Biblia kiyekijtoua toni Jiova uan iKonetsin, Jesucristo, kichiuaskej ika tajyouilis tein Satanás kichiua maj onka. “Ika ya nojon monextijtsinoko in Tekonetsin de Dios para kinuejuelos in chikaualisme den amokuali Satanás.” (1 Juan 3:8.) Ixpoliuis tein mochiujtok nikan taltikpak, kampa motelita netauelitalis, tachiualis tein amo kuali uan xijxikuiyot. Uan no, Jesús motenkaua ke “kikalantamotas in Satanás naken takitskijtok axkan taltikpak”, tein kijtosneki ke kiixpolos (Juan 12:31). Kemej amo moajsisok nejin ángel akin tel amo yolkuali, Dios peuas tayektalis nikan taltikpak kampa onkas yolseuilis uan nochin kuali mouikaskej (2 Pedro 3:13).

Sayoj ke ¿toni kinpanos akin senkis amo kinekij mopataskej uan kisentokaj kichiuaj tein amo kuali? Tikajsij tanankilil itech nejin tein Dios motenkaua kichiuas: “Akin melaujkej nemiskej itech taltikpak, uan akin amo motajtakolmakanij mokauaskej ompa”, uan satepan kijtoua ke “akin amo yolkualmej ixpoliuiskej itech taltikpak, uan [...] kinajchiuaskej” (Proverbios 2:21, 22). Kemaj, ixpoliuiskej akin taoliniaj maj mochiua tein amo kuali uan sayoj onkas yolseuilis. Itech nejon taltikpak kampa tel takualtsinkan yeski, taltikpakneminij tatakamatinij yolik kinajchiuilijtiyaskej tajtakol (Romanos 6:17, 18; 8:21).

Dios amo kichiuas maj timochiuakan kemej teposmej tein amo ueli taixpejpenaj uan ijkon kitamis tein amo kuali, ta techmachtis itanauatiluan uan techpaleuis maj tikauakan tanemililmej uan tachiualismej tein teijtakouaj.

¿Uan toni kichiuas ika tachiualis tein amo momattok, tein semi kiualkui tajyouilis? Yejuatsin motenkaua ke amo uejkaua iTekiuajyo taixyekanas itech taltikpak, uan kiixtalij Jesucristo kemej tekiuaj itech nejon tekiuajyot, akin ueli kinpajtia akin mokokouaj (Mateo 14:14). IKonetsin no kipia chikaualis kitsakuilis tetsaujkaejekat uan okseki tetsaujmej (Marcos 4:35-41). Yejua kitamis tajyouilis tein kiualkui “tonal uan tachiualis tein amo momattok” (Eclesiastés 9:11). Itech iTekiuajyo, taltikpakneminij amo kipanoskejok nion se taman tein amo kuali (Proverbios 1:33).

Akin momikilijkej porin kipanokej se taman tein tel amo kuali no kipanoskej se taman tein kuali. Tepitsin achto ke Jesús oksepa kimakaskia inemilis Lázaro, akin tel kuali iuan mouikaya, kijtoj: “Nejuatsin nikinyolitia in [...] [mikemej] uan nikinmaka nemilis oksepa” (Juan 11:25). Kemaj, Jesús kipia chikaualis tein ika uelis oksepa kinmakas nemilis nejon akin momikilijkej.

Komo tikonuelitaskia tionnemis itech se taltikpak kampa amo kinpanos tein amo kuali akin yolkualmej, kuali yeskia xionmomachti Biblia. Ompa okachi tikonmatis keniuj tamati Dios akin melauak uan toni kiixtalijtok kichiuas. Itaixpantijkauan Jiova akin nemij ompakauin kampa tionnemi mitsonpaleuiskej ika miak pakilis. Timitsonyoleuaj xiontajto iniuan oso xikontajkuilouili akin kikixtijkej nejin amaix.