Nin Tekiuajkayotl kajki iluikak uan ayakmo miak poliui kinpojpolos nochtin oksekimej tekiuajkej tlen katej nikan Tlaltikpak, uan noijki mochiuas itlanekilis toTajtsin Dios nikan ipan Tlaltikpak uan itech iluikak. ITekiuajkayo toTajtsin Dios melauak kinpaleuis tlaltikpaktlakamej, uan kinsetilis nochtin. ¡Ninmej melauak kuali tlajtolmej!​—Xiktlajtolti Daniel 2:44; Mateo 6:9, 10, uan 24:14.

Pampa itech se tekiuajkayotl moneki se akin tlayekanas, Jehová yokitlali iKone Jesús ken ueyi Tekiua itech iTekiuajkayo.​—Xiktlajtolti Apocalipsis 11:15.

Xikita video ¿Tlen iTekiuajkayo toTajtsin Dios?

IKone toTajtsin Dios se kuali ueyi Tekiua pampa ye techtlasojtla uan nochipa kichiua tlen kuali (Mateo 11:28-30). Uan noijki kipia chikaualistli pampa kinpaleuis tlaltikpaktlakamej, uan kitekitiltis ijkuak ualtlanauatis ipan Tlaltikpak. Satepan ijkuak toTajtsin Dios okiyoliti Jesús, ye oyajki iluikak uan omochixki iyekma toTajtsin Dios pampa peuas tlanauatis (Hebreos 10:12, 13). Saiktlami, toTajtsin Dios okimakak tekiuajkayotl.​—Xiktlajtolti Daniel 7:13, 14.

Biblia kijtoa san sekimej itekipanojkauan toTajtsin Dios tlanauatiskej iuan Jesús. Itech Daniel 7:27 nonmej kintokayotiaj yolchipauakej. ToTajtsin Dios achto okinpejpenki itlatitlaniluan Jesús pampa ma yetokan yolchipauakej. Axkan itech ninmej tonalmej, Jehová ok kinpejpentok tlakamej uan siuamej tlen kipiaj chikauak intlaneltokilis pampa ma yetokan yolchipauakej.  Noijki ken Jesús, ninmej tlaltikpaktlakamej yauij iluikak ijkuak mikij uan mochiuaj se espíritu.​—Xiktlajtolti Juan 14:1-3 uan 1 Corintios 15:42-44.

¿Keski yaskej iluikak? Biblia kijtoa amo miakej yaskej iluikak, uan Jesús okintokayoti “amo miakej ichkatsitsintin” (Lucas 12:32). San 144,000 tlaltikpaktlakamej ualtlanauatiskej ipan Tlaltikpak iuan Jesús.​—Xiktlajtolti Apocalipsis 14:1.

Jesús okitlalijkej ken ueyi Tekiua itech xiuitl 1914, uan achto okinkixti iluikak Satanás uan amo kuali iejekauan uan okinualtlamotlak nikan Tlaltikpak. * Ken Diablo sapanoa okualantoka opejki kichiua ma yeto tlajyouilistli itech Tlaltikpak (Apocalipsis 12:7-10, 12). Ijkuakon pampa tlayekapan tlaltikpaktlakamej okachi tlajyouiaj. Guerras, tlalolinilistli, kokolistli uan apistli, kiteititia axkan mochijtok tlen toTajtsin Dios okijto mochiuaskia. Nin kiteititia ayakmo miak poliui uan iTekiuajkayo toTajtsin Dios peuas ualtlanauatis ipan Tlaltikpak.​—Xiktlajtolti Lucas 21:7, 10, 11, 31.

Ika se tetlapouilistli tlen mochijtok itech nochi Tlaltikpak, iTekiuajkayo toTajtsin Dios kinnechikojtok sapanoa miakej tlaltikpaktlakamej tlen kisaj itech nochi uejueyij altepemej. Sapanoa miakej tlakamej uan siuamej tlen yolkualmej yomochijkej itekipanojkauan Jesús uan kitlakamatij. Nochtin ninmej tlaltikpaktlakamej momakixtiskej ijkuak iTekiuajkayo toTajtsin Dios kipojpolos nochi tlen amo kuali. Ik non, tla tejuan tiknekij timopaleuiskej ika nin Tekiuajkayotl, moneki tiktlakamatiskej Jesús.​—Xiktlajtolti Apocalipsis 7:9, 14, 16, 17.

Itech nochi mil xiuitl, Tekiuajkayotl kichiuas itlanekilis toTajtsin Dios pampa tlaltikpaktlakamej. Tlaltikpak mokuepas se kualtsin xochitlali. Saiktlami, Jesús kimakas Tekiuajkayotl iTajtsin (1 Corintios 15:24-26). ¿Mitspaktiskia tikintlapouis oksekimej itech nin Tekiuajkayotl?​—Xiktlajtolti Salmo 37:10, 11, 29.