1, 2. ¿Tlen tlamantli ualeua timotlajtlaniaj?

KONEMEJ kinekij kimatiskej miak tlamantli. Ijkuak itlaj tikinyekiluiaj, ualeua techtlajtlaniaj: “¿Tleka ijkon?”. Maski kuali yotikinnankilijkej, oksepa techtlajtlaniaj: “¿Tleka?”.

² Tinochtin timotlajtlaniaj miak tlamantli. Ualeua timotlajtlaniaj tlen tikkuaskej, ken timotlakentiskej noso tlen tikmokouiskej. Xamo noijki timotlajtlaniaj tleka tiyoltokej uan ken tiyetoskej satepan. Pero ayakmo itlaj titetlajtlaniskej tla amo kuali technankiliaj.

3. ¿Tleka miakej amo kitemoaj tlen kijtosneki tlen motlajtlaniaj?

³ Miak ipati tlen miakej motlajtlaniaj pero amo kitemoaj tlen kijtosneki. ¿Tleka? Miakej kineltokaj itech Biblia kajsiskej tlen kinekij kimatiskej pero kijtoaj oui kajsikamatiskej. Xamo mokuayejyekoaj san akinmej tlamachtiaj uan teopixkej kimatij tlen kijtosneki tlen kinekij kimatiskej. Ik non, sekimej pinauaj tetlajtlaniskej tlen amo kimatij. ¿Tejuatsin tlen timokuayejyekoa?

4, 5. 1) ¿Tlen tikneki tikmatis? 2) ¿Tleka moneki xiktemo tlen tikneki tikmatis?

⁴ Xamo noijki timotlajtlania: “¿Tleka tiyoltokej? ¿Tlen techpanoa ijkuak tiixpoliuij? ¿Tleka tlajyouiaj akinmej yolkualmej?”. ToTeko Jesús okijto: “Xiktlajtlanikah tlan nomechpoloa iwa nomechmakaskeh. Xiktemokah tlan nomechpoloa iwa nonkajsiskeh, xitenotsakah kan kaltentli iwa nomechtlatlapoliskeh” (Mateo  7:7). Ik non, amo ximosotlaua, ximochijchikaua uan tikajsis tlen tikneki tikmatis.

⁵ Itech Biblia tikajsis tlen tikneki tikmatis (Proverbios 2:1-5). Amo oui tikajsikamatis tlen kijtoa. Tlen timomachtis mitspaleuis xiyolpaki. Noijki mitsyolchikauas tikmatis nochi tlen toTajtsin Dios kichiuas. Axkan ma tikitakan se tlamantli tlen miakej motlajtlaniaj.

6. ¿Tleka miakej kijtoaj toTajtsin Dios amo kitekipachoa tlen techpanoa?

⁶ Miakej kijtoaj toTajtsin Dios amo kitekipachoa tlen techpanoa. Kijtoaj: “Amo titlajyouiskiaj tla toTajtsin Dios totech motekipachoskia”. San kanin onka guerras, miakej mokokoliaj uan sekimej apismikij. Noijki miakej mokokoaj, tlajyouiaj uan ixpoliuij. Ik non, sekimej kijtoaj: “Tla toTajtsin Dios melauak totech motekipachoa, ¿tleka amo kitlajtlamia tlen techtlajyouiltijtok?”.

7. 1) ¿Tleka miakej kineltokaj toTajtsin Dios techtlajyouiltia? 2) ¿Ken tikmatij amo itlajtlakol toTajtsin Dios ma pano tlen amo kuali?

⁷ Ijkuak panoa itlaj tlen amo kuali, akinmej tlayekanaj itech religiones kijtoaj toTajtsin Dios ijkon okinekiaya ma pano, kijtosneki ye kitlajtlakoltiaj. Ik non, miakej kineltokaj amo yolkuali. Pero ye amo keman techtlajyouiltia. ¿Ken tikmatij? Biblia kijtoa toTajtsin Dios amikaj kiyejyekoa ika tlen amo kuali. Santiago 1:13 kijtoa: “Ijkuak itla nomechyoltilana, amo xikijtokah Dios onomechtokti manomechyoltilana tlan amo kuali. Porke n amokuali amo weletis kitoktis Dios matlajtlakolchiwa, nion Dios weletis  amaka kiyoltilanas matlajtlakolchiwa”. ToTajtsin Dios kitekauilia ma pano tlen amo kuali pero amo itlajtlakol ijkuak ijkon panoa (xiktlajtolti Job 34:10-12). Ma tikitakan itlaj tlen techpaleuis ma tikajsikamatikan.

