1, 2. ¿Tlen trampa okitekitilti Balaam tlen ika okijtlako ialtepe Jehová?

AKIN kinkitskia yolkamej, achto kita tlen kikua yolkatl tlen kineki kikitskis. Ijkuak yikimati tlen kikua yolkatl tlen kineki kikitskis, non kitlalilia itech trampa. Ijkuak yolkatl kikua tlen kajki itech trampa uan ompa mokaua, akin kinkitskia yolkamej yolpaki pampa okitlali itech trampa tlen yolkatl kikua.

² Itech xiuitl 1473 achto itech xiuitl 1, se tlakatl itoka Balaam kuali okipejpenki tlen trampa kitekitiltis. Ye okinekiaya kikitskis ialtepe toTajtsin Dios, tlen ochantiaya itech ixtlauak Moab, tlen amo uejka okatka itech Tlali tlen Jehová okijto Kinmakaskia. Balaam okijto okatka iteotlajtojki Jehová, pero non amo melauak, pampa ye okatka se tlakatl tlaixneki tlen okitlakejkej ma kiuijuikalti altepetl Israel. Pero Jehová amo okikauili uan okichi ma kiteochiua. Pampa Balaam okinekiaya ma kitlaxtlauikan, omokuayejyeko uelis kichiuaskia toTajtsin Dios ma kinuijuikalti israelitas, tla yejuan kichiuaskiaj se ueyi tlajtlakoli. Pampa ijkon omokuayejyeko kichiuas, okitekitilti se trampa: ichpokamej kuajkualtsitsintin tlen ochantiayaj Moab (Números 22:1-7; 31:15, 16; Apocalipsis 2:14).

3. ¿Ken oteijtlako trampa tlen okitekitilti Balaam?

³ ¿Kuali okiski tlen okitekitilti? Uelis tikijtoskej kema. Sapanoa miakej tlakamej israelitas “opejkej auilnemij iuan  iichpokauan Moab”. Noijki opejkej kinueyichiuaj teotsitsintin moabitas, ken tetlajyalti Baal de Peor, akin okiueyichiuayaj ijkuak oauilnemiayaj. Ik non, omikej 24,000 israelitas ijkuak yipanoskiaj itech Tlali tlen Jehová okijto Kinmakaskia. ¡Sapanoa otlajyouijkej! (Números 25:1-9.)

4. ¿Tleka oauilnenkej sapanoa miakej israelitas?

⁴ ¿Tleka sapanoa otlajyouijkej? Pampa omoxelojkej itech Jehová, miakej opejkej kipiaj amo kuali inyolo, maski ye okinmakixti itech Egipto, okintlamakak kanin tlauaki uan okinuikak itech Tlali tlen okijto Kinmakaskia (Hebreos 3:12). Tlatitlanil Pablo omokuayejyeko itech nin uan okijkuilo: “Amo matimomekatikah kemi sikimeh de yejwah okichijkeh, iwa omikeh sempóali iwa eyi mil (23,000) san itech se tonati” (1 Corintios 10:8). *

5, 6. ¿Ken technejmachtia tlajtlakoli tlen okichijkej israelitas itech ixtlauak Moab?

⁵ Tlen techtlapouia Números melauak kinnejmachtia itekipanojkauan toTajtsin Dios, pampa noijki yikalakiskej itech Tlali tlen ye kinmakas (1 Corintios 10:11). Se neskayotl, axkan tlaltikpaktlakamej sapanoa kinpaktia auilnemiskej okachi ken moabitas. Ijkon ken israelitas ouetskej  itech trampa, axkan sejse xiuitl akinmej kichiuaj ken Cristo noijki uetsij itech auilnemilistli (2 Corintios 2:11). Ijkon ken Zimrí akin omixeui okiuikak se siuatl madianita kanin okatkaj israelitas uan okikalakito ijtik imantajkali, axkan sekimej tlen monechikoaj itech tlanechikol noijki auilnemij uan kinmijtlakoaj oksekimej (Números 25:6, 14; Judas 4).

