Lucas 23:1-56
23 Satepan nochtin omoketskej uan okiuikakej Jesús ixpan Pilato.
2 Ijkuakon okiteluijkej uan okijtojkej: “Otikajsikej nin tlakatl kinkuejsojtinemi akinmej chantij itech toaltepe. Ye kijtojtinemi amo makitlatlaxtlauilikan César. Noijki kijtojtinemi ye Cristo uan tekiua”.
3 Ijkuakon Pilato okitlajtlani: “¿Te tikinnauatia judíos?”. Jesús okinankili: “Te ijkon yotikijto”.
4 Satepan Pilato okinmilui teopixkej tlen otlayekanayaj uan akinmej ompa okatkaj: “Ne nikita nin tlakatl amitlaj okichi”.
5 Pero yejuan okachi okijtouayaj: “Kinkuejsojtinemi nochtin tlen chantij Judea porque tlamachtijtinemi. Opejki tlamachtia Galilea uan axkan nikan yokalakiko”.
6 Ijkuak Pilato ijkon okikak, otlajtlanki kox Jesús oualaya Galilea.
7 Satepan Pilato okimatki Jesús oualaya kanin Herodes otlanauatiaya ikinon okititlanili. Ijkuakon Herodes okatka ompa Jerusalén.
8 Herodes opaki ijkuak okitak Jesús. Yiuejkika okinekiaya kitas porque okimatki miakej omotlapouiayaj tlen okichiuaya. Ye okinekiaya kitas makichiua se milagro.
9 Herodes okitlajtlani miak tlamantli Jesús pero ye amo okinankili.
10 Teopixkej tlen otlayekanayaj uan akinmej otlamachtiayaj tlanauatil okitlauelitayaj, ikinon ompa omoketokaj uan okiteluiayaj.
11 Herodes uan isoldados okitayaj Jesús amitlaj ipati uan okipinauijkej ikinon okitlalilijkej se tsotsoli* kuajkualtsin. Satepan oksepa okititlanili Pilato.
12 Pilato uan Herodes omokokoliayaj pero non tonal opejki mouikaj.
13 Satepan Pilato okinnotski teopixkej tlen otlayekanayaj, tekiuajkej uan oksekimej.
14 Ye okinmilui: “Namejuan onantechualikilijkej nin tlakatl porque nankijtouaj kinmiluijtinemi oksekimej matlaixnamikikan. Pero namoixpan yoniktlajtlani uan nikita amo okichi tlen namejuan nankijtouaj.
15 Herodes noijki otechualtitlanili porque okitak amitlaj okichi. Nin tlakatl amitlaj okichi para tikmiktiskej.
16 San niktlajyouiltis uan nikkauas mauia”.
17 *
18 Pero nochtin chikauak okijtouayaj: “¡Xikmikti non tlakatl uan xikkajkaua Barrabás!”.
19 (Barrabás okitsakej porque okinpaleui oksekimej makinmixnamikikan tekiuajkej uan noijki otemikti).
20 Pilato oksepa okinnotski nochtin porque okinekiaya kikajkauas Jesús.
21 Pero yejuan chikauak okijtouayaj: “¡Makipilokan itech kouitl! ¡Makipilokan itech kouitl!”.
22 Pilato oksepa okinmilui: “¿Tleka? ¿Tlen okichi nin tlakatl? Nikita amitlaj okichi para tikmiktiskej ikinon niktlajyouiltis uan nikkauas mauia”.
23 Pero yejuan okachi chikauak okijtouayaj makimiktikan itech kouitl ikinon Pilato ayakmo itlaj okijto.
24 Satepan Pilato okichi tlen yejuan okinekiayaj.
25 Okikixti tlakatl tlen yejuan okinekiayaj maski okinmixnamik tekiuajkej uan otemikti. Pero okinmaktili Jesús para makitoktikan tlen yejuan okinekiayaj.
26 Ijkuak okiuikakej Jesús, okinamikej se tlakatl itoka Simón tlen oneski* altepetl Cirene. Ye ouia tlala uan okimamaltijkej kouitl* tlen itech kipiloskiaj Jesús. Non tlakatl oyaya ikuitlapan Jesús.
27 Miakej okitokayaj Jesús uan ompa oyayaj sekimej siuamej. Nonmej siuamej omoelpanuitekiayaj porque omoyolkokouayaj uan chikauak okichokiliayaj.
28 Jesús okinmitak siuamej uan okinmilui: “Ayakmo techchokilikan siuamej tlen nanchantij Jerusalén. Namejuan ximochokilikan uan xikinchokilikan namokoneuan.
