijkuak okipilouayaj itech kouitl ijkon ken okitoktijkej Jesús (Lu 24:20; Jn 19:14-16; 20:25; Hch 2:23, 36). Ika griego moijtoua staurós uan kijtosneki se kouitl melaktik ken kouitl kanin okipilojkej Jesús. Amitlaj kiteititia kox nin tlajtoli kijtosneki se cruz tlen miakej okiueyichiuayaj ijkuak ayamo okatka Cristo. Nin tlajtoli noijki kijtosneki ijkuak ikaj kitlajyouiltiaj noso kipinauiaj porque kichiua ken Cristo (Mt 16:24; Heb 12:2).
Kouitl tlen kitemaka yolilistli.
Non kouitl okatka itech xochitlali Edén. Biblia amo kijtoua kox itlakilo okipiaya itlaj ipati tlen okichiuaya mayoltokan. Non kouitl okineskayotiaya toTajtsin Dios kinmakaskia yolilistli tlen amo keman tlamis akinmej kinkauiliskia makikuakan itlakilo. Itech Apocalipsis nin tlajtoli kijtosneki toTajtsin Dios kichiuas nochipa matiyoltokan (Gé 2:9; 3:22; Ap 2:7; 22:19).
Kuali tlajtoli.
Kuetlaxtekomatl.
Non tlamantli okichiuayaj ika inmieuayo yolkamej ken tentsomej noso ichkamej, uan ijtik okitlaliayaj vino noso okseki tlamantli. Ijkuak vino mochikauilia, ijyotemi tlen ijtik kitlaliaj uan toponisneki. Ikinon okitlaliayaj ijtik kuetlaxtekonmej yankuikej tlen uejueyij omochiuayaj. Pero tla okitlaliayaj ijtik kuetlaxtekonmej tlen yotlajtlankej, otsojtsomoniayaj porque otlakuauayaj (Jos 9:4; Mt 9:17).
Kuetlaxtli kanin otlajkuilouayaj.
Non tlamantli okatka ieuayo ichka, tentso noso toro uan ipan otlajkuilouayaj. Non kuetlaxtli okachi ouejkauaya amo ken papiro uan okinejnekiayaj para kinchiuaskej rollos kanin oijkuilitoka Biblia. Kuetlaxtin tlen Pablo okintlajtlanili Timoteo xamo ompa oijkuilitoka seki tlamantli tlen kijtoua Escrituras Hebreas. Seki Rollos tlen okinmajsikej itech mar Muerto okatkaj de kuetlaxtli (2Ti 4:13).
L
Leptón.
Levadura.
Leví.
Ye okatka inkone Jacob uan Lea. Noijki ijkon okitokayotiayaj se familia. Eyi grupos levitas tlen otlayekanayaj okiskej itech eyi ikoneuan Leví. Ualeua tlajtoli levitas kijtosneki nochi familia pero amo nochipa ompa poui ifamilia Aarón tlen okatkaj teopixkej. Ifamilia Leví amo okimakakej seki tlali tlen toTajtsin Dios okinmilui israelitas kinmakaskia. Okinmakakej 48 altepemej kanin otlamiaya intlal okseki familias (Dt 10:8; 1Cr 6:1; Heb 7:11).
M
Macedonia.
Nin se altepetl tlen okatka ik norte ompa Grecia uan miakej okixmatkej ijkuak otlanauatiaya Alejandro Magno. Non altepetl amo opouiaya inuan okseki altepemej hasta ijkuak okimoaxkatijkej romanos. Non altepetl opouiaya Roma ijkuak apóstol Pablo achto otetlajpaloto Europa. Pablo eyi uelta otetlajpaloto Macedonia (Hch 16:9).
Maná.
Non tlen okachi okikuayaj israelitas ijkuak okatkaj 40 xiuitl kanin tlauaki. Jehová okiualtitlaniaya non maná uan nochi kualkan okatka ipan tlali itlampa ajuachtli. San tonal sábado amo okatka. Ijkuak israelitas yikin okitakej okijtojkej: “¿Tlen non?” uan ika hebreo moijtoua: “¿Man huʼ?” (Éx 16:13-15, 35). Jesús noijki okinejneki tlajtoli maná ijkuak itlaj okineskayoti (Jn 6:49, 50).
Media.
Nin altepetl okiski itech se ikone Jafet tlen omotokayotiaya Madái. Akinmej opouiayaj itech non altepetl okinmiluiayaj medos uan yejuan ochantitoj itech tepetl iraní. Itech pentecostés xiuitl 33 ompa Jerusalén, okatkaj sekimej tlen oualayaj Media (Hch 2:9).
Mesías.
Nin tlajtoli kisa itech tlajtoli hebreo uan kijtosneki “tlapejpenali”. Ika griego moijtoua Cristo (Da 9:25; Jn 1:41).
Mikatekochtli.
Ualeua kijtosneki kanin ikaj toktok. Noijki kijtosneki kanin nochtin toktokej uan ika hebreo moijtoua Seol uan ika griego moijtoua Hades. Ijkuak Biblia kijtoua Mikatekochtli, san itlaj kineskayotia uan ualeua kineskayotia kanin tlami nochi uan amitlaj kimatij (Ge 35:20; Ec 9:10; Mt 27:61; Hch 2:31). Tlajtoli griego mnēméion, noijki motlajtolkopa ken Mikatekochtli uan kisa itech se tlajtoli tlen kijtosneki “kilnamiki”. Non tlajtoli kiteititia kilnamikij akin yoixpoliuik (Jn 5:28, 29, nota).
Mirra.
