TLAPOUALISTLI 50

Ome siuamej yolchikajkej

IJKUAK israelitas otlajyouiayaj okitlajtlaniliayaj Jehová ma kinpaleui. Ye okinnankili uan okinmakak tlayekankej tlen yolchikajkej pampa kinpaleuiskiaj. Biblia kintokayotia jueces. Achto juez okatka Josué, uan satepan oksekimej ken: Otniel, Aod uan Samgar. Ome itech akinmej okipaleuijkej Israel okatkaj siuamej uan omotokayotiayaj Débora uan Jael.

Débora okatka se teotlajtojki. Jehová okimatilti tlen panoskia satepan, uan ye okinmiluiaya tlaltikpaktlakamej tlen Jehová okijtoaya. Débora noijki okatka juez. Omotlaliaya ikxitlan se soyatl kanin okatkaj tepemej uan tlaltikpaktlakamej oyayaj kitatij pampa ma kinpaleui itech ouijkayotl tlen okipiayaj.

Itech non tonalmej Jabín okatka ken ueyi tekiua itech Canaán. Okipiaya 900 carros tlen okintekitiltiaya itech guerra. Pampa okipiaya sapanoa miakej soldados, miakej israelitas yomochijkej itlakeualuan Jabín. Akin okinyekanaya isoldados Jabín omotokayotiaya Sísara.

Se tonal, Débora okinotski juez Barac uan okilui: ‘Jehová yokijto: “Xikinuika 10,000 tlakamej itech tepetl Tabor. Ompa nimitsuikilis Sísara. Uan nikchiuas xiktlani ye, uan isoldados”’.

Barac okilui Débora: ‘Nias tla te tias nouan’. Débora iuan oyajki, uan okilui Barac: ‘Amo mitsueyichiuaskej pampa titlatlanis, pampa ika se siuatl Jehová kimiktis Sísara’. Uan nin tlen opanok.

Barac okatka itech tepetl Tabor uan otemok pampa kinnamikiskia isoldados Sísara. San niman, Jehová okichi ma kiaui miak uan oatemik, uan miakej soldados omeltsinkej. Sísara otemok itech icarro uan ocholo.

Satepan, Sísara oajsik kanin okatka imantajkali Jael. Ye okilui ma kalaki itech imantajkali uan okimakak tepitsin leche. Nin okichi ma kochi. Ijkuakon, Jael okitilanki se kuauitl uan okitsoponili itech itsonteko Sísara. ¡Satepan ijkuak Barac oajsito, Jael okititi Sísara yomikik! Opanok ijkon ken okijto Débora.

Saiktlami, okimiktijkej ueyi tekiua Jabín uan israelitas oksepa okipixkej yolseuilistli.

Jueces 2:14-22; 4:1-24; 5:1-31.