2 Timoteo 2:1-26
2 Nokone, nochipa ximoyolchikaua ika itetliokolil Cristo Jesús tlen kuali.
2 Nochi tlen onimitstlapoui uan miakej okimatkej, xikinmachti tlakamej tlen kichiuaj kuali inteki uan ijkon kimatiskej ken kinmachtiskej oksekimej.
3 Xikxiko nochi tlen tikijyouis ijkon ken se kuali isoldado Cristo Jesús.
4 Nion se soldado mokajkalakia itech okseki tlamantli para kitlanis tomin tla kineki kiyolpaktis akin okitlali mayeto soldado.
5 Ijkuak mauiltiaj amikaj kiselia corona tla amo motlatlanij ken moneki.
6 Akin chikauak tekipanoua ijkuak tlatoka, moneki ye achto kikuas tlen tlaki.*
7 Nochipa ximokuayejyeko* tlen nimitsiluijtok. ToTeko mitspaleuis nochi xikajsikamati.
8 Xikilnamikto Jesucristo okiyolitijkej uan ye ixui David. Non kuali tlajtoli tlen ne nitetlapouia.
9 Ikinon nitlajyouia uan nitsaktok ken yetoskia onikchi itlaj amo kuali. Pero iTlajtol toTajtsin Dios amikaj uelis kitsakuilis.
10 Ne nochi nikxikoua para kuali mayetokan tlapejpenalmej. Ijkon Cristo Jesús noijki kinpaleuis mamomakixtikan uan nochipa kinteochiuaskej.
11 Nin tlamantli uelis kineltokaskej: tla iuan tiixpoliuiskej noijki iuan tiyoltoskej.
12 Tla titlaxikoskej, noijki iuan titlanauatiskej. Tla tikijtoskej amo tikixmatij, ye noijki kijtos amo techixmati.
13 Tla tejuan amo tikchiuaskej tlen kijtoua toTajtsin Dios, ye nochipa kichiuas tlen kijtoua porque ye amo uelis motlajtolnamikis.
14 Xikinmilnamikti nin tlamantli oksekimej uan ixpan toTajtsin Dios xikinnauati amo mamokualanikan ika tlajtoli tlen amitlaj ipati porque kinmijtlakoua akinmej kikakij.
15 Ximochijchikaua mamitsseli toTajtsin Dios porque kuali tikchiua moteki uan amo moneki tipinauas. Noijki kuali tiknejneki* iTlajtol toTajtsin Dios.
16 Amo xikkaki tlen amitlaj ipati uan kixnamiki toTajtsin Dios porque non kichiua oksekimej makichiuakan tlen amo kuali.
17 Tlen yejuan kijtouaj moxitinis ken se kokolistli tlen kipalanaltia tonakayo. Ijkon kichiuaj Himeneo uan Fileto.
18 Nonmej tlakamej yokikajkej tlen melauak. Kijtojtinemij yokinyolitijkej akinmej yoixpolikej uan kichiuaj ayakmo matlaneltokakan sekimej.
19 Pero toTajtsin Dios okiyektlakxili tlen iaxka, amo molinia uan kipia nin sello: “Jehová kinmixmati akinmej iaxkauan” uan “ayakmo makichiua tlen amo kuali akin kinotsa Jehová ika itoka”.
20 Itech se ueyi kali amo san kinpiaj tepalkamej de oro uan de plata. Noijki kinpiaj de kouitl uan de sokitl.* Seki kinnejnekij* itech se tonal miak ipati pero okseki nochipa kinnejnekij.*
21 Akin amo mouika inuan akinmej yetoskiaj ken tepalkamej tlen nochipa kinnejnekij,* yetos ken se tepalkatl chipauak tlen kinejnekij* itech se tonal miak ipati. Kipaleuis iteko uan kimatis kichiuas nochi tlen kuali.
22 Amo xikchiua tlen kinyoltilana telpochmej, ximochijchikaua xikchiua tlen kuali, xitlaneltoka, xitetlasojtla uan kuali ximouika inuan oksekimej. Ijkon xikchiua inuan akinmej kineltokaj toTeko porque yejuan yolchipauakej.
23 Amo xikinkaki akinmej monanankiliaj ika tlen tetlapololtia uan amitlaj ipati, porque tikmati non san kichiua mamokualanikan.
24 Akin kitekichiuilia toTeko amo moneki mokualanis, nochtin makinyeknotsa, makimati ken tlamachtis uan makixiko ijkuak itlaj kitoktiaj.
25 Noijki mayeto yolyamanki ijkuak kinmachtia akinmej amo kineltokaj tlen tlamachtia. Xamo toTajtsin Dios kinkauilis mamoyolkopakan uan ijkon kuali makajsikamatikan tlen melauak.
26 Ijkon moilnamikiskej uan kisaskej imak itrampa Diablo porque ouetskej imak itrampa para kichiuaskej tlen ye kineki.
Notas
^ Noso “mochiua”, “pankisa”.
^ Noso “ximonejneuili”.
^ Noso “tiktekitiltia”, “tikkui”.
^ Noso “akuitlatl”.
^ Noso “kintekitiltiaj”, “kinkuij”.
^ Noso “kintekitiltiaj”, “kinkuij”.
^ Noso “kintekitiltiaj”, “kinkuij”.
^ Noso “kitekitiltiaj”, “kikuij”.
