Linda: Lucía. Nechmakak miak pakilis nimitsonitas chikueyitika itech nechikol keman tikelnamikkej imikilis Jesús. * ¿Keniuj tikonitak?

Lucía: Nikteluelitak. Sayoj ke tein melauj amo nikajsikamatik seki taman tein kijtojkej. Nikakini ke iluitij keman yolik Jesús itech Navidad uan keman oksepa kipiak nemilis itech Semana Santa, sayoj ke amo ijkuak momikilij.

Linda: Kemaj. Yejua nejon iluimej tein okachi kichiuaj. Sayoj ke tiitaixpantijkauan Jiova tikneltokaj ke motelneki maj xijxiujtika tikelnamikikan imikilis Jesús. Uelis tikitaskej keyej itech sayoj seki minutos, komo tikonpia tiempo.

Lucía: Kemaj, nikpia tepitsin.

Linda: Kuali. Tein okachi tayekantok keyej tiitaixpantijkauan Jiova tikelnamikij imikilis Cristo yejua porin Jesús kijtoj maj tikchiuakan. Maj tikitakan tein panok youak achto ke momikiliskia. ¿Tikonelnamiki ke Jesús kipiak se takualis tein motelnekia iniuan itatitaniluan?

Lucía: Ah, kemaj. Keman takuaj iniuan uan amo oksepa kichiuaskiaok.

Linda: Kemaj. No moixmati kemej iTakualis toTekotsin. Keman takuajtoyaj, Jesús kinyekiluij imomachtijkauan seki taman tein monekia kichiuaskej. Nejon moajsi itech Lucas 22:19 itech Traducción del Nuevo Mundo. ¿Tikonuelitaskia tikonixtajtoltis?

Lucía: Kuali yetok. Nikan kijtoua: “No kikuik se pan, kitasojkamatik, kitapanak uan kinmakak yejuan uan kijtoj: ‘Nejin kijtosneki nonakayo tein namoka niktemakati. Xiksentokakan xikchiujtokan nejin uan ika xinechelnamikikan’”.

Linda: Miak tasojkamatik. Xikonita tein kijtoj Jesús itamian tajkuilol: “Xiksentokakan xikchiujtokan nejin uan ika xinechelnamikikan”. Uan tepitsin achto, Jesús kiniluij toni monekia kielnamikiskej. Kiniluij ke kitemakaskia inemilis, uan ijkon kinmakixtiskia imomachtijkauan. Itech Mateo 20:28, Jesús no kijtoj se taman ijkon. Xikonita tein kijtoua: “Nejuatsin ni Yektagatsin amo niuala para ma aksame nechtekitilikan. Ta, niuala sayo para ma nitetekitilis, uan para ma niktemakas nonemilis para nikixtauas in tajtakol, uan para nikinmakixtis nijin taltikpakuani”. Ika seki tajtolmej, tiitaixpantijkauan Jiova tikelnamikij keman Jesús momikilij uan ijkon tikelnamikij nemilis tein toka kitemakak. Ika imikilis uelis timomakixtiskej komo titatakamatij.

Lucía: Nikakini ke Jesús momikilij uan ijkon techmakixtij. Sayoj ke tein melauj amo nikajsikamati keniuj techmakixtia imikilis.

 Linda: Nimitsonajsikamati. Taxtauil oso imikilis Jesús tein kitemakak, se tamachtilis tein ouij se kiajsikamatis. Sayoj ke yejua semej tamachtilis tein okachi kualtsin tein kipia Biblia. ¿Uelis tiksentokaskej titajtoskej tepitsinok?

Lucía: Kemaj, nikpia tepitsinok tiempo.

Linda: Kuali. Yekin nikitstoya nejin tamachtilis uan niktemoti nikmelauas kemej amo ouij moajsikamatis.

Lucía: Kuali yetok.

Linda: Yekinika moneki tikajsikamatiskej tein panok keman Adán uan Eva tajtakojkej itech xochital ompa Edén. Maj tikixtajtoltikan tein kijtoua Romanos 6:23. ¿No tikonneki tikonixtajtoltis?

Lucía: Kemaj. Kijtoua: “In tajtakol keme yeskia se patrón ten tetaxtauia sayo ika mikilis. Pero Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús”.

Linda: Tasojkamatik. Maj tikitakan nejin tajkuilol. Xikonita ke peua kijtoua ke “in tajtakol keme yeskia se patrón ten tetaxtauia sayo ika mikilis”. Nejin yejua se taman tein Dios kiixtalij keman kinchijchiuak yekinika taltikpakneminij: taxtauil, oso tatsakuiltilis, tein kiualkui tajtakol yejua mikilis. Tein melauj, yekinika amo akin tajtakouaya. Dios kichijchiuak Adán uan Eva yektikej, tein kijtosneki ke amo kipiayaj tajtakol. Uan keman ininkoneuan yoliskiaj amo no kipiaskiaj tajtakol. Yejua ika, amo onkaya keyej momikiliskia nion akin. Adán uan Eva ijkon kemej ininkoneuan ueliskiaj nemiskej nochipaya ika yolpakilis. Sayoj ke, kemej tikonmati, panok se teisa tein kiuejueloj nochi. ¿Tikonelnamiki toni panok?

Lucía: Kemaj, Adán uan Eva kikuajkej takilot tein Dios kiniluijka maj amo kikuakan.

Linda: Kemaj. Uan ijkon tajtakojkej; Adán uan Eva kiixtalijkej amo kitakamatiskej Dios. Mochiujkej tajtakouanij. Nejon tein kichiujkej senkis kinualkuilij tein amo kuali yejuan uan ininkoneuan.

