1, 2. 1) ¿Keyej moneki takuaujtamatiskej iuan Jiova akin yankuixtok monamiktijkej? (Salmo 37:3, 4). 2) ¿Toni tikitaskej itech nejin tamachtilis?

¿YANKUIXTOK tionmonamiktij oso amo uejkaua tionmonamiktis? Komo kemaj, xa tikonneki nochipa tionyolpakis iuan takat oso siuat akin semi tikontasojta. Akin monamiktiaj kipanoskej ouijkayomej, uan yekinika monekis kiixtaliskej seki taman tein semi tayekantok. Tein nankichiuaskej keman nankipiaskej ouijkayomej uan tein nankiixpejpenaskej uelis kichiuas xiyolpakikan oso amo. Komo nantakuaujtamatij iuan Jiova, kuali nantaixpejpenaskej, okachi kuali nanmouikaskej uan okachi nanyolpakiskej. Sayoj ke komo amo nankichiuaj tein Jiova tayolmajxitia, xa nankipiaskej ouijkayomej uan amo nanyolpakiskej (xikonixtajtolti Salmo 37:3, 4).

² Maski nejin tamachtilis kinijkuilouilijkej akin yankuixtok monamiktijkej, ika tajtos seki ouijkayomej tein uelis kipiaskej nochin akin monamiktijkejya. Tikitaskej ininneskayo takamej uan siuamej akin ininka motajtoua itech Biblia, uan keniuj tein kichiujkej uelis techpaleuis itech miak taman, kemej neskayot, keman tikpiaj tonamik. No tikitaskej ininneskayo  seki tokniuan itech nejin tonalmej akin kipiaj ininnamik.

3, 4. ¿Toni ouijkayomej uelis kipiaskej akin yankuixtok monamiktijkej?

³ Kansaika, akin yankuixtok monamiktijkej xa kiniluiaj maj nemikan kemej oksekin kichiuaj. Kemej neskayot, inintatuan oso okseki ininchankauan xa kiniluiaj maj niman kinpiakan konemej. Oso akin iniuan mouikaj oso seki ininchankauan xa kiniluiaj maj mokouilikan se kali uan maj motajtakouikan.

⁴ Komo akin yankuixtok monamiktijkej kinkakij ininchankauan oso akin iniuan mouikaj, xa motauikaltiskej. Yejua ika xa monekis tekitiskej nochin omen. Nejon kichiuas maj amo semi momachtikanok Biblia, maj amo semi taueyichiuakanok kemej kalyetouanij uan maj amo semi tapaleuikanok itech tanojnotsalis. Xa hasta amo yaskejok nechikolmej porin monekis okachi tekitiskej, oso porin amo kinekiskej maj kinkuilikan inintekiuj. Nochi nejin kichiuas maj amo ueli okachi kitekitilikan Jiova.

5. ¿Toni mitsonmachtia tein kinpanok Klaus uan Marisa?

⁵ Tein kichiuanij miakej kinextia ke se kitemos se kipias miak tomin oso miak taman, amo kichiua maj se yolpaki. Yejua nejon tein kinpanok Klaus uan Marisa keman monamiktijkej. * Kemej kinekiaj kipiaskej miak taman, nochin omen semi tekitiaj, sayoj ke amo yolpakiaj. Klaus kijtoua: “Maski tikpiayaj okachi ke tein monekia, amo tikixtalijtoyaj nion teyi tein techpaleuiskia maj okachi tiktekitilianij Jiova. Tein melauj, tikpiayaj miak ouijkayomej uan semi tisiouiaj”. Tejuatsin xa no tikonitani ke se kitemos se kipias miak taman, amo kichiua maj se yolpaki. Sayoj ke amo xikonnemili ke amo uelisok tikonpatas tein tikonchiujtok. Tein kuali tein kichiuanij oksekin uelis mitsonpaleuis. Yekinika maj tikitakan toni kinmachtia takamej tein kichiuak tekiuaj Jehosafat.

6. ¿Keniuj kichiuak tekiuaj Jehosafat tein kijtoua Proverbios 3:5, 6 keman kipiak se ueyi ouijkayot?

