ToTajtsinDios kinyoleua nochtin tlaltikpaktlakamej ma motokikan itech ijkuak motlatlaujtiaj (Salmo 65:2). Maski ijkon, non amo kijtosneki kinkaki, noso kinselia nochi tlatlaujtilmej. Biblia kijtoa tla se tlakatl kitlajyouiltia isiua non uelis “kitsakuilis” itlatlaujtiluan (1 Pedro 3:7). Ijkuak israelitas nochipa okichiuayaj tlamantli tlen amo kuali, toTajtsin Dios ayakmo okinkakiaya. Maski ijkon, ye kinkaki intlatlaujtilis akinmej okichijkej itlaj amo kuali tla melauak moyolkuepaj. Nikan tikitaj tlatlaujtilistli se tlateochiualistli.​—Xiktlajtolti Isaías 1:15 uan 55:7.

Xikita video ¿Techkaki toTajtsin Dios?

Ijkuak timotlatlaujtiaj noijki ijkon tikueyichiuaj Jehová, ik non, moneki san ye itech ma timotlatlaujtikan (Mateo 4:10; 6:9). Uan noijki ken tejuan titlajtlakolejkej, moneki timotlatlaujtiskej ika itoka Jesús, pampa ye okitemakak iyolilis pampa techtlapojpoluiskej totlajtlakoluan (Juan 14:6). Jehová amo kineki san ma tikueptokan tlajtolmej tlen tikmatij noso tlen ijkuilijtokej, moneki ma timotlatlaujtikan ika nochi toyolo.​—Xiktlajtolti Mateo 6:7 uan Filipenses 4:6, 7.

Akin oTechchijchi kikaki totlatlaujtiluan maski tikchiuaj san itech toyolo (1 Samuel 1:12, 13). Uan noijki techyoleua nochipa ma tiktlatlaujtikan, ken ijkuak tlanesi noso ijkuak yiyoak, ijkuak titlakuaskej noso ijkuak tikpiaj se ouijkayotl.​—Xiktlajtolti Salmo 55:22 uan Mateo 15:36.

Axkan itech ninmej tonalmej melauak oui timotokiskej itech toTajtsin Dios pampa miakej tlaltikpaktlakamej amo tlaneltokaj itech toTajtsin Dios uan noijki kipinauia ijkuak tikinmiliaj Jehová kichiuas itech nochi Tlaltikpak ma yeto yolseuilistli (2 Timoteo 3:1, 4; 2 Pedro 3:3, 13). Ik non, moneki ma timonechikokan iuan akinmej kichiuaj ken Cristo pampa timoyolchikauaskej. Pampa yejuan noijki moneki tikinyolchikauaskej.​—Xiktlajtolti Hebreos 10:24, 25.

 Ijkuak tejuan okachi tiyetoskej iuan akinmej kitlasojtlaj toTajtsin Dios, okachi timotokiskej itech. Itech innechikoluan iTlaixpantijkauan Jehová uelis timoyolchikauaskej ijkuak tikitaskej ken tokniuan kipiaj chikauak intlaneltokilis.​—Xiktlajtolti Romanos 1:11, 12.

Uelis tikchiuas ijkuak timokuayejyekos itech tlen otimomachti itech Biblia. Ximokuayejyeko itech itlanauatiluan, tlen kichijtok uan tlen kijtoa kichiuas. Tla timokuayejyekoa uan timotlatlaujtia, non mitspaleuis tikajsikamatis ken toTajtsin Dios sapanoa tetlasojtla uan melauak ixtlamatki.​—Xiktlajtolti Josué 1:8 uan Salmo 1:1-3.

San uelis timotokis itech toTajtsin Dios tla titlaneltoka uan timoyolchikaua itech. Maski ijkon, totlaneltokilis ijkon ken se xochitl tlen moneki nochipa tikatekiskej pampa kuali ma moskalti, tla tiknekij totlaneltokilis chikauak ma yeto, moneki timokuayejyekoskej itech tlamachtilmej tlen tikneltokaj. ​— Xiktlajtolti Mateo 4:4 uan Hebreos 11:1, 6.

Jehová motekipachojtok itech akinmej kitlasojtlaj. Jehová amokikauas itlaj ma pano tlen uelis kichiuas ayakmo ma titlaneltokakan itech uan tlen noijki uelis kichiuas ayakmo ma tikchiakan yolilistli tlen amo keman tlamis (Salmo 91:1, 2, 7-10). Noijki Jehová techilia amo ma tikchiuakan sekimej tlamantli tlen kichiuas ma timokokokan noso amo ma tiyolpakikan, uan ye techilia ken uelis okachi kuali tiyetoskej.​—Xiktlajtolti Salmo 73:27, 28 uan Santiago 4:4, 8.