1, 2. ¿Keniuj Jesús kinyolchikauak imomachtijkauan itech tonal keman moajokuik?

ITECH tonal keman Jesús moajokuik, ome imomachtijkauan yajtoyaj itech se xolal tein moajsia kemej 11 kilómetros iuan Jerusalén. Yejuan tayokoxtoyaj porin amo kimatiaj ke Jesús oksepa kipiaya inemilis. Sayoj ke yejua monextij kampa yajtoyaj uan peuak iniuan nejnemi uan kinyolchikauak. ¿Keniuj kichiuak? “Peuak kinajsikamatiltij [...] nochi in Tajtoltsin de Dios kampa tajtoa de Cristo Temakixtijke. Uan peuak kinnextilia ika in Tajkuilolamatsin ten kichiuak Moisés hasta [...] ten kijkuilojke ne oksekin tanauatiani.” (Luc. 24:13-15, 27.) ¡Semi yolpakkej keman Jesús ‘kinajsikamatiltij’ Tajkuilolmej! (Luc. 24:32.)

² Nejon tiotak, yejuan mokepkej Jerusalén. Keman kinajsikej tatitanilmej kintapouijkej tein kinpanok. Keman tajtojtoyajok, Jesús monextij ininixpan nochin. Sayoj ke tatitanilmej motelmoujtijkej uan omeyolouayaj ox katka Jesús. ¿Keniuj kinyolchikauak? Biblia kijtoua: “Jesús kintamachilistapoj imomachtijkauan. Uan de ompa yejuan kajsikamatke ya nochi ne nintajkuiloluan den ne tanauatiani” (Luc. 24:45).

3. 1) ¿Toni uelis techuikas maj tiknekikan timosenkauaskej keman tikchiuaj itekiyo Dios? 2) ¿Toni techpaleuis maj amo tikpolokan yolpakilis?

³ Ijkon kemej kinpanok imomachtijkauan Jesús, tejuan no kemansa timotayokoltiaj. Xa tiktelchiujtokej itekiyo Dios sayoj  ke tiknekij timosenkauaskej porin tikitaj ke amo kuali tanankiliaj keman titanojnotsaj (1 Cor. 15:58). Xa sekin akin tikinmachtiaj ika Biblia amo semi kichiuaj kemej momachtiaj, oso hasta senkis kikauaj Jiova. ¿Toni techpaleuis maj tiksentokakan tikpiakan yolpakilis keman tikchiuaj itekiyo Dios? Se taman, komo kuali tikajsikamatij neskayomej tein Jesús kijtoj. Maj tikitakan eyi neskayomej uan ijkon tikitaskej toni techmachtia.

4. ¿Toni kijtosneki neskayot kampa Jesús ika tajtoj akin tatoka tein kochi?

⁴ (Xikonixtajtolti Marcos 4:26-29.) ¿Toni kijtosneki neskayot kampa Jesús ika tajtoj akin tatoka tein kochi? Takat akin ika motajtoua itech neskayot kinixnextia akin kiteixmatiltiaj iTekiuajyo Dios. Xinach kiixnextia kuali tanauatilmej ika Tekiuajyot tein kintapouiaj akin yolmelaujkej. Ijkon kemej mojmostaj kichiua, akin tatoka ‘kochi tayouak uan nimampa meua tonayanʼ. Uan no, keman kitokaj xinach panoua seki tonalmej hasta keman kitemaka takilot. Itech nejon tonalmej “xinach ixua, [uan] moskaltia”. “Ika ichikaualis den tal” yolik moskaltijtiuj. No ijkon, akin tikinmachtiaj kemej yeskia yolik moskaltijtiyouij. Keman aksa kichiua tein momachtia hasta kiixtalia kitekitilis Dios, kitemaka takilot, tein kijtosneki ke motemaktia iuan Jiova uan moauia.

5. ¿Keyej Jesús kijtoj neskayot kampa ika tajtoj akin tatoka tein kochi?

⁵ ¿Keyej Jesús kijtoj nejin neskayot? Porin kinekia techmachtis ke sayoj Jiova kichiua maj moskalti xinach oso tamachtilis itech ininyolo akin ‘kipiaj kuali tanejnekilis’ (Hech. 13:48, TNM; 1 Cor. 3:7). Tejuan kemej yeskia tiktokaj uan tikatekiaj xinach, sayoj ke amo ueli tikchikaujkauiaj maj moskalti nion ueli tikijsiuiltiaj. Ijkon kemej takat akin ika motajtoua itech neskayot, amo tikmatij keniuj moskaltia tatok. Kemej tikchiujtokej okseki taman tein mojmostaj ipa tikchiuaj, amo tikitaj keniuj moskaltijtok. Sayoj ke satepan, xinach oso tamachtilis uelis kitemakas itakilo, tein kijtosneki ke taltikpaknenkej mochiua imomachtijkauj Jesús akin peua tapaleuia itech tanojnotsalis tein kemej yeskia tapixkalis (Juan 4:36-38).

