TAMACHTILIS 20
¿Toni kijtoua Apocalipsis ke kinpanos akin kiixnamikij Dios?
“Kinsentilijke nochi tayekanani tech se ueyi ixtauat ten kitokaytia ika hebreojtajtol Armagedón” (APOC. 16:16).
NEKUIKATIL 150 Jiova mitsmakixtis
TEIN MOITAS *
1. Kemej kijtoua amatajkuilol Apocalipsis, ¿toni kinchiuilia Satanás itekitikauan Dios?
AMATAJKUILOL Apocalipsis kinextia ke iTekiuajyo Dios taixyekantokya ompa iluikak uan ke Satanás kiualpantamotkej nikan taltikpak (Apoc. 12:1-9). Nejon kichiuak maj yolpakinij ompa iluikak, sayoj ke no kichiuak maj tejuan okachiok tikpiakan kuejmolmej. ¿Keyej? Porin kemej Satanás semi kualantok kinchiuilia tein amo kuali itekitikauan Jiova (Apoc. 12:12, 15, 17).
2. ¿Toni techpaleuis maj amo tikauakan Jiova?
2 ¿Toni techpaleuis maj amo tikauakan Jiova maski Satanás techixnamikis? (Apoc. 13:10). Komo tikmatij tein panos satepan. Kemej neskayot, itech amatajkuilol Apocalipsis, tatitanil Juan ika tajtoj seki tatiochiualismej tein tikseliskej amo uejkaua. Se taman yejua keman kijtoj ke akin kiixnamikij Dios kinixpoloskej. Maj tikitakan keniuj ininka motajtoua itech Apocalipsis uan tein kinpanos.
MOIXNEXTIAJ AKIN KIIXNAMIKIJ DIOS
3. ¿Toni moixnextia itech amatajkuilol Apocalipsis?
3 Yekinika versículo tein kipia amatajkuilol Apocalipsis kiteajsikamatiltia ke tein ompa ijkuiliujtok kiixnextia seki taman (Apoc. 1:1). Akin kiixnamikij Dios moixnextiaj kemej koujtajtapialmej oso ‘okuilimej’. Kemej neskayot, ika motajtoua “se koujtajtapial tein kisaya den ueyiat” uan “kipiaya majtakti ikuaomiyouan uan chikome itsontekonuan” (Apoc. 13:1, TNM). Satepan moijtoua ke “ual ajkopankisak den tal ne ika ome okuilin. Uan [...] tajtojtinemia pitsotik keme ne ueyi tekuani ten kiliaj dragón”. Uan kichiuaya “ma ual panuetsi tit desde ne eluiyaktsinko” (Apoc. 13:11-13). Ompa, ika motajtoua “se chichiltik okuilin” uan ipanko tokotsyetiuj se siuaauilnenkej. Nejin eyi koujtajtapialmej kinixnextiaj akin kiixnamikinij Jiova uan iTekiuajyo miak xiujmej. Yejua ika moneki maj tikmatikan akonimej (Apoc. 17:1, 3).
NAUI UEJUEYI TAPIALMEJ
Kisaj “itech ueyiat” (Dan. 7:1-8, 15-17). Kinixnextiaj tekiuajyomej akin kiixnamikinij ixolal Jiova oso taixyekananij kampa yejuan neminij. Peuak mochiua nejin itech itonaluan Daniel uan hasta axkan. (Xikonita párrafo 4 uan 7).
4, 5. ¿Keniuj Daniel 7:15-17 techpaleuia maj tikajsikamatikan seki taman tein moixnextia itech amatajkuilol Apocalipsis?
4 Achto ke tikmatiskej akonimej kiixnamikij Dios, moneki tikajsikamatiskej toni kiixnextiaj koujtajtapialmej uan siuaauilnenkej. Uan Biblia techmelauilia nejon. Miak taman tein moijtoua itech amatajkuilol Apocalipsis no ika motajtoua itech okseki amatajkuilolmej. Kemej neskayot, itech se takochitalis tanauatijkej Daniel kiitak ke “naui uejueyi tapialmej kiskej itech ueyiat” (Dan. 7:1-3). Daniel kijtoua ke nejin uejueyi tapialmej kiixnextiaj naui “tekiuanij” oso tekiuajyomej (xikonixtajtolti Daniel 7:15-17). Nejin techpaleuia maj tikajsikamatikan ke tapialmej tein ika motajtoua itech amatajkuilol Apocalipsis no kiixnextiaj tekiuajyomej.
5 Maj tikitakan seki taman tein ika motajtoua itech amatajkuilol Apocalipsis. Biblia techpaleuis maj tikajsikamatikan toni kijtosneki tein tikitaskej. Yekinika ika titajtoskej koujtajtapialmej, tikitaskej akonimej kinixnextiaj uan toni kinpanoua. Satepan ika titajtoskej tein techmachtia.
