TLAPOUALISTLI 67

Jehosafat omotenmachiaya itech Jehová

¿TIKMATI akinmej ninmej tlakamej uan tlen kichijtokej? Yaui itech guerra, uan tlakamej akinmej yauij tlaixpan tlakuikatokej. Uelis timotlajtlania: ‘¿Tleka akinmej tlakuikatokej amo kipiaj espadas nion lanzas pampa ika moteuiskej?’. Ma tikitakan.

Jehosafat okatka ueyi tekiua itech ome inechikoluan altepetl Israel. Okatka ijkuak ueyi tekiua Acab uan Jezabel otlanauatiayaj itech majtlaktli nechikolmej. Maski ijkon, Jehosafat okatka se ueyi tekiua yolkuali, uan itajtsin Asá noijki okatka yolkuali. Ik non, itech miak xiuitl tlaltikpaktlakamej itech ome nechikolmej okipiayaj se kuali nemilistli.

Maski ijkon, opanok itlaj tlen okinmomojti tlaltikpaktlakamej. Sekimej tlakamej okiluijkej Jehosafat: ‘Miakej soldados tlen chantij itech altepemej Moab, Ammón uan itech tepetl Seír, uitsej pampa mitsteuiskej’. Miakej israelitas omonechikojkej itech Jerusalén pampa okinekiayaj Jehová ma kinpaleui. Oyajkej itech teokali uan ompa Jehosafat omotlatlaujti: ‘Oh Jehová, toTajtsin Dios, amo tikmatij tlen tikchiuaskej. Amo uelis tikintlaniliskej pampa miakej soldados. Xitechpaleui’.

Jehová okikak, uan okichi se itekipanojki ma kilui altepetl: ‘Nin guerra amo namoaxka, iguerra toTajtsin Dios. Namejuan amo nanmoteuiskej. San xitlachiakan uan xikitakan ken Jehová namechmakixtis’.

Mostlatika, Jehosafat okilui altepetl: ‘¡Ximotenmachiakan itech Jehová!’. Ijkuakon, iyekapan soldados okintlali sekimej tlakamej akinmej otlakuikayaj, uan ijkuak onejnemiayaj okitlakuikiliayaj Jehová. ¿Tikmati tlen opanok ijkuak yoajsitokaj kanin mochiuaskia guerra? Jehová okichi soldados akinmej okinkokoliayaj israelitas san yejuan ma moteuikan. ¡Uan ijkuak israelitas oajsikej, nochtin soldados akinmej okinkokoliayaj yomikej!

Jehosafat okatka ixtlamatki pampa omotenmachiaya itech toTajtsin Dios, ¿amo melauak? Tla tejuan noijki ijkon tikchiuaj, tiyetoskej tiixtlamatkej.

1 Reyes 22:41-53; 2 Crónicas 20:1-30.