6. Keman aksa tikmachtiaj ika Biblia, ¿toni moneki tikajsikamatiskej?

⁶ ¿Toni techmachtia nejin neskayot? Yekinika, techajsikamatiltia ke amo ueli tikchiuaj maj akin tikmachtiaj ika Biblia moskalti kemej itatojtokakauj Cristo. Yolyemanilis techpaleuis maj amo tikchikaujkauikan maj moaui. Maski tikpaleuiskej nochi tein tiueliskej, ika yolyemanilis tikajsikamatij ke yejua moneki kiixtalis ox motemaktis iuan Jiova. Akin motemaktia iuan Jiova moneki kichiuas porin kitasojta. Jiova amo kiselia komo amo kichiua ika nochi iyolo (Sal. 51:12; 54:6; 110:3).

7, 8. 1) ¿Toni okseki taman techmachtia neskayot kampa Jesús ika tajtoj akin tatoka tein kochi? Xikonijto se neskayot. 2) ¿Toni techmachtia kemej tamati Jiova uan Jesús?

⁷ Ojpatika, komo tikajsikamatij tein techmachtia nejin neskayot, techpaleuis maj amo timosenkauakan komo yekinika tikitaj ke totanojnotsalis amo kiualkui tein tikchiayaj. Moneki amo tiyolijsiuiskej (Sant. 5:7, 8). Komo tikpaleuiaj akin tikmachtiaj ika Biblia nochi tein tiuelij, sayoj ke xinach oso tamachtilis amo kitemaka itakilo, nejon amo kijtosneki ke tejuan titapolojtokej. Jiova kikaua maj xinach oso tamachtilis moskalti sayoj itech ininyolo akin yolyemankej uan kinekij kipataskej ininnemilis (Mat. 13:23). Yejua ika, maj amo tiknemilikan ke amo kuali kisa totanojnotsalis komo tikitaj ke amo kiualkui tein tikchiayaj. Jiova amo kiita ke kuali kisa totanojnotsalis sayoj komo kuali tanankiliaj  akin tikinnojnotsaj, ta porin tiksentokaj timochikauaj tiktekitiliskej (xikonixtajtolti Lucas 10:17-20 uan 1 Corintios 3:8).

⁸ Expatika, techmachtia ke amo nochipa tikitaj keniuj moyolpata taltikpaknenkej. Kemej neskayot, se takat uan se siuat namikuanij akin se misionero kinmachtiaya ika Biblia, se tonal kiluijkej ke kinekiaj mochiuaskej tanojnotsanij akin ayamo moauiaj. Tokniuj kinelnamiktij ke achto monekia kikauaskej tachichinalis. Sayoj ke semi kimoujkakakik keman kiluijkej ke seki metsti achto kikaujkajya. ¿Keyej kichiujkej nejon? Yejuan kiajsikamatkej ke Jiova nochi kiita uan kitauelita maj aksa kipia ome nemilis. Yejua ika kiixpejpenkej kichiuaskej se taman: tachichinaskej iixpan tokniuj oso senkis kikauaskej nejon tachiualis. Ueyi netasojtalis tein axkan kipialiayaj Jiova kinpaleuij maj kuali taixpejpenanij. Maski tokniuj nion kimatia keniuj moyolpatakaj, yejuan moskaltijkaj kemej itatojtokakauan Cristo.

9. ¿Toni kijtosneki neskayot kampa ika motajtoua matat tein ika amichkitskiaj?

⁹ (Xikonixtajtolti Mateo 13:47-50, TNM.) ¿Toni kijtosneki neskayot kampa Jesús ika tajtoj matat tein ika amichkitskiaj? Jesús kijtoj ke ijkuak kintapouiaj iTekiuajyo Dios nochin taltikpakneminij tamati kemej ijkuak kitamotaj itech ueyiat se ueyi matat tein ika amichkitskiaj. Ijkon kemej matat kintsikoua “miak tataman pescados”, totanojnotsalis kinualkui nochi tataman taltikpakneminij (Is. 60:5). Yejua nejon moita ke mochiua itech uejueyi nechikolmej uan itech iTakualis toTekotsin tein mochiua xijxiujtika. Seki nejon tein mosentiliaj tamatij kemej amichimej “ten kualtia” uan kinsentiliaj itech nechikol kampa kichiuaj kemej Cristo. Sayoj ke oksekin tamatij kemej amichimej “ten amo kualtiaj”, uan Jiova amo kinselia.