⁶ Tokniuan takamej, ¿namechtekipachoua kemansa nochi tekimej tein nankipiaj? Komo ijkon, ineskayo Jehosafat uelis namechpaleuis. Kemej katka tekiuaj, monekia kinyekpias nochin akin nemiaj itech ialtepeuj. Yejua ika kichiuak miak taman tein ika kitemoj kinyekpias. Kichijchiuak itech nochi xolalmej tein moajsiaj Judá tein tapaleuiskia maj amo kalakinij akin kinixnamikiaj, uan kinsentilij panoua 1,160,000 tateuianij (2 Crón. 17:12-19). Satepan kipiak se ueyi ouijkayot, porin miakej tateuianij akin ualeuayaj Ammón, Moab uan Seír kinteuitoj akin nemiaj Judá (2 Crón. 20:1, 2). ¿Toni kichiuak Jehosafat? Kitajtanij  Jiova maj kipaleuiani uan maj kimakani chikaualis ijkon kemej motayolmajxitia itech Proverbios 3:5, 6 (xikonixtajtolti). Netataujtil tein kichiuak moajsi itech 2 Crónicas 20:5-12, uan kinextia ke semi takuaujtamatia iuan iTajtsin Jiova. ¿Keniuj kinankilij yejuatsin?

7. ¿Keniuj Jiova kinankilij Jehosafat?

⁷ Jiova kititanik se levita akin motokaytiaya Jahaziel maj kiluiti Jehosafat: “Ximoketsakan, amo teyi xikchiuakan uan xikitakan keniuj Jiova namechmakixtia” (2 Crón. 20:13-17). ¡Nejin amo keman mochiujtoya itech se neteuilis! Sayoj ke nejin tanauatilmej kitemakaka Jiova, amo se taltikpaknenkej. Kemej Jehosafat semi takuaujtamatia iuan Jiova, kitakamatik. Keman yejua uan akin nemiaj Judá kinnamikitoj akin kintauelitayaj, amo kintalij taixpan akin kuali tateuiayaj, ta kintalij takamej akin amo kiuikayaj tein ika tateuiskej uan mokuikatijtiayaj. Jiova kinmakixtij, ijkon kemej kiluijka Jehosafat (2 Crón. 20:18-23).

8. ¿Toni uelis kinmachtis tokniuan takamej tein kichiuak Jehosafat?

⁸ Tokniuan takamej, ¿toni uelis namechmachtis tein kichiuak Jehosafat? Kemej namejuan moneki nankiitaskej maj kuali yetokan namochankauan, namochikauaj nankinpaleuiskej uan nankinyekpiaskej. Yejua ika, keman onkak ouijkayomej xa nankinemiliaj ke uelis nankiyektaliskej namoselti. Sayoj ke amo xiknemilikan nejon, ta xiktataujtikan Jiova uan xiktajtanikan maj namechpaleui. No xikchiuakan netataujtil iuan namonamik uan xiktemokan maj Jiova namechixyekana. Yejua ika, ximomachtikan iTajtol uan amaixmej tein inechikol techmaka uan xikchiuakan tein motayolmajxitia. Sekin xa amo kiuelitaskej xikchiuakan tein Biblia tayolmajxitia uan xa hasta kijtoskej ke amo nantamatij. Xa kijtoskej ke okachi uelis nankinpaleuiskej namochankauan ika tomin uan okseki taman tein kipia ipatiuj. Sayoj ke xikelnamikikan Jehosafat. Yejua takuaujtamatik iuan Jiova uan kinextij ika tein kichiuak. Jiova amo kikauak uan amo no namechkauas namejuan (Sal. 37:28; Heb. 13:5). ¿Toni no uelis kichiuaskej akin monamiktijkejya tein kinpaleuis maj yolpakikan?

9. ¿Toni kichiujkej tanauatijkej Isaías uan inamik?

⁹ Isaías uan inamik kitayekanaltijkej kitekitiliskej Jiova. Isaías katka tanauatijkej uan inamik xa no kichiuaya nejon tekit, porin Biblia kijtoua ke kitematiltiaya tein panoskia satepan (Is. 8:1-4). Isaías uan inamik kitayekanaltiayaj kiueyichiuaskej Jiova. Yejuan kinkauilijkej se kuali neskayot tokniuan akin kipiaj ininnamik.

10. ¿Keyej tokniuan akin kipiaj ininnamik moneki momachtiskej tein Biblia kijtojka ke panoskia?

¹⁰ ¿Keniuj tokniuan akin kipiaj ininnamik uelis kichiuaskej kemej tanauatijkej Isaías uan inamik? Komo mochikauaj okachi kitekitiliskej Jiova. Uelis okachi takuaujtamatiskej iuan Dios komo mosenmachtiaj tein Biblia kijtojka ke panoskia uan kiitaj keniuj nochipa mochiuani (Tito 1:2). * Uelis kinemiliskej keniuj tapaleuiskej maj mochiua seki taman tein Biblia kijtojka ke panoskia. Kemej neskayot, tein kijtoj Jesús: ke iTajtol Dios moteixmatiltiskia itech nochi taltikpak achto ke ejkoskia tamilis (Mat. 24:14). Komo se tokniuj  takat uan inamik okachi takuaujtamatij ke tein kijtojka Biblia ke panoskia mochiujtok, okachi mochikauaskej kitekitiliskej Jiova.

