Biblia tanejmachtia: “Itech iyolo in tagat ualeutok ne pitsotik tanemililis, ne temiktilis, [...] ne tasuapapatalis oso ne tagapapatalis, ne tachtekilis, oso ne takajkayaualis uan ne tauijuikaltilis” (Mat. 15:19). Tein kiixnextia toyolo uelis techkajkayauas uan techchiualtis teisa tein Dios amo kiyolpaktia. Xa tikitaskej ke techkajkayauak keman ipa tikchiujkejya tein amo kuali. ¿Keniuj uelis tikajsiskej tein tikpiaj itech toyolo achto ke tikchiuaskej tein amo kuali?

Maj mojmostaj tikixtajtoltikan Biblia uan maj tiknemilikan tein tikixtajtoltiaj.

Tatitanil Pablo kijtoj: “In Tajtoltsin de Dios kipia uelilis uan kitemaka nemilis. Uan [...] kinejneuilia keme se machete ten ojkan tene. Ika ya nojon [...] kalaki [...] uan kitatemoliti [...] toyolo uan totalnamikilis”. Itamachtilis Dios tein tikixtajtoltiaj itech Biblia “techtaminextilia kox kuali oso amo kuali nochi ten tiknemilijtinemij uan nochi ten tikyoluelitaj tikchiuaske” (Heb. 4:12). Keman timomachtiaj Biblia, moneki tikitaskej tein tiknemiliaj uan tein tikchiuaj; nejon techpaleuis maj tikajsikan tein yekmelauj tikpiaj itech toyolo. Yejua ika, motelneki maj mojmostaj tikixtajtoltikan uan maj tiknemilikan tein tikixtajtoltiaj uan ijkon uelis tikitaskej teisa kemej Jiova kiita.

Komo tikseliaj uan tikchiuaj tein techyolmajxitia Biblia, tikmachtiskej totanemilil. Uan yejua technejmachtis komo teisa amo kuali yetok, uan techpaleuis  maj amo timotenpaleuikan keman tiknekiskej tikchiuaskej teisa tein amo kuali (Rom. 9:1). Uan no, itech Biblia tikajsij neskayomej tein uelis techpaleuiskej kemej se tanejmachtilis (1 Cor. 10:11). Komo tikitaj toni techmachtia tein kinpanok, techpaleuis maj amo tikchiuakan tein amo kuali. Uan nejin tinochin uelis tikchiuaskej.

Maj tiktataujtikan Dios maj techpaleui.

Jiova kiita tein tikpiaj itech toyolo (1 Crón. 29:17). “Dios [okachi] ok ueyi uan ke ne teluililis den toyolo porin Yejuatsin nochi kimati ten tikchiutinemij.” (1 Juan 3:20.) Yejua ika, amo uelis tikajkayauaskej. Komo ika nochi toyolo tiktapouiaj tein techtekipachoua, tein tikmachiliaj uan tein tiknejnekij, yejuatsin techpaleuis maj tikitakan tein tikpiaj itech toyolo. Uan no uelis tiktajtaniskej maj techmaka “se yolo chipauak” (Sal. 51:10). Netataujtil techtelpaleuia maj tikmatikan toni kinejneki toyolo.

Maj kuali tikakikan tein moijtoua itech nechikolmej.

Komo ijkon tikchiuaj, uelis tikitaskej tein yekmelauj tikpiaj itech toyolo. Maski semi melauak ke itech sejse nechikol amo motemaka yankuik tamachtilis, motelneki maj kuali titakakikan. ¿Keyej? Porin ompa techpaleuiaj maj okachi kuali tikajsikamatikan tamachtilis tein kisa itech Biblia, uan tikseliaj tayolmajxitilis tein techpaleuia maj tikitakan toni tikpiaj itech toyolo uan maj tikpatakan tein monekis. Inintanankililuan tokniuan no semi techpaleuia itech nejon (Prov. 27:17). Sayoj ke komo amo timosentiliaj iniuan tokniuan, uelis peuas sayoj totech titanemiliskej uan amo kuali titaixpejpenaskej (Prov. 18:1). Yejua ika, semi kuali maj timotajtanikan: “¿Nochipa niyouj nechikolmej uan kuali nikaki tein ompa moijtoua?” (Heb. 10:24, 25).