8, 9. ¿Tlen neskayotl kiteititia amo itlajtlakol toTajtsin Dios titlajyouiaj?

⁸ Ma tikijtokan se tlakatl sapanoa kitlasojtla ikone uan kititia ma kichiua tlen kuali. Ijkuak moskaltia non konetl, ayakmo kineki kitlakamatis itajtsin uan oksekan chantiti. Peua kichiua tlen amo kuali uan tlajyouia. ¿Tikijtoskia itlajtlakol itajtsin tlajyouia porque okikauili ma uia? Amo (Lucas 15:11-13). Nin tlamantli techititia amo kuali ma tiktlajtlakoltikan toTajtsin Dios ijkuak titlajyouiaj. Ijkuak tlaltikpaktlakamej okinekej kichiuaskej tlen amo kuali uan amo okitlakamatkej, ye amo okintsakuili. Ik non, amo ma tiktlajtlakoltikan toTajtsin Dios ijkuak techpanoa tlen amo kuali.

⁹ ToTajtsin Dios kitekauilia ma pano tlen amo kuali, pero ye kimati tleka kitekauilia. Itech tlamachtil 11 tikitas tlen kijtoa Biblia itech non tlamantli. Uelis tikneltokaskej ika nochi toyolo toTajtsin Dios techtlasojtla uan amo itlajtlakol titlajyouiaj. San ye kipojpolos nochi tlen techtlajyouiltijtok (Isaías 33:2).

10. ¿Tleka uelis tikneltokiliskej toTajtsin Dios kiyektlalis nochi tlen amo kuali?

¹⁰ ToTajtsin Dios santo (Isaías 6:3). Nochi tlen kichiua chipauak uan kuali. Ik non, uelis tikneltokaskej tlen techiluia. Pero tejuan amo tisantos ken toTajtsin Dios. Ualeua tikchiuaj tlen amo kuali. Noijki maski ualeua tekiuajkej kinekij tlapaleuiskej, amo ueli kiyektlaliaj nochi tlen panotok. San toTajtsin Dios uelis kiyektlalis,  ik non, ika nochi toyolo uelis tikneltokiliskej kineki kiyektlalis nochi tlen amo kuali uan kimati ken kichiuas. Ye noijki kinmixpolos akinmej amo yolkualmej (xiktlajtolti Salmo 37:9-11).

11. ¿Ken momachilia toTajtsin Dios ijkuak titlajyouiaj?

¹¹ ¿Ken momachilia toTajtsin Dios ijkuak techpanoa tlen amo kuali? Biblia kijtoa ye kipaktia kichiuas nochi ika melajkayotl (Salmo 37:28). Ye kita nochi tlen kuali uan tlen amo kuali panoa. Sapanoa motekipachoa ijkuak titlajyouiaj. Biblia kijtoa “sapanoa omoyolkoko” ijkuak yiuejkika miakej okichijkej tlen amo kuali (Génesis 6:5, 6). ToTajtsin Dios amo keman kipatla iyelis (Malaquías 3:6). Biblia kijtoa kitekipachoa nochi tlen techpanoa (xiktlajtolti 1 Pedro 5:7).

12, 13. 1) ¿Tleka titetlasojtlaj? 2) ¿Ken timomachiliaj ijkuak tikitaj sekimej tlajyouiaj? 3) ¿Tleka uelis tikneltokaskej toTajtsin Dios kitlajtlamis nochi tlen techtlajyouiltia uan tlen amo kuali?

¹² Biblia techiluia toTajtsin Dios otechchijchi ken ye (Génesis 1:26). Non kijtosneki uelis tikpiaskej toyelis ken ye. Biblia kijtoa: “Dios Ye n tlasojtlálistli” (1 Juan 4:8). Nochi tlen kichiua kiteititia techtlasojtla. Tejuan titetlasojtlaj porque ye tetlasojtla. Ik non, tla timoyolkokoaj ijkuak tikitaj tlajyouiaj akinmej amitlaj okichijkej, toTajtsin Dios okachi moyolkokoa.

