TLAPOUALISTLI 61

David okitlalijkej ken ueyi tekiua

SAÚL oksepa kineki kikitskis David. Kinuika 3,000 soldados akinmej okachi chijchikauakej pampa kitemoskej. Ijkuak David kimati nin, kintitlani sekimej soldados ma tlachiatij ichtaka kanin mokajtok Sául itech non yoak. Ijkuakon, David kintlajtlania ome soldados: ‘¿Akin kineki yas nouan kanin kajki Saúl?’.

Abisai okijto: ‘Ne nias’. Abisai okatka ikone Zeruyá, iuelti David. Ijkuak Saúl uan isoldados okochkej, David uan Abisai ichtaka okalakej kanin okatka Saúl. Okiuikakej ilanza Sául uan iakontsin, tlen okatkaj inakastlan itsonteko. Amo akaj okinmitak nion okinkakej pampa nochtin yejuan okochtokaj.

Axkan xikinmita David uan Abisai. Ocholojkej, uan yokatkaj ipan se tepetl. David okitsajtsili akin okinyekanaya isoldados Israel: ‘Abner, ¿tleka amo tikmaluijtok moteko, ueyi tekiua? ¡Xikita! ¿Kanin kajki ilanza uan iakontsin?’.

Sául oijsak. Okitenkak ye David uan okitlajtlani: ‘¿Te tiDavid?’. ¿Ueli tikinmita Saúl uan Abner ne tlakxitlan?

David otlanankili: ‘Kema, tlakatsintli noueyi tekiua’. Uan David okitlajtlani: ‘¿Tleka tikneki tinechkitskis? ¿Tlen tlamantli tlen amo kuali onikchi? Nikan nikpia molanza, oh ueyi tekiua. Akaj ma kikuiki’.

Saúl okijto: ‘Yonikchi tlen amo kuali. Yonimokuapolo’. Ijkuakon, David oyajki, uan Saúl omokuepki ikalijtik. Maski ijkon, David omoilui: ‘Se tonal Saúl oksepa kinekis nechmiktis. Moneki nicholos itech inueyi altepetl filisteos’. Uan ijkon okichi. David ueli okinkajkaya filisteos uan okichi ma kineltokakan kinpaleuiskia.

Opanok kauitl uan filisteos oksepa omoteuijkej iuan Israel. Ijkuak omoteuijtokaj, Saúl uan Jonatán omikej. Ik non, David omoyolkoko miak, uan ye okijkuilo se kuajkualtsin tlakuikal, kanin otlakuikak: ‘Nimoyolkokoa miak pampa te, nokni, Jonatán. ¡Melauak onimitstlasojtlaya!’.

Satepan opanok nin, David omokuepki Israel, itech altepetl Hebrón. Ompa omoteuijkej tlakamej akinmej okipejpenkej Is-bóset, ikone Saúl, pampa mochiuaskia ueyi tekiua iuan oksekimej tlakamej akinmej okinekiayaj David ma yeto ueyi tekiua. Saiktlami, tlakamej akinmej okipejpenkej David otlatlankej. David okipiaya 30 xiuitl ijkuak omochi ueyi tekiua. Itech chikomej xiuitl uan tlajko otlanauati itech Hebrón. Ompa okinpixki sekimej ikoneuan David tlen omotokayotiayaj Amnón, Absalón uan Adonías.

Satepan, David uan isoldados okimoaxkatijkej kualtsin altepetl Jerusalén. Joab, okse ikone Zeruyá, iuelti David, otlayekanaya itech non guerra. Ik non, David okimakak se tlatliokolil: okitlali pampa kinyekanaskia nochtin isoldados. Axkan, David opejki tlanauatia itech altepetl Jerusalén.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.