¿Kijtoua Biblia ke se tonal amo tasojtis takual?
“Tikixtaliaj tiktamiskej mayan”. Ijkon kijtouaj taixyekananij itech taltikpak. Kiixtaliaj kichiuaskej maj nochin itech taltikpak kipiakan tein kimajseuaskej. a ¿Yekmelauj ajsis tonal keman nochi kipiaskej tein kimajseuaskej? ¿Toni kijtoua Biblia?
Biblia kijtojka ke axkan tonalmej tasojtiskia tein se kimajseuas
Biblia kijtojka ke tasojtiskia tein se kimajseuas axkan tonalmej tein moixmati kemej “tonalmej keman tatamitiya” (2 Timoteo 3:1). Dios amo itajtakol maj tasojti tein se kimajseuas, sayoj ke technejmachtia ke kemaj tasojtiskia (Santiago 1:13). Yejua nejin tein kijtojka Biblia.
“Miakkan onkas mayan” (Mateo 24:7). Biblia kijtojka ke miakkan onkaskia mayan. Yankuixtok, sekin akin kiitaj keniuj motemaka takual, kijtojkej nejin: “Miakkan okachi amo ajsi takual oso okachi amo onkak takual tein tepaleuij”. b Itech miak altepemej semi miakej amo kinajsi tein kimajseuaskej. Yejua ika miakej momikiliaj.
“Nikitak se tiltik caballo. Akin ipanko yaya kipiaya imako se tatamachiualoni” (Apocalipsis 6:5). Nejin tiltik caballo uan akin ipanko youi, kinextijtoya mayan tein onkaskia itech tonalmej keman tatamitiya. c Tein kiuika imako nejin akin youi ipanko caballo, ika kitamachiuaskiaj tepitsin takual tein onkaskia. Ijkon kemej akin youi ika caballo tsikuintiuj, motanejmachtia ke semi patiyoj yeski takual uan maj amo kiauilokan tein onkak (Apocalipsis 6:6). Uan ijkon tinemij axkan. Miakej amo ueli kiajsij oso kikouaj tein kimajseuaskej.
Keniuj tamis tatasojtilis
Taixmatinij kijtouaj ke tein nikan taltikpak mochiua tein tikmajseuaskej, ueliskia ajsis para nochin. Komo ijkon, ¿keyej amo ajsi takual? ¿Uan toni kijtoua Biblia ke kichiuas toTachijchiujkauj, Jehová, d para kitamis nejin ouijkayot?
Ouijkayot: Tekiuanij amo ueli kichiuaj maj amo tasojti takual uan maj nochin ueli mokouilikan para amo kipanoskej mayan.
Keniuj momelauas: Dios kinixpolos taltikpaktekiuanij tajtakouanij uan mokauas sayoj itaixyekanalis (Daniel 2:44; Mateo 6:10). Axkan miakej amo kinajsi tomin para mokouiliskej tein kimajseuaskej, sayoj ke iTaixyekanalis Dios kitamis nejon kuejmol. Biblia kijtoua tein kichiuas Jesucristo, Tekiuaj itech iTaixyekanalis Dios: “Yejua kimakixtis pobre akin tsajtsi maj kipaleuikan, no akin tajyouijtok uan akin amo kipia akoni kipaleuis. [...] Itech taltikpak semi taonkas, ininkuapan tepemej semi motachiuas” (Salmo 72:12, 16).
Ouijkayot: Keman mochiua neteuilis ixpoliui miak taman uan motaouijkantalia, yejua ika amo semi onkak tein se kimajseuas oso senkis amo teyi.
Keniuj momelauas: “[Jehová] kitamia neteuilismej noyampa taltikpak. Kiposteki arco uan kikojkotona lanza, kintatia carros tein ika tateuiaj” (Salmo 46:9). Dios kiixpolos nochi taman tepos tein ika tateuiaj uan no akin kichiuaj maj onka neteuilis. Ijkon amo akinok monekis kitemojtinemis tein kimajseuas. Biblia kijtoua tein mochiuas: “Akin yolmelauak kualtsin nemis, nochin semi yolseujkanemiskej” (Salmo 72:7).
Ouijkayot: Kemej semi momachilia totonik oso mochiua tetsaujmej amo ueli mochiuaok tein kitokaj uan kinmiktia tapialmej kampa kisa tein se kimajseua.
Keniuj momelauas: Dios kichiuas maj amo onkaok tetsaujmej uan ijkon uelis onkas tein se kimajseuas. Biblia kijtoua: “[Jehová] kitamatilia ejekat; at tein moajkotamota itech ueyiat seui. […] Yejuan tatokaj uan kitokaj uvajmekat tein semi kitemaka itakilo” (Salmo 107:29, 35-37).
Ouijkayot: Nemij miakej akin kitelixnekij tomin oso mokauaj maj kintaxtauikan, yejua ika kichijchiuaj takual tein uelis teijtakos oso kitsakuiltiaj uan amo ueli kipiajok akin kinpoloua.
Keniuj momelauas: ITaixyekanalis Dios kinixpolos akin amo melaujkej uan akin mokauaj maj kintaxtauikan (Salmo 37:10, 11; Isaías 61:8). Biblia kijtoua ke Jehová Dios kintajtouia akin ininka mauiltiaj uan kintamaka akin mayantokej (Salmo 146:7).
Ouijkayot: Xijxiujtika se tercio den takual tein onkak itech nochi taltikpak moauiloua oso poliui.
Keniuj momelauas: Keman tekititos iTaixyekanalis Dios, kuali mokuis nochi tein se kimajseua. Keman Jesús yetoya nikan taltikpak, kiitak maj amo moauilouani takual. Ijkon kichiuak keman ika ichikaualis Dios kintamakak panoua 5 mil. Keman tamitakuajkej, kiniluij imomachtijkauan: “Xiksentilikan tein mokauak, para maj amo teyi moauilo” (Juan 6:5-13).
Kemej iTaixyekanalis Dios kitamis nochi tein kichiua maj tasojti takual, nochin kipiaskej tel kuali takual uan tein kinchikauas (Isaías 25:6). Para tikonmatis kemanian iTaixyekanalis Dios kichiuas nejin, xikonita tamachtilis “¿Kemanian taixyekanas iTekiuajyo Dios nikan taltikpak?”.
a Agenda 2030 para el Desarrollo Sostenible tein kiixtalijkej akin pouij itech Naciones Unidas itech xiuit 2015.
b Tein kisenteixmatiltijkej Organización de las Naciones Unidas para la Agricultura y la Alimentación, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas uan Organización Mundial de la Salud.
c Para tikonmatis okseki taman tein kijtosneki nauin akin youij ipanko sejse caballo tein ika tajtoua Apocalipsis, xikonita tamachtilis “¿Toni kiixnextiaj nauin akin youij ipanko caballos?”.
d Jehová yejua itokay Dios (Salmo 83:18). Xikonita tamachtilis “¿Quién es Jehová?”.
Xa no tikonuelitas
TEIN TIMOTAJTANIAJ DE BIBLIA
¿Toni kinextia ke tinentokej “itech tonalmej keman tatamitiya”?
Itech Biblia moijtoj miak taman tein mosenchiuaskia uan tein kinextiskia ke tinentokej itech tonalmej keman tatamitiya.
TANEJMACHTIJKEJ
¿Toni kiixnextiaj nauin akin youij ipanko caballos?
Xikonmati toni kiixnextiaj nauin akin youij ipanko caballos.
SEKI TAMAN TEIN BIBLIA TAMACHTIA TEIN TAYEKANTOKEJ
¿Toni iTekiuajyo Dios?
Keman Jesús kiteixmatiltij iTajtol Dios nikan taltikpak, okachi ika tajtoj iTekiuajyo Dios. Miak xiujmejya, itatojtokakauan tajtanij itech netataujtil maj nejon Tekiuajyot taixyekanaki.
