1, 2. ¿Toni kinpanok ome imomachtijkauan Jesús keman yayaj Emaús?

 ITECH 16 metsti nisán xiuit 33 imomachtijkauan Jesús semi moyolkokojtokej uan motelmoujtiaj, ome de yejuan kisaj de Jerusalén uan youij Emaús, se xolal tein yetok 11 kilómetros de ompa. Semi tayokoxtokej porin kimiktijkej Jesús akin kitojtokayaj. Imomachtijkauan kichiayaj maj Mesías kichiuani miak taman para kinpaleuis judíos, sayoj ke kimiktijkej. Satepan mochiua teisa tein amo kichiaj.

² Se takat akin amo kiixmatij motokia uan peua iniuan nejnemi. Yejuan kitapouiaj ke semi tayokoxtokej porin Jesús kipanok miak taman tein amo kuali. Satepan nejon takat peua kiniluia seki taman tein amo keman kielkauaskiaj, porin ‘peua ika tajtoua tein kijkuiloj Moisés uan nochin Tanauatianij’, kinmelauilia keyej Mesías monekik tajyouis uan keyej kimiktijkej. Keman ajsij Emaús yejuan momakaj cuenta ke nejon takat katka Jesús akin Dios kichiujka maj oksepa nemi. Xa semi yolpakkej keman kimatkej ke Mesías oksepa nemia (Luc. 24:​13-35).

3, 4. 1) ¿Toni kinpanok imomachtijkauan Jesús? (Hechos 1:3). 2) ¿Toni tikitaskej itech nejin tamachtilis?

³ Jesús miakpa monextij ininixpan imomachtijkauan itech 40 tonalmej achto ke yaskia iluikak (xikonixtajtolti Hechos 1:3). Yejua kinyolchikauak imomachtijkauan porin tayokoxtoyaj uan moujtoyaj, yejua ika semi yolpakkej uan moyolchikaujkej  para tanojnotsaskej uan kiteixmatiltiskej iTaixyekanalis Dios. a

⁴ Semi techpaleuis komo timomachtiaj tein kichiuak Jesús 40 tonalmej achto ke yaskia iluikak. Itech nejin tamachtilis tikitaskej keniuj kichiuak tein monekia itech nejon tiempo para 1) kinyolchikauas imomachtijkauan, 2) kinpaleuis maj okachi kiajsikamatikan tein kijtoua iTajtol Dios uan 3) kinmachtis keniuj kichiuaskiaj okseki tekimej tein kipiaskiaj satepan. Uan tikitaskej keniuj no uelis tikchiuaskej kemej Jesús.

MAJ TIKINYOLCHIKAUAKAN OKSEKIN

5. ¿Keyej monekia kinyolchikauaskej imomachtijkauan Jesús?

⁵ Imomachtijkauan Jesús monekia maj kinyolchikauakan. ¿Keyej? Porin sekin kikaujkaj ininchan, ininchankauan uan tekit tein kipiayaj para kitojtokaskej Jesús uan nochipa iuan yetoskej (Mat. 19:27). Oksekin kinchiuiliayaj tein amo kuali porin mochiujkaj imomachtijkauan Jesús (Juan 9:22). Yejuan kinekkej kikauaskej seki taman uan tajyouiskej porin kineltokayaj ke Jesús katka Mesías akin moijtojka ke ualaskia (Mat. 16:16). Sayoj ke keman kimiktijkej Jesús, semi motayokoltijkej uan kinekiaj mosenkauaskej porin kinemiliayaj ke amo mochiuaskiaok tein kichiayaj.

6. ¿Toni kichiuak Jesús satepan ke oksepa nemik?

⁶ Jesús kiitak ke imomachtijkauan motayokoltijtoyaj, sayoj ke amo porin amo takuaujtamatiaj, ta kiajsikamatik ke motayokoltijtoyaj porin kimiktijkaj. Yejua ika niman peuak kinyolchikaua itasojikniuan satepan ke oksepa nemik. Monextij iixpan María Magdalena keman chokatoya kampa kitokkaj (Juan 20:​11, 16). No monextij ininixpan ome imomachtijkauan akin yajtoyaj Emaús. Uan no iixpan tatitanil Pedro (Luc. 24:34). ¿Toni techmachtia tein kichiuak Jesús? Maj tikitakan toni panok keman monextij iixpan María Magdalena.

7. ¿Toni kiitak Jesús ke kichiujtoya María, uan keniuj kipaleuij? (Juan 20:​11-16; no xikonita taixkopin).

