Apocalipsis 5:1-14
5 Iyekma akin okatka* ipan trono onikitak se rollo tlen ojka oijkuilitoka. Kuali otsaktoka ika chikome sellos.
2 Noijki onikitak se ángel chikauak. Ye chikauak okijtouaya: “¿Akin kinamiki kitlapos rollo uan noijki isellos?”.
3 Pero amikaj itech iluikak, ipan tlaltikpak nion itlampa tlali ueli okitlapouaya rollo uan kitaskia tlen ompa oijkuilitoka.
4 Sapanoua onichokak porque amikaj okinamikiaya kitlapos rollo uan kitaskia tlen ompa oijkuilitoka.
5 Pero se tlayekanki onechilui: “Ayakmo xichoka. Xikita, yotlatlanki león tlen okiski itech ifamilia Judá uan ixui David. Ye uelis kitlapos rollo uan noijki chikome isellos”.
6 Itlajko trono, intlajko naui querubines* uan intlajko tlayekankej, onikitak omoketoka se ichkatsin tlen omotaya okimiktijkaj. Okinpiaya chikome ikuakonuan uan chikome ixtololouan. (Ixtololouan kijtosneki chikome iespíritus toTajtsin Dios tlen okintitlankej ipan nochi tlaltikpak).
7 Ichkatsin san niman omotoki uan okonanki rollo tlen okatka iyekma akin okatka* ipan trono.
8 Ijkuak Ichkatsin okonanki rollo, naui querubines* uan 24 tlayekankej ixpan omotlankuaketskej. Sejse okipiayaj se arpa uan tazones de oro tlen otentokaj ika kopali. (Kopali kijtosneki ijkuak motlatlaujtiaj akinmej yolchipauakej).
9 Noijki otlakuikayaj se yankuik tlakuikali tlen kijtoua: “Mitsnamiki tikonanas rollo uan tikintlapos isellos, porque omitsmiktijkej uan ika moeso otikinko para toTajtsin Dios akinmej tlatlamantli infamilia, tlatlamantli intlajtol, tlatlamantli inmialtepe uan nouian chantij.
10 Te otikchi mayetokan tekiuajkej uan teopixkej para kitekichiuiliskej toTajtsin Dios. Yejuan tlanauatiskej ipan tlaltikpak”.
11 Onitlachixki uan onikinkak miakej ángeles tlen okiyaualojtokaj trono, querubines* uan tlayekankej. Okatkaj cientos de millones* uan millares de millares.
12 Yejuan chikauak okijtouayaj: “Ichkatsin tlen okimiktijkej kinamiki tlanauatis, kinamiki kiselis tlamantli tlen kualtsin, ixtlamatilistli uan chikaualistli, kinamiki makitlakaitakan, makiueyitlalikan uan makiteochiuakan”.
13 Noijki onikinkak nochtin tlen katej iluikak, ipan tlaltikpak, itlampa tlali uan ijtik mar. Nochtin okijtouayaj: “Akin kajki* ipan trono uan Ichkatsin nochipa makinteochiuakan, makintlakaitakan, makinueyitlalikan uan makipiakan chikaualistli”.
14 Naui querubines* okijtouayaj: “¡Amén!”. Tlayekankej omotlankuaketskej uan okiueyichijkej toTajtsin Dios.
Notas
^ Noso “oeuatoka”, “oyetoka”.
^ Querubines kijtosneki ángeles tlen okachi tlanauatiaj.
^ Noso “oeuatoka”, “oyetoka”.
^ Querubines kijtosneki ángeles tlen okachi tlanauatiaj.
^ Querubines kijtosneki ángeles tlen okachi tlanauatiaj.
^ Ika griego moijtoua “miríadas de miríadas”.
^ Noso “euatok”, “yetok”.
^ Querubines kijtosneki ángeles tlen okachi tlanauatiaj.