⁶ Ximotlajtlani: “¿Nikita noijki nichanti ken itech ixtlauak Moab? ¿Nikita yinikselis noteotliokolil noso yankuik tlali?”. Tla kema, ximochijchikaua pampa tiyetos itech itlasojtlalis toTajtsin Dios uan tiktlakamatis nin tlanauatil: “Xikcholilikah n awilnemílistli” (1 Corintios 6:18).

7, 8. ¿Tlen kijtosneki “awilnemílistli”, uan ken tlajyouiaj akinmej auilnemij?

⁷ Ijkuak Biblia kitekitiltia tlajtoli “awilnemílistli”, (ika griego pornéia) kijtosneki ijkuak se tlakatl moteka iuan se siuatl uan ayamo monamiktiaj ijkon ken kijtoa Biblia. Noijki kijtosneki ijkuak ikaj momekatia, auilnemi pampa kineki kitlanis tomin, se tlakatl moteka iuan se siuatl tlen amo inamik, noijki ijkuak akinmej ayamo monamiktiaj kitekitiltiaj inkamak pampa kimajmachiliskej itlakayo ikaj (sexo oral) noso itech intsintenko (sexo anal), uan noijki ijkuak momajmachiliaj intlakayo akinmej ayamo monamiktiaj. Noijki auilnemilistli ijkuak se tlakatl moteka iuan okse tlakatl uan se siuatl moteka iuan okse siuatl, noso ikaj moteka iuan se yolkatl. *

⁸ Biblia techiluia tlen melauak: akinmej auilnemij amo uelis yetoskej itech tlanechikol nion kiseliskej yolilistli tlen amo keman tlamis (1 Corintios 6:9; Apocalipsis 22:15). Noijki sapanoa motlajyouiltiaj, pampa momachiliaj  ayakmo itlaj inpati, amo motlakaitaj, mokualaniaj iuan innamik, intlalnamikilis san kintlajtlakoltijtok, kinpiaj inkoneuan maski amo okinekiayaj, kinmajsi itlaj kokolistli uan noijki mikij (xiktlajtolti Gálatas 6:7, 8). San titlajyouiskej tla ijkon tikpiaskej tonemilis. Miakej amo mokuayejyekoaj tlen kinpanos ijkuak kichiuaj nin tlamantli tlen kintopeua: peua kimauisoaj pornografía.

9. ¿Melauak amo teijtlakoa pornografía ken sekimej kijtoaj? Xikyekijto tleka ijkon titlanankilia.

⁹ Itech miakej altepemej pornografía san kanin moita: kanin kinemakaj periódicos, itech tlakuikalmej, itech televisión uan noijki itech Internet. * ¿Melauak amo teijtlakoa nin ken sekimej kijtoaj? Kema teijtlakoa. Akinmej kitaj pornografía satepan nochipa momajmachiliaj, sapanoa kinekij motekaskej iuan ikaj, kinekij tlen pitsotik uan mokualaniaj iuan innamik. Nochi nin uelis kichiuas ma moxelokan pampa kichiuaj “tlan amo kuali kelewia inkuerpo” (Romanos 1:24-27; Efesios 4:19). * Se tlakatl tlen momachtia itech akinmej san kinekij auilnentoskej, kijtoa nin yetoskia ken cáncer tlen nochipa “moskaltijtok uan moxitinijtok, uan san ualeua poliui uan noijki sapanoa oui pajtis”.

10. ¿Ken uelis timoyekanaskej ika principio bíblico tlen ijkuilitok itech Santiago 1:14, 15? (Xikita recuadro “ Nimochijchikaua nikpias chipauak nonemilis”).