Toyolo uelis techkajkayauas itech seki taman tein tikchiuaj itech tonemilis. Maj ika titajtokan naui: tiktemoskej timotomintiskej, tiktelnekiskej tayil tein teuintij, akonimej iniuan timouikaj uan keniuj timoixpetaniaj.

Tiktemoskej timotomintiskej.

Amo kijtosneki ke amo kuali maj se tekiti uan ijkon tikpiaskej tein ika timoixpanoltiskej. Sayoj ke Jesús tanejmachtij ke semi tamouilil maj okachi tiktayekanaltikan tominpialis. Itech se neskayot tein kitemakak, ika tajtoj se takat tominpixkej tein kipexontij tatok itech kalmej kampa kisentiliaya uan amo kipiayaok kani kisentilis okseki tatok tein kitekiskia. Yejua ika kinemilij kintamotas uan kinchijchiuas okseki tein okachi uejueyi. Yejua kinemiliaya: “Ompa nikeuas nochi ten noaxka. Uan de ompa uelis [nikiluis] notalnamikilis ijkuin: Notalnami[ki]lis, nimitsilia axkan tikpia miak tataman ten tikeutok [...] uan nijin uejkauas miak xiume. Ika ya nojon xitakua uan ximoseui uan xitayi vino uan ximoyolpaktijtiu”. Yejua amo kinemilij ke ueliskia momikilis nejon youak (Luc. 12:16-20).

Ijkon kemej tikpixtiyaskej okachi xiujmej, uelis peuas timotekipachoskej uan tiktelnekiskej tikpiaskej tomin tein ika timoixpanoltiskej keman tixiuejkejya tiyeskij. Nejon uelis techuikas maj tiktemokan keniuj timotenpaleuiskej porin tiknekij titekitiskej okachi horas keman tikpiaj nechikol, uan amo semiok tikchiuaskej tekit tein moneki kemej itatojtokakauan Cristo. Nejon semi tamouilil yeskia. ¿Uan komo titelpochmej oso tiichpochmej uan tikmatij ke tekit kemej precursor oso okse kemej nejon, yejua okachi  kuali tekit tein uelis tikchiuaskej? ¿Tikijtoskej ke satepan tikchiuaskej porin tiknemiliaj ke achto moneki titekitiskej uan tiksentiliskej tomin? ¿Amo okachi monekiskia maj axkanya tikchiuakan nochi tein tiueliskej itech itekiyo Dios? Tein melauj, motelneki maj tiknemilikan nejon porin amo tikmatij ox tiyoltoskej mosta.

Tiktelnekiskej tayil tein teuintij.

Proverbios 23:20 tayolmajxitia: “Amo ximoajsi iniuan tein tel tayij vino”. Akin kitelneki tayis tayil tein teuintij, uelis peuas miakpa tayis uan kitemos motenpaleuis keman kijtos ke amo kineki tauanas ta sayoj kineki kuali momachilis. Komo tikitaj ke sayoj ika tayil kuali timomachiliaj, xa moneki tikitaskej tein yekmelauj kineki kichiuas toyolo.

Akonimej iniuan timouikaj.

Kemej tikmatij, amo uelis tikchiuaskej maj nion tepitsin timoitakan iniuan akin amo kitekitiliaj Dios, kemej akin iniuan timomachtiaj oso titekitij oso akin iniuan titajtouaj itech tanojnotsalis. Sayoj ke semi taman komo timosentiliaj oso tiktemouaj kuali timouikaskej iniuan. Xa timotenpaleuiskej ijkuak tikijtoskej ke yejuan kuali monejnemiltiaj. Sayoj ke Biblia techyeknejmachtia: “Amo ximotekauilikan ke ma namechkajkayauakan. [...] Takan timouikatinemij iuan nekes ten amo yolchipauke, [...] techmajmauaske ika tajtakolme” (1 Cor. 15:33). Ijkon kemej tepitsin sokiat uelis kipitsotilis nochi chipauakat tein moajsi itech se tapalkat, komo timouikaj iniuan akin amo kitekitiliaj Jiova uelis kijtakos tokuali uikalis iuan. Satepan uelis peuas titanemiliskej, timotakentiskej, titajtoskej uan timonejnemiltiskej kemej akin amo kitekitiliaj Dios.

