Tiitaixpantijkauan Jiova tikneltokaj ke tamachtilis uan tanauatilmej tein kipia Biblia techpaleuiaj maj tikixpejpenakan tein Dios kiyolpaktia uan techpaleuia itech tonemilis (Isaías 48:17, 18). Amo tejuan tikixtalianij nejin tamachtilismej. Sayoj ke timochikauaj ika timoixyekanaskej. Maj tikitakan seki tamachtilismej tein ika moyekanaj akin moixmattokej oso akin novios. a

•   Nenamiktilis moneki uejkauas nochipaya (Mateo 19:6). Tiitaixpantijkauan Jiova tikajsikamatij ke komo peua timoixmatij iuan aksa tikchiuaj porin tiknemiliaj timonamiktiskej. Yejua ika, amo tikitaj kemej se auil.

•   Komo ayamo tikpiaj xiujmej keman uelisya timonamiktiskej, amo monekiskia peuas se moixmatis iuan aksa. Uelis monamiktiskej akin kipanauijkejya xiujmej keman okachi chikauak inintanejnekilis motekaskej iuan aksa (1 Corintios 7:​36).

•   Uelis peuas timoixmatiskej iuan aksa, komo amo teyi techtsakuilia maj timonamiktikan. Maj aksa kitsayana amat ininixpan tekiuanij amo senkis kijtosneki ke iixpan Dios uelis oksepa monamiktis. Dios kiselia maj tami nenamiktilis sayoj komo semej auilnemi (Mateo 19:9).

•   Itatojtokakauan Cristo akin kinekij monamiktiskej uelis kichiuaskej sayoj iuan akin no poui itech inintaneltokalis (1 Corintios 7:​39). Tein kijtosneki, ke tiitaixpantijkauan Jiova sayoj uelis peuas timoixmatiskej uan timonamiktiskej iuan aksa akin no moauijya kemej itaixpantijkauj Jiova, amo iuan aksa akin sayoj kipoujkaita tein tikneltokaj (2 Corintios 6:​14). Dios nochipa kinauatiani itekitikauan maj monamiktikan sayoj iuan akin no poui itech inintaneltokalis (Génesis 24:3; Malaquías 2:​11). Uan no, tamatinij kiitanij ke nejin tanauatil semi tapaleuia. b

•   Konemej moneki kintakamatiskej inintatuan (Proverbios 1:8; Colosenses 3:​20). Akin nemijok iniuan inintatuan uan peuaj moixmatij iuan aksa moneki kitakamatiskej tanauatilmej tein inintatuan kiixtaliskej. Uelis yeski kemej ijkuak kiixtaliaj xiujmej keman uelisya peuas moixmatiskej iuan aksa uan toni uelis kichiuaskej.

•   Biblia kijtoua ke “tisejsemej titanankiliskej ika tein tikchiuaj” (Gálatas 6:5, TNM). Yejua ika, tisejsemej uelis tikixpejpenaskej ox tiknekij timoixmatiskej iuan aksa, sayoj ke nochipa moneki tiktakamatiskej tein techyolmajxitia Biblia. Maski ijkon, miakej kinextiaj tamatilis uan kintajtaniaj itaixpantijkauan Jiova akin yolmajsitokejya maj kinyolmajxitikan uan ininka motekipachouaj (Proverbios 1:5).

•   Miakej keman peuaj moixmatij iuan aksa miakpa kichiuaj uejueyi tajtakolmej. Biblia technauatia maj amo tiauilnemikan. Nejin amo sayoj kijtosneki keman mosentekaj akin amo namikuanij, ta no keman kimajmatokaj aksa, keman auilnemij itech inintenoj (sexo oral) uan itech ininikan (coito anal) uan okseki taman tein pitsotik (1 Corintios 6:​9-​11). Uan no, komo se takat uan se siuat akin moixmattokej mopitsouaj oso motenamikij uan momajmatokaj kemej kipeualtis maj kinekikan mosentekaskej uan maski amo senkis kichiuaskej, iixpan Dios kichiujtokej se taman tein pitsotik tein amo kiyolpaktia (Gálatas 5:​19-​21). Biblia no kijtoua ke tajtakol maj se kikui tajtolmej tein pitsotikej (Colosenses 3:8).

•   Toyolo uelis techkajkayauas (Jeremías 17:9). Uelis kichiuas maj aksa kichiua seki taman tein kimattok ke amo kuali. Yejua ika, se takat uan se siuat akin moixmattokej amo uelis yetoskej ininselti porin ininyolo uelis kinchiualtis teisa tein amo kuali. Semi kinpaleuis maj amo kipiakan kuejmolmej komo kisaj iniuan miakej oso youij iuan aksa akin takuaujtamach (Proverbios 28:26). Akin kichiua kemej Cristo uan kineki monamiktis kimati ke semi tamouilil maj kitemo akin iuan monamiktis itech internet, porin amo taixejekol maj moixmati iuan aksa akin amo kiyekixmati (Salmo 26:4).