Israelitas okatkaj itech tepetl Sinaí, pero satepan okipanouijkej Parán kanin tlauaki hasta oajsitoj Cadés. Ompa Jehová okilui Moisés: “Xikintitlani 12 tlakamej ichtaka ma tlachiatij Canaán, tlali tlen nikinmakas israelitas. Xikpejpena se itech sejse tlanechikolmej”. Moisés okinpejpenki 12 tlakamej uan okinmilui: “Xiakan Canaán uan xikitakan tlali kox kuali para se tlatokas. Xikitakan kox chikauakej noso amo akinmej ompa chantij, noijki kox chantij itech mantajkalmej noso itech altepemej”. 12 tlakamej oyajkej Canaán. Itech nonmej 12 tlakamej oyayaj Josué uan Caleb.

Nonmej 12 tlakamej omokuepatoj ijkuak opanok 40 tonalmej. Okiualikakej higos, granadas uan uvas uan okijtojkej: “Kuali tlali Canaán, pero akinmej ompa chantij sapanoa chikauakej uan altepemej kipiaj tepamitl tlen sapanoa uejkapan”. Pero Caleb okijto: “¡Tikintlaniliskej! San niman ma tiakan”. ¿Tleka ijkon okijto Caleb? Ye uan Josué otlaneltokayaj itech Jehová. Pero oksekimej majtlaktli tlakamej okijtojkej: “Amo ma tiakan. Akinmej ompa chantij sapanoa uejkapantikej. Inmixpan timotaj ken chapulimej”.

Israelitas omoyolkokojkej uan okijtojkej: “Ma tikpejpenakan okse tlayekanki uan ma timokuepakan Egipto. ¿Tlen tikchiuatiuij Canaán?  ¡Ompa san techmiktiskej!”. Pero Josué uan Caleb okijtojkej: “Okachi kuali ma tiktlakamatikan Jehová. Ye techmaluis. Amo ximomojtikan”. Pero israelitas amo okinkakej uan okinekiayaj kinmiktiskej Josué uan Caleb.

¿Tlen okichi Jehová? Okilui Moisés: “Yonikinteochi israelitas, pero yejuan amo nechtlakamatij. Ik non, nikinkauas 40 xiuitl kanin tlauaki hasta ma mikikan. San inkoneuan israelitas, Josué uan Caleb chantiskej itech tlali tlen onikinmilui israelitas nikinmakas”.