Keniuj timoixpetaniaj.

Axkan, computadoras uan okseki teposmej kitelpiaj miak taman tein ika se moixpetanis, uan miak tein kipia kitapanauilia iTajtol Dios. Tatitanil Pablo kijtoj ke nion tepitsin moneki ika titajtoskej tein pitsotik (Efes. 5:3). ¿Uan komo toyolo kinejneki kiitas oso kikakis teisa tein pitsotik? Xa tikijtoskej ke tinochin kemansa moneki timoixpetaniskej uan tisejsemej tikixpejpenaskej keniuj tikchiuaskej. Sayoj ke, maj nochipa tiktakamatikan tein Pablo tayolmajxitia uan maj amo teyi tikitakan oso tikakikan tein pitsotik.

Maski toyolo techkajkayauaniya uan timomattokej tiktemoskej keniuj timotenpaleuiskej ijkuak tikchiuaj tein amo kuali, uelis timopataskej (Efes. 4:22-24). Maj tikitakan ome neskayomej.

Miguel * monekik kipatas tanemilil tein kipialiaya tominpialis. Yejua kijtoua: “Nonamik, nokonetsin uan nejua tikayomej itech se ueyi altepet kampa kiitaj ke motelneki se kipias tein okachi kuali, teposmej tein okachi yankuikej uan maj amo teyi tepolo itech se inemilis. Niknekik nikpias nochi tein ueliskia itech nejin taltikpak, uan niknemiliaya ke amo nechijtakoskia tominpialis. Niman nikitak ke se kitelnekis se motomintis tamati kemej ijkuak se yaskia ika tepos itech se ojti tein amo keman tami. Niktajtanij Jiova maj nechpaleuiani maj nikpata notanemilil uan tein kinejnekia noyolo, uan nikiluij ke kemej kalyetouanij tiknekiaj tikchiuaskej itekiyo nochi tein ueliskia. Tikixtalijkej amo tikpiaskej miak taman itech tonemilis uan tiyaskej kampa okachi monektokej tanojnotsanij. Niman peuak tikchiuaj tekit kemej precursor uan tikitakejya ke amo moneki tikpiaskej miak taman uan ijkon uelis tiyolpakiskej uan kuali timomachiliskej”.

Tein kipanok Leo kinextia ke motelneki tikitaskej toni tiknejnekij uan toni tikchiuaj. Yejua kichiuak nejon uan uelik kinkauak akin iniuan mouikaya tein amo kipaleuiayaj. Leo kijtoua: “Tekit tein nikpiaya nechuikaya maj nimonechiko iniuan tetanamakiltianij tein uejka kayomej. Maski nikmatia ke itech nejon nechikolmej tel tayiaj, nikuelitaya niyas. Miakpa no niteltayik hasta nimouintijtoyaya, uan satepan nechkuejmolouaya notanemilil. Nikmatik ke monekia nikitas tein yekmelauj nikpiaya itech noyolo. Tein tayolmajxitia Biblia uan tein nechiluijkej tayekananij, nechpaleuij maj nikita ke nikpiaya nejon kuejmol porin niktemouaya nimouikas iniuan akin amo kitasojtaj Jiova. Axkan, okachi nikchiua nejon tekit ika teléfono uan niktemoua amo nimotelitas iniuan nejon tetanamakiltianij”.

Moneki tiyeskij tiyolmelaujkej touan, uan tikajsiskej tein tikpiaj itech toyolo. ¿Keniuj uelis tikchiuaskej? Moneki tiktataujtiskej Jiova maj techpaleui “porin yejuatsin kiixmati tein onkak itech toyolo” (Sal. 44:21). No tikpiaj iTajtol, tein kemej yeskia se teskat, techpaleuia maj tikitakan tein yekmelauj tikpiaj itech toyolo (Sant. 1:22-25). Uan no, tikseliaj kuali tayolmajxitilis itech amaixmej uan itech nechikolmej. Ika nochi nejin, uelis tikyekpiaskej toyolo uan tikchiuaskej tein kiyolpaktia Jiova.