⁷ (Xikonixtajtolti Juan 20:​11-16).  Itech tonal 16 de nisán, kualkantsin seki siuamej yajkej kampa kitokkaj Jesús (Luc. 24:​1, 10). Semej de yejuan katka María Magdalena. Keman ajsik kampa kitokkaj Jesús kiitak ke amo ompa yetoyaok, yejua ika tsikuinik uan kiniluito Pedro uan Juan. Nochin omen motalojkej kampa kitokkaj uan María kintojtokak. Pedro uan Juan kiitakej ke inakayo Jesús amo ompa yetoyaok uan mokepkej ininchan. Sayoj ke María amo yajki, ta ompa peuak choka uan amo kimatia ke Jesús ompa kiitstoya. Yejua kiitak ke María kichokilijtoya uan kinekik kiyolseuis. Satepan, monextij iixpan uan tein kichiuak semi kiyolchikauak, kinojnotsak uan kinauatij teisa tein motelnekia: maj kinnauatiani iikniuan ke yejua oksepa nemia (Juan 20:​17, 18).

8. ¿Keniuj uelis tikchiuaskej kemej Jesús?

⁸ ¿Keniuj uelis tikchiuaskej kemej Jesús? Komo tikinyolchikauaj tokniuan maj kisentokakan kitekitilikan Jehová. Yejua ika, maj tikitakan toni ouijkayomej kipiaj, maj timochikauakan tikinajsikamatiskej uan maj tikinyolseuikan. Maj tikitakan toni kipanok se tokniuj siuat akin monotsa Jocelyn, iikniuj siuapil nejin tokniuj momikilij. Yejua kijtoua: “Miak metsti semi nimotayokoltijtoya”. Se tokniuj uan isiuatsin kiyoleujkej ininchan, uan kikakkej keniuj momachiliaya, kuali kinojnotskej uan kielnamiktijkej ke Jehová semi kipatiuita. Yejua kijtoua: “Amo nikmatia toni nikchiuas, nikmachiliaya kemej yeskia nietoya itech mar keman tel kioujtok. Sayoj ke Jehová kichiuak maj nejin tokniuan nechmakixtikan. Yejuan nechpaleuijkej maj niknejneki oksepa niktekitilis Jehová”. Komo tiknekij tikinyolchikauaskej oksekin, moneki tikinkakiskej keman techtapouiskej keniuj momachiliaj, ijkon uelis tikinyolseuiskej uan tikinpaleuiskej maj kisentokakan kitekitilikan Jehová (Rom. 12:15).

MAJ TIKINPALEUIKAN OKSEKIN MAJ KIAJSIKAMATIKAN ITAJTOL DIOS

9. ¿Toni amo semi kiajsikamatiaj imomachtijkauan Jesús uan keniuj kinpaleuij?

⁹ Imomachtijkauan Jesús kineltokayaj tein kijtoua iTajtol Dios uan mochikauayaj kitakamatiskej Jehová (Juan 17:6). Sayoj ke amo kiajsikamatiaj keyej Jesús kimiktijkaj kemej aksa akin amo yolkuali. Jesús kimatia ke imomachtijkauan takuaujtamatiaj iuan Jehová uan kitasojtayaj, sayoj ke kiitak ke amo semi kiajsikamatiaj tein kijtoua iTajtol Dios (Luc. 9:​44, 45; Juan 20:9). Yejua ika kinpaleuij maj kiajsikamatinij tein kiixtajtoltiayaj. Maj tikitakan toni kichiuak keman monextij ininixpan ome imomachtijkauan akin yayaj Emaús.

10. ¿Keniuj Jesús kinpaleuij imomachtijkauan maj kineltokanij ke yejua katka Mesías? (Lucas 24:​18-27).

¹⁰ (Xikonixtajtolti Lucas 24:​18-27). Jesús amo niman kiniluij nejon ome takamej akoni katka yejua, ta kintajtanij seki taman. ¿Keyej? Porin xa kinekia kinkauas maj kijtokan tein kinemiliayaj uan tein kimachiliayaj, uan ijkon kichiujkej. Kiluijkej ke yejuan kinemiliayaj ke Jesús mochiuaskia inintekiuaj israelitas uan ke yejua kinixyekanaskia uan amo romanosok. Jesús kinkauak maj kiluianij keniuj momachiliayaj. Satepan, ika iTajtol Dios kinpaleuij maj kiajsikamatinij ke mochiujkaya seki taman tein moijtojka. b Uan nejon youak keman moajsik iniuan okseki imomachtijkauan, no kiniluij toni kijtosnekia tein mochiujtoya (Luc. 24:​33-48). ¿Toni techmachtia?

