¿Yekmelauj ueli mochiuaj uejueyi tachiualismej? Eyi taixnamikilis tein okachi moijtoua

TAIXNAMIKILIS SE: Amo mouika ika tanauatil tein Dios kiixtalij keniuj moojtokaltis itachijchiualis. Tikajsikamatij tein Dios kiixtalij keniuj moojtokaltis itachijchiualis ika tein tamatinij kiitanij itech nochi tein onkak kampa tinemij. Tein melauj, amo senkis tikajsikamatij tanauatilmej tein Dios kiixtalij keniuj moojtokaltis itachijchiualis (Job 38:4). Se tamatkej uelis momachtis miak xiujmej ika se taman tein onkak itech taltikpak, sayoj ke se tonal uelis kiitas se taman tein amo mouika ika tein kiajsini, uan monekis oksepa moyekmachtis. Kemej neskayot, tikmatij ke nochi tsojpilomej tiltikej, sayoj ke komo tikajsij se tein istak kichiuas maj totanemilil mopata ika tein achto tikneltokayaj.

Tamatkej John Locke (1632-1704) kitetapouij se tachiualis tein kinextia ke uelis ijsiujka timopoloskej ika tein tiknemiliaj porin amo tikixmatij nochi tein yekmelauj panok. Ika tajtoj akin tekiuajtia Siam uan akin tajtouaya itenkopa ueyi altepet Holanda. Keman nejin takat ika tajtouaya iueyialtepeuj, kimelauak ke kemansa se elefante uelia nejnemia aixko. Tekiuaj kinemilij ke nejin takat kikajkayaujtoya, maski tein melauj takat ika tajtojtoya teisa tein amo moixmatia itech altepet Siam: keman at mochiua sekti, tel takuauaya uan ueli kixikoua se elefante. Kemej tekiuaj amo kimatia nejin, monemilij ke nejon amo ueliskia panos.

Xikonita seki taman tein seki xiujmej achto moitaya ke amo ueliskia panos:

● Se avión tein kisa Nueva York uan ajsi Singapur ueli kinuika panoua 800 taltikpakneminij, uan patani 900 kilómetros itech se hora uan nion seko moketsa.

● Ome taltikpakneminij maski kayomej itech tataman altepemej, ika se tepos ueli moitaj keman monojnotsaj.

● Itech se disco ueli moeuaj tel miak nekuikatilmej.

● Tapajtianij uelij kipatiliaj iyolo se taltikpaknenkej oso okseki taman itech inakayo.

¿Toni techtanemililtia keman tikitaj nejin neskayomej? Komo taltikpakneminij ueli kichiuaj uejueyi tachiualismej tein seki xiujmej achto moitaya ke amo ueliskia, Dios, akin kichijchiuak nochi tein onkak, ueli kichiua okachi miak taman tein se kimoujkaita, maski ayamo senkis tikajsikamatij oso amo ueli tikchijchiuaj tein yejuatsin kichijchiuak (Génesis 18:14; Mateo 19:26). *

TAIXNAMIKILIS OME: Se taman tein ika kintaneltoktiaj taltikpakneminij. Biblia amo techtajtania maj tikneltokakan nochi uejueyi tachiualismej. Ta kiyeknextia ke motelneki maj amo nochi tikneltokakan, yejua ika tanejmachtia: “Amokuali Satanás kichiuas ma monextiki ne tamajkaual tagat ten tekititinemis ika ueyi chikaualis, uan ika ueyi neskayome, uan no ka mouiskatekime ten sayo ika teixkajkayauas san. Uan ne tamajkaual tagat kualkuis miak tataman de tajtakol” (2 Tesalonicenses 2:9, 10).

Jesucristo no kijtoj ke miakej kijtoskiaj ke kitojtokaj maski amo yeskia melauak. Sekin hasta kijtoskiaj: “Notekotsin, Notekotsin, tejuan tiktanextiliayaj ika in chikaualis de motokaytsin. Uan no ika motokaytsin tikinkalankixtiayaj in amokuali ejekame. Uan ika motokay tikchiuayaj miakke uejueyi mouiskatekit” (Mateo 7:22). Sayoj ke Jesús kijtoj ke amo kinitaskia kemej itatojtokakauan (Mateo 7:23). Ika nejin moita ke yejua amo tamachtij ke nochi uejueyi tachiualismej oso mouiskatekimej ualeuaj itech Dios.

Uan no, Dios amo kichia maj itekitikauan takuaujtamatikan sayoj porin kiitaj uejueyi tachiualismej oso mouiskatekimej. No moneki takuaujtamatiskej porin kiajsij miak taman tein kinextia ke uelis se takuaujtamatis (Hebreos 11:1).

Maj tikitakan se ueyi tachiualis oso mouiskatekit tein okachi moixmati itech Biblia, nejin yejua keman moajokuik Jesucristo. Seki xiujmej satepan ijkuak kimiktijkej, itatojtokakauan itech altepet  Corinto peujkej omeyolouaj ox Jesús yekmelauj moajokuik. ¿Keniuj kinpaleuij tatitanil Pablo? ¿Sayoj kiniluij ke monekia okachi takuaujtamatiskej? Amo. Kinelnamiktij tein kinextiaya ke yekmelauj mochiuak. Satepan, ijkuak kiniluij ke Jesús “kitalpachotoj uan ipan eyi tonal pankisak yoltok [...] ijkon keme tikajsij tech in Tajkuilolamatsin de Dios”, no kijtoj: “Monextij iixpan in Pedro uan nimampa no monexti inixpan itatitaniluan de Cristo. Uan no [...] kachi satepan monextito inixpan keme makuil ciento tokniuan taneltokani. Uan miakke de nojon tokniuan taneltokani yoltinemij ok” (1 Corintios 15:4-8).

¿Motelnekia maj nejin tokniuan kineltokanij nejin ueyi tachiualis? Pablo kimelauak: “Takan Totajtsin Dios amo melau kipankixtij ya yoltok in Cristo, ijkuakon nijin totanojnotsalis ten tikchiutinemij [...] amo no teyi kualtiaskia. Uan no nenkajtiskia san namotakuautamatilis ten nankipiaj” (1 Corintios 15:14). Tatitanil kiitak ke motelnekia nejin tachiualis. Monekia ijsiujka moyeknextis ox Jesús yekmelauj moajokka oso amo. Pablo kimatia ke kemaj, uan nemiajok miakej akin kiitakej uan ueliskiaj kijtoskej toni panoka, uan maski ueliskia kinmiktiskej amo kijtouayaj ke amo melauak tein mochiujka (1 Corintios 15:17-19).

TAIXNAMIKILIS EYI: Uejueyi tachiualismej iselti panouaj uan taltikpakneminij akin amo kipiaj ueyi nemachtil amo uelij kimelauaj. Seki tamatinij kinekij kimelauaskej uejueyi tachiualismej tein ika tajtoua Biblia kemej tachiualismej tein iselti panouaj uan amo Dios kichiuak. Kinemiliaj ke ijkon okachi se kineltokas tein Biblia kijtoua. Uan maski melauak ke seki uejueyi tachiualismej uelis mouikaskej ika tachiualismej tein iselti panoua, kemej talolinilis, kokolismej tein ijsiujka momoyauaj uan keman taxitini, onkak se taman tein yejuan amo itech tanemilianij. Nejin yejua tonal keman mochiuak ueyi tachiualis ijkon kemej iTajtol Dios kinextia ke mochiuak.

Maj tikitakan tein panok ika yekinika chauis ompa Egipto, keman ueyiat Nilo mokepak esti. Seki taltikpakneminij kijtouaj ke nejin mochiuak porin tal chichiltik moneloj iuan ueyiat Nilo iuan seki okuiltsitsin chichiltikej. Sayoj ke tein kijtoua Biblia kinextia ke ueyiat mokepak esti, amo chichilsokit. Komo ika nejmachkayot tikixtajtoltiaj Éxodo 7:14-21, tikitaj ke nejin ueyi tachiualis mochiuak niman keman Aarón kiuitekik ueyiat ika itopil porin Moisés kinauatij maj kichiuani. Uan maski melauak yeskia ke mochiuak iselti, ¿amo tikonitaskia ke se ueyi tachiualis porin panok niman keman Aarón kiuitekik ueyiat?

Okse tachiualis tein kinextia ke motelneki se kimatis tonal keman mochiuak, yejua tein panok keman xolal Israel yaya kalakiti itech Tal tein Dios motenkaujka kinmakas. Kampa ika panoskiaj moajsia ueyiat Jordán, uan itech nejon tonalmej okachi moskaltiaya. Tajkuilol kijtoua: “Uan niman keman akin kiuikayaj Arca ajsikej hasta Jordán uan ininmetsuan tiopixkamej akin kiuikayaj Arca apaliujkej atenoj [...] amej tein ualtemouayaj peuak motsakuiliaj. Uan moajokkej sayoj seko kemej se tepamit tel uejka, ompa xolal Adán, inakastan Zaretán” (Josué 3:15, 16). ¿Nochi nejin mochiuak sayoj porin moolinij tal? Tajkuilol amo kijtoua. Sayoj ke se kimoujkaita keman panok. Niman keman Jiova Dios kijtoj ke mochiuaskia, panok (Josué 3:7, 8, 13).

Ika nochi nejin, ¿yekmelauj ueli mochiuaj uejueyi tachiualismej? Biblia kinextia ke kemaj. Tein melauj, kiteajsikamatiltia ke amo sayoj tachiualismej tein iselti panouaj. Sayoj ke, ¿uelis tikijtoskej ke uejueyi tachiualismej amo yekmelauj mochiuaj sayoj porin itech totonaluan amo tikitanij?

[Tajtolmelaualismej]