¿Uelis tikijtos itech tlen tekiuajkayotl timotlapouiskej?... Kema, itech iTekiuajkayo toTajtsin Dios, nin Tekiuajkayotl kikuepas Tlaltikpak se xochitlali. ¿Mitspaktiskia timomachtis okachi itech nin Tekiuajkayotl?...

Nochi tekiuajkayomej kipiaj intekiua. Uan kinnauatia nochtin tlaltikpaktlakamej tlen katej itech ialtepe. ¿Tikmati akin ueyi Tekiua itech iTekiuajkayo toTajtsin Dios?... Kema, Jesucristo. Axkan ye kajki itech iluikak. ¡Ayakmo uejkauas mochiuas Tekiua itech nochi Tlaltikpak! ¿Timokuayejyekoa tikpiaskej yolpakilistli ijkuak Jesús mochiuas Tekiua itech nochi Tlaltikpak?...

¡Sapanoa tiyolpakiskej! Itech Xochitlali, tlaltikpaktlakamej ayakmo moteuiskej nion ayakmo yaskej itech guerras. Itech nochi Tlaltikpak motlasojtlaskej. Ayakmo ikaj mokokos nion mikis. Akin amo tlachia, tlachias, akin amo tlakaki, tlakakis uan akin amo ueli nejnemi, motlalos uan tsikuinis. Nochtin kipiaskej miak tlakuali. Uan yolkamej kuali mouikaskej noijki touan. Tlaltikpaktlakamej tlen yomikej, kinyolitiskej. Miakej tlakamej uan siuamej tlen otikitakej itech nin  amatlajkuilol ken Rebeca, Rahab, David uan Elías ¡kinyolitiskej! ¿Mitspaktiskia tiyetos inmiuan ijkuak kinyolitiskej?...

Jehová mitstlasojtla uan kineki xiyolpaki. Tla ok timomachtijtos itech Jehová uan tiktlakamatis, ¡uelis tiyoltos pampa nochipa itech se kualtsin xochitlali! ¿Mitspaktiskia?​...