TLAMACHTIL 16
¿Tlen okichi Jesús ijkuak okatka nikan tlaltikpak?
Sekimej mokuayejyekouaj Jesús se konetl, se profeta noso se tlakatl tlen yiixpolitok. Pero tla okachi timomachtiaj tlen okichi, okachi tikixmatiskej. Axkan tikitaskej seki tlamantli tlen okichi Jesús uan ken mitspaleuia tlen okichi.
1. ¿Tlen okachi okipatioitaya kichiuas Jesús?
Jesús okachi okipatioitaya kitematiltis tlen kichiuas iTekiuajkayo toTajtsin Dios (xiktlajtolti Lucas 4:43). Okitematilti san iTekiuajkayo toTajtsin Dios kitlajtlamis nochi tlen techtlajyouiltia. a Jesús omochijchika ijkon tetlapouis eyi xiuitl uan tlajko (Mateo 9:35).
2. ¿Tleka Jesús okichi milagros?
Biblia kijtoua toTajtsin Dios okimakak ichikaualis Jesús uan ijkon okichi miak milagros (Hechos 2:22). ToTajtsin Dios okimakak ichikaualis Jesús uan ijkon okitlakaualti ejekakiauitl, miakej okintlamakak, okinpajti uan sekimej okinyoliti (Mateo 8:23-27; 14:15-21; Marcos 6:56; Lucas 7:11-17). Nochi milagros tlen Jesús okichi okiteititi toTajtsin Dios okiualtitlanki. Noijki okiteititi toTajtsin Dios uelis kitlajtlamis nochi tlen techtlajyouiltia.
3. ¿Tlen techmachtia tlen Jesús okichi?
Jesús nochipa okitlakamatki Jehová (xiktlajtolti Juan 8:29). Okitlakamatki maski sekimej okixnamikej. Ijkon otechititi maski titlajyouiaj uelis tiktekichiuiliskej Jehová uan ‘tikchiuaskej tlen ye okichi’ (1 Pedro 2:21).
MATIMOMACHTIKAN
Matikitakan ken okitematiltiaya Jesús tlen kichiuas toTajtsin Dios uan ken okinchiuaya milagros.
4. Jesús otetlapoui
Jesús uejka oyajki para miakej kintlapouis tlen kichiuas toTajtsin Dios. Xiktlajtoltikan Lucas 8:1 uan satepan xikitakan tlen namechmachtia.
-
¿Okintlapoui Jesús san akinmej okitemouayaj?
-
¿Kanin noijki otetlapouiaya Jesús?
ToTajtsin Dios okitematilti Mesías tetlapouiskia. Xiktlajtoltikan Isaías 61:1, 2 uan satepan xikitakan tlen namechmachtia.
-
¿Ken okichi Jesús tlen kijtoua nin profecía?
-
Tlen tikijtoua tejuatsin, ¿noijki axkan moneki matiktematiltikan tlen kichiuas toTajtsin Dios?
5. Tlen Jesús otlamachti techpaleuia
Jesús otetlapoui tlen kichiuas toTajtsin Dios pero noijki okinmititi akinmej okintlapouiaya tlen omonekiaya kichiuaskej para nochipa yolpakiskej. Matikitakan tlen otlamachti itech Tepetl. Xiktlajtoltikan Mateo 6:14, 34 uan 7:12 uan satepan xikitakan tlen namechmachtia.
-
¿Tlen tlamantli tlen okijto Jesús uelis techpaleuis?
-
¿Uelis techpaleuis axkan tlen ye okijto?
6. Jesús okinchi milagros
Jehová okimakak ichikaualis para makichiua milagros. Para tikitas se milagro tlen ye okichi, xiktlajtoltikan Marcos 5:25-34 noso xikitakan VIDEO uan satepan xikitakan tlen namechmachtia.
-
Ijkon ken otikitakej itech video, ¿tlen okineltokaya siuatl?
-
¿Tlen omitspakti ijkuak Jesús okichi nin milagro?
Xiktlajtoltikan Juan 5:36 uan satepan xikitakan tlen namechmachtia.
-
¿Tlen “kiteititia” milagros tlen okichi Jesús?
¿Otikmatiaya?
Nochi tlen okichi Jesús ijkuilitok itech naui Evangelios tlen kipia Biblia. Naui Evangelios okijkuilojkej Mateo, Marcos, Lucas uan Juan. Yejuan okijkuilojkej tlen okichi Jesús. Nochi tlen okijkuilojkej amo motlajtolnamiki uan techpaleuia matikajsikamatikan tlen okichi.
-
MATEO
ye akin achto otlajkuilo. Okijkuilo tlen otlamachti Jesús uan tlen okintlapoui itech iTekiuajkayo toTajtsin Dios.
-
MARCOS
amo miak otlajkuilo pero ompa tikajsij miak tlamantli kualtsin.
-
LUCAS
okijkuilo moneki matimotlatlaujtikan uan noijki okijkuilo Jesús okintlakaitak siuamej.
-
JUAN
okijkuilo ken okipiaya iyelis Jesús porque okijkuilo ken omotlapouiaya inuan akinmej omouikaya uan oksekimej.
SEKIMEJ KIJTOUAJ: “Jesús okatka yolkuali pero toTajtsin Dios amo okipejpenki”.
-
¿Tlen timokuayejyekoua tejuatsin?
XIKILNAMIKTO
Jesús otetlapoui itech iTekiuajkayo toTajtsin Dios, okinchi milagros uan nochipa otetlakamatki.
Matikojpauikan
-
¿Tlen okachi okipatioitaya kichiuas Jesús ijkuak okatka nikan tlaltikpak?
-
¿Tlen okiteititi milagros tlen okichi?
-
¿Tlen tlamantli tlen okijto Jesús uelis techpaleuis?
NIN NOIJKI MITSPAKTIS
¿Tlen nochipa otetlapouiaya Jesús?
“¿Tleka Jesús kipatioita iTekiuajkayo toTajtsin Dios?” (Akin Tetlapouijtok, 1 de octubre 2014)
Xikita tleka tikneltokaj Jesús melauak okinchi milagros.
“¿Tlen techmachtiaj milagros tlen okichi Jesús?” (Akin Tetlapouijtok, 15 de julio 2004)
Xikita ken okipaleui se tlakatl makipatla inemilis ijkuak omomachti Jesús okinpaleui oksekimej.
Xikita tlen okipanotia Jesús.
a Itech tlamachtil 31 hasta 33 moyekijtos tlen kijtosneki iTekiuajkayo toTajtsin Dios.
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