Lucía: ¿Uan keyej ininkoneuan ta tejuan amo teyi tikchiujkej?

Linda: Maj tiktalikan se neskayot. ¿Tikonchijchiuani teisa ika se molde?

Lucía: Kemaj, nikpia se tein ika mochijchiua pan.

Linda: Xikonnemili ke tikonkoua se yankuik uan achto ke tikonkuis, uetsi talpan uan tekochtia inakastan. ¿Keniuj kisas pan tein ika tikonchijchiuas? ¿Melauj ke kisaskej ika nejon tekoch?

Lucía: Kemaj.

Linda: No ijkon, keman Adán uan Eva amo kitakamatkej Dios mochiujkej kemej yeskia “tekochtikej” porin tajtakojkej. Kemej tajtakojkej achto ke kipiaskiaj konemej, nochi ininkoneuan yolkej ika tajtakol. Itech Biblia, tajtakol amo sayoj kijtosneki tein amo kuali tein kichiuaj taltikpakneminij, ta no kijtosneki tajtakol tein techyekana tein Adán uan Eva techpanoltilijkej. Yejua ika, maski tein kichiujkej Adán uan Eva amo totajtakol, ta nion ayamo tiyoliaj, tinochin techyekana tajtakol tein Adán uan Eva techpanoltilijkej. Uan kemej tikixtajtoltijkej itech Romanos 6:23, “in tajtakol keme yeskia se patrón ten tetaxtauia sayo ika mikilis”.

Lucía: Sayok ke ¿keyej tejuan moneki tikijyouiskej nejon tatsakuiltilis nochipa? Nejon amo taixejekol.

Linda: Melauj, nejon amo taixejekol yeskia. Sayoj ke moajsi okse taman. Kemej Dios kichiua nochipa tein melauak, yejua ika monekia maj Adán uan Eva momikilikan porin tajtakojkej. Sayoj ke, Dios amo kisenkauak ininkoneuan, ta kiixtalij se taman tein kinkixtiliskia tajtakol. Nejin yejua inemilis Jesús tein kitemakak. Maj oksepa tikixtajtoltikan Romanos 6:23. Satepan ke kijtoua ke “in tajtakol keme yeskia se patrón ten tetaxtauia sayo ika mikilis”, tajkuilol kijtoua ke “Totajtsin Dios techtayokolia yejua ne yek nemilis nachipa porin  tipoutinemij iuan Totekotsin Cristo Jesús”. Kemej tikitaj imikilis Cristo kichiua maj ueli techkixtilikan tajtakol uan mikilis. *

Linda: Moajsi okse taman tein techmachtia nejon tajkuilol tein nikuelitaskia maj tikitakan.

Lucía: ¿Katiyejua?

Linda: Xikonita tein kijtoua nikan: “Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús”. Komo yejua Jesús akin monekik tajyouis uan momikilis uan ijkon toka kitemakak inemilis, ¿keyej amo kijtoua nikan “Jesús techtayokolia”? *

Lucía: Mmm... Amo nikmati.

Linda: Keman Adán uan Eva amo kitakamatkej Dios itech xochital ompa Edén, tajtakojkej iixpan ininTachijchiujkauj. Tikyekmatij ke nejon tein kichiujkej semi kiyolkokoj Jiova. Sayoj ke yejuatsin niman kiixtalij tein tapaleuiskia: semej ikoneuan akin nemij iluikak ualaskia nikan taltikpak nemiskia kemej se taltikpaknenkej akin amo kipia tajtakol uan kitemakaskia inemilis tein ika techmakixtiskia tinochin. * Yejua ika taxtauil se netetayokolil tein Dios techmaka. No moajsi okse taman tein kinextia ke nejon se netetayokolil. ¿Tikonnemiliani keniuj momachilij Dios keman kimiktijkej Jesús?

Lucía: Tein melauj amo.

Linda: Nikita seki auilmej. ¿Tikonpia konemej?

Lucía: Kemaj, nikinpia omen; se okichpil uan se siuapil.

Linda: Kemej temomaj, xa uelis tikonajsikamatis keniuj momachilij Jiova ompa iluikak keman kiitak keniuj momikilij iKonetsin. ¿Keniuj tikonnemilia ke momachilij keman kikitskijkej Jesús, kikejkelojkej uan kiuijuitekkej? Xikonnemili tekokojkayot tein kimachilij keman kiitak ke iKonetsin yolik momikiliaya uan tajyouiaya itech se kouit.

Lucía: Amo nitanemilijtoya itech nejon. ¡Semi tetayokoltij!

Linda: Amo tikmatij keniuj yekmelauj momachilij Dios. Sayoj ke Biblia kemaj kijtoua toni kiolinij maj kikauani maj iKonetsin tajyouiani. Itech Juan 3:16 kimelaua nejon ika kualtsitsin tajtolmej. ¿Tikonneki tikonixtajtoltis?

Lucía: Kemaj.... Kijtoua: “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa”.

Linda: Tasojkamatik. Oksepa xikonita ipeujyan tajkuilol. Ompa kijtoua: “Totajtsin Dios semi kintasojtak in taltikpakuani”. Yejua nejon tein kiolinij: netasojtalis. Netasojtalis kiolinij Dios maj kiualtitani iKonetsin nikan taltikpak uan ijkon toka momikiliskia. Amo onkak okachi ueyi netasojtalis ke nejon. Uan yejua nejon tein itaixpantijkauan Jiova tikelnamikij xijxiujtika itech tonal keman moelnamiki imikilis Jesús. Amo nikmati ox mitsonpaleuij tein tikitakej...

Lucía: Kemaj, nechpaleuij. Tasojkamatik porin tionualaj.