Nin kijtosneki iayo kouitl uitsyo tlen ajuiak. Aceite tlen ika okinpejpenayaj oksekimej okipiaya mirra. Non ika okajuialiayaj tlakemitl uan camas. Noijki okinelouayaj ika aceites para tepachoskej uan para kinchiuaskej cremas. Okinelouayaj ika vino uan okoniayaj para amitlaj kimachiliskiaj. Noijki okinejnekiayaj para kinyektlaliskiaj cuerpos tlen okintokayaj (Éx 30:23; Pr 7:17; Mr 15:23; Jn 19:39).
Moapolaktia.
Moloc.
Ye okatka indios ammonitas. Xamo kijtosneki ye Malcam, Milcom noso Mólek (Hch 7:43).
Motlatlanij.
Yiuejkika ijkon okichiuayaj ijkuak okipejpenayaj tlen kichiuaskej. Okinkalakiayaj tetsitsintin noso kojtsitsintin ijtik ibolsa intlaken noso ijtik okse tlamantli uan satepan okitsetselouayaj. Tlen achto okisaya noso okikixtiayaj okiteititiaya tlen omonekiaya kichiuaskej. Ijkon okichiuayaj ijkuak yomotlatlaujtijkej (Mt 27:35; Hch 1:26).
Moyolkopa.
N
Nardo.
Nin kijtosneki aceite ajuiak, chichiltik uan patio. Non aceite okikixtiayaj itech xiuitl tlen itoka espicanardo (Nardostachys jatamansi). Okatka sapanoua patio, ikinon ualeua okinelouayaj iuan okseki aceites tlen amo okachi patio uan okichiuayaj okse aceite tlen amo melauak nardo. Marcos uan Juan okijtojkej aceite tlen okitlalilijkej Jesús okatka de nardo uan amitlaj iuan onelitoka (Mr 14:3; Jn 12:3).
Naualotl.
Sekimej kineltokaj ok yoltokej akinmej yoixpolikej uan motlapouiaj inuan akinmej yoltokej. Ualeua kintlakeuaj tetlajchiuijkej porque kinkauiliaj makinyekanakan. Tlajtoli “naualotl” ika griego moijtoua farmakía uan kijtosneki ‘kinejnekij drogas’. Non tlajtoli opejki kinejnekij iuan tlajtoli naualotl, porque yiuejkika okinejnekiayaj drogas ijkuak okinmiluiayaj ejekamej makinmakakan chikaualistli para tetlajchiuiskej (Gál 5:20; Ap 21:8).
Nazareno.
Nisán.
Ijkon okitokayotijkej metstli abib satepan ijkuak israelitas okinuikakej Babilonia. Non metstli ika opeuaya incalendario judíos tlen toTajtsin Dios okitlali uan okatka metstli chikome itech calendario tlen nochipa okinejnekiayaj. Opeuaya tlajko marzo uan otlamiaya tlajko abril (Ne 2:1). Judíos okichiuayaj Pascua tonal 14 mestli Nisán uan Jesucristo noijki non tonal okichi iCena toTeko (Lu 22:15, 19, 20). Noijki non tonal okimiktijkej itech kouitl (Lu 23:44-46).
Noko.
Nin kijtosneki itlaj tlen okimotlaliliayaj inmiajkolpan personas uan inajnakastlan itlaj okipilouayaj. Noijki kijtosneki kouitl tlen okintlaliliayaj inkechtla ome yolkamej para kitilanaskej se arado noso se carreta. Tlakeualmej okinejnekiayaj para kiuikaskej itlaj etik. Ikinon non kouitl okineskayotiaya akinmej okatkaj tlakeualmej uan okintlajyouiltiayaj. Tlajtoli okachiuayaj inko noso okipostekiayaj inko okijtosnekiaya ayakmo okatkaj tlakeualmej uan ayakmo okintlajyouiltiayaj (Le 26:13; Mt 11:29, 30).
O
Ojtli.
Itech Biblia nin tlajtoli kijtosneki tlen tikchiuaj uan kiteititia kox kipaktia Jehová noso amo. Idiscípulos Jesucristo okinmiluiayaj opouiayaj itech “Ojtli tlen melauak” porque okineltokayaj Jesucristo uan okichiuayaj ijkon ken ye (Hch 19:9).
Okinuitekiayaj ika mekatl.
Itech Escrituras Griegas Cristianas ninmej tlajtolmej kijtosneki ijkuak otetlajyouiltiayaj uan oteuitekiayaj ika mekatl tlen oyakailpitoka noso okipiayaj itlaj yakauitstik (Jn 19:1).
Okitemakak itlajtol.
Nin kijtosneki okiluiayaj toTajtsin Dios itlaj kichiuaskej, kitemakaskiaj se tetliokolil, kitekichiuiliskiaj noso amo kichiuaskiaj seki tlamantli tlen uelis kichiuaskiaj. Noijki kijtosneki itlaj okijtouayaj para kiteititiskiaj itlaj melauak, noso ikaj okijtouaya itlaj kichiuas noso amo kichiuas. Miak uelta okitemakayaj intlajtol ixpan ikaj ueyititok uan okachi ijkon okichiuayaj ixpan toTajtsin Dios. Jehová okiteititi melauak mochiuaskia acuerdo tlen okichi iuan Abrahán ijkuak okitemakak itlajtol (Mt 5:33; Ge 14:22; Heb 6:16, 17).
Okitlaxtla.
