Colosenses 2:1-23
2 Nikneki xikitakan ne nimochijchikaua namechpaleuis namejuan. Noijki akinmej chantij Laodicea uan akinmej ayamo nechitaj.
2 Ne nikneki namechyolchikauas uan nochtin san sekan ximotlasojtlakan. Noijki manamechteochiuakan para nochi kuali xikajsikamatikan. Ijkon kuali nankajsikamatiskej tlamantli santo tlen amo omomatiaya uan iaxka toTajtsin Dios, non kijtosneki ye Cristo.
3 Porque itech Cristo tlatitok nochi ixtlamatilistli uan tlen uelis tikmatiskej.
4 Ijkon namechiluia para amikaj manamechkajkayaua ika tlajtoli tlen teyoltilana.
5 Namejuan yinankimatij tlen nimokuayejyekoua* maski amo namouan nika. Ne nipaki porque nikita nochi kuali nankichiuaj uan ika nochi namoyolo nankineltokaj Cristo.
6 Ikinon nochipa xikpiakan namonemilis ken toTeko Cristo Jesús porque onanmochijkej idiscípulos.
7 Chikauak ximokitskijtokan itech Jesús ijkon ken se kouitl kuali toktok. Noijki xiyektlaneltokakan ijkon ken onamechmachtijkej uan nochipa xiktlasojkamatilikan toTajtsin Dios.
8 Ximomaluikan para amikaj manamechtlalili se trampa ika inmixtlamatilis oksekimej. Amo manamechkajkayauakan ika tlen amitlaj ipati kichiuaj oksekimej. Yejuan kichiuaj tlen kitaj kuali oksekimej uan amo kichiuaj tlen tlamachtia Cristo.
9 Porque Cristo kipia nochi iyelis toTajtsin Dios.
10 Cristo namechpaleuia amitlaj manamechpolo. Ye kinyekana nochtin tekiuajkej uan akinmej tlanauatiaj.
11 Namejuan onamechchiuilijkej circuncisión porque nanmouikaj iuan Cristo pero non circuncisión amo kichiuaj tlakamej. Non circuncisión kijtosneki ayakmo tikchiuaskej tlen amo kuali kineki tocuerpo. Porque akinmej kipaleuiaj Cristo ijkon kimochiuiliaj circuncisión.
12 Porque onamechtokakej iuan Cristo ijkuak onamechapolaktijkej ken ye okiapolaktijkej. Noijki onamechyolitijkej iuan Cristo porque iuan nanmouikaj uan nankineltokaj tlen toTajtsin Dios okichi ika ichikaualis. Ye okiyoliti Cristo.
13 ToTajtsin Dios okichi xiyoltokan iuan Cristo maski onanmiktokaj porque onantlajtlakolchiuayaj uan ayamo onankimochiuiliayaj circuncisión. Ye otechtlapojpolui ika nochi iyolo.
14 Noijki okipojpolo nochi tlanauatil tlen oijkuilitoka uan otechixnamikiaya. ToTajtsin Dios okipojpolo tlanauatil ijkuak Cristo okimiktijkej itech kouitl.*
15 Ika non tlamantli ye okintlanili tekiuajkej uan akinmej tlanauatiaj. Teixpa okiteititi okintlanili uan yetoskia ken okintsakuato.
16 Ikinon amikaj manamechilui tlen nankikuaskej noso tlen nankoniskej. Noijki amikaj manamechilui kox nanmiluichiuaskej, kox nankiluichiuiliskej yankuik metstli noso kox nanmoseuiskej sábado.
17 Non tlamantli san iekauilo tlen satepan ualaskia pero Cristo iaxka tlen melauak.
18 Amo manamechkixtilikan namotetliokolil akinmej san kiteititiaj yolyamankej uan kinueyichiuaj ángeles. Yejuan san kineltokaj tlen kitaj uan moueyinekij ika intlayejyekol* tlen amitlaj ipati.
19 Akinmej ijkon kichiuaj amo salitokej iuan tsontekomatl. Tsontekomatl kimaka tlen kipoloua cuerpo uan kichiua san sekan mayeto tlen ika sasalitok. ToTajtsin Dios kichiua tsontekomatl makiskalti cuerpo.
20 Tla namejuan onanmikej iuan Cristo para ayakmo nankichiuaskej tlen mokuayejyekouaj* oksekimej, ¿tleka nankichiuaj ken akinmej amo kitekichiuiliaj toTajtsin Dios? ¿Tleka nankintlakamatij* ninmej tlanauatilmej:
21 “Amo xikonana, amo xikyeko, amo xikkitski”?
22 Nonmej tlanauatilmej kijtosneki nochi tlamantli tlen tlajtlami ijkuak kinejnekij.* Ijkon tlanauatiaj uan tlamachtiaj tlakamej.
23 Nonmej tlanauatilmej mota kinpaleuia oksekimej mayetokan ixtlamatkej pero amo kinpaleuia makixtopeuakan tlen kineki incuerpo. Ijkon kinpanoua porque yejuan kipejpenaj ken kiueyichiuaskej toTajtsin Dios. Yejuan kitlajyouiltiaj incuerpo porque kinekij makinmitakan yolyamankej.
Notas
^ Noso “nimonejneuilia”.
^ Xikita diccionario.
^ Noso “intlanemilil”.
^ Noso “monejneuiliaj”.
^ Noso “nankinuelkakij”.
^ Noso “kitekitiltiaj”, “kikuij”.
