¿Tionmotajtaniani ox nemilis sayoj kijtosneki se mauiltis, se tekitis, se monamiktis, se kinpias konemej uan se ueuentsintias? (Job 14:1, 2.) Biblia kijtoua ke hasta akin semi tamatinij motajtanianij nejon. (Xikonixtajtolti Eclesiastés 2:11.)

Moneki tikmatiskej keniuj peuak nemilis, nejon techpaleuis maj tikmatikan keyej tinemij. Satepan ke kiitaj keniuj tel kuali chijchiujtok tokuatixyo uan tonakayo, miakej kiajsikamatinij ke akin techchijchiuak semi tamatkej. (Xikonixtajtolti Salmo 139:14.) Komo ijkon, amo techchijchiuak sayoj maj tinemikan uan satepan maj timomikilikan. Tikmatiskej keyej tinemij techpaleuis maj tiyolpakikan itech tonemilis.

Keman Dios kichijchiuak yekinika takat uan yekinika siuat, kinmakak se kualtsin tekit. Yejuatsin kinekia maj momoyauakan noyampa taltikpak, maj kichiuanij noyampa se xochital uan maj neminij nochipaya. (Xikonixtajtolti Génesis 1:28, 31.)

Keman yekinika takat uan yekinika siuat kiixnamikkej Dios, yejuatsin amo kielkauak tein kiixtalijtoya nion techsenkauak. Biblia kijtoua ke ijkuak uan hasta axkan Dios kisentoka kichiua tein moneki tein ika kinmakixtis itekitikauan uan mochiuas tein kiixtalijtok nikan taltikpak. Dios no kineki xionyolpaki itech monemilis ijkon kemej yekinika kiixtalij. (Xikonixtajtolti Salmo 37:29.) Biblia kijtoua toni moneki tikchiuaskej uan ijkon tinemiskej kemej Dios kineki.