TLAPOUALISTLI 55

Se chokotsin okitekichiuili toTajtsin Dios

¿AMO melauak kuajkualtsin nin chokotsin? Itoka Samuel. Uan tlakatl akin kitlalijtok ima ipan itsonteko chokotsin ye ueyi teopixki itech Israel, itoka Elí. Uan akinmej kiualikaj Samuel ixpan Elí, yejuan itatajuan Samuel, Elqaná uan Ana.

Samuel san okipiaya naui noso makuili xiuitl. Maski ijkon, axan yichantis itech itabernáculo Jehová iuan Elí uan oksekimej teopixkamej. ¿Tleka Elqaná uan Ana kiualikaj se chokotsin ken Samuel pampa kitekichiuilis Jehová itech tabernáculo? Ma tikitakan.

Sekimej xiuitl achto, Ana omoyolkokoaya miak. Ijkon okipanoaya pampa amo ueli okipiaya se ikone, uan kema okinekiaya kipias se konetl. Ik non, se tonal ijkuak Ana oyajki itech itabernáculo Jehová, omotlatlaujti: ‘¡Ay, Jehová, amo xinechilkaua! Tla te tikchiua ma nikpia se konetl, nimitsmaka notlajtol, nimitsmakas pampa ye uelis mitstekichiuilis nochi iyolilis’.

Jehová okinankili itlatlaujtilis Ana, uan sekimej metstli satepan okipixki Samuel. Ana okitlasojtlaya ikonetsin, uan ik non, ijkuak okatka konetsintli opejki kimachtia itech Jehová. Okilui inamik: ‘Ijkuak Samuel okachi yikipias xiuitl uan ayakmo monekis nikmaluis, nikuikas itech tabernáculo pampa ompa ma kitekichiuili Jehová’.

Itech tlaixkopinal non tikitaj kichijtokej Ana uan Elqaná. Uan pampa itatajuan kuali okimachtijkej, Samuel oyolpakik pampa uelis kitekichiuiliskia Jehová itech imantajkali. Sejse xiuitl itatajuan oyayaj pampa kiueyichiuaskiaj Jehová itech imantajkali, uan pampa kitlajpaloskiaj ikone. Uan sejse xiuitl, Ana okiuikiliaya se yankuik itlaken makotonki tlen okichijchiuiliaya Samuel.

Opanok xiuitl, uan Samuel ok okitekichiuiliaya Jehová itech itabernáculo, uan okiyolpaktiaya Jehová uan altepetl. Maski ijkon, ikoneuan ueyi teopixki Elí, Ofní uan Finehás, yejuan amo okatkaj yolkualmej. Okichiuayaj miak tlamantli tlen amo kuali, uan noijki okichiuayaj oksekimej amo ma kitlakamatikan toTajtsin Dios. Elí omonekiaya kinkixtis ken teopixkamej, maski ijkon, amo okichi.

Telpochtli Samuel amo keman okika kitekichiuilis Jehová, maski okitak opanotoka tlamantli tlen amo kuali itech tabernáculo. Itech miak kauitl Jehová amo okinotsaya nion se tlakatl, pampa amo okatkaj miakej akinmej melauak okitlasojtlayaj. Ijkuak Samuel okachi omoskalti, nin opanok:

Samuel okochtoka itech tabernáculo uan akaj okinotski. Ye otlanankili: ‘Nikan nika’. Uan omeuak uan omotlalo okitato Elí, uan okilui: ‘Otinechnotski, uan nikan nika’.

Uan Elí okinankili: ‘Ne amo onimitsnotski; oksepa xikochiti’. Uan Samuel oksepa omokuepki itech itlapech.

Ijkuakon, ojpa okinotski: ‘¡Samuel!’. Ik non, Samuel omeuak uan oyajki okitato Elí. Uan okilui: ‘Otinechnotski, uan nikan nika’. Uan Elí okinankili: ‘Amo onimitsnotski nokone. Oksepa ximotekati’. Ik non, Samuel oksepa omokuepki itech itlapech.

‘¡Samuel!’ eyijpa oksepa okinotski. Ik non, Samuel omotlalo okitato Elí. Okilui: ‘Nikan nika; axkan kema otinechnotski’. Axan Elí okimatki ye Jehová akin okinotsaya. Okilui Samuel: ‘Oksepa ximoteka, uan tla ye mitsnotsa, moneki tikiluis: “Xitlajto, Jehová, motekipanojka mitskaki”’.

Ijkon okijto Samuel ijkuak Jehová oksepa okinotski. Axkan Jehová okilui Samuel kintlajyouiltiskia Elí uan ikoneuan. Satepan, Ofní uan Finehás omikej ijkuak omoteuijkej iuan filisteos, uan ijkuak Elí okikak tlen opanok, ouetski, omokechpostek uan omikik. Uan ijkon omochi itlajtol Jehová.

Samuel omoskalti, uan ye omochi saiktlami juez itech Israel. Ijkuak okokoxkatik noso oueuejtik, altepetl okilui: ‘Xikpejpena se ueyi tekiua pampa ma techyekana’. Samuel amo okinekiaya kichiuas non, pampa Jehová ye akin melauak okatka inueyi tekiua. Maski ijkon, Jehová okilui ma kichiua ken okijto altepetl.

1 Samuel 1:1-28; 2:11-36; 4:16-18; 8:4-9.