MOIXMATI AKONIMEJ KIIXNAMIKIJ DIOS
KOUJTAJTAPIAL TEIN KIPIA CHIKOME ITSONTEKONUAN
Kisa “den ueyiat” uan kipia chikome itsontekouan, majtakti ikuaomiyouan uan majtakti coronas (Apoc. 13:1-4, TNM). Kinixnextiaj nochin tekiuajyomej akin taixyekananij nikan taltikpak. Chikome itsontekonuan kinixnextiaj chikome uejueyi tekiuajyomej akin kiixnamikinij ixolal Jiova oso taixyekananij kampa yejuan neminij. (Xikonita párrafos 6 hasta 8).
6. ¿Toni kiixnextia koujtajtapial tein kipia chikome itsontekonuan tein ika motajtoua itech Apocalipsis 13:1-4?
6 ¿Toni kiixnextia koujtajtapial tein kipia chikome itsontekonuan? (Xikonixtajtolti Apocalipsis 13:1-4). Biblia kijtoua ke nejin koujtajtapial tamati kemej se leopardo, sayoj ke kipia imetsuan kemej se oso, itenoj kemej se león uan kipia majtakti ikuaomiyouan. Naui tapialmej tein ika motajtoua itech Daniel capítulo 7 no ijkon tamatij. Sayoj ke, itech Apocalipsis moijtoua ke sayoj se tapial ijkon tamati. Yejua ika, nejin koujtajtapial amo kiixnextia sayoj se tekiuajyot. Uan no, Apocalipsis kijtoua ke kipia “tanauatil para tayekantinemis ipan nochi tataman tagayot uan ipan tataman pueblojme uan ipan nochi tataman paísme uan ipan nochi tataman tagayot ten tajtoaj ika tataman tajtolme”. Nejin kinextia ke kipia okachi tanauatil ke se tekiuajyot itech se altepet (Apoc. 13:7). Yejua ika, nejin koujtajtapial kinixnextia nochi tekiuajyomej tein taixyekananij nikan taltikpak hasta axkan (Ecl. 8:9). *
7. ¿Toni kiixnextiaj chikome itsontekonuan koujtajtapial?
7 ¿Toni kiixnextiaj chikome itsontekonuan koujtajtapial? Apocalipsis capítulo 17 techpaleuia maj tikmatikan nejin porin ompa ika motajtoua tapial tein no ixnesi itech capítulo 13. Apocalipsis 17:10 kijtoua: “Yejuan [...] chikome tayekanani reyes. Pero makuil de ne chikome tayekanani ipa ixpoliuke ya. Pero se rey tayekantinemi ok. Uan okse tayekanke ayamo monextij. Pero kuak yejua monextikiu ya, [...] amo uejkauas ok tayekantinemis”. Satanás kikuini tataman tekiuajyomej, sayoj ke moajsij chikome tein moixnextiaj kemej tsontekomamej porin okachi kipianij tanauatil. Nejin tekiuajyomej kiixnamikinij ixolal Jiova oso taixyekananij kampa yejuan neminij. Itech itonaluan tatitanil Juan, makuil nejin tekiuajyomej amo taixyekanayajok: Egipto, Asiria, Babilonia, Medopersia uan Grecia. Chikuasentika tekiuajyot, Roma, taixyekantoya keman tatitanil Juan kimatiltijkej nejin. ¿Katiyejua yeskia chikometika tekiuajyot oso tsontekon?
8. ¿Akoni kiixnextia chikometika tsontekon tein kipia koujtajtapial?
8 Kemej tikitaskej, tein moijtoj itech amatajkuilol Daniel techpaleuia maj tikmatikan akoni chikometika tsontekon tein kipia koujtajtapial. ¿Katiyejua tekiuajyot taixyekantoni itech nejin tonalmej, itech “itonal toTekotsin”? (Apoc. 1:10, TNM). Ueyi tekiuajyot Reino Unido uan Estados Unidos. Yejua ika, uelis tikijtoskej ke nejin yejua chikometika tsontekon tein kipia koujtajtapial tein ika motajtoua itech Apocalipsis 13:1-4.
“OKUILIN KIPIAYA OME IKUAKUAU KEME KIPIA IN OKICH ICHKAT”
Kisa “den tal” uan tajtoua “keme ne ueyi tekuani ten kiliaj dragón”. Kichiua “ma ual panuetsi tit desde ne eluiyaktsinko”, uan kemej yejua tanauatijkej tein amo melauak, kichiua “ueyi mouiskatekime” (Apoc. 13:11-15; 16:13; 19:20). Ueyi tekiuajyot Reino Unido uan Estados Unidos, moixnextia kemej se koujtajtapial tein kipia ome ikuaomiyouan uan kemej se tanauatijkej tein amo melauak, porin “kinkajkayaua in taltikpakyetoni” uan kiniluia “ma kichijchiuakan se tatadios ten ixtamati keme ne achto okuilin”, tein kipia chikome itsontekonuan uan majtakti ikuaomiyouan. (Xikonita párrafo 9).
