Jehová okichi ikoneuan Abrahán ma mochiuakan se ueyi altepetl pampa san sekan ma kitekichiuilikan uan okinmakak tlanauatilmej. Nin altepetl tlen okitokayoti Israel omonekiaya kiueyichiuas toTajtsin Dios ken ye okinmili uan noijki kitlakamatiskiaj iTlajtol (Salmo 147:19, 20). Ijkon, noijki oksekimej tlaltikpaktlakamej itech nochi Tlaltikpak uelis kiseliskiaj tlateochiualismej.​—Xiktlajtolti Génesis 22:18.

ToTajtsin Dios okinpejpenki israelitas pampa ma yetokan itlaixpantijkauan. Ijkuak tikitaj nochi tlen okipanok nin altepetl, tikitaj ken uelis tikseliskej miakej tlateochiualismej tla tiktlakamatij itlanauatiluan Jehová (Deuteronomio 4:6). Ika israelitas oksekimej tlaltikpaktlakamej uelis kixmatiskiaj akin melauak toTajtsin Dios.​—Xiktlajtolti Isaías 43:10, 12.

Ijkuak toTajtsin Dios ayakmo okiseli altepetl Israel, Jehová okipatkayoti ika akinmej opejkej kichiuaj ken Cristo (Mateo 21:43; 23:37, 38). Ik non, axkan itech ninmej tonalmej akinmej melauak kichiuaj ken Cristo kitekichiuiliaj Jehová ken iTlaixpantijkauan, uan amo israelitas.​—Xiktlajtolti Hechos 15:14, 17.

Jesús okinyekili imachtijkauan ken omonekiayaj kintlapouiskej uan ken kinmachtiskiaj tlaltikpaktlakamej pampa mochiuaskiaj imachtijkauan Cristo itech nochi Tlaltikpak (Mateo 10:7, 11; 24:14; 28:19, 20). Axkan, itech itlamian nochi tlamantli tlen amo kuali, tikitaj ken okachi yimochijtok nin tekitl. Itech ninmej tonalmej tlen amo keman moilkauas, Jehová kinnechikojtok sapanoa miakej tlaltikpaktlakamej pampa ma yetokan itech tlaneltokalistli tlen melauak (Apocalipsis 7:9, 10). Pampa akinmej melauak kichiuaj ken Cristo tekitij san sekan, non kichiua yejuan ma mopaleuikan uan ma moyolchikauakan. Uan noijki, itech nochi tlanechikolmej nochtin momachtiaj san tlen Biblia kijtoa.​—Xiktlajtolti Hebreos 10:24, 25.

ITlaixpantijkauan Jehová opejkej kanaj itech xiuitl 1870. Sekimej opejkej momachtiaj Biblia uan okimatkej sekimej tlamachtilmej tlen melauak tlen yokipiaya miak xiuitl amo omomatiaya. Okimatiayaj Jesús okinmili imachtijkauan ken omonekiaya tetlapouiskej, ik non, opejkej tetlapouiaj itech nochi Tlaltikpak itech iTekiuajkayo toTajtsin Dios. Itech xiuitl 1931 omotokayotijkej iTlaixpantijkauan Jehová.​—Xiktlajtolti Hechos 1:8; 2:1, 4, uan 5:42.

Itech achto siglo, intlanechikol akinmej okichiuayaj ken Cristo itech nochi Tlaltikpak okipiayaj sekimej tlayekankej tlen okinpaleuiayaj, noso se cuerpo gobernante, uan yejuan okitaya Jesús ken Tlayekanki itech tlanechikol (Hechos 16:4, 5). Axkan noijki onka se Cuerpo Gobernante kanin katej tlayekankej tlen kimatij miak, yejuan kiyekanaj tekitl tlen kichiuaj iTlaixpantijkauan Jehová uan noijki tekitl tlen mochiua itech Kalmej kanin tekitij iTlaixpantijkauan Jehová itech nochi Tlaltikpak. Itech nonmej kalmej motlajtolkuepaj, mochijchiuaj uan motitlanij amatlajkuilolmej tlen kisaj itech Biblia itech kanaj 600 tlajtolmej. Nin Cuerpo Gobernante ika Biblia kinyekana uan kinyolchikaua nochtin tlen katej itech kanaj 100,000 nechikolmej, itech sejse nechikol yetokej sekimej tlakamej tlen tlayekanaj ika tlasojtlalistli.​—Xiktlajtolti 1 Pedro 5:2, 3.

ITlaixpantijkauan Jehová tekitij san sekan pampa kitematiltiskej kuali tlajtolmej tlen kisaj itech Biblia uan noijki pampa oksekimej ma mochiuakan iTlaixpantijkauan Jehová. Ijkon ken itlatitlaniluan Jesús, yejuan tetlapouiaj itech kalmej (Hechos 20:20). Noijki kinmachtiaj oksekimej akinmej kitlasojtlaj tlen melauak. Uan iTlaixpantijkauan Jehová amo san se tlanechikol, yejuan yetokej ken se ueyi kalchanejkej tlen motlasojtlaj uan noijki inTajtsin kinmaluia ika tlasojtlalistli (2 Tesalonicenses 1:3). Uan ken inechikol Jehová mochijchikaua pampa kichiuas tlen Jehová kineki uan kinpaleuis oksekimej, ik non, nochi altepetl yolpaki.​—Xiktlajtolti Salmo 33:12 uan Hechos 20:35.