Satepan, israelitas oksepa okikajkej Jehová uan opejkej kinueyichiuaj oksekimej dioses. Chikome xiuitl madianitas okinmichtekiliayaj inyolkauan israelitas uan okinmijtlakoliayaj tlen okitokayaj. Ik non, israelitas omotlatiayaj ijtik cuevas uan itech tepeyo. Satepan, israelitas okitlatlaujtijkej Jehová ma kinmakixti. Ik non, Jehová okititlanki se ángel ma kiluiti se telpochtli tlen omotokayotiaya Gedeón: “Jehová yomitspejpenki para tiyetos se soldado yolchikauak”. Gedeón okitlajtlani: “¿Ken nikmakixtis altepetl Israel tla amo itlaj nopati?”.

Gedeón okinekiaya kimatis kox melauak Jehová okipejpenki. ¿Tlen okichi? Okitlali ichkatsojmitl ipan tlali uan okilui Jehová: “Tla mostla kualkan ajuachtli kisiauas ichkatsojmitl uan tlali uaktos, ijkon nikmatis otinechpejpenki para nikmakixtis altepetl Israel”. Mostlatika, ichkatsojmitl osiautoka uan tlali ouaktoka. Ijkuakon, Gedeón okilui Jehová mostlatika ichkatsojmitl ma uakto uan tlali ma siauto. Omochi tlen Gedeón okilui Jehová. Ijkon ye okimatki Jehová melauak okipejpenki. Gedeón okinnechiko isoldados para moteuiskiaj iuan madianitas.

 Jehová okilui Gedeón: “Nikinpaleuis israelitas ma tlatlanikan. Pero katej miakej soldados uan uelis mokuayejyekoskej otlatlankej ika inchikaualis. Xikinmilui akinmej momojtiaj ma mokuepakan inkalijtik”. Ik non, 22,000 tlakamej oyajkej uan 10,000 omokajkej. Satepan, Jehová okijto: “Ok katej miakej soldados. Xikinuika kanin panoa atl uan xikinmilui ma atlikan. San ma mokauakan akinmej atliskej uan tlachixtoskej amo ma uiki akin kinteuis”. San 300 tlakamej otlachixtokaj ijkuak oatlikej. Jehová okijto nonmej 300 tlakamej kintlaniliskiaj 135,000 (ciento treinta y cinco mil) soldados madianitas.

Non yoak, Jehová okilui Gedeón: “Xikinteuikan madianitas”. Gedeón okinmakak isoldados kuakojmej uan xoktsimej tlen ijtik okipiayaj tlitl uan okinmilui: “Xinechitakan uan xikchiuakan tlen ne nikchiuas”. Gedeón okipitski kuakouitl, okitlapanki xoktsin, okolini tlitl uan chikauak okijto: “¡Iespada Jehová uan Gedeón!”. 300 tlakamej noijki ijkon okichijkej. Madianitas sapanoa omomojtijkej uan opejkej motlatlaloaj. Ken amo okimatiayaj tlen kichiuaskiaj san inneuian opejkej moteuiaj. Jehová oksepa okinpaleui israelitas ma kintlanilikan akinmej okinkokoliayaj.