¿Tamati kemej okseki amaixmej?

“Nochi in Tajkuilolamatsitsin nochi yejuan Dios kichiuak ika ichikaualisuan. Ika ya nojon [...] uelis se kuitinemis para ika se tamachtijtinemis [...]. Uan ika nijin Tajtoltsin in tekitike de Dios mochiuaki yek yolmajsitok [...] uan ijkon uelis kichiutiyas miak tataman den kuali tekit.” (2 TIMOTEO 3:16, 17)

SEKIN amo kineltokaj nejin tajtolmej tein kijtoua Biblia. ¿Toni tikonnemilia tejuatsin? Ika tein kijtoua nikan, ¿katiyejua tanemilil tikonita ke melauak?

• Se tel kuali amaix

• Semej amaixmej tein no ika tajtoua Dios

• Se amaix tein kipia tetapouilis uan temachtia chipaujkanemilis

• ITajtol Dios

¿Kuali maj se kiita toni yekmelauj kipia Biblia? Xikonita nepaleuil tein kijtoua kitemaka: “Nochi tanextililis ten tikajsij tech in Tajkuilolamatsin de Dios, nochi nojon techijkuilouilijke para tejuan ika timomachtiske [...] porin ompa tikajsij de keniu titaxikojtiyaske ika ne tajyouilis uan no tikajsij de keniu timoyoltalijtiyaske” (Romanos 15:4). Nejin kinextia ke Biblia moijkuiloj maj techmachti, maj techyolseui uan maj techmelauili ke uelis tikchiaskej tein kuali.

Sayoj ke, ¿tikonchiuaskia tein kijtoua Biblia komo sayoj yeskia se tel kuali amaix oso semej amaixmej tein no ika tajtoua Dios? ¿Tionmokauaskia maj mitsonyekana? Komo monekiskia tikonixejekos tikonchiuas teisa tein tejuatsin uan mochankauan nankiitaj ke motelneki, ¿tikonchiuaskia kemej tayolmajxitia maski tikonnemiliaya tikonchiuas okse taman? Uan komo Biblia sayoj kipiaskia tetapouilis tein amo melauak, ¿mitsonyolseuiskia oso tiontakuaujtamatiskia ke uelis mochiuas tein kuali ijkon kemej motenkaua?

Miakej tein momachtianij Biblia kiajsikamatinij ke yejua iTajtol Dios. ¿Tikonuelitaskia tikonmatis keyej kineltokaj ke amo onkak okse amaix kemej Biblia? Itech okseki tamachtilismej ika motajtoua makuil taman tein tapaleuia maj se kiajsikamati ke amo onkak okse amaix kemej Biblia.