Majtakti xiuitya titanojnotsanij ika carritos. Ika nejon, noyampa taltikpak niman techixmatij tiakonimej. Semi kualtsitsin uan amo ouij se kinkui. Kemej kijtoj Asenata, se tokniuj de Polonia: “Carritos semi kualtsitsin maski amo kipia miak taman. ¡Amo ouij se kintalia uan se kinuika kampa moneki!”.

 ¿Tionmotajtaniani keniuj kinemilijkej kichijchiuaskej uan keniuj kinchijchiujkej?

 Itech xiuit 2001, tokniuan Oloch Taojtokaltianij kiniluijkej tokniuan de Francia maj peuanij tanojnotsanij senteixtenoj ika seki taman kampa ueliskia kitaliskej amaixmej para nochin ueliskia kiitaskej. Peuak kichijchiuaj maletas ika ruedas uan seki carritos kampa ueliskia kitaliskej amaixmej uan no ika kiuikaskej amaixmej. Satepan, akin tekitij itech sucursal kiixpejpenkej se taman carrito tein mokuiskia uan yejua kitekitiltijkej tokniuan miak xiujmej.

 Nejon tokniuan kiitakej ke ika nejon tel kuali ueliaj tanojnotsayaj. Yejua ika itech xiuit 2011 tokniuan Oloch Taojtokaltianij kijtojkej maj peuanij tanojnotsanij itech altepet Nueva York (Estados Unidos) ika carritos uan mesas kampa kitaliskej amaixmej. Precursores akin kinixpejpenkej maj tanojnotsanij ika nejon carritos kiitakej ke tel kuali ueliaj tanojnotsayaj uan no uelia kiuikatinemiaj kampa monekiskia. No kijtojkej keniuj ueliskia mopatas tepitsin kemej chijchiujtoyaj. Carritos chijchiujtoyaj ika uapal uan katkaj etikej para se kinpankixtis oso se kintemoltis kampa onkak escalones. Yejua ika kitemojkej kinchijchiuaskej maj amo semi etikej sayoj ke maj amo semi tel ejkaujtikej para amo kitsontamotas ejekat keman kitaliskiaj. No kitalilijkej okachi uejueyi ruedas tein yejyemanik para uelis nejnemiskej kampa ouijkan. Uan no kitalilijkej se cajón kampa kieuaskej amaixmej.

 Semi ueliaj tanojnotsayaj ika nejon carritos. Yejua ika itech xiuit 2012 tokniuan Oloch Taojtokaltianij kijtojkej maj noyampa taltikpak peua motanojnotsa ika nejon carritos. Kiajsikej se akin ika tekiti nejon, akin ueliskia kinchijchiuas tel miak carritos tein amo etikej uan tein taxikoskiaj.

 Ijkon kemej panouanij xiujmej, kitemolianij toni no kitaliliskej para maj taxikokan carritos. Kemej neskayot, desde xiuit 2015 kipia toni ika se kipantsakuas para amo apaliuis. Dina, se tokniuj siuat akin nemi Geogia, kiita ke semi kuali nejon. Kijtoua: “Amaixmej amo apaliuij porin carrito kipia toni ika se kipantsakuas”. Itech xiuit 2017, peuak mokui carteles magnéticos itech seki taman tajtolmej. Tomasz, se tokniuj de Polonia, kijtoua: “Teoijmakaya se kipatilis carteles tein monekia se kipepechos. Axkan nejin carteles magnéticos amo ouij se kinpata”. Itech xiuit 2019, peuak kinchijchiuaj ika seki taman tein okachi taxikoua.

 Ixyetok sayoj se akin kinchijchiua nochi carritos uan ompa moxejxelouaj noyampa taltikpak. Axkan se carrito ipatiuj 43 dólares, uan ompa ayamo mopoua tomin tein moneki keman se kintitani uan se kiixtaua okseki taman. Hasta axkan, tikintitanilianij nechikolmej panoua 420,000 carritos itech nochi taltikpak uan titaxtauanij panoua 16 millones de dólares para tikinpiaskej nejin carritos.

 Para kuali mokuis tomin tein motemaka, kisenkouaj miak carritos. Uan no, itech nechikolmej ueli tajtanij piezas tein ika kiixpataskej tein uejueliuik uan ijkon amo moneki kiixpataskej ika se yankuik carrito.

 Tokniuan semi kiuelitaj tanojnotsaskej ika carritos. Martina, de Ghana kijtoua: “Itech seki taman kemej titanojnotsaj, tejuan tiktemouaj tikintajpaloskej para tikinnojnotsaskej. Sayoj ke semi nikuelita nitanojnotsas ika carritos porin yejuan motokiaj kampa tietokej. Maski sayoj ompaka panoskej uan kiitaj carrito, kimatijya ke tikteixmatiltijtokej itajtol Dios”.

 Itech okse altepet ompa África, se takat motokij kampa yetoya se carrito uan kiuikak seki amaixmej itech itajtol. Se semana satepan mokepak uan kiniluij tokniuan: “Nochi nikinlerojya. Semi moneki tein tamachtia nejin amatajkuilolmej yejua ika niouj noxolal uan nikinuikiliti nochankauan para maj no kilerokan”. Ixolal uejka katka kemej 500 kilómetros. Ome metsti satepan oksepa ualaj kampa yetoya carrito uan kijtoj: “Akin nemij noxolal kilerojkejya nochi amatajkuilolmej uan kiuelitakej tein kijtoua. Kinekij mochiuaskej itaixpantijkauan Jehová. Sayoj ke kinekij kimatiskej seki taman kemej nejin: keman aksa kiauiaj moneki kiatsonpankalakskej. Sayoj ke kampa tinemij amo onkak ueyiat. Yejua ika ¿monekis hasta nikan moauikiuij?”. Tokniuan kitemojkej maj se precursor kinojnotsa nejin takat itech itajtol. Axkan tokniuj kisentoka monojnotsa iuan nejon takat.

 ¡Semi techyolpaktia tikitaskej ke ika carritos ueli moteixmatiltia itajtol Dios “itech nochi taltikpak” uan ijkon nochin uelis kimatiskej! (Mateo 24:14). ¿Keniuj ueli taxtauaj para mochijchiuaskej carritos? Ika tomin tein noyampa taltikpak kitemakaj, tein no motemaka itech donate.jw.org. ¡Semi tiktasojkamatij ijkon xitapaleuikan!