Lucas 13:1-35
-
Kinmixpoloskej akinmej amo moyolkopaj (1-5)
-
Se higoskouitl tlen amo otlaki (6-9)
-
Se sábado, Jesús okipajti se siuatl tlen okuitlapantoloniuik (10-17)
-
Iyolo mostaza uan levadura (18-21)
-
“Ximochijchikauakan nankalakiskej itech puerta tlen amo patlauak” (22-30)
-
Herodes “non astotl” (31-33)
-
Jesús okiyolkoko tlen kinpanoskia akinmej ochantiayaj Jerusalén (34, 35)
13 Ijkuakon sekimej tlen ompa okatkaj okiluijkej Jesús, tekiua Pilato okinmikti itech templo sekimej tlen ochantiayaj Galilea.
2 Ijkuak Jesús ijkon okikak, okinmilui: “¿Nankineltokaj akinmej okinmikti okatkaj okachi tlajtlakolejkej uan amo oksekimej tlen noijki chantij Galilea?
3 Amo. Ne namechiluia, tla amo nanmoyolkopaskej nannochtin noijki namechixpoloskej.
4 Noso ¿nankineltokaj okatkaj okachi tlajtlakolejkej 18 tlakamej tlen inpan ouetsiko torre ompa Siloam, uan amo oksekimej tlen chantij Jerusalén?
5 Amo. Ne namechiluia, tla amo nanmoyolkopaskej nannochtin noijki namechixpoloskej ijkon ken yejuan okinpanok”.
6 Satepan Jesús okinmilui nin neskayotl:* “Se tlakatl okitokak se higoskouitl itlala kanin otoktoka uva. Pero amo okajsik nion se tlakilotl ijkuak okitemoto.
7 Satepan okilui tlakatl tlen okimaluiaya uva: ‘Yikipia eyi xiuitl nikualtlatemolia nin higoskouitl uan amo nikajsi nion se tlakilotl. Xiktsonteki porque san tlatsatsakuilia’.
8 Ye okinankili: ‘Noteko, xikkaua okse xiuitl matokto, nitlachkuas uan niktlalilis abono.
9 Xamo ijkon kitemakas tlakilotl uan tlamo tiktsontekis’”.
10 Se sábado, Jesús otlamachtijtoka itech se sinagoga.*
11 Ompa okatka se siuatl tlen yokipiaya 18 xiuitl omokokouaya porque okipiaya se ejekatl.* Non siuatl okuitlapantoloniuik uan amo ueli omomelauaya.
12 Ijkuak Jesús okitak non siuatl, okilui: “Siuatsintli, xipajti”.
13 Jesús ipan okintlali imauan uan siuatl omomela uan opejki kiueyichiua toTajtsin Dios.
14 Pero se tlakatl tlen otlayekanaya itech sinagoga* okualanki ijkuak okitak Jesús otepajti sábado, ikinon okinmilui akinmej ompa okatkaj: “Onka chikuase tonalmej ijkuak uelis titekipanoskej, ikinon ximopajtikij itech nonmej tonalmej uan amo xiualakan sábado”.
15 Jesús okijto: “Namejuan nankipiaj ome namoixko. ¿Amo nankitotomaj namotoro noso namoburro tonal sábado uan nankatlititiuij?
16 Nin siuatsintli ixui Abrahán. Satanás yokitlajyouilti 18 xiuitl. ¿Amo omonekiaya nikpajtis maski sábado?”.
17 Ijkuak Jesús ijkon okijto, opinauakej akinmej okikokoliayaj pero oksekimej opakej porque okichiuaya miak tlamantli tetlajtlachialti.
18 Jesús noijki okinmilui: “¿Ken mota iTekiuajkayo toTajtsin Dios uan tlen ika uelis nikneskayotis?
19 Yetoskia ken iyolo mostaza tlen se tlakatl okitokato itlala. Nin semilla oixuak uan omoskalti ueyi kouitl uan totomej omochantijkej itech imamayo”.
20 Jesús oksepa okinmilui: “¿Tlen ika uelis nikneskayotis iTekiuajkayo toTajtsin Dios?
21 Yetoskia ken levadura tlen se siuatsintli okinelo ika kanaj 20 litros harina uan saiktlami nochi tixtli osamauak”.
22 Ijkuak Jesús oyaya Jerusalén, otlamachtijtiaj itech altepemej uan altepetsitsintin.
23 Ijkuakon se tlakatl okitlajtlani: “NoTeko, ¿amo miakej momakixtiskej?”. Ye okinmilui:
24 “Ximochijchikauakan nankalakiskej itech puerta tlen amo patlauak. Ne namechiluia, miakej mochijchikauaskej kalakiskej pero amo uelis kalakiskej.
25 Ijkuak tlakatl tlen iaxka kali yokitsak puerta ika llave, namejuan nanmokauaskej kiauak. Nankiuitekiskej puerta uan nankiluiskej: ‘¡ToTeko, techtlatlapoli!’. Pero ye namechiluis: ‘Amo nikmati kanin nanuitsej’.
26 Namejuan nankiluiskej: ‘Tejuan mouan otitlakuajkej uan te otitlamachti itech toaltepe kanin miakej panouaj’.
27 Pero ye namechiluis: ‘Amo nikmati kanin nanuitsej. ¡Xiakan nochtin namejuan porque nankichiuaj tlen amo kuali!’.
28 Ompa nantlauelchokaskej uan nankualaniskej ijkuak nankinmitaskej Abrahán, Isaac, Jacob uan nochtin profetas yetoskej itech iTekiuajkayo toTajtsin Dios. Pero namejuan namechkixtiskej kiauak.
29 Miakej uitsej ik kanin kisa tonaltsin uan ik kanin motlatia. Noijki uitsej ik norte uan ik sur uan motlaliskej inakastlan mesa itech iTekiuajkayo toTajtsin Dios.
30 Noijki xikmatikan sekimej tlen katej tlakuitlapan, panoskej tlayekapan uan oksekimej tlen katej tlayekapan, mokauaskej tlakuitlapan”.
31 Ijkuakon sekimej fariseos okiluitoj Jesús: “Xio porque Herodes kineki mitsmiktis”.
32 Ye okinnankili: “Xikiluitij non astotl: ‘Axkan uan mostla nikinkixtis ejekamej,* nitepajtis uan uiptla nitlamis’.
33 Pero axkan, mostla uan uiptla moneki nikchiuas noteki. Porque amo uelis kimiktiskej se profeta tla amo kajki ompa Jerusalén.
34 Namejuan tlen nanchantij Jerusalén, nankinmiktiaj profetas uan nankinmojmotlaj ika tetl akinmej namechintitlaniliaj. ¡Miak uelta oniknekiaya namechnechikos ken se gallina kinnechikoua ikoneuan itlampa iajasuan!* Pero namejuan amo onankinekej.
35 Axkan toTajtsin Dios kikaua nin templo uan namechkajteuilia. Ne namechiluia, amo oksepa nantechitaskej hasta ijkuak nankijtoskej: ‘¡Yokiteochijkej akin uits ika itoka Jehová!’”.
Notas
^ Noso “ejemplo”.
^ Xikita diccionario.
^ Noso “demonio”.
^ Xikita diccionario.
^ Noso “demonios”.
^ Noso “imajtlapaluan”, “imastikapaluan”.