Nin kijtosneki ijkuak itlaj motemaka para ikaj makimakixtikan, para amo makitlajyouiltikan, para amo makitlajtlakoltikan noso para amo makichiua itlaj tlen moneki. Pero amo nochipa okitlaxtlauayaj ika tomin (Is 43:3). Omonekiaya kitlaxtlauaskej ijkuak opanouaya miak tlamantli. Itech altepetl Israel, chokotsitsintin tlen achto onesiayaj uan yolkamej okichtin tlen achto onesiayaj okatkaj iaxkauan Jehová uan san ye okijtouaya tlen kichiuaskiaj. Ikinon omonekiaya kitlaxtlauaskej para kinmakixtiskiaj (Nú 3:45, 46; 18:15, 16). Tla se toro ikaj okimiktiaya porque otlateuiaya uan amo okimaluiayaj, iteko omonekiaya kitlaxtlauas para amo makimiktikan (Éx 21:29, 30). Pero amo okiseliayaj tlen okitlaxtlauaya akin otemiktiaya san porque okinekiaya (Nú 35:31). Biblia kijtoua tlen okachi ipati omotlaxtla, ye ijkuak Cristo okitemakak iyolilis para kintlaxtlauas akinmej tetlakamatij uan kinmakixtis imak tlajtlakoli uan mikilistli (Sl 49:7, 8; Mt 20:28; Ef 1:7).
P
Palani inakayo, lepra.
Pan tlen okitemakayaj ixpan toTajtsin Dios.
Non pan okitlaliayaj ipan se mesa tlen okatka kanin Santo itech Tabernáculo uan itech templo. Okatka 12 pan, sekan onepanitoka chikuase uan oksekan onepanitoka ok chikuase. Noijki okiluiayaj “pan tlen nepanitok” noso “pan tlen okitemakayaj”. Nochi sábados okipatlayaj non pan tlen okimakayaj toTajtsin Dios uan okitlaliayaj yankuik pan. San teopixkej ueli okikuayaj pan tlen okipatlayaj (2Cr 2:4; Éx 25:30; Le 24:5-9; Mt 12:4; Heb 9:2).
Pascua.
Nin se iluitl tlen okichiuayaj sejse xiuitl para kilnamikiskiaj ijkuak israelitas okiskej Egipto. Okichiuayaj tonal 14 metstli abib (satepan non metstli okiluiayaj nisán). Ijkuakon okimiktiayaj se ichka noso se tentso uan okitliuatsayaj. Satepan okikuayaj iuan kilitl tlen chichik uan pan tlen amo okipiaya levadura (Éx 12:27; Jn 6:4; 1Co 5:7).
Pentecostés.
Itech altepetl Jerusalén nochtin tlakamej judíos omonekiaya kichiuaskej eyi uejueyij iluimej uan non iluitl ompa opouiaya. Itech Escrituras Griegas Cristianas non iluitl kitokayotiaj Pentecostés, pero itech Escrituras Hebreas kitokayotiaj iluitl ijkuak okololouayaj tlen okitokayaj noso iluitl tlen itoka Semanas. Tlajtoli Pentecostés kijtosneki ‘tonal cincuenta’. Oiluichiuayaj 50 tonal satepan ijkuak opanouaya tonal 16 metstli nisán (Éx 23:16; 34:22; Hch 2:1).
Profecía.
Kijtosneki tlen toTajtsin Dios kitematiltia, tlen moteititia noso ijkuak oksekimej kitematiltiaj tlen kineki toTajtsin Dios. Profecías uelis kijtoskej ken moneki tikpiaskej tonemilis, tlen moneki tikchiuaskej, ken tlaixkomaka toTajtsin Dios noso tlen panos satepan (Mt 13:14; 2Pe 1:20, 21).
Q
Querubín.
R
Rollo.
Non okatka se amatl ueyak tlen okichiuayaj ika kuetlaxtli noso papiro. Se lado ipan otlajkuilouayaj uan okitetsilouayaj ika se kouitl. ITlajtol toTajtsin Dios okijkuilojkej itech rollos uan noijki okinchijkej copias. Yiuejkika ijkuak okijkuilojkej Biblia ijkon okinchiuayaj libros (Lu 4:17-20; 2Ti 4:13).
S
Sábado.
Biblia kijtoua nochi semanas judíos omoseuiayaj non tonal uan axkan non tonal noijki moixmati ken sabbat. Non tlajtoli kisa itech hebreo uan kijtosneki ‘moseuiaj’ noso ‘amitlaj kichiuaj’. Sábado okatka tonal chikome itech insemana judios. Non tonal opeuaya viernes ijkuak yomotlati tonaltsin uan otlamiaya sábado ijkuak yomotlati tonaltsin. Tonal sábado amo omonekiaya itlaj kichiuaskej, san teopixkej uelis tekipanoskiaj templo. Noijki okitayaj ken sábado okseki tonal ijkuak oiluichiuayaj itech se xiuitl. Noijki ijkon okitayaj xiuitl chikome uan xiuitl 50. Itech xiuitl tlen okatka ken tonal sábado, amo otlatokayaj uan hebreos amo omonekiaya kitlaxtlauaskej tlen okiteuikiliayaj. Tlen okijtouaya iTlanauatil Moisés makichiuakan tonal sábado amo oui okatka, pero akinmej otlayekanayaj itech religiones okijtouayaj makichiuakan okseki tlamantli. Ikinon ijkuak okatka Jesús, oui okatka kichiuaskej nochi tlen yejuan okijtouayaj (Éx 20:8; Le 25:4; Lu 13:14-16; Col 2:16).
Saduceos.
Judíos okipiayaj se religión miak ipati tlen ijkon omotokayotiaya. Ompa opouiayaj akinmej oueyititokaj tlen okipiayaj miak tomin uan teopixkej tlen otlanauatiayaj itech templo. Saduceos okixtopeuayaj tlen fariseos okinmachtijkej inuejkatatajuan. Noijki okixtopeuayaj seki tlamantli tlen okineltokayaj. Yejuan amo okineltokayaj kinyolitiskej akinmej yoixpolikej nion amo okineltokayaj katej ángeles. Noijki okixnamikej Jesús (Mt 16:1; Hch 23:8).
Salmo.