11, 12. 1) ¿Toni techmachtia kemej Jesús kikuik iTajtol Dios? (No xikonita taixkopimej). 2) ¿Toni kichiuak se tokniuj para kipaleuis Nortey maj kimati toni kichiuas?

¹¹ ¿Keniuj uelis tikchiuaskej kemej Jesús?  Keman tikmachtiskej aksa ika Biblia, maj tiktajtanikan tein kipaleuis maj kijto tein kinemilia uan tein kimachilia (Prov. 20:5). Satepan ke tikmatiskejya keniuj momachilia, maj tiknextilikan keniuj itech Biblia uelis kiajsis textos tein kipaleuis. Maj amo tikiluikan tein moneki kichiuas, ta maj tiktajtanikan keniuj uelis kipaleuis se versículo, maj tikyolchikauakan maj itech tanemili uan keniuj uelis kichiuas tein kiixtajtoltia. Maj tikitakan toni kipanok se tokniuj takat de Ghana akin monotsa Nortey.

¹² Nortey peuak momachtia Biblia keman kipiaya 16 xiujmej. Tepitsin satepan, ichankauan peuak kiixnamikij. ¿Toni kipaleuij maj kisentoka momachti Biblia? Akin kimachtiaya kimelauilijkaya tein kijtoua Mateo capítulo 10 para kinextilis ke akin kichiuaj kemej Cristo kinixnamikiskiaj. Nortey kijtoua: “Nikmatik ke nikajsikaya taneltokalis tein melauak keman nochankauan peuak nechixnamikij”. Akin kimachtiaya no kinextilij tein kijtoua Mateo 10:16 kampa kijtoua ke moneki timotachiliskej, satepan kiitakej keniuj kipaleuiskia nejon versículo para maj kuali kinmelauiliani ichankauan tein kineltokaya. Satepan ke moauij, Nortey kinekik mochiuas precursor, sayoj ke ipopaj kinekia maj youi universidad. Akin kimachtiaya Biblia amo kiluij toni monekia kichiuas, ta kitajtanij seki taman para maj itech tanemili tein kijtoua Biblia uan maj kimatini toni monekia kichiuas. ¿Toni kichiuak? Maski ipopaj kikixtij de ichan Nortey mochiuak precursor regular. ¿Toni kinemilia Nortey? Yejua kijtoua: “Nikyekmati ke tein nikixpejpenak yejua tein okachi kuali”. Keman tikinpaleuiaj oksekin maj kiajsikamatikan tein kijtoua iTajtol Dios, yejuan ueli okachi takuaujtamatij iuan Jehová uan kisentokaj kitekitiliaj (Efes. 3:​16-19).

MAJ TIKINPALEUIKAN TOKNIUAN TAKAMEJ PARA MAJ MOCHIUAKAN KEMEJ NETETAYOKOLILMEJ

13. ¿Toni kichiuak Jesús para maj kisentokani moteixmatiltiani kuali tanauatilmej satepan ke yajki iluikak? (Efesios 4:8).

¹³ Jesús kichiuak nochi tein iTajtsin kinauatijka (Juan 17:4). Sayoj ke amo keman kinemilij ke sayoj yejua ueliskia kichiuas tein Jehová kinekia. Itech eyi xiuit uan tajko keman tanojnotsak, no kinmachtij oksekin keniuj kichiuaskiaj. Jesús iniuan  takuaujtamatia imomachtijkauan. Yejua ika kinnauatij maj tamachtianij, maj kiteixmatiltianij kuali tanauatilmej, uan maj kinyekpianij itekitikauan Jehová akin semi kinpatiuita. Sekin imomachtijkauan Jesús akin kiixyekanayaj tekit, ayamo kiajxitiayaj 30 xiuit (xikonixtajtolti Efesios 4:8). Nejin takamej iuan tekitikej Jesús uan amo kikaujkej. Uan achto ke Jesús yaskia iluikak okachi kinmachtij para maj mochiuanij takamej kemej netetayokolilmej. ¿Keniuj kinmachtij?

14. ¿Toni Jesús kinnextilij imomachtijkauan itech 40 tonalmej keman yetoyaok nikan taltikpak? (No xikonita taixkopin).