¹⁰ Ma tikilnamikikan tlen ijkuilitok itech Santiago 1:14, 15: “Se tlakatl wetsi itech tlajtlákoli ijkuak kimokawilia makiyoltilana tlan amokuali mokuatlapowijtok. Yika, tlan amokuali tikyejyekolia tlaakati n tlajtlákoli, iwa ijkuak moskaltia n tlajtlákoli techmiktia”. Ik non, tla peua timokuayejyekoa  tlen pitsotik, san niman xikkixtopeua. Se neskayotl, tla ijkuak tikistlakojtok computadora noso televisión ualmonextia tlen pitsotik, san niman xikpatili noso xikseui. San niman xikchiua nochi tlen moneki pampa amo mitstlanilis tlen sokio uan tiknekis tikchiuas (xiktlajtolti Mateo 5:29, 30).

11. Ijkuak tiknekiskej tikchiuaskej tlen amo kuali, ¿ken tikteititiskej titlaneltokaj itech Jehová?

¹¹ Jehová ye akin okachi kuali techixmati, ik non, techiluia: “Xikpojpolokah tlan amo kuali kelewia nomokuerpo. Amaka mamokalakijtinemi iwan se non amo isiwa, nion manemi itech tlan pitsotik, nion mamotemaka imak tlan amokuali kelewia ikuerpo, nion makitlawelneki tomi, porke tla ijkó nonkichiwah, noni yaskia kemi  nonkinweyilijtoskiah diostsitsinteh” (Colosenses 3:5). Maski sapanoa oui tikchiuas nin, xikilnamiki toTajtsin techtlasojtla miak uan amo san niman kualani, akin uelis tiktlatlaujtis ma mitspaleui (Salmo 68:19). Ijkuak tiknekis timokuayejyekos itech tlen sokio, san niman ximotlatlaujti itech Jehová uan xiktlajtlanili chikaualistli tlen “wits de Dios” uan ximochijchikaua pampa timokuayejyekos itech okseki tlamantli (2 Corintios 4:7; 1 Corintios 9:27; xikita recuadro tlen itoka “ ¿Ken uelis nikkauas tlen amo kuali?”).

12. ¿Tlen kijtosneki ‘toyolo’ uan tleka moneki tikmaluiskej?

¹² Salomón akin okatka ixtlamatki okijkuilo: “Itech nochi tlamantli [...] okachi xikmalui moyolo, pampa itech kisa yolilistli” (Proverbios 4:23). Ijkuak moijtoa ‘toyolo’, kijtosneki tlen tikpiaj toijtik tlen kita toTajtsin Dios. Ik non, pampa Jehová kita toyolo, ye uelis kijtos kox tikseliskej yolilistli tlen amo keman tlamis, uan amo ken techitaj oksekimej. Ik non, moneki ma timomaluikan. Job akin okatka yolmelajki, okijto amo keman kitaskia se siuatl pampa mopaktiskia (Job 31:1). ¡Otechmakak se kuali neskayotl! Ma timokuayejyekokan noijki ijkon ken salmista, akin omotlatlaujti: “Xikchiua noixtololouan ma tlachiakan oksekan pampa amo ma kitakan tlen amo itlaj ipati” (Salmo 119:37).

13. ¿Akin okatka Dina, uan tleka amo kuali okinpejpenki iyolikniuan?

¹³ Ken otimomachtijkej itech tlamachtil 3, toyolikniuan uelis techpaleuiskej noso techijtlakoskej (Proverbios 13:20; xiktlajtolti 1 Corintios 15:33). Ma timotlapouikan itech Dina, iichpoch Jacob. Maski Dina kuali okiskaltijkej, amo kuali okichi ijkuak opejki mouika iuan ichpokamej tlen ochantiayaj Canaán. Ijkon ken moabitas, cananeos omoixmatiayaj ken auilnenkej (Levítico 18:6-25). Cananeos totoka uelis kikajkayauaskiaj Dina pampa ma auilnemi,  uan ijkon okichi Siquem “akin okachi okitlakaitayaj itech nochi ikalijtik itajtsin” (Génesis 34:18, 19).

14. ¿Tlen tlamantli amo kuali opanok pampa Dina amo kuali okinpejpenki iyolikniuan?