¹³ Ximokuayejyeko, tla uelis tiktlajtlamiskia nochi tlen techtlajyouiltia uan tlen amo kuali, ¿tikchiuaskia? Kema tikchiuaskia porque titetlasojtla, ik non, ¿tlen kichiuas toTajtsin Dios? Kitlajtlamis nochi tlen techtlajyouiltia uan tlen amo kuali. Kichiuas porque  techtlasojtla uan sapanoa chikauak. Ik non, ika nochi moyolo uelis tikneltokas melauak mochiuas nochi tlen achto yotikitakej. Pero moneki kuali tikixmatiskej toTajtsin Dios tla tiknekij tikneltokaskej tlen yokijto.

14. 1) ¿Ken itoka toTajtsin Dios? 2) ¿Ken tikmatij kineki ijkon ma tiknotsakan?

¹⁴ Tla tikneki ikaj tikixmatis, achto tikiluia motoka. Pero ¿toTajtsin Dios kipia itoka? Miakej religiones san kijtoaj Dios noso toTeko, pero amo ijkon itoka. Non san ken tikijtoskiaj “tekiua”. ToTajtsin Dios techiluia ye itoka Jehová. Biblia kijtoa: “Para nochtin ma kimatikan te motoka Jehová, san te okachi tiUeyititok ipan nochi tlaltikpak” (Salmo 83:18 [itech okseki Biblias kajki itech 82:19]). Ye kineki ma tikmatikan ken itoka uan ijkon ma tiknotsakan. ¿Ken tikmatij? Akinmej okijkuilojkej Biblia miak uelta okijkuilojkej itoka (Éxodo 3:15; 6:3). ToTajtsin Dios kineki iuan ma timouikakan, ik non, techiluia itoka.

15. ¿Tlen kijtosneki tokayotl Jehová?

¹⁵ Miak ipati tlen kijtosneki tokayotl Jehová. Kijtosneki toTajtsin Dios kichiua nochi tlen kijtoa uan tlen  kineki. Amikaj nion amitlaj uelis kitsakuilis. San ye kinamiki ijkon motokayotis. *

16, 17. 1) ¿Tleka Jehová ‘nochi weleti kichiwa’ 2) ¿Tleka Jehová “Torey non nochipa yolitok”? 3) ¿Ken tikmatij Jehová okichijchi nochi tlen onka?

¹⁶ Yotikitakej Salmo 83:18 kijtoa: “San te [Jehová] okachi tiUeyititok”. Biblia noijki kitekitiltia okseki tlajtolmej ijkuak kijtoa ken iyelis Jehová.  Apocalipsis 15:3 kijtoa: “Saikpanoa weyi iwa kuajkualtsi nochi tlan otikchijchi, Totajtsi Dios Akin nochi weleti tikchiwa”. ¿Tlen kijtosneki ijkuak kijtoa “nochi weleti tikchiwa”? Kijtosneki san ye akin kipia sapanoa miak chikaualistli, amikaj okse ken ye. Noijki 1 Timoteo 1:17, kijtoa Jehová “Torey non nochipa yolitok”. Non kijtosneki Jehová amo keman oneski nion amo keman ixpoliuis. Salmo 90:2 kiyekijtoa nochipa yetos. ¡Non melauak techtlajtlachialtia!

¹⁷ Biblia noijki kijtoa Jehová okichijchi nochi tlen onka. Apocalipsis 4:11 kijtoa: “Toteko Dios, sanwel Tejwatsi moaxka n weyílistli, mawistílistli iwa n weletílistli. Porke Tejwatsi otikchijchi nochi tlan onka, iwa tejwatsi otikmonekilti mayetokah, yika otikinchijchi”. Jehová okinchijchi ángeles, sitlalimej, tlakilotl, michimej uan nochi tlen onka.

18. 1) ¿Tleka sekimej mokuayejyekoaj amo uelis timouikaskej iuan toTajtsin Dios? 2) Pero ¿tlen kijtoa Biblia?

