Filipenses 3:1-21
3 Nokniuan, saiktlami namechiluia nochipa xipakikan porque nankichiuaj ken toTeko. Amo nechkualania oksepa namechijkuililis tlen yonamechijkuililijka porque non namechpaleuia.
2 Ximomaluikan porque katej akinmej kichiuaj ken itskuintin. Ximomaluikan porque katej akinmej kichiuaj tlen amo kuali. Ximomaluikan porque katej akinmej kinekij xikmochiuilikan circuncisión.
3 Tejuan tikpiaj circuncisión tlen melauak. Espíritu santo techpaleuia matiktekichiuilikan toTajtsin Dios. Tejuan timoueyinekij ika tlen okichi Cristo Jesús uan amo tikneltokaj tlen kichiuaj oksekimej.
4 Ne uelis okachi nimoueyinekis tla ikaj moueyineki porque kineltoka tlen kichiuaj oksekimej.
Tla ikaj mokuayejyekoua* uelis kineltokas tlen kichiuaj oksekimej, ne okachi uelis ijkon nikchiuas.
5 Ne onechchiuilijkej circuncisión ijkuak onikpiaya chikueyi tonal. Nipoui itech altepetl Israel uan nipoui itech ifamilia Benjamín. Ne nihebreo porque nopapanuan hebreos uan oniktlakamatiaya* nochi tlanauatil ijkon ken se fariseo.
6 Ne sapanoua oniktlajyouilti tlanechikol. Onikteititi amitlaj notlajtlakol porque oniktlakamatki* tlanauatil.
7 Pero tlen onikpatioitaya axkan ayakmo nikpatioita porque nikchiua ken Cristo.
8 Noijki nochi tlamantli nikita amitlaj ipati porque okachi ipati ixtlamatilis noTeko Cristo Jesús. Por ye onikka nochi tlamantli uan nochi nikita ken tlajsoli para manechseli Cristo
9 uan para mamota ne nikchiua ken ye. Ne amo nikijtoua niyolkuali porque niktlakamati* iTlanauatil Moisés. Nechitaj niyolkuali porque nikneltoka Cristo. ToTajtsin Dios kinmita yolkualmej nochtin akinmej kineltokaj Cristo.
10 Ne nikneki nikixmatis Cristo, nikneki nikixmatis ichikaualis akin okiyoliti, nikneki nitlajyouis ken ye otlajyoui uan nikneki niixpoliuis ken ye oixpoliuik.
11 Ijkon nikitas kox uelis nechyolitiskej inuan akinmej achto kinyolitiskej.
12 Nin amo kijtosneki yonikseli tlen nechtliokoliskej nion amo kijtosneki yonikchi tlen omonekiaya. Ne ok nimochijchikaua para nikitas kox nikselis tlen nechmakaskej porque Cristo Jesús onechpejpenki.
13 Nokniuan, nikmati ayamo nikselia tlen nechmakaskej. Pero ne amo san nikilnamiktok tlen opanok uan nimochijchikaua nikselis tlen satepan uits.
14 Nimochijchikaua nikchiuas tlen moneki uan ijkon nikselis notetliokolil. Non kijtosneki niyoltos iluikak, porque toTajtsin Dios kinmakas non tetliokolil akinmej ye okinnotski ika Cristo Jesús.
15 Noijki ijkon matimokuayejyekokan* akinmej yotimochikajkej.* Pero tla namejuan okse tlamantli nanmokuayejyekouaj,* toTajtsin Dios namechpaleuis kuali ximokuayejyekokan.*
16 Maski yitikmatij tikchiuaskej miak tlamantli, nochipa matikchijtokan ijkon ken tikchijtiuitsej.
17 Nokniuan, san sekan xikchiuakan ijkon ken ne nikchiua. Noijki xikinmitakan akinmej kichiuaj ijkon ken otechitakej tikchiuaj.
18 Porque miakej kitlauelitaj kouitl* tlen itech okimiktijkej Cristo. Achto nochipa onikijtouaya akinmej yejuan pero axkan nichoka ijkuak nikijtoua akinmej yejuan.
19 Yejuan ixpoliuiskej, indios ye tlen kinekij kichiuaskej. Moueyinekij porque kichiuaj tlen tepinati. Yejuan san mokuayejyekouaj* tlen onka tlaltikpak.
20 Pero tejuan tochan kajki iluikak uan san tikchixtokej matechmakixti toTeko Jesucristo tlen kajki iluikak.
21 Ye kipia chikaualistli para kinauatis nochi tlen onka. Ika non chikaualistli kipatlas tocuerpo tlen amitlaj ipati uan kikopas ken ye icuerpo ueyititok.
Notas
^ Noso “monejneuilia”.
^ Noso “onikuelkakiaya”.
^ Noso “onikuelkaki”.
^ Noso “nikuelkaki”.
^ Noso “matimonejneuilikan”.
^ Noso “yotimoskaltijkej”.
^ Noso “nanmonejneuiliaj”.
^ Noso “ximonejneuilikan”.
^ Xikita diccionario.
^ Noso “monejneuiliaj”.