¹⁴ Ijkuak Dina okixmatki Siquem, uelis amo omokuayejyekoaya iuan motekas. Pero Siquem kema, okichi ken kichiuaskiaj nochtin cananeos tlen okitayaj kuali motekaskej iuan se siuatl. Maski Dina okijto amo iuan motekaskia, Siquem amo okikakili, “okikitski [...] uan okipijpinati”. Maski satepan Siquem “opejki kitlasojtla ichpochtli” non amo okipojpolo tlen okichiuili (xiktlajtolti Génesis 34:1-4). Uan amo san Dina otlajyoui. Pampa amo kuali okinpejpenki iyolikniuan, nochtin ikalchanejkauan otlajyouijkej uan omopinatijkej (Génesis 34:7, 25-31; Gálatas 6:7, 8).

15, 16. ¿Ken uelis tikpiaskej iixtlamatilis toTajtsin Dios? (Xikita recuadro “ Tlaxelolmej pampa se mokuayejyekos”).

¹⁵ Pampa Dina sapanoa otlajyoui, okajsikamatki amo kuali tlen achto okichi. Pero akinmej kitlasojtlaj uan  kitlakamatij Jehová, amo moneki panoskej itech non tlajyouilistli. Pampa kikakij toTajtsin Dios kinekij nemiskej “iuan akin ixtlamatki” (Proverbios 13:20a). Pampa kajsikamatij “nochi tlen kuali”, amo kimotemoliaj ouijkayotl nion tlajyouilistli (Proverbios 2:6-9; Salmo 1:1-3).

¹⁶ Akinmej kinekij iixtlamatilis toTajtsin Dios, ye kinmakas uan kipiaskej tla motlatlaujtiaj itech, tla nochipa momachtiaj  Biblia uan nochi tlen kitemaka tlakeuali yolmelajki (Mateo 24:45, TNM; Santiago 1:5). Noijki moneki ma tiyetokan tiyolyamankej, pampa ijkon tikteititiskej tiknekij tikchiuaskej tlen kijtoa Biblia (2 Reyes 22:18, 19). Se neskayotl, akin kichiua ken Cristo kajsikamati toyolo okachi tekajkayaua uan teouijtilia (Jeremías 17:9). Pero ijkuak kipias se ouijkayotl, ¿yetos yolyamanki uan kiselis tlanojnotsalistli uan tlapaleuilistli tlen kimakaskej?

17. Xikyekijto tlen uelis panos itech se kalchanejke, uan ken uelis se teta motlapouis iuan iichpoch.

¹⁷ Ma timokuayejyekokan itech nin tlamantli: se teta amo kikauilia iichpoch ma nemiti iuan se telpochtli tla amo ikaj inmiuan yaui. Ichpochtli uelis kijtos: “Notajtsin, ¿amo titlaneltoka notech? Amo titlajtlakolchiuaskej”. Maski ichpochtli kitlasojtla Jehová uan amo mokuayejyekoa tlajtlakolchiuas, ¿melauak “nemi ika ixtlamatilistli” tlen uits itech toTajtsin Dios? ¿‘Kicholilijtok n awilnemílistli’? ¿Noso motlapololtijtok pampa “tlaneltoka itech iyolo”? (Proverbios 28:26.) Uelis timokuayejyekos itech okseki principios bíblicos tlen uelis kipaleuiskej teta ma motlapoui iuan iichpoch itech nin tlamantli (xikita Proverbios 22:3; Mateo 6:13; 26:41).

18, 19. ¿Tlen ouijkayotl okipanok José uan ken okixnamik?

