Mateo 17:1-27
17 Chikuase tonal satepan, Jesús oyajki itech se ueyi tepetl. Okinuikak Pedro, Santiago uan ikni tlen omotokayotiaya Juan uan ompa inselti okatkaj.
2 Ompa Jesús okse tlamantli okinmonextili. Oixpetlanki ken tonaltsin uan itlaken omotaya istak ken tlauili.
3 Noijki omonextijkej Moisés uan Elías omotlapouijtokaj iuan Jesús.
4 Pedro okilui Jesús: “NoTeko, tipakij nikan tikatej. Tla tikneki, manikinchiua eyi kaltsitsintin. Se para te, okse para Moisés uan okse para Elías”.
5 Ijkuak Pedro otlajtojtoka, se mixtli petlantok okinpacho uan ikaj oualtlajto ijtik mixtli uan okijto: “Nin noKone niktlasojtla uan ye kichiua manipaki. Xikkakikan”.
6 Discípulos sapanoua omomojtijkej ijkuak ijkon okikakej uan omoixtlapachojkej ipan tlali.
7 Jesús innauak omotoki, inpan okintlali imauan uan okinmilui: “Ximoketsakan. Amo ximomojtikan”.
8 Ijkuak oajkotlachixkej, amikaj okitakej uan san Jesús ompa okatka.
9 Pero ijkuak oualtemouayaj itech tepetl, Jesús okinmilui: “Amikaj xikiluikan tlen onankitakej hasta ijkuak toTajtsin Dios kiyolitis iKone Tlakatl”.
10 Pero discípulos okitlajtlanijkej: “¿Tleka akinmej tlamachtiaj tlanauatil kijtouaj achto uits Elías?”.
11 Jesús okinnankili: “Non melauak. Elías achto uits uan oksepa tlayektlaliki.
12 Pero ne namechiluia, Elías youitsa uan yejuan amo okixmatkej. Okitoktijkej tlen yejuan okinekej uan noijki ijkon kitlajyouiltiskej iKone Tlakatl”.
13 Ijkuak ijkon okinmilui, discípulos okajsikamatkej ye okijto Elías okatka ye Juan Bautista.
14 Ijkuak oajsitoj kanin miakej okatkaj, se tlakatl omotlankuaketsato ixpan Jesús uan okilui:
15 “NoTeko, xikiknomati notelpoch porque mimiki uan tlajyouia. Miak uelta youetski ijtik tlitl uan ijtik atl.
16 Onikinualikili modiscípulos pero amo ouelik okipajtijkej”.
17 Jesús okijto: “¡Akinmej axkan yoltokej amo yolkualmej uan amo tlaneltokaj! ¿Hasta keman namouan niyetos? ¿Hasta keman namechxikojtos? Xikualikakan telpochtli”.
18 Jesús okajuak ejekatl* tlen okatka ijtik telpochtli uan ejekatl* okiski, ijkon telpochtli oualpajtik.
19 Discípulos okichtakatlajtlanitoj Jesús: “¿Tleka tejuan amo ouelik otikkixtijkej ejekatl?”.*
20 Ye okinnankili: “Porque amo okachi nantlaneltokaj. Ne namechiluia, tla namotlaneltokilis yetoskia ken se iyolo mostaza, uelis nankiluiskiaj nin tepetl ik ne mamotoki uan ye motokiskia. Ijkon namejuan nochi uelis nankichiuaskiaj”.
21 *
22 Ijkuak Jesús uan idiscípulos okatkaj Galilea, ye okinmilui: “IKone Tlakatl kitemaktiskej inmak tlakamej.
23 Yejuan kimiktiskej uan ipan eyi tonal toTajtsin Dios kiyolitis”. Discípulos omoyolkokojkej ijkuak ijkon okinmilui.
24 Ijkuak oajsitoj Capernaúm, sekimej tlen okololouayaj tomin* para templo, okajsitoj Pedro uan okitlajtlanijkej: “¿Motlamachti amo kitemaka tomin para templo?”.
25 Pedro okinnankili: “Kema ye kitemaka”. Satepan okalak kalijtik uan ijkuak ayamo itlaj okijtouaya, Jesús okitlajtlani: “¿Tlen tikijtoskia Simón? Tekiuajkej tlen katej tlaltikpak, ¿akinmej kintlajtlaniliaj matlatlaxtlauakan? ¿Inkoneuan noso oksekimej?”.
26 Ye okinankili: “Oksekimej”. Jesús okilui: “Nin kijtosneki tekoneuan amo moneki tlatlaxtlauaskej.
27 Pero amo tiknekij tikinkualaniskej, ikinon xio xikuika mekatl tlen kipia tepostli uan xiktlamotla ijtik mar. Ijkuak tikkamatlapos michin tlen achto tikkitskis, kipias se tomin de plata. Ika non tomin xiktlaxtlaua tlen ne niktemakaskia uan tlen te tiktemakaskia”.
Notas
^ Noso “demonio”.
^ Noso “demonio”.
^ Noso “demonio”.
^ Seki biblias kipiaj nin versículo pero tlen yiuejkika omoijkuilo ika griego amo kipia.
^ Yiuejkika judíos sejse xiuitl okitemakayaj ome dracmas para templo. Non ome dracmas okitlaniayaj tla otekipanouayaj ome tonal.
