2 Corintios 5:1-21
5 Tocuerpo yetoskia ken se kaltsintli tlen kajki nikan tlaltikpak. Tejuan tikmatij tla xixinis nin kaltsintli, toTajtsin Dios techmakas se kali ompa iluikak kanin nochipa tichantiskej. Non kali amo kichiuaskej tlakamej.
2 Timoyolkokouaj itech nin kali porque tiknekij tikseliskej tokal ompa iluikak. Non kali techtlakentis ken se tlakemitl.
3 Ijkon amo tiyetoskej tixipetsikej ijkuak ika timotlakentiskej.
4 Timoyolkokouaj akinmej tikatej itech nin kaltsintli uan timosotlauaj, pero amo porque tiknekij tikmokixtiliskej nin kaltsintli, ijkon tikmachiliaj porque tiknekij tikmotlaliliskej okse kaltsintli. Yolilistli tlen amo keman tlamis kipatkayotis cuerpo tlen ixpoliui.
5 ToTajtsin Dios otechmakak espíritu santo. Ijkuak ijkon okichi, kijtosneki yotechaxkatili tlen satepan tikseliskej.
6 Tejuan nochipa titlaneltokaj uan tikmatij amo tikatej inauak toTeko porque ok tiyoltokej itech nin cuerpo.
7 Tejuan timoyekanaj ika tlen tikneltokaj uan amo ika tlen tikitaj.
8 Pero titlaneltokaj uan tiknekij tichantiskej iuan toTeko maski ayakmo tiyetoskej itech nin cuerpo.
9 Tejuan tiknekij ye matechseli maski iuan tichantiskej noso maski uejka tiyetoskej.
10 Porque tinochtin tiyetoskej ixpan Cristo uan ye techixkomakas. Ye kitas kox kuali noso amo kuali tlen otikchijkej ika tocuerpo uan techmakas tlen technamiki.
11 Tejuan tikmatij tlen kijtosneki tiktlakaitaskej toTeko, ikinon timochijchikauaj para oksekimej makineltokakan tlen titlamachtiaj. Pero toTajtsin Dios kuali techixmati uan ne nikneki noijki namejuan kuali techixmatikan.
12 Amo tiknekij oksepa namoixpan timoueyinekiskej. Tejuan timechiluiaj tleka moneki topatka nanmoueyinekiskej, para nankinnankiliskej akinmej moueyinekij ika tlen kitaj uan amo ika tlen onka inyolipan.
13 Tla otikuatlapolouayaj, ijkon otikchiuayaj para tikyolpaktiskej toTajtsin Dios. Noijki tla kuali timokuayejyekouaj,* ijkon tikchiuaj para timechpaleuiskej.
14 Itlasojtlalis Cristo technauatia porque yotikitakej se tlakatl inpatka nochtin oixpoliuik, porque yetoskia ken nochtin yoixpolitokaj.
15 Ye inpatka nochtin oixpoliuik ikinon akinmej yoltokej amo makichiuakan san tlen yejuan kinekij. Makichiuakan tlen kineki Cristo porque ye inpatka oixpoliuik uan okiyolitijkej.
16 Axkan tejuan amikaj tikitaj ken oksekimej kinmitaj. Tla tisekimej otikitayaj Cristo ken oksekimej kitaj, axkan ayakmo ijkon tikitaj.
17 Tla ikaj kajki iuan Cristo, toTajtsin Dios kiyankuilia. Yopojpoliuik nochi tlen amo yankuik. Axkan onka nochi tlen yankuik.
18 Pero toTajtsin Dios okichijchi nochi tlen onka. Cristo techpaleuia matimouikakan iuan toTajtsin Dios. ToTajtsin Dios technauatia matikinpaleuikan oksekimej iuan mamouikakan.
19 Nin kijtosneki toTajtsin Dios ika Cristo kinkauilia oksekimej iuan mamouikakan uan amo kilnamiktok intlajtlakol. Ye techkauilia matikinmiluikan oksekimej uelis iuan mouikaskej.
20 ToTajtsin Dios otechtitlanki ipatka Cristo. Yetoskia ken toTajtsin Dios ika tejuan kintlatlaujtia oksekimej. Tejuan tikatej ipatka Cristo ikinon tikintlatlaujtiaj oksekimej mamouikakan iuan toTajtsin Dios.
21 Cristo amo keman otlajtlakolchi pero toTajtsin Dios okitemakak ken se tetliokolil ipatka totlajtlakol. Ijkon ye techpaleuis matiyetokan tiyolkualmej ixpan toTajtsin Dios.
Notas
^ Noso “timonejneuiliaj”.