¹⁸ José akin okatka itlakpaikni Dina, okitlasojtlaya toTajtsin Dios uan okicholili auilnemilistli (Génesis 30:20-24). Ijkuak José okatka tsikitsin, okitak ken otlajyoui itlakpaikni pampa okichi tlen amo kuali. Pampa okilnamiktoka nin uan okinekiaya yetos itech itlasojtlalis toTajtsin Dios, satepan nin okipaleui ijkuak ochantito Egipto, pampa isiua iteko “mojmostla” okiluiaya iuan ma moteka. Pampa José okatka se tlakeuali amo uelis kikajteuaskia iteki uan yaskia. Omonekiaya moyolchikauas pampa kimatis ken kixnamikis ika ixtlamatilistli tlen opanotoka. Uan nin okichi ijkuak  miak uelta okilui isiua Potifar amo iuan motekas, uan saiktlami okicholili (xiktlajtolti Génesis 39:7-12).

¹⁹ Ximokuayejyeko: ¿yetoskia yolmelajki José tla nochipa mokuayejyekojtoskia tlen kimachiliskia tla motekaskia iuan non siuatl? Uelis amo. José amo omokuayejyeko itech tlen pitsotik, okachi kuali, okipatioitaya mouikas iuan Jehová uan okiteititi ika tlen okilui isiua Potifar: “Noteko [...] nochi ye nechkauilia, san te amo, pampa tiisiua. Ijkon, ¿ken uelis nikchiuas nin tlamantli amo kuali uan nikchiuas tlen tlajtlakoli iixpan noTajtsin Dios?” (Génesis 39:8, 9).

20. ¿Tlen okichi Jehová pampa kipaleuis José?

²⁰ Ximokuayejyeko ken oyolpakik Jehová ijkuak okitak José mojmostla okixtopeuaya tlen amo kuali, maski ikalchanejkauan okatkaj uejka (Proverbios 27:11). Jehová okipaleui José ma kisa itech telpiloyan uan noijki okichi ma kitlalikan akin okachi otlanauatiaya itech Egipto maski amo ijkon ken Faraón, uan noijki okixexeloaya tlakuali (Génesis 41:39-49). Melauak tlen kijtoa Salmo 97:10: “Namejuan tlen nankitlasojtlaj Jehová, xikkokolikan tlen amo kuali. Ye kinmaluijtok inyolilis akinmej yolmelajkej, kinmakixtia inmak akinmej amo yolkualmej”.

21. ¿Ken omopaleui ika principios bíblicos se tokni africano?

²¹ Axkan noijki miakej itekipanojkauan toTajtsin Dios  kitlakamatij nin tlanauatil: “Xiktlawelitakah nochi tlan amokuali, iwa xikchiwakah tlan kuali” (Romanos 12:9). Se tokni africano okijto se ichpochtli akin iuan omomachtiaya, okilui iuan motekaskia tla kipaleuiskia ika iexamen de matemáticas. Ye okijto: “San niman onikilui amo. Pampa onimopaleui ika principios bíblicos, axkan nichipauak uan kuali nimomachilia, uan nin okachi ipati ken oro uan plata”. Kema, maski tlajtlakoli uelis techpaktis “san kech tonati”, kichiuas ma titlajyouikan miak (Hebreos 11:25). Ijkuak timokuayejyekoaj ken uelis nochipa tiyolpakiskej tla tiktlakamatij Jehová, tikitaj amo itlaj ipati timoyolpaktiskej ika tlajtlakoli (Proverbios 10:22).

22, 23. 1) Tla ikaj tlajtlakolchiua, ¿kijtosneki ayakmo keman moyektlalis? 2) ¿Akinmej uelis kipaleuiskej?

²² Maski titlajtlakolejkej, uelis timochijchikauaskej amo tikchiuaskej tlen kineki totlalnakayo uan tikchiuaskej tlen techiluia toTajtsin Dios (Romanos 7:21-25). Jehová kimati uan “kilnamiki tejuan titlali” (Salmo 103:14). Ualeua ikaj uelis tlajtlakolchiuas, pero ¿kijtosneki ayakmo keman moyektlalis? Amo. Maski akin otlajtlakolchi uelis tlajyouis ijkon ken okipanok David, toTajtsin Dios nochipa kineki ‘kitlapojpoluis’ akin moyolkuepa uan “moyolkuitia” (Salmo 86:5; Santiago 5:16; xiktlajtolti Proverbios 28:13).