9. ¿Akoni kiixnextia koujtajtapial tein kipia “ome ikuakuau keme kipia in okich ichkat”?
9 Itech Apocalipsis capítulo 13 kijtoua toni kichiua chikometika tsontekon tein kiixnextia Reino Unido uan Estados Unidos. Kijtoua nejin: “Kipiaya ome ikuakuau keme kipia in okich ichkat. Pero [...] tajtojtinemia pitsotik keme ne ueyi tekuani ten kiliaj dragón”. Nejin “okuilin kichiuak ya ueyi mouiskatekime hasta ma ual panuetsi tit desde ne eluiyaktsinko para ma kitakan nochi in taltikpakyetoni” (Apoc. 13:11-15). Uan itech Apocalipsis capítulo 16 uan 19 kitokaytia kemej tanauatijkej tein amo melauak (Apoc. 16:13; 19:20). Daniel no ika tajtoj tein kichiuaj Reino Unido uan Estados Unidos keman kijtoj: “Semi tauejuelos” (Dan. 8:19, 23, 24, nota). Uan yejua nejon tein panok itech Ojpatika Ueyi Neteuilis. Ome uejueyi bombas tein ika tamik nejin neteuilis kisenchijchiujkej tamatinij kayomej Reino Unido uan Estados Unidos. Ijkon, nejin ueyi tekiuajyot kichiuak “ma ual panuetsi tit desde ne eluiyaktsinko”.
SE KOUJTAJTAPIAL CHICHILTIK
Ipanko tokotsyetiuj se siuaauilnenkej, “ueyi […] Babilonia”. Moijtoua ke nejin se chikueyi tayekankej (Apoc. 17:3-6, 8, 11). Yekinika, siuaauilnenkej kiixyekana koujtajtapial, sayoj ke satepan koujtajtapial kiixpoloua. Siuaauilnenkej kinixnextia nochi taneltokalismej tein amo melaujkej. Koujtajtapial axkan kiixnextia Organización de las Naciones Unidas, akin kinpaleuia tekiuajyomej. (Xikonita párrafos 10, 14 hasta 17).
10. ¿Toni kiixnextia “ten tamati keme ne achto okuilin”? (Apocalipsis 13:14, 15, TNM; 17:3, 8, 11).
10 Axkan ika motajtoua okse tapial. Nejin tapial semi tamati kemej koujtajtapial tein kipia chikome itsontekonuan, sayoj ke nejin chichiltik. Apocalipsis kijtoua ke “tamati keme ne achto okuilin” uan ke yejua se “chikueyi tayekanke” (xikonixtajtolti Apocalipsis 13:14, 15; 17:3, 8, 11). * Moijtoua ke nejin “tayekanke” nesik, ompa ixpoliuik uan satepan oksepa nesik. Nejin kinextia tein kipanok Organización de las Naciones Unidas, akin kinpaleuia tekiuajyomej. Yekinika motokaytiaya Sociedad de Naciones. Itech Ojpatika Ueyi Neteuilis ixpoliuik uan satepan oksepa nesik.
11. ¿Toni kichiuaskej koujtajtapialmej oso tekiuajyomej, uan keyej amo moneki timouiskej?
11 Ika tein kimoyauaj koujtajtapialmej oso tekiuajyomej, kichiuaskej maj taltikpakneminij kiixnamikikan Dios uan ixolal. Kemej yeskia kinsentiliskej “nochi tataman tayekanani” itech Armagedón, “para moteuiske ika guerra iuan Dios tech ne [i]ueyi tonal [...] porin sayo Yejuatsin kipixtinemi nochi chikaualis” (Apoc. 16:13, 14, 16). Sayoj ke amo moneki timouiskej, porin toueyi Dios Jiova niman kinmakixtis nochin akin kipaleuiaj itaixyekanalis (Ezeq. 38:21-23).
12. ¿Toni kinpanos nochi koujtajtapialmej?
12 ¿Toni kinpanos nochi koujtajtapialmej? Apocalipsis 19:20 itech Traducción del Nuevo Mundo, kijtoua: “Kikitskij koujtajtapial uan no tanauatijkej tein amo melauak tein kichiuak milagros iixpan koujtajtapial. Ika nejon milagros kinkajkayauak akin kinneskayotijkej ika itokay koujtajtapial uan akin kiueyichiuaj itaixkopin tamachijchiuj. Uan nochin omen kinpantamotak yoltokej kampa kuakualakatok tit”. Yejua ika, keman taixyekantoskejok, tekiuanij akin kiixnamikij Dios senkis kinixpoloskej.
13. ¿Katiyejua ouijkayot tikpanouaj akin tikchiuaj kemej Cristo?
13 Tein techmachtia. Akin tikchiuaj kemej Cristo moneki tiktakamatiskej Dios uan tikpaleuiskej iTekiuajyo (Juan 18:36). Uelