Hebreos 8:1-13
8 Nin tlen okachi ipati tikijtojtokej: tejuan noijki tikpiaj se teopixki tlen tlayekana. Ye omotlali iyekma toTajtsin Dios tlen kajki itech itrono ompa iluikak.
2 Ye tlapaleuia kanin tlachipauak itech kaltsintli tlen melauak. Non kaltsintli Jehová okitlali uan amo se tlakatl okitlali.
3 Porque teopixkej tlen tlayekanaj okintlalijkej makitemakakan tetliokolil uan makinmiktikan yolkamej. Ikinon nin teopixki tlen tlayekana omonekiaya kipias itlaj tlen kitemakas.
4 Ye amo yetoskia teopixki tla yetoskia nikan tlaltikpak, porque katej tlakamej tlen kitemakaj tetliokolil ken kijtoua iTlanauatil Moisés.
5 Inteki ninmej tlakamej san kineskayotia uan kiteititia tlen onka iluikak. Non omoteititi ijkuak toTajtsin Dios okinauati Moisés ken omonekiaya kichiuas kaltsintli. Ye okilui: “Kuali xikita uan nochi xikchiua ijkon ken onimitsititi itech tepetl”.
6 Pero axkan Jesús okiseli okachi kuali tekitl porque tlapaleuia mamochiua se acuerdo* tlen okachi kuali. Non acuerdo* omochi ijkon ken kijtoua tlanauatil uan mokitskijtok itech nochi tlen kuali omoijto mochiuas.
7 Tla kuali yetoskia achto acuerdo,* amo monekiskia okse acuerdo.*
8 Porque toTajtsin Dios kita tlen amo kuali kichiuaj itech altepetl ijkuak kijtoua: “Jehová kijtoua: ‘Yiajsis tonal nikchiuas se yankuik acuerdo* iuan altepetl Israel uan noijki iuan altepetl Judá.
9 Non acuerdo* amo yetos ken acuerdo* tlen onikchi inuan inuejkatatajuan ijkuak onikinmakitski uan onikinkixti itech altepetl Egipto. Ayakmo onechtekipacho tlen okinpanok porque amo okichijkej tlen otimokajkej’, ijkon kijtoua Jehová”.
10 “Jehová kijtoua: ‘Ne nikchiuas nin acuerdo* iuan altepetl Israel ijkuak yopanokej nonmej tonalmej. Nikintlalis notlanauatiluan itech intlayejyekol* uan nikinmijkuilos inyolipan. Ne niyetos inDios uan yejuan pouiskej itech noaltepe’”.
11 “‘Ayakmo ikaj kinmachtis akinmej chantij itech ialtepe nion inmikniuan nion ayakmo kinmiluis: “¡Xikixmatikan Jehová!”. Porque nochtin nechixmatiskej, konemej uan hasta akinmej kipiaj miak xiuitl.
12 Ne nikinmiknomatis ijkuak kichiuaskej tlen amo kuali uan ayakmo nikilnamikis intlajtlakol’”.
13 Ijkuak ye okijto: “Se yankuik acuerdo”,* okichi matlajtlami achto acuerdo.* Porque yipojpoliuis tlen yotlajtlanki uan tlen yopanok.
Notas
^ Noso “pacto”. Xikita diccionario.
^ Noso “pacto”. Xikita diccionario.
^ Noso “pacto”. Xikita diccionario.
^ Noso “pacto”. Xikita diccionario.
^ Noso “pacto”. Xikita diccionario.
^ Noso “pacto”. Xikita diccionario.
^ Noso “pacto”. Xikita diccionario.
^ Noso “pacto”. Xikita diccionario.
^ Noso “intlanemilil”.
^ Noso “pacto”. Xikita diccionario.
^ Noso “pacto”. Xikita diccionario.