10. ¿Keyej Jesús kijtoj neskayot kampa ika tajtoj matat tein ika amichkitskiaj?

¹⁰ ¿Keyej Jesús kijtoj nejin neskayot? Keman Jesús kijtoj ke kinxeloskiaj amichimej kinextia tein panotok itech itamian tonalmej tein mochiujtok axkan, uan amo mochiuas keman kinmakaskej tein kinnamikis itech okachi ueyi tajyouilis. Jesús kinextij ke amo nochin akin kiuelkakiskiaj tamachtilis tein melauak kiixtaliskiaj kitekitiliskej Jiova. Miakej mosentiliaj itech nechikolmej oso kiselianij momachtiskej Biblia touan, sayoj ke amo kiixtaliaj motemaktiskej iuan Dios (1 Rey. 18:21). Uan oksekin amo youijok nechikolmej. No moajsij telpochmej oso ichpochmej akin inintatuan kitekitiliaj Jiova, sayoj ke yejuan amo kitasojtanij itanauatiluan. Tein yeski taman tein panos, Jesús kiyeknextij ke sejsemej moneki kiixpejpenaskej ox kitekitiliskej Dios. Akin kichiuaj, Jiova kinita kemej “kualtsitsin taman tein moajsi itech nochi altepemej” (Ageo 2:7).

11, 12. 1) ¿Keniuj uelis techpaleuis neskayot kampa ika motajtoua matat tein ika amichkitskiaj? 2) ¿Toni techmachtia kemej tamati Jiova uan Jesús?

¹¹ ¿Keniuj techpaleuia nejin neskayot? Komo tikajsikamatij tein techmachtia nejin neskayot techpaleuis maj amo timotelyolkokokan oso maj amo tiknekikan timosenkauaskej komo se akin tikmachtiaj ika Biblia oso se tokonetsin amo kiixtalia kitekitilis Jiova. Nejon uelis panos maski tejuan tikpaleuiskej nochi tein tiueliskej. Komo aksa kiselia se nemachtil ika Biblia oso itatuan peuak kimachtiaj iTajtol Dios keman konetsinok katka, nejon amo nochipa kijtosneki ke kipias se kuali uikalis iuan Jiova. Akin amo mokauaj maj Jiova kinyekana, satepan kinajchiuas itech ixolal.

¹² ¿Kijtosneki nejon ke akin kikauaj tamachtilis tein melauak amo keman kinkauaskejok maj mokepakan itech nechikol?  Oso komo aksa amo kiixtalia motemaktis iuan Jiova, ¿nochipa yeski kemej amichimej “ten amo kualtiaj”? Amo. Uelisok motokiskej achto ke peuas okachi ueyi tajyouilis. Kemej yeskia Jiova kiniluijtok: “Ximokepakan nouan uan nejua nimokepas namouan” (Mal. 3:7). No yejua nejon kinextia okse neskayot kampa Jesús ika tajtoj konet akin kiauilchiuak itomin (xikonixtajtolti Lucas 15:11-32).

13. ¿Toni kijtosneki neskayot kampa Jesús ika tajtoj konet akin kiauilchiuak itomin?

¹³ ¿Toni kijtosneki neskayot kampa Jesús ika tajtoj konet akin kiauilchiuak itomin? Tepopaj teiknelijkej akin ika motajtoua itech neskayot kiixnextia toTajtsin Jiova akin tetasojta. Konet akin tajtanik maj kimakakan tein iaxka uan satepan kiauilchiuato itomin, kinixnextia akin kikauaj nechikol. Keman ijkon kichiuaj kemej yeskia youij “uejka tech okse país”, tein kijtosneki ke kiajsitij tein poui nikan taltikpak kampa Satanás taixyekantok tein mouejkatilijtok iuan Jiova (Efes. 4:18; Col. 1:21). Sayoj ke sekin satepan kiajsikamatij ke amo kuali tein kichiuaj uan maski semi ouij, mokepaj itech inechikol Jiova. Yejuatsin ika miak pakilis kinselia porin moyolyemaniaj uan moyolnonotsaj (Is. 44:22; 1 Ped. 2:25).

14. ¿Keyej Jesús kijtoj neskayot kampa ika tajtoj konet akin kiauilchiuak itomin?

¹⁴ ¿Keyej Jesús kijtoj nejin neskayot? Semi teyololinia kemej Jesús kinextij keniuj Jiova kineki maj iuan mokepakan akin kikaujkej. Tepopaj akin ika motajtoua itech neskayot nochipa kichiaya maj mokepani ikonetsin. Keman kiuejkaitak ikonetsin ke “ajsitiaya ichan”, motaloj kinamikito. Tein techmachtia nejin neskayot monekiskia kinolinis akin kikaujkej tamachtilis tein melauak maj niman mokepakan iuan Jiova. Maski xa amo chikauak ininkuali uikalis iuan Dios uan uelis mopinaujmatiskej uan kinouijmakas mokepaskej, amo nenkaj chikaujkayot tein kichiuaskej, ta ne iluikak yolpakiskej keman mokepaskej (Luc. 15:7).

15, 16. 1) ¿Toni techmachtia neskayot kampa Jesús ika tajtoj konet akin kiauilchiuak itomin? Xikonijto seki neskayomej. 2) ¿Toni techmachtia kemej tamati Jiova uan Jesús?

¹⁵ ¿Keniuj techpaleuia nejin neskayot? Techpaleuia maj no tikchiuakan kemej Jiova. Maj amo keman timochiuakan ‘titelyolmelaujkej’ porin nejon techuikas maj amo tiknekikan tikinseliskej akin moyolnonotsaj uan mokepaj itech nechikol.  Komo ijkon tikchiuaskiaj, semi tikijtakoskiaj tokuali uikalis iuan Jiova (Ecl. 7:16). No techmachtia ke akin kikauaj nechikol moneki tikinitaskej kemej “se ichkat tein poliujtok” tein uelis mokepas (Sal. 119:176). Komo tikajsij aksa akin kikauak nechikol sayoj ke amo takalankixtil, ¿ika netasojtalis tikpaleuiskej maj ueli mokepa? ¿Niman tikinnauatiskej tayekananij uan ijkon yejuan no uelis kipaleuiskej? Ijkon tikchiuaskej komo yekmelauj tikajsikamatij uan tikchiuaj tein techmachtia neskayot kampa Jesús ika tajtoj konet akin kiauilchiuak itomin.

¹⁶ Maj tikitakan keniuj sekin akin mokepanij iuan Jiova kitasojkamatij iteiknelilis uan nepaleuil tein kitemaka nechikol ika netasojtalis. Se tokniuj takat akin kikalankixtijkaj itech nechikol uan ijkon moajsik veinticinco xiujmej, kijtoua: “Keman nechselijkej itech nechikol uan hasta axkan moskaltiani yolpakilis tein nikmachilia porin nikseliani yolseuilis tein kitemaka Jiova (Hech. 3:19). Nochin nechpaleuianij uan nechnextilianij netasojtalis. Axkan nipoui iniuan tokniuan tein kemej yeskiaj nochankauan”. Se tokniuj ichpoch akin kikauak Jiova uan ijkon moajsik makuil xiuit, kijtoj keman mokepak: “Amo ueli nikmelaua keniuj nimomachilij keman senkis nikitak ke nechnextiliayaj netasojtalis tein Jesús ika tajtoj. Nipouis itech inechikol Jiova yejua tein okachi kuali”.

17, 18. 1) ¿Toni techmachtij eyi neskayomej tein tikitakej? 2) ¿Toni moneki tikixtaliskej tikchiuaskej?

¹⁷ ¿Toni techmachtia eyi neskayomej tein tikitakej? Yekinika, techajsikamatiltij ke tejuan amo ueli tikchiuaj maj aksa moskalti kemej itatojtokakauj Cristo, ta nejon sayoj Jiova ueli kichiua. Ojpatika, amo uelis tikchiaskej maj kiixtalikan kitekitiliskej Jiova nochin akin touan monechikouaj oso akin tikinmachtiaj ika Biblia. Uan expatika, techmachtij maj amo tiknemilikan ke amo keman mokepaskej akin kikaujkej Jiova uan tamachtilis tein melauak. Uan keman aksa mokepas, maj kuali tikselikan ijkon kemej Jiova kichiua.

¹⁸ Maj tisejsemej tiksentokakan tiktemokan taixmatilis, taajsikamatilis uan tamatilis. Keman tikixtajtoltiskej neskayomej tein Jesús kijtoj, maj timotajtanikan toni kijtosneki, keyej moijkuiloj itech Biblia, keniuj uelis tikuiskej tein techmachtia uan toni technextilia kemej tamati Jiova uan Jesús. Komo ijkon tikchiuaj, tiknextiskej ke yekmelauj tikajsikamatij tein kijtosneki itajtoluan Jesús.