¹⁸ Sekimej momojtiaj ijkuak kajsikamatij ken iyelis Jehová. Mokuayejyekoaj amo kitekipachoa tlen techpanoa porque ueyititok, sapanoa chikauak uan noijki uejka kajki. Pero toTajtsin Dios amo kineki ijkon ma timokuayejyekokan. Ye kineki iuan ma timouikakan. Biblia kijtoa “Dios amo wejka kajki de tejwah tinochteh” (Hechos 17:27). Ye kineki xikixmati. Tla ijkon tikchiuas, motech motokis uan noijki mouan mouikas (Santiago 4:8).

19. 1) ¿Ken uelis timouikas iuan toTajtsin Dios? 2) ¿Tlen okachi mitspaktia itech iyelis Jehová?

¹⁹ ¿Ken uelis timouikas iuan toTajtsin Dios? Jesús okijto: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3). Tla okachi timomachtis itech Jehová uan Jesús, okachi tikinmixmatis uan inmiuan timouikas. Noijki tikpias yolilistli tlen amo keman tlamis. Yotimomachti toTajtsin Dios “Ye tlasojtlálistli” (1 Juan 4:16). Pero Biblia noijki kijtoa ye “teiknomatki uan teajsikamatki, amo san niman kualani uan sapanoa kipia tlasojtlalistli yolmelajki uan kijtoa tlen melauak” (Éxodo 34:6). Noijki kijtoa Jehová ‘yolkuali uan kineki tetlapojpoluis’ (Salmo 86:5). Ye kimati mochias uan kichiua tlen kijtoa (2 Pedro 3:9; 1 Corintios 1:9). Ijkuak timomachtijtias Biblia okachi kuali tikixmatis.

20, 21. ¿Ken uelis timouikas iuan toTajtsin Dios tla amo ueli tikita?

²⁰ ¿Ken uelis timouikas iuan toTajtsin Dios tla amo ueli tikita? (Juan 1:18; 4:24; 1 Timoteo 1:17).  Biblia mitspaleuis xikajsikamati ye melauak kajki (Salmo 27:4; Romanos 1:20). Ijkuak okachi tikixmatis Jehová, okachi tiktlasojtlas uan kuali iuan timouikas.

²¹ Tikmatis Jehová ye toTajtsin uan techtlasojtla (Mateo 6:9). Ye otechchijchi uan kineki kuali ma tiyetokan, ijkon ken se teta kintlasojtla ikoneuan uan kineki kuali ma yetokan (Salmo 36:9). Biblia kijtoa uelis iuan timouikas (Santiago 2:23). Akin okichijchi nochi tlen onka kineki iuan ximouika, ¡non se tlateochiualistli!

22. ¿Tlen moneki tikchiuas tla sekimej amo kinekij ximomachti Biblia?

²² Sekimej mitsiluiskej ayakmo ximomachti Biblia. Xamo amo kinekij xikpatla moreligión. Pero ¿tlen moneki tikchiuas tla oksekimej amo kinekij ximouika iuan Jehová? Amo xikchiua tlen mitsiluiaj, okachi kuali tla tikpejpena timouikas iuan toTajtsin Dios.

23, 24. 1) ¿Tleka moneki tikijtos tlen amo tikajsikamati? 2) ¿Tlen tikitaskej itech okse tlamachtil?

²³ Xamo seki tlamantli amo tikajsikamatis ijkuak timomachtijtias Biblia. Pero xikilui akin mitsmachtia ma mitspaleui uan xikilui tlen amo tikajsikamati. Jesús okijto moneki ma tiyetokan tiyolyamankej ken konemej. Yotikitakej konemej kinekij kimatiskej miak tlamantli (Mateo 18:2-4). ToTajtsin Dios kineki xikajsikamati tlen tikneki tikmatis. Ik non, kuali ximomachti Biblia uan xikita kox melauak tlen timomachtijtok (xiktlajtolti Hechos 17:11).

²⁴ Tla timomachtis Biblia, okachi kuali tikixmatis Jehová. Itech okse tlamachtil tikitaskej tleka amo onka okse amochtli ken Biblia.