Tel miakej kichiaj maj itaixyekanalis oso iTekiuajyo Dios kiualkui tein kuali; yejua ika kichiuaj tein Jesús kinnauatij itatojtokakauan. Yejua kiniluij maj tajtanikan: “Maj uiki motekiuajyo. Maj mochiua motanejnekilis, kemej iluikak, no ijkon nikan taltikpak” (Mateo 6:10, TNM).

Sayoj ke, maski miakej kitelnekij kimatiskej toni itaixyekanalis Dios, miak taneltokalismej amo semi ika tajtouaj. Tajkuilojkej H. G. Wells kimoujkaitaya maj Jesús kiitani ke motelnekia “tein yejua kitokaytij Tekiuajyot tein moajsi Iluikak”, sayoj ke maj amo semi ika tajtouanij nejon Tekiuajyot itech “inintamachtilis miak taneltokalismej kampa kijtouaj ke kichiuaj kemej Cristo”.

Tiitaixpantijkauan Jiova amo ijkon tikchiuaj, tejuan nochipa titajtouaj ika iTekiuajyo Dios. Kemej neskayot, toamaix tein okachi moixmati, tein tikonpia momako, mokixtia itech 220 tataman tajtolmej, uan yejua tein okachi momoyaua itech nochi taltikpak, ta mokixtiaj ajsitokya 46 millones sejse tapoual. ¿Uan toni okachi ika tajtoua? Xikonita tein kijtoua ipeujyan: Tanejmachtijkej. Kiteixmatiltijtok iTekiuajyo Jiova.  *

¿Keyej semi tiktemouaj tikteixmatiltiskej iTekiuajyo Dios? Porin yejua tamachtilis tein okachi tayekantok itech amatajkuilol tein okachi moixmati: Biblia. Uan no, tikyekmatij ke sayoj iTekiuajyo Dios senkis kitamis kuejmolmej tein onkak nikan taltikpak.

Tein melauj sayoj tiktemouaj tikchiuaskej ijkon kemej Jesús kichiuak. Yejua kitayekanaltij iTekiuajyo Dios; keman kichiuak itekiyo Dios yejua tein okachi ika tajtoj (Lucas 4:43). ¿Keyej kiitaya ke motelnekia? ¿Toni uelis mitsonualkuilis iTekiuajyo Dios? Timitsonyoleuaj xikonita tein tanankilia Biblia itech nejin tamachtilismej.