11. ¿Toni uelik kichiujkej Priscila uan Áquila, uan keyej?

¹¹ Akin yankuixtok monamiktijkej uelis kinpaleuis tein kichiujkej Priscila uan inamik Áquila, akin katkaj judíos uan nemiaj Roma. Keman kinmatiltijkej tein kichiuak Jesús, mochiujkej itatojtokakauan. Yejuan xa semi kuali nemiaj ompa Roma. Sayoj ke nochi mopatak keman tekiuaj Claudio kintokak nochin judíos. Priscila uan Áquila monekik kikauaskej nochi tein kiixmatiaj, monekik kitemoskej kani nemiskej uan peuas tekitiskej ompa. ¿Kichiuak nejon maj amo semi kitekitilianijok Jiova? Xa tikmatijya tein panok. Keman nemiajya Corinto peuak tapaleuiaj itech nechikol, uan kinyolchikaujkej tokniuan iuan tatitanil Pablo. Satepan tapaleuitoj itech okseki xolalmej kampa monekiaj okachi tanojnotsanij (Hech. 18:18-21; Rom. 16:3-5). ¡Priscila uan Áquila kipiayaj miak tekit uan semi yolpakiaj!

12. ¿Keyej tokniuan akin kipiaj ininnamik moneki kiixtaliskej keniuj kitekitiliskej Jiova?

¹² Tokniuan akin kipiaj ininnamik uelis kitayekanaltiskej kitekitiliskej Jiova kemej kichiujkej Priscila uan Áquila. Semi kuali maj ika tajtokan achto ke monamiktiskej keniuj kinekij kitekitiliskej Jiova. Keman kiixtaliaj nejin uan mochikauaj ijkon kichiuaskej, uelis okachi kiitaskej keniuj kinpaleuia yektikatsin espíritu (Ecl. 4:9, 12). Maj tikitakan tein kichiujkej Russell uan Elizabeth. Russell kijtoua: “Achto ke timonamiktiskiaj, ika titajtojkej keniuj tiktekitiliskiaj Jiova”. Elizabeth no kijtoua: “Ika titajtouayaj nejon, porin amo tiknekiaj maj satepan nion teyi kipatani kemej tikixtalijkaj tiktekitiliskej Jiova”. Yejua ika uelik tapaleuitoj Micronesia kampa monekiaj okachi tanojnotsanij.

13. ¿Toni panos komo titakuaujtamatij iuan Jiova, ijkon kemej kijtoua Salmo 28:7?

¹³ Ijkon kemej Russell uan Elizabeth, miakej tokniuan akin kipiaj ininnamik  kiixtalianij amo kitemoskej kipiaskej miak taman, porin kinekij okachi tapaleuiskej itech tanojnotsalis. Komo se tokniuj takat uan inamik kiixtaliaj okachi kitekitiliskej Jiova uan mochikauaj ijkon kichiuaskej, kiseliskej miak tatiochiualismej. Kiitaskej keniuj kinyekpia Jiova, okachi iuan takuaujtamatiskej uan semi yolpakiskej (xikonixtajtolti Salmo 28:7).

14. ¿Keniuj kinextijkej tatitanil Pedro uan inamik ke takuaujtamatiaj itech tein kijtoua Mateo 6:25, 31-34?

¹⁴ Tatitanil Pedro uan inamik no kinkauilijkej se kuali neskayot tokniuan akin kipiaj ininnamik. Kemej chikuasen metsti satepan ke kiixmatik Jesús oso xa se xiuit satepan, tatitanil Pedro monekik kiixtalis se taman tein semi monekia. Yejua kinkitskiaya amichimej uan ijkon kinixpanoltiaya ichankauan. Yejua ika, keman Jesús kiyoleuak maj mochiua itatojtokakauj, xa itech tanemilij inamik achto ke kiixtaliskia toni kichiuas (Luc. 5:1-11). Pedro kiixtalij kiteixmatiltis iTekiuajyo Dios iuan Jesús. ¡Semi kuali taixpejpenak! Uan Biblia kinextia ke inamik kipaleuij, porin satepan ke Jesús oksepa nemik, iuan yajtinemik Pedro keman tanojnotsato itech seki xolalmej (1 Cor. 9:5). Kemej inamik kikauak se kuali neskayot, Pedro uelik kinyolmajxitij tokniuan takamej uan siuamej akin kipiayaj ininnamik (1 Ped. 3:1-7). Nejin kinextia ke Pedro uan inamik takuaujtamatiaj ke Jiova kinmakaskia tein monekia komo kitayekanaltiayaj kiteixmatiltiskej iTekiuajyo (xikonixtajtolti Mateo 6:25, 31-34).