¹⁴ Jesús amo kinajuak imomachtijkauan keman kinyolmajxitij, ta kuali kichiuak. Kimatik ke seki imomachtijkauan amo kineltokayaj ke oksepa nemia. Yejua ika kinyolmajxitij para kinpaleuis maj kineltokanij (Luc. 24:​25-27; Juan 20:27). Kiniluij maj okachi kiitanij keniuj kinyekpiaskej itekitikauan Dios uan maj amo kitemouanij motomintiskej (Juan 21:15). No kinyolmajxitij maj amo kiitanij tein yejuan kichiujtoyaj uan tein oksekin ueliaj kichiuayaj para kitekitiliskej Jehová (Juan 21:​20-22). Kemej miakej kinemiliayaj ke Jesús yaya kiixtalitia maj aksa taixyekana, kinmelauak uan kinpaleuij maj okachi tanojnotsanij (Hech. 1:​6-8). ¿Toni kinmachtia tokniuan tayekananij tein Jesús kichiuak?

15, 16. 1) ¿Keniuj tayekananij uelis kichiuaskej kemej Jesús? 2) ¿Keniuj kipaleuij Patrick tein se tayekankej kiyolmajxitij?

¹⁵ ¿Keniuj tokniuan tayekananij uelis kichiuaskej kemej Jesús? Moneki kinmachtiskej tokniuan takamej hasta akin okachi telpochmejok maj kichiuakan seki tekimej itech nechikol. c Tayekananij moneki kiajsikamatiskej ke nejon tokniuan monekiok momachtiskej kichiuaskej okseki taman. Yejuan moneki maj kinyolmajxitikan tokniuan telpochmej para maj mochiuakan okachi yolyemankej, takuaujtamachmej, uan maj kinekikan kinpaleuiskej oksekin (1 Tim. 3:1; 2 Tim. 2:2; 1 Ped. 5:5).

¹⁶ Maj tikitakan tein kipanok se tokniuj  takat akin monotsa Patrick. Keman katka telpoch, amo kuali kinnojnotsaya tokniuan uan amo kinikneliaya nion tokniuan siuamej. Se tayekankej kiitak ke Patrick monekia mopatas uan yejua ika kiyolmajxitij, sayoj ke amo kiajuak. Patrick kijtoua: “Niktasojkamati porin tayekankej nechpaleuij maj nimopata. Tel amo kuali kemej nimomachiliaya keman nikitaya ke oksekin tokniuan kinmakayaj tekimej tein nejua niknekia. Tein tokniuj nechiluij nechpaleuij maj nimochiua niyolyemanik uan maj nikintasojta tokniuan uan amo sayoj maj niktemojto nikselis tekimej itech nechikol”. Nejon tapaleuij maj Patrick kiixtalianij kemej tayekankej keman kipiaya 23 xiujmej (Prov. 27:9).

17. ¿Keniuj kinextij Jesús ke iniuan takuaujtamatia imomachtijkauan?

¹⁷ Jesús amo sayoj kinnauatij imomachtijkauan maj tanojnotsanij, ta no maj tamachtianij. Xa yejuan kinemiliayaj ke amo ueliskia kichiuaskej nochi nejon tekit. Sayoj ke Jesús kimatia ke kemaj ueliskiaj uan kemej kinekia maj kimatikan, kiniluij: “Ijkon kemej noTajtsin nechualtitanik nejua, nejua no namechtitani namejuan” (Juan 20:21).

18. ¿Keniuj tayekananij uelis kichiuaskej kemej Jesús?

¹⁸ ¿Keniuj tokniuan tayekananij uelis kichiuaskej kemej Jesús? Tayekananij akin tamattokej, kinmachtiaj oksekin keman kinkauiliaj maj kichiuakan seki tekimej (Filip. 2:​19-22). Xa uelis kiniluiskej telpochmej maj tachipauakan uan maj kiyekpiakan Kali kampa tiMosentiliaj. Tayekananij uelis kiniluiskej tokniuan maj kichiuakan se tekit, kinnextiliskej keniuj kichiuaskej, uan takuaujtamatiskej ke kuali kinkisas. Matthew akin yankuixtok mochiuak tayekankej, semi kintasojkamatilia tayekananij akin miak xiujmejya tekititokej porin kimachtijkej keniuj kichiuas seki tekimej itech nechikol uan porin takuaujtamatkej ke kuali kichiuaskia. Yejua kijtoua: “Keman nimopolouaya, nechpaleuiayaj maj nikitani keniuj okachi kuali nikchiuaskia teisa”. d

19. ¿Toni moneki tikixtaliskej tikchiuaskej?

¹⁹ Itech 40 tonalmej keman Jesús yetoyaok nikan taltikpak kinyolchikauak oksekin, kinmachtij uan kinnextilij keniuj kichiuaskej se tekit. Maj no tikixtalikan ijkon tikchiuaskej (1 Ped. 2:21). Yejua techpaleuis maj ijkon tikchiuakan porin motenkauak: “Nejua nochipa nietos namouan hasta keman tantiasya tein mochiujtok itech taltikpak” (Mat. 28:20).