2 Timoteo 1:1-18
1 Ne niPablo, niiapóstol Cristo Jesús porque toTajtsin Dios ijkon okinek, para maniktematilti ye yokijto kinmakas yolilistli akinmej katej iuan Cristo Jesús.
2 Nimitstlajkuililia Timoteo, te tinokone tlen nimitstlasojtla:
ToTajtsin Dios uan toTeko Cristo Jesús mamitstliokolikan tlen kuali, mamitsiknomatikan uan mamitsmakakan yolseuilistli.
3 Niktlasojkamatilia toTajtsin Dios uan nochipa nimitsilnamiki ijkuak nimotlatlaujtia tlajka uan youak. Ne nikueyichiua toTajtsin Dios ika notlalnamikilis chipauak ijkon ken okichijkej nouejkatatajuan.
4 Nikilnamiki ken otichokaya ikinon nikneki nimitsitas uan ijkon nipakis.
5 Porque nikilnamiki titlaneltoka ika nochi moyolo ijkon ken achto otlaneltokakej moabuelita Loida uan momama Eunice. Ne nikmati noijki ijkon titlaneltoka.
6 Ikinon nimitsilnamiktia okachi xikmiaktili ken se tlitl tetliokolil tlen toTajtsin Dios omitsmakak ijkuak mopan onikintlali nomauan.
7 Porque espíritu santo tlen kitemaka toTajtsin Dios amo kichiua matimomojtikan. Kichiua matikpiakan chikaualistli, matitetlasojtlakan uan kuali matimokuayejyekokan.*
8 Amo xipinaua titetlapouis akin toTeko. Noijki amo xipinaua porque nitsaktok ipatka toTeko. Xikxiko nochi tlen tikijyouis porque titetlapouia kuali tlajtoli uan xikneltoka toTajtsin Dios mitsmakas chikaualistli para titlaxikos.
9 Ye otechmakixti uan otechnotski matiyetokan tiyolchipauakej, pero amo okichi porque itlaj otikchijkej, ijkon okichi porque kitetliokolia tlen kuali uan ijkon okinek. Ye yiuejkika okiteititi techtlasojtla por Cristo Jesús.
10 Pero axkan kuali yomotak porque omoteititi Cristo Jesús tlen techmakixtia. Ye okipojpolo mikilistli uan ika kuali tlajtoli otechititi ken tikpiaskej se yolilistli uan se cuerpo tlen amo ijtlakaui.
11 Ikinon onechtlalijkej manitetlapoui, maniyeto niapóstol uan manitlamachti.
12 Ikinon nitlajyouia porque nikchiua non tekitl pero amo nipinaua. Porque nikixmati akin nikneltoka uan nikneltoka kimaluis tlen onikmakak makimalui hasta ijkuak ajsis tonal tlaixkomakaskej.
13 Amo keman xikkaua kuali tlajtoli tlen onimitstlapoui. Nochipa xikteititi titlaneltoka uan titetlasojtla ijkon ken kichiuaj akinmej katej iuan Cristo Jesús.
14 Espíritu santo tlen tikpiaj mamitspaleui xikmalui tlamantli miak ipati tlen omitsmakakej.
15 Yitikmati onechkajtejkej nochtin tlakamej tlen chantij Asia. Ijkon okichijkej Figelo uan Hermógenes.
16 ToTeko makinmiknomati akinmej chantij ichan Onesíforo, porque ye nochipa onechyolchika uan amo opinauak maski nitsaktok.
17 Ye onechtemojtinenki ijkuak okatka Roma uan amo omosotla hasta onechajsik.
18 ToTeko Jehová makiknomati ijkuak ajsis tonal tlaixkomakaskej. Te kuali tikmati ken onechpaleui ompa Éfeso.
Notas
^ Noso “matimonejneuilikan”.