15. ¿Toni mitsonmachtia tein kichiujkej Tiago uan inamik Esther?

¹⁵ Uan komo uejkaujya nanmonamiktijkej, ¿toni uelis namechpaleuis xiknekikan okachi nankitekitiliskej Jiova? Uelis nankiitaskej toni kichiuanij okseki tokniuan akin kipiaj ininnamik. Kemej neskayot, uelis nankiixtajtoltiskej taxelol “Ika miak pakilis motemakakej tapaleuitiuij”. * Yejua nejon kichiujkej Tiago uan inamik Esther, akin kayomej Brasil. Tein kiixtajtoltijkej itech nejon taxelol kinpaleuij maj kinekinij tapaleuitij kampa monekiaj okachi tanojnotsanij. Tiago kijtoj: “Keman tikixtajtoltijkej keniuj Jiova kinpaleuiani itekitikauan itech nejin tonalmej, kichiuak maj tiknekinij no tikitaskej keniuj Jiova techixyekana uan techyekpia”. Satepan, itech xiuit 2014, nejin tokniuan tapaleuitoj Paraguay itech tajtol portugués. Esther kijtoj: “Semi tikuelitaj tein kijtoua Efesios 3:20. Itech xiujmej tein tiktekitilianij Jiova, tikitanij keniuj miakpa mochiuani nejin tajtolmej”. Itech amat tein Pablo kinijkuilouilij tokniuan akin nemiaj Éfeso, kijtoj ke Jiova techmakas okachi ke tein tiktajtaniaj. Uan nejon nochipa ijkon mochiuani.

16. ¿Akonimej uelis kinpaleuiskej tokniuan akin yankuixtok monamiktijkej?

¹⁶ Tokniuan akin yankuixtok namonamiktijkej, ininneskayo seki tokniuan akin kipanouanij miak taman tein kinpaleuiani maj takuaujtamatikan iuan Jiova uelis semi namechpaleuis. Seki tokniuan akin kipiaj ininnamik miak xiujmejya kitekitilianij Jiova kemej precursores. Uelis nankintajtaniskej maj namechyolmajxitikan ika tein nankiixtalijtokej nankichiuaskej itech itekiyo Jiova. Ijkon no nankinextiaj ke nantakuaujtamatij iuan Jiova (Prov. 22:17, 19). Tokniuan tayekananij no uelis namechpaleuiskej xikixtalikan  keniuj nankitekitiliskej Jiova uan maj ueli xikchiuakan.

17. ¿Toni kinpanok Klaus uan Marisa, uan toni techmachtia nejon?

¹⁷ Kemansa xa tiknekij se tekit itech itekiyo Jiova, sayoj ke amo tikseliaj tein tiknekiaj. Maj tikitakan tein kinpanok Klaus uan Marisa, akin achto ininka titajtojkej. Eyi xiuit satepan ke monamiktijkej, kikaujkej ininchan uan tapaleuitoj Betel ompa Finlandia itech kalchiualis. Sayoj ke kiniluijkej ke ueliskia mokauaskej sayoj chikuasen metsti. Maski yekinika nejon semi kintayokoltij, satepan kinyoleujkej maj momachtikan tajtol árabe, uan axkan semi kinyolpaktia tapaleuiskej itech se altepet kampa motajtoua árabe. Marisa kijtoua: “Se kimouilia se kichiuas tein amo keman se kichiuani, uan senkis moneki se takuaujtamatis iuan Jiova. Sayoj ke nikitani ke yejuatsin nochipa techpaleuiani kemej amo tiknemiliayaj. Nejin kichiuani maj okachi iuan nitakuaujtamati Jiova”. Kemej tikitaj, uelis titakuaujtamatiskej ke Jiova nochipa techtatiochiuis komo senkis iuan titakuaujtamatij.

18. ¿Toni kinpaleuis tokniuan akin kipiaj ininnamik maj kisentokakan takuaujtamatikan iuan Jiova?

¹⁸ Nenamiktilis se inetetayokolil Jiova (Mat. 19:5, 6). Uan yejuatsin kineki maj akin monamiktijkejya yolpakikan (Prov. 5:18). Tokniuan akin yankuixtok namonamiktijkej, kuali yeskia xikitakan toni nankichiujtokej itech namonemilis. ¿Namochikaujtokej nankinextiliskej Jiova ke nankitasojkamatiliaj nochi tein namechmakani? Xiktataujtikan Jiova, xiktemokan tayolmajxitilis itech iTajtol tein uelis namechpaleuis uan xikchiuakan. Uelis nantakuaujtamatiskej ke komo nankitayekanaltiaj nankitekitiliskej Jiova, nanyolpakiskej iuan namonamik.