²³ Noijki, pampa toTajtsin Dios techtlasojtla, kintlalia “tlakah kemi se tlatliokólili”, tlakamej tlen chikauak intlaneltokilis, tlen kuali tekitij uan kinekij tlapaleuiskej (Efesios 4:8, 12; Santiago 5:14, 15). Yejuan kinekij kinpaleuiskej akinmej otlajtlakolchijkej oksepa ma mouikakan iuan toTajtsin Dios. Uan pampa amo oksepa ma tlajtlakolchiuakan, kinpaleuiaj ma ‘kipiakan tlamatilistli’, ijkon ken okijto Salomón (Proverbios 15:32).

24, 25. 1) ¿Ken okiteititi telpochtli tlen tlajtoa itech Proverbios 7:6-23 amo ‘okipiaya tlamatilistli’? 2) ¿Ken uelis ‘tikpiaskej tlamatilistli’?

²⁴ Biblia noijki tlajtoa itech akinmej amo ‘kipiaj tlamatilistli uan noijki itech akinmej ‘kipiaj inyolo’ (Proverbios 7:7). Pampa sekimej amo chikauak intlaneltokilis uan amo momachtiaj ken kitekichiuiliskej toTajtsin Dios, amo ‘kipiaj tlamatilistli’, ik non, amo kimatij tlen kuali uan tlen amo kuali nion kuali kitekitiltiaj inkuayejyekol. Okachi totoka tlajtlakolchiuaskej ijkon ken telpochtli tlen kijtoa Proverbios 7:6-23. Pero akinmej ‘kipiaj tlamatilistli’, okachi kimaluiaj tlen kipiaj inmijtik pampa nochipa momachtiaj Biblia uan motlatlaujtiaj itech Jehová. Uan maski tlajtlakolejkej, mochijchikauaj pampa tlen mokuayejyekoaj, tlen kimachiliaj uan tlen kinekij kichiuaskej ma kiseli toTajtsin Dios. Tla ijkon kichiuaj, kiteititiaj ‘motlasojtlaj’ uan kinekij ‘kajsiskej tlen kuali’ (Proverbios 19:8).

²⁵ Ik non, ma timotlajtlanikan: “¿Melauak nikneltoka nechpaleuiskej itlanauatiluan toTajtsin Dios? ¿Melauak niyolpakis tla nikintlakamatis?” (Salmo 19:7-10; Isaías 48:17, 18). Uan tla amo tikmati tlen tikchiuas itech itlaj, ximokuayejyeko tlen uelis mitspanos tla amo tikintlakamatis itlanauatiluan toTajtsin Dios. Noijki moneki ‘xikyejyeko uan xikita Jehová yolkuali’, uan xikchiua tlen melauak itech monemilis uan ximokuayejyeko itech tlamantli tlen kuali, tlamantli “tlan mijmilaktik, tlan chipawak, tlan teyolpakti iwa tlan moneki se kiyektenewas” (Salmo 34:8; Filipenses 4:8, 9). Tla timochijchikauas ijkon tikchiuas, okachi tiktlasojtlas toTajtsin Dios uan tiktlasojtlas tlen kitlasojtla, uan tikkokolis tlen kikokolia. Xikilnamiki José, maski noijki okatka tlajtlakole ken tejuan, ‘okicholili n awilnemílistli’ pampa okikauili Jehová nochipa ma kipaleui uan ma kimaka tlamatilistli. Noijki ijkon ma tikchiuakan (Isaías 64:8).

26. ¿Tlen timomachtiskej satepan?

 ²⁶ Akin otechchijchi otechmakak totlakayo, ik non, amo san ika timauiltiskej, kajki pampa moyolpaktiskej uan kipiaskej inkoneuan akinmej yomonamiktijkej (Proverbios 5:18). Itech ome tlamachtilmej tlen satepan tikitaskej, timomachtiskej ken kita toTajtsin Dios namiktilistli.