Gálatas 1:1-24
1 Ne niapóstol Pablo. Jesucristo uan toTajtsin Dios onechpejpenkej maniyeto niapóstol uan amo se tlakatl onechpejpenki. ToTajtsin Dios okiyoliti Cristo.
2 Ne uan nochtin tokniuan tlen nouan katej tikintlajkuililiaj tlanechikolmej tlen katej Galacia:
3 ToTajtsin Dios uan toTeko Jesucristo manamechtliokolikan tlen kuali uan manamechmakakan yolseuilistli.
4 Cristo topatka oixpoliuik porque titlajtlakolejkej, para techmakixtis axkan ijkuak onka tlen amo kuali. Ye ijkon okichi tlen kineki toTajtsin Dios.
5 Nochipa makiueyichiuakan toTajtsin Dios. Amén.
6 Nechtlajtlachialtia san niman nankikauaj akin onamechnotski ika itetliokolil Cristo tlen kuali. Noijki nankiseliaj okse tlamachtil ken yetoskia kuali tlajtoli.
7 Nin amo kijtosneki onka okse kuali tlajtoli. Sekimej namechkuejsouaj uan kinekij kipatlaskej kuali tlajtoli tlen kijtoua akin Cristo.
8 Pero makixpolokan akin amo namechmachtis kuali tlajtoli tlen tejuan otimechmachtijkej. Maski tejuan ijkon tikchiuaskej noso maski ijkon kichiuas se ángel tlen kajki iluikak.
9 Ne oksepa namechiluia tlen yonikijto: makixpolokan akin amo namechmachtis kuali tlajtoli tlen onankineltokakej maski san akin ijkon kichiuas.
10 ¿Nikneki manechselikan tlakamej noso manechseli toTajtsin Dios? ¿Nikneki nikinyolpaktis tlakamej? Amo niktekichiuiliskia Cristo tla nikinyolpaktiskia tlakamej.
11 Nokniuan, nikneki xikmatikan kuali tlajtoli tlen onamechtlapoui amo inmiaxka tlakamej.
12 Onechmatilti Jesucristo uan amo onechmatilti se tlakatl nion amikaj onechmachti.
13 Namejuan onankimatkej tlen onikchiuaya ijkuak onikatka itech inreligión judíos. Onankimatkej sapanoua oniktlajyouilti itlanechikol toTajtsin Dios uan oniknekiaya nikpojpolos.
14 Itech inreligión judíos onikintlaniliaya akinmej inuan onimoskalti tlen chantij noaltepe, porque okachi onikchiuaya tlen onechmachtijkej nopapanuan.
15 ToTajtsin Dios okichi maninesi* uan onechnotski porque kitetliokolia tlen kuali. Ye kuali okitak
16 maniktematilti kuali tlajtoli itech okseki altepemej uan ijkon makixmatikan iKone. Ijkuak ye onechpejpenki manikchiua nin tekitl, amikaj oniktlajtlani tlen nikchiuaskia.
17 Noijki amo onia* onikinmitato akinmej yokatkaj apóstoles ompa Jerusalén. Ne onia altepetl Arabia uan satepan onimokopki Damasco.
18 Eyi xiuitl satepan, onia* Jerusalén oniktlajpaloto Cefas* uan ompa onimoka kaxtoli tonal.
19 Pero amo onikinmitak oksekimej apóstoles, san onikitak Santiago ikni toTeko.
20 ToTajtsin Dios kuali kimati melauak tlen namechijkuililia.
21 Satepan onia itech altepemej tlen katej Siria uan Cilicia.
22 Pero amo onechixmatiayaj akinmej omonechikouayaj* Judea uan okichiuayaj ken Cristo.
23 San okikakiayaj oksekimej okijtouayaj: “Tlakatl tlen otechtlajyouiltiaya uan okinekiaya kipojpolos toreligión axkan tetlapouia kuali tlajtoli”.
24 Tlen onechpanok okinpaleui oksekimej makiueyichiuakan toTajtsin Dios.
Notas
^ Noso “manitlakati”.
^ Noso “onitlejkok”.
^ Noso “onitlejkok”.
^ Noijki omotokayotiaya Pedro.
^ Ika griego moijtoua “tlanechikolmej”.