Nin kijtosneki se tlakuikali tlen ika okiueyichiuayaj toTajtsin Dios. Ijkuak okiueyichiuayaj toTajtsin Jehová, okitlakuikiliayaj uan otlatsotsonayaj. Ijkon okichiuayaj itech templo ompa Jerusalén ijkuak teixpan okiueyichiuayaj toTajtsin Dios (Lu 20:42; Hch 13:33; Snt 5:13).
Samaria.
Nin altepetl 200 xiuitl okiyekanki itekiuajkayo Israel tlen okatka norte kanin opouiayaj majtlaktli familias. Noijki ijkon okitokayotiayaj nochi tlali kanin otlanauatiaya non tekiuajkayotl. Altepetl Samaria okichijkej ipan se tepetl tlen noijki ijkon omotokayotiaya. Ijkuak okatka Jesús, Samaria okatka ik norte itech altepetl Galilea uan ik sur itech altepetl Judea. Jesús ompa amo otetlapouiaya pero ualeua ik ompa opanouaya uan omotlapouiaya inuan akinmej ompa ochantiayaj. Pedro okinejneki okse illave Tekiuajkayotl ijkuak samaritanos okiselijkej espíritu santo (1Re 16:24; Jn 4:7; Hch 8:14).
Samaritanos.
Yiuejkika ijkon okinmiluiayaj israelitas tlen opouiayaj itech intekiuajkayo majtlaktli familias tlen okatkaj norte. Pero itech xiuitl 740 a.i.x. 1 ijkuak asirios okimoaxkatijkej Samaria, noijki ijkon opejki kinmiluiaj akinmej ompa okinuikakej asirios. Ijkuak okatka Jesús, ayakmo ijkon okinmiluiayaj akinmej opouiayaj itech non altepetl. Ijkon opejki kinmiluiaj akinmej opouiayaj itech se religión tlen okatka ik kanin yiuejkika okatkaj Siquem uan Samaria. Akinmej opouiayaj itech non religión amo okineltokayaj seki tlamantli ijkon ken judíos (Jn 8:48).
Sanedrín.
Nin kijtosneki jueces judíos tlen okatkaj Jerusalén. Ijkuak okatka Jesús, itech Sanedrín opouiayaj 71 personas. Ompa opouiayaj teopixki tlen otlayekanaya uan oksekimej tlen achto okipixkej non tekitl, infamiliares teopixkej tlen otlayekanayaj, tlayekankej, akinmej okinyekanayaj familias uan akinmej otlamachtiayaj tlanauatil (Mr 15:1; Hch 5:34; 23:1, 6).
Santísimo.
Nin cuarto okatka okachi tlaijtik itech tabernáculo uan templo. Noijki okitokayotiayaj Santo de los Santos. Ijtik non cuarto okatka arca tlen ika omochi acuerdo. ITlanauatil Moisés okijtouaya san teopixki tlen otlayekanaya uelis ompa kalakiskia sejse xiuitl ijkuak toTajtsin Dios otetlapojpoluiaya (Éx 26:33; Le 16:2, 17; 1Re 6:16; Heb 9:3).
Santo.
Nin achto cuarto tlen okatka itech tabernáculo uan templo uan okatka okachi ueyi. Nin cuarto okatka okse tlamantli amo ken Santísimo tlen okatka okachi tlaijtik. Kanin Santo ompa itech tabernáculo okatkaj candelabro de oro, altar de oro kanin okitlatiayaj kopali, mesa kanin okitlaliayaj pan tlen okitemakayaj ixpan toTajtsin Dios uan okseki tlamantli de oro. Kanin Santo ompa itech templo okatkaj altar de oro, majtlaktli candelabros de oro uan majtlaktli mesas kanin okitlaliayaj pan tlen okitemakayaj ixpan toTajtsin Dios (Éx 26:33; Heb 9:2).
Satanás.
Sello.
Nin kijtosneki itlaj tlen ika okitlaliayaj se marca para kiteititiskiaj itlaj tlen ikaj iaxka, itlaj tlen melauak noso se acuerdo (okachi okitlaliayaj ipan sokitl noso cera). Non marca otlapaleuiaya amitlaj makitoktikan tlen okipiaya sello ken amamej, puertas uan hasta kanin otoktokaj akinmej yoixpolikej. Sellos tlen yiuejkika okinnejnekiayaj okatkaj tlakuauakej (okinchiuayaj de tetl, marfil noso kouitl) uan okinpiayaj koptokej letras noso dibujos. Ijkuak moijtoua itlaj kipia se sello kineskayotia itlaj tlen melauak, itlaj tlen ikaj iaxka, itlaj tlen tlatitok noso itlaj tlen amo momati (Mt 27:66; Jn 6:27; Ef 1:13; Ap 5:1; 9:4).
Siervo ministerial.
Ika griego moijtoua diákonos uan motlajtolkopa ken “akin tekipanoua” noso “akin tlapaleuia”. Siervos ministeriales kinpaleuiaj akinmej tlayekanaj itech tlanechikolmej. Moneki kichiuaskej tlen kijtoua Biblia para uelis tlapaleuiskej (1Ti 3:8-10, 12).
Sinagoga.
Nin tlajtoli kijtosneki ‘monechikouaj’ noso ‘mololouaj’. Itech miakej versículos kijtosneki kanin omonechikouayaj judíos para kitlajtoltiskiaj iTlajtol toTajtsin Dios, para kinmachtiskiaj, para motlatlaujtiskiaj noso para tetlapouiskiaj. Ijkuak okatka Jesús, itech Israel okatka se sinagoga itech sejse altepetl uan itech uejueyij altepemej okatkaj okachi miakej sinagogas (Lu 4:16; Hch 13:14, 15).
Sion, tepetl Sion.
Ijkon okiluiayaj altepetl Jebús tlen okipiaya miak tlamantli para mopaleuiskia. Ompa ochantiayaj jebuseos uan okatka itech tepetsintli ompa Jerusalén ik sur uan ik kanin kisa tonaltsin. David ompa omochanti ijkuak okimoaxkati non altepetl uan satepan okixmatiayaj ken “ialtepe David” (2Sa 5:7, 9). Ijkuak David ompa okiuikak arca, Jehová okitaya santo non tepetl. Satepan noijki ijkon okiluiayaj kanin okatka templo itech tepetl Moria. Ualeua noijki ijkon okiluiayaj altepetl Jerusalén. Itech Escrituras Griegas Cristianas miak uelta tlajtoli Sion san itlaj kineskayotia (Sl 2:6; 1Pe 2:6; Ap 14:1).
Siria.
Itech Escrituras Griegas Cristianas nin kijtosneki se altepetl tlen opouiaya Roma uan Antioquía okiyekanaya. Ompa opouiaya ueyi itlal altepetl Siria tlen moijtoua itech Escrituras Hebreas uan noijki okitokayotiayaj Aram. Akin otlanauatiaya Siria noijki otlanauatiaya Palestina (Lu 2:2; Hch 18:18; Gál 1:21).
Sirte.
Ijkon intoka ome mares kanin amo okachi tlauejkatlan tlen katej itempa altepetl Libia ik norte ompa África. Akinmej otekipanouayaj itech barcos omomojtiayaj ik ompa panoskej porque okatka miak xali uan atl okoliniaya (Hch 27:17).
Sitlali tlen kisa kualkan.
Siuatl tlen monemaka.
Nin kijtosneki akin moteka iuan okse maski amo inamik para kitlanis tomin. Ualeua Biblia kijtoua tlakamej noijki ijkon okichiuayaj. Tlajtoli griego pórnē kijtosneki ‘tlanemaka’. ITlanauatil Moisés okijtouaya amo omonekiaya monemakaskej. Itech itemplo Jehová amo okiseliayaj tomin tlen okitlaniayaj akinmej omonemakayaj. Pero akinmej opouiayaj itech religión tlen amo melauak omonemakayaj para kitlaniskej tomin (Dt 23:17, 18; 1Re 14:24). Itech Biblia tlajtoli siuatl tlen monemaka kijtosneki se persona, se altepetl noso miakej personas tlen kinueyichiuaj dioses maski kijtouaj kitekichiuiliaj toTajtsin Dios. Apocalipsis ijkon kinneskayotia religiones tlen moixmatij ken “Ueyi Babilonia”, porque kuali mouikaj inuan tekiuajkej tlen katej tlaltikpak para makinpaleuikan uan makinmakakan miak tlamantli (Ap 17:1-5; 18:3; 1Cr 5:25).
T
Tablas tlen okoyontokaj.
Ika non tablas okintlajyouiltiayaj personas uan amo okinkauiliayaj mamolinikan. Ualeua san inmikxiuan okinkalakiliayaj itech nonmej tablas. Pero ualeua nochi incuerpo amo ueli okoliniayaj porque okinkalakiliayaj inmikxiuan, inmauan uan inkech itech nonmej tablas (Jer 20:2; Hch 16:24).
Talento.
Ijkon okitokayotiayaj tlen okachi etik okitamachiuayaj hebreos uan tomin tlen okachi patio okatka, etik okatka 34.2 kilos. Se talento tlen okitamachiuayaj griegos okipiaya 20.4 kilos (1Cr 22:14; Mt 18:24, nota).
Tártaro.
Itech Escrituras Griegas Cristianas, nin tlajtoli kijtosneki ayakmo okinkauilijkej makichiuakan miak tlamantli ángeles tlen amo otetlakamatkej ijkuak okatka Noé. 2 Pedro 2:4 kijtoua okintlamotlakej ijtik Tártaro, pero non amo kijtosneki “ángeles tlen otlajtlakolchijkej” okintsakej itlampa tlali kanin tlayoua uan miakej kineltokaj ompa kintsakuaj dioses. Kijtosneki toTajtsin Dios okinkixtili inteki, ayakmo okinkauili mayetokan iluikak uan okichi intlayejyekol mayeto kanin sapanoua tlayoua para amo makajsikamatikan tlen ye kineki kichiuas. Biblia kijtoua noijki sepa kinmixpoloskej ken yetoskia yaskej kanin tlayoua. Kinmixpoloskej iuan Satanás el Diablo tlen kinyekana. Para ángeles tlen oteixnamikej, Tártaro kijtosneki itlaj tlen sapanoua tepinati. Tártaro okse tlamantli kijtosneki uan amo ijkon ken tlauejkatlan tlen kijtoua Apocalipsis 20:1-3.
Techtliokoliaj tlen kuali.
Ika griego nin tlajtoli kijtosneki itlaj tlen teyolpakti noso itlaj kualtsin. Miak uelta kijtosneki se tetliokolil tlen kitemakaj ika nochi inyolo. Ijkuak kijtoua toTajtsin Dios techtliokolia tlen kuali, kijtosneki se tetliokolil tlen techmaka ika nochi iyolo uan amo kichia oksepa matikkopilikan. Non kiteititia toTajtsin Dios yolkuali, kipaktia kitemakas tlen kipia uan sapanoua techtlasojtla. Tlajtoli griego noijki motlajtolkopa ken “techselia” uan “tetliokolil tlen kitemakaj ika nochi inyolo”. Non kijtosneki ikaj kimakaj itlaj maski amo kinamiki kipias noso amo okimotlanili. Akin kitemaka tetliokolil kichiua porque kipaktia kitemakas tlen kipia (2Co 6:1; Ef 1:7).
Tekiuajkayotl.
Templo.
Nin se kali tlen okatka Jerusalén ompa Israel uan okipatkayoti tabernáculo tlen okiuikatinemiayaj israelitas uan ompa okiueyichiuayaj toTajtsin Dios. Salomón okichi achto templo uan babilonios okipojpolojkej. Okse templo okichi Zorobabel ijkuak israelitas okinuikakej Babilonia uan satepan Herodes el Grande okiyektlali. Ualeua okiluiayaj “kali” (Mt 21:13; Lu 11:51; 1Cr 29:1; 2Cr 2:4; Mt 24:1).
Teopixki.
Nin kijtosneki akin okatka ipatka toTajtsin Dios itech altepetl. Ye okinmachtiaya oksekimej akin toTajtsin Dios uan tlen technauatia matikchiuakan. Noijki inpatka oksekimej okinmiktiaya yolkamej ixpan toTajtsin Dios, okinpaleuiaya uan inpatka omotlatlaujtiaya. Ijkuak ayamo okatka iTlanauatil Moisés, akin okiyekanaya se familia okatka iteopixki non familia. ITlanauatil Moisés okijtouaya teopixkej omonekiaya yetoskej tlakamej tlen opouiayaj itech ifamilia Aarón uan okisayaj itech ifamilia Leví. Oksekimej levitas okinpaleuiayaj nonmej teopixkej. Ijkuak omochi yankuik acuerdo, Israel tlen iaxka toTajtsin Dios omochi se altepetl kanin pouij teopixkej, uan Jesucristo ye teopixki tlen tlayekana (Éx 28:41; Heb 9:24; Ap 5:10).
Teopixki tlen otlayekanaya.
ITlanauatil Moisés okijtouaya non teopixki okatka ipatka altepetl Israel ixpan toTajtsin Dios uan okinyekanaya oksekimej teopixkej. San ye uelis kalakiskia kanin Santísimo, itech cuarto tlen okatka okachi tlaijtik itech tabernáculo uan itech templo. Ompa okalakiaya san ijkuak toTajtsin Dios otetlapojpoluiaya sejse xiuitl. Jesucristo noijki kiluiaj teopixki tlen tlayekana (Le 16:2, 17; 21:10; Mt 26:3; Heb 4:14). Itech Escrituras Griegas Cristianas tlajtoli teopixkej tlen otlayekanayaj xamo kijtosneki teopixkej tlen okachi otlanauatiayaj. Xamo ompa opouiayaj teopixkej tlen okinpatlatiayaj uan akinmej okinyekanayaj 24 grupos teopixkej (2Cr 26:20; Esd 7:5; Mt 2:4; Mr 8:31).
Tetl tlen ika otlakuechouayaj.
Nin kijtosneki se tetl tankachtik uan okitlaliayaj ipan okse tetl tlen noijki okatka tankachtik uan okinejnekiayaj para tlakuechoskej. Itlajko tetl tlen okatka ueyi okitlaliayaj se kouitl tlen ika okoliniayaj tetl tlen ipan okatka. Yiuejkika miakej inchan okinpiayaj molinos tlen ika otlapayanayaj siuamej. Tlen okikuayaj familias nochipa okikuechouayaj ika molino, ikinon iTlanauatil Moisés okijtouaya amikaj uelis kimokauiskia molino noso tetl tlen ika otlakuechouayaj maski itlaj okitetlanetiaya. Yolkamej okinmalakachouayaj molinos tlen okachi uejueyij (Dt 24:6; Mr 9:42, nota).
Tetl tlen okachi tlakitskijtok.
Nin kijtosneki se tetl tlen okitlaliayaj kanin omonamikiaya ome tepamitl uan otlapaleuiaya san sekan mayeto non tepamitl. Tetl kanin omotlakxilijtoka kali okatka tetl tlen okachi otlakitskijtoka. Okipejpenayaj se tetl chikauak ijkuak okichiuayaj se ueyi kali uan ijkuak okichiuayaj tepamitl tlen okiyaualouaya se altepetl. Nin tlajtoli kineskayotia kanin motlakxilijtok tlaltikpak. Noijki Jesús kiluiaj ye “tetl tlen okachi tlakitskijtok kanin motlakxilijtok” tlanechikol. Tlanechikol yetoskia ken se kali ika espíritu santo (Ef 2:20; Job 38:6).
Tetlajchiui.
Nin kijtosneki akin kinejneki inchikaualis ejekamej (Hch 13:6).
Tetliokolil.
Nin kijtosneki itlaj tlen okimakayaj toTajtsin Dios para kitlasojkamatiliskiaj, okimakayaj ijkuak omoyolkuitiayaj noso okimakayaj para iuan mouikaskej. Desde ijkuak okatka Abel, akinmej ochantiayaj tlaltikpak okimakayaj toTajtsin Dios tlatlamantli tetliokolil uan ualeua okinmakayaj yolkamej. ITlanauatil Moisés okijtouaya omonekiaya kitemakaskej tetliokolil. Ijkuak Jesús okitemakak iyolilis ken se tetliokolil tlen ajsitok, ayakmo omonekiaya kintemakaskej yolkamej. Akinmej kichiuaj ken Cristo hasta axkan kimakaj toTajtsin Dios seki tetliokolil (Gé 4:4; Heb 13:15, 16; 1Jn 4:10).
Tetliokolil para toTajtsin Dios tetlapojpoluis.
Non tetliokolil okitemakayaj tla ikaj omotlapololtiaya uan otlajtlakolchiuaya porque tlajtlakole. Okintemakayaj tlatlamantli yolkamej ken toros noso palomaskonemej. Akin okinekiaya makitlapojpoluilikan itlajtlakol okitemakaya itetliokolil ken oueliaya uan tla okipiaya miak tomin noso amo (Le 4:27, 29; Heb 10:8).
Tetliokolil tlen okitlatiayaj.
Nin kijtosneki ijkuak okintetliokoliayaj yolkamej, okintlatiayaj ipan altar uan ajsitok okinmakayaj toTajtsin Dios. Akin okitemakaya non tetliokolil amo okimokauiaya nion tepitsin maski okitemakaya se toro, se ichka, se tentso, se paloma ueyi noso se palomajkonetl (Éx 29:18; Le 6:9; Mr 12:33; Heb 10:6).
Tlachixkej.
Yejuan akinmej kitaj ken molinia tonaltsin, metstli uan sitlalimej para kijtoskej tlen panos satepan (Mt 2:1).
Tlajtlakolchijtinemij uan ayakmo pinauaj.
Ika griego moijtoua asélgueia. Nin tlajtoli kijtosneki ijkuak ikaj sapanoua kinmixnamiki itlanauatiluan toTajtsin Dios uan kiteititia ayakmo pinaua. Akin ijkon kichiua kiteititia amo kintlakaita noso kintlauelita akinmej tlanauatiaj uan tlen technauatiaj matikchiuakan. Noijki akin ijkon kichiua kijtosneki kichiua se ueyi tlajtlakoli (Gál 5:19; 2Pe 2:7).
Tlajtlaksaj ipan trigo.
Ijkon okichipauayaj trigo uan okikixtiliayaj ieuayo. Ualeua okichipauayaj ika se tlakotl, uan tla okatka miak okichipauayaj ika teposmej tlen okintilanayaj yolkamej. Nonmej teposmej okinpanoltiayaj ipan trigo tlen okisouayaj kanin otlaejekaniayaj. Kanin otlaejekaniayaj okatka ixtlauak, okatka tlatankachtik, uejkapan uan ompa oejekaya.
Tlakemitl tetsojtsopiti.
Tlakilotl tlen achto tlaki.
Nin tlajtoli monejneki para miak tlamantli. Jehová okinnauati israelitas makinmakakan tlakamej tlen achto onesiayaj, yolkamej tlen achto onesiayaj uan tlakilotl tlen achto otlakiaya. Israelitas okimakayaj toTajtsin Dios non tlamantli itech iluitl ijkuak okikuayaj pan tlen amo okipiaya levadura uan itech Pentecostés. Cristo uan idiscípulos tlen okinpejpenkej noijki kinmiluiaj tlakilotl tlen achto tlaki (1Co 15:23; Nú 15:21; Pr 3:9; Ap 14:4).
Tlanauatil.
Tlanechikol.
Nin tlajtoli kijtosneki ijkuak sekimej monechikouaj para itlaj kichiuaskej. Itech Escrituras Hebreas ualeua nin tlajtoli kijtosneki akinmej opouiayaj itech altepetl Israel. Itech Escrituras Griegas Cristianas ualeua kijtosneki akinmej kichiuaj ken Cristo pero ualeua noijki kijtosneki sejse tlanechikol (1Re 8:22; Hch 9:31; Ro 16:5).
Tlauijuikaltia.
Nin kijtosneki ijkuak ikaj kineki makipano tlen amo kuali okse persona noso se tlamantli. Nin amo kijtosneki akin tlauijuikaltia ijkuak kualani. Tlajtoli tlauijuikaltia miak uelta kijtosneki ijkuak ikaj kijtoua panos tlen amo kuali. Tla toTajtsin Dios kijtoua itlaj panos noso ikaj kinauatia makijto tlen panos, kijtosneki miak ipati uan mochiua se profecía (Gé 12:3; Nú 22:12; Mr 11:21; Hch 23:12; Ro 12:14; Gál 3:10). Tla ikaj kijtoua itlaj kichiuas pero amo kichiua, kiuijuikaltiaj para kitlajyouiltiskej (Ne 10:29).
Tlayekanki.
Biblia okachi kinejneki nin tlajtoli ijkuak kijtoua akinmej tlanauatiaj noso tlayekanaj itech se altepetl. Apocalipsis noijki kinejneki nin tlajtoli ijkuak kijtoua akinmej katej iluikak. Tlajtoli griego presbýteros motlajtolkopa ken “tlayekanki” ijkuak kijtoua akinmej kiyekanaj tlanechikol (Éx 4:29; Pr 31:23; 1Ti 5:17; Ap 4:4). Yejuan noijki kinmaluiaj akinmej pouij itech tlanechikol ijkon ken kichiua se tlajpixki. Tlajtoli griego epískopos kijtosneki akin kita ken tlamaluis. Non tlajtoli uan tlajtoli presbýteros kijtosneki akinmej kiyekanaj tlanechikol kanin pouij akinmej kichiuaj ken Cristo. Tlajtoli presbýteros kiteititia ken kipia iyelis se tlayekanki. Tlajtoli epískopos kiteititia tlen tekitl kichiua se tlayekanki (Hch 20:28; 1Ti 3:2-7; 1Pe 5:2).
Tlen axkan onka.
Nin tlajtoli kijtosneki se tiempo. Ika griego moijtoua aiṓn uan ualeua kijtosneki ijkuak itlaj okachi panoua. Noijki kiteititia inyelis personas noso tlen yejuan kichiuaskiaj itech se tiempo. Xikita kanin kijtoua IJKUAK YITLAMIS TLEN AXKAN ONKA.
Tlen kuali.
Tlen sokio.
Itech Biblia nin tlajtoli kijtosneki ikaj amo chipauak noso itlaj amo chipauak. Noijki kijtosneki amo kintlakamatij tlanauatilmej tlen kijtouaj tlen moneki tikchiuaskej. Miak uelta noijki kijtosneki tlen iTlanauatil Moisés kijtoua amo kuali noso amo chipauak (Le 5:2; 13:45; Mt 10:1, nota; Hch 10:14; Ef 5:5).
Tomin de plata, mina.
Escrituras Griegas Cristianas kijtoua se mina okatka ipati 100 dracmas uan okatka etik 340 gramos (Lu 19:13, nota).
Tonal ijkuak otlayektlaliayaj para moseuiskiaj.
Tonal ijkuak toTajtsin Dios otetlapojpoluiaya.
Non tonal okatka santo uan israelitas okitayaj miak ipati. Noijki okitokayotiayaj Yom Kipur (ika hebreo yohm hakkippurím kijtosneki ‘ijkuak itlaj kipachouaj’). Israelitas okintlapojpoluiayaj tonal 10 metstli etanim. Sejse xiuitl san non tonal teopixki tlen otlayekanaya okalakiaya kanin Santísimo itech tabernáculo uan seki xiuitl satepan okalakiaya itech templo. Ompa okitemakaya inmieso yolkamej para makitlapojpoluilikan itlajtlakol, makintlapojpoluilikan intlajtlakol oksekimej levitas uan makintlapojpoluilikan intlajtlakol nochtin tlen opouiayaj itech altepetl. Ijkuak okinmiktiayaj yolkamej okineskayoti Jesús ixpoliuiskia. Ye san se uelta oixpoliuik para makintlapojpoluilikan intlajtlakol personas uan ayakmo oksepa ixpoliuis. Ijkon kinkauilia nochtin mamouikakan iuan Jehová. Yiuejkika non tonal israelitas okitayaj santo, omonechikouayaj uan amo otlakuayaj. Non tonal okatka sábado uan amo otekipanouayaj (Le 23:27, 28; Hch 27:9; Col. 1:20; Heb 9:12).
Trompeta.
Nin se tepostli tlen ika tlapitsaj uan kinejnekij para ika tlanauatiskej noso ika tlatsotsonaskej. Miak uelta ijkuak kipitsaj trompeta, motematiltia ken tlaixkomaka Jehová uan motematiltia okseki tlamantli tlen ye kichiua (1Co 15:52; Ap 8:7-11:15).
Tsotsoli tilauak.
U
Ueyi tlajyouilistli.
Jesús okijto ompa Jerusalén yetoskia se “ueyi tlajyouilistli” tlen amo keman opanouaya. Noijki okijto nochtin kijyouiskiaj se “ueyi tlajyouilistli” ijkuak ye ualaskia ika ichikaualis (Mt 24:21, 29-31). Pablo okijto toTajtsin Dios kinamiki kintlajyouiltis akinmej amo kixmatij uan akinmej amo kitlakamatij kuali tlajtoli tlen kijtoua akin Jesucristo. Itech Apocalipsis capítulo 19 kijtoua Jesús kinyekana ángeles para kimomakaskej iuan yolkatl temomojti, inuan tekiuajkej tlen katej tlaltikpak uan akinmej kinpaleuiaj (2Te 1:6-8; Ap 19:11-21). Noijki kijtoua “sapanoua miakej” momakixtiskej ijkuak panos non tlajyouilistli (Ap 7:9, 14). Xikita kanin kijtoua ARMAGEDÓN.
X
Xochitlali.
Nin tlajtoli kijtosneki se tlali sapanoua kuajkualtsin. Jehová okichijchi achto xochitlali ompa Edén para machantikan achto tlakatl uan achto siuatl. Ijkuak Jesús opilkatoka itech kouitl, inakastlan okatka se ichteki uan tlen okilui moajsikamati satepan tlaltikpak yetos se xochitlali. Nin tlajtoli kajki itech 2 Corintios 12:4 uan xamo kijtosneki xochitlali tlen satepan yetos. Noijki kajki itech Apocalipsis 2:7 uan xamo kijtosneki se xochitlali tlen kajki iluikak (Can 4:13; Lu 23:43).
Y
Yankuik metstli.
Yinikan tika.
Itech Escrituras Griegas Cristianas ualeua kijtosneki ijkuak yinikan yetos Jesucristo ken tekiua mesiánico, desde ijkuak okitlalijkej ken tekiua hasta itlamian tonalmej. Ijkuak yinikan yetos Cristo kijtosneki se tiempo tlen yomoijto uan amo kijtosneki uits uan san niman mokopas (Mt 24:3).
Yolchipauak, chipauak.
Nin kijtosneki se tlamantli tlen Jehová kiteititia porque kipia chipauak iyelis uan ye sapanoua santo (Éx 28:36; 1Sa 2:2; Jn 17:11). Ijkuak moijtoua chipauakej personas (Mr 6:20; Hch 3:21), chipauak seki tlamantli (Ro 7:12; 11:16; 2Ti 3:15), kanaj tlachipauak (Mt 4:5; Hch 7:33; Heb 9:1) uan chipauak tlen kichiuaj sekimej (Éx 36:4), tlajtoli ika hebreo uan griego moajsikamati xelitok noso kixelouaj para mayeto iaxka toTajtsin Dios akin santo. Kijtosneki kixelouaj para makitekichiuili toTajtsin Dios noso para kimakaskej. Itech Escrituras Griegas Cristianas tlajtoli tlen motlajtolkopa ken “yolchipauak” uan “chipauak” noijki kijtosneki ijkuak se persona kipia chipauak inemilis (2Co 7:1; 1Pe 1:15, 16).
Z
Zeus.
Ye dios tlen kinyekana dioses griegos. Ompa Listra omokuayejyekojkej Bernabé okatka Zeus. Ik altepetl Listra okajsikej miak tlamantli kanin kijtoua “teopixkej tlen okipaleuiayaj Zeus” uan “Zeus ye dios tonaltsin”. Iyekapan barco kanin oyaya Pablo desde Malta, okipiaya se imagen kanin omotayaj “ikoneuan Zeus”. Ikoneuan Zeus okatkaj gemelos uan omotokayotiayaj Cástor uan Pólux (Hch 14:12; 28:11).