29 Porque ajsis tonal ijkuak ijkin moijtos: ‘Pakij siuamej tlen amo ueli kinpiaj inkoneuan, siuamej tlen amo okinpixkej inkoneuan uan akinmej amo otlachichitijkej’.
30 Ijkuakon nankiluiskej tepeyo: ‘¡Topan xiuetsikan!’. Noijki nankinmiluiskej tepetsitsintin: ‘¡Techtlalpachokan!’.
31 Tla ijkon nankichiuaj ijkuak kouitl xoxouik, ¿tlen panos ijkuak uakis?”.
32 Noijki okinuikayaj ome ichtekej tlen kinmiktiskiaj iuan Jesús.
33 Ijkuak oajsitoj itech tlali tlen itoka Tsontekomatl, okipilojkej Jesús itech kouitl. Noijki ompa okinpilojkej ome ichtekej, se iyekma uan okse iopochma.
34 Pero Jesús okijtouaya: “NoTajtsin, xikintlapojpolui porque amo kimatij tlen kichiuaj”. Noijki soldados okimotlatlanilijkej itlaken.
35 Miakej ompa otlachixtokaj. Pero tekiuajkej okitlauelitayaj uan okijtouayaj: “Ye okinpaleui oksekimej, axkan ineuian mamopaleui tla ye Cristo tlen okipejpenki toTajtsin Dios”.
36 Soldados noijki okipinauiayaj ijkuak okimakayaj vino xokok
37 uan okiluiayaj: “Ximopaleui tla te tikinnauatia judíos”.
38 Noijki ikpak* ijkin okijkuilojkej: “Ye kinnauatia judíos”.
39 Se ichteki tlen inakastlan okipilojkej opejki kiuijuikaltia uan okiluiaya: “¿Amo te tiCristo? ¡Ximopaleui uan noijki tejuan techpaleui!”.
40 Ijkuak okse ichteki okikak, okajuak uan okilui: “¿Amo tepitsin tikmauilia toTajtsin Dios maski axkan noijki titlajyouijtok?
41 Tejuan titlajyouijtokej porque otikmotlanilijkej pero nin tlakatl amitlaj okichi”.
42 Noijki okijto: “Jesús, techilnamiki ijkuak peuas titlanauatis”.
43 Ye okinankili: “Axkan melauak nimitsiluia, nouan tiyetos itech xochitlali”.
44 Itech non altepetl opejki tlayoua kanaj tlajkotonal hasta kanaj las 3 tiotlak,
45 porque tonaltsin ayakmo otlauiaya. Noijki otlajkotsayanki tsotsoli* tilauak tlen opilkatoka itech templo.
46 Jesús chikauak otsajtsik uan okijto: “¡NoTajtsin, momak niktlalia noyolilis!”. Ijkuak ijkon okijto, oixpoliuik.
47 Tlakatl tlen okinyekanaya soldados opejki kiueyichiua toTajtsin Dios ijkuak okitak tlen opanok. Okijto: “Nin tlakatl melauak okatka yolkuali”.
48 Nochtin tlen okitakej tlen opanok omoelpanuitektiajkej ijkuak omokopkej inchan.
49 Akinmej okixmatiayaj Jesús san uejka omoketokaj. Noijki siuamej tlen okipaleuijtiualayaj Jesús desde Galilea okitakej tlen opanok.
50 Okatka se tlakatl yolkuali tlen omotokayotiaya José. Ye opouiaya itech Sanedrín.
51 (Ye amo otlapaleui makimiktikan Jesús). José oualaya Arimatea, non altepetsintli okatka Judea. Ye okichiaya iTekiuajkayo toTajtsin Dios.
52 José okiluito Pilato makimaka icuerpo Jesús.
53 José okitemoui icuerpo Jesús uan okikimilo ika se kuali tsotsoli* de lino. Satepan okitokak Jesús itech se tetl tlen yokikoyonijkaj uan amikaj ompa yokitokayaj.
54 Non tonal otlayektlalijtokaj porque mostlatika sábado moseuiskiaj.
55 Siuamej tlen okipaleuijtiualayaj Jesús desde Galilea, noijki otlachiatoj kanin okitokakej uan okitakej ken okitekakej icuerpo.
56 Satepan omokopkej okiyektlalitoj xiuitl ajuiak uan aceite ajuiak. Pero sábado omoseuijkej ijkon ken kijtoua tlanauatil.
Notas
^ Noso “tlakemitl”, “tilmajtli”.
^ Seki biblias kipiaj nin versículo pero tlen yiuejkika omoijkuilo ika griego amo kipia.
^ Noso “otlakatki”.
^ Xikita diccionario.
^ Noso “ikuapak”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
