TLAPOUALISTLI 47

Se ichteki itech Israel

¡XIKITA tlen kitlalpachojtok nin tlakatl itech imantajkali! Se tlakentli kuajkualtsin, oro uan sekimej tlamantli tlen chijchijtok ika plata. Nin okiualikak itech Jericó. Maski ijkon, ¿tlen omonekiaya kichiuiliskej ninmej tlamantli tlen okatka itech Jericó? ¿Tikilnamiki?

Omonekiaya kixpoloskej, uan oro uan plata kiuikaskiaj itech itabernáculo Jehová. Ninmej tlaltikpaktlakamej amo okitlakamatkej toTajtsin Dios. Okichtekej tlen iaxka toTajtsin Dios. Nin tlakatl omotokayotiaya Acán, uan inauak okatkaj sekimej ichanejkauan. Ma tikitakan tlen opanok.

Satepan Acán okichteki ninmej tlamantli, Josué okintitlanki sekimej tlakamej pampa moteuiskej iuan altepetl Hai. Maski ijkon, altepetl okintlanili israelitas. Sekimej omikej, uan oksekimej ocholojkej. Josué omoyolkoko miak. Omokuatolo, okitlatlaujti Jehová uan okijto: ‘¿Tleka tikaua ma techpano nin tlamantli?’.

Jehová okinankili: ‘¡Ximeua! Israel otlajtlako. Okitilankej tlamantli tlen moixpoloskia noso tlen motemakaskia itech tabernáculo. Okichtekej sekimej tlamantli uan amo itlaj okijtojkej. Amo nikinteochiuas tla amo kixpoloskej tlen okichtekej uan akin okintilanki ninmej tlamantli’. Jehová okijto kititiskia Josué akin tlakatl tlen amo yolkuali.

Ik non, Josué okinechiko nochi altepetl, uan Jehová okiteititi tlakatl tlen amo yolkuali, Acán. Acán okijto: ‘Onitlajtlako. Onikitak se tlakentli kuajkualtsin, oro uan sekimej tlamantli tlen chijchijtok ika plata. Onechpakti miak ninmej tlamantli uan onikinuikak. Uelis nankajsiskej nochi itech nomantajkali, kanin onikintlalpacho’.

Ijkuak okajsikej tlamantli uan okiualikilijkej Josué, ye okilui Acán: ‘¿Tleka otitechtlajyouilti? ¡Axkan Jehová mitstlajyouiltis!’. Ijkuakon, nochtin israelitas okimojmotlakej Acán uan ichanejkauan ika tetl uan ijkon omikej. ¿Amo techmachtia nin amo itlaj ma tikonanakan tlen amo toaxka?

Satepan, Israel oksepa oyajki Hai pampa iuan moteuiskia. Axkan Jehová okinpaleui, uan yejuan otlatlankej.

Josué 7:1-26; 8:1-29.