Tayolmajxitilis mouika ika tein kijtouaj tapajtianij
“¿Amo nimitstajkuilouiliani achtopaya ika tayolmajxitilis uan taixmatilis, uan ijkon nimitsnextilis ke melaujkej nejin tajtolmej[?]” (PROVERBIOS 22:20, 21)
¿KEYEJ TEL TAMAN? Miak amaixmej tein uejkauj kayomej kijtouaj tanemililmej uan tamachtiaj keniuj se mopajtis, sayoj ke axkan, tamatinij kijtouaj ke amo kuali uan uelis teijtakos. Itech totonaluan, hasta amaixmej tein motekitiltia itech tamachtiloyan, moneki kiyektaliskej. Sayoj ke kemej Biblia moijkuiloj ika ichikaualis Dios, “amo keman ijtakauis” tein kijtoua (1 Pedro 1:25).
NESKAYOMEJ: Tanauatil tein kiselij Moisés, kinnauatiaya israelitas maj uejka kichijchiuanij se nekalauiloyan ‘kalampa kampa chanchiuayaj’ (Deuteronomio 23:12, 13). No monekia mopajpakaskej satepan ke kimatokaskiaj se tapial oso se taltikpaknenkej miket (Levítico 11:27, 28; Números 19:13, 19). Uan no kinnauatiaya akin palantoya ininnakayo maj seko moajsinij, uan ueliskiaj mokepaskiaj hasta maj kiitanij ke kokolis amo tamauayaok (Levítico 13:1-8).
¿TONI KINEXTIA TAPAJTILIS AXKAN? Kisentoka tapaleuia maj amo se kokolispeua, komo se kipia kani poliuis at tein pitsotik, maj se momapajpaka uan maj seko moajsikan tein kipiaj se kokolis tein temaua. Yejua ika, Centros para el Control y la Prevención de Enfermedades tein poui Estados Unidos, tayolmajxitiaj ke komo amo onkak nekalauiloyan, moneki “maj uejka se youi uan maj se kitalpacho, komo moajsi chipauakat ompakauin moneki se yas panoua 30 metros”. Organización Mundial de la Salud kijtoua ke ijkuak se kichiua nejin tayolmajxitilis, kalannemilis kaxani se 36% itech xolal. Uan no, yekin kemej 200 xiujmej, tapajtianij kiajsikamatkej ke kinpanoltiliayaj kokolis akin kinpajtijtoyaj porin amo momapajpakayaj keman kimatokayaj se miket. Centros para el Control y la Prevención de Enfermedades kijtouaj ke kisentoka “tapaleuia maj amo se kokolispeua” komo se momapajpaka. ¿Uan keniuj tapaleuia maj seko moajsikan akin palantok ininnakayo oso akin kipiaj okse taman kokolis? Yankuixtok Saudi Medical Journal kijtoj: “Keman yekin peua se kokolis tein ijsiujka momoyaua, tapaleuia maj amo momauakan oksekin komo seko moajsij akin kipiaj nejon kokolis”.
¿KENIUJ TIKONITA? ¿Tikonixmati okse amaix tein ika tajtoua Dios maj mouika ika tein kijtouaj axkan tapajtianij? ¿Oso sayoj Biblia?
“Se kimoujkaita tanauatilmej tein kijtouayaj ke monekia mochipauaskej tein nemiaj itech itonaluan Moisés.”—(MANUAL OF TROPICAL MEDICINE [AMAIX TEIN IKA TAJTOUA KENIUJ SE MOPAJTIS KAMPA TAKAUANI], TEIN ININAXKA TAPAJTIANIJ ALDO CASTELLANI UAN ALBERT J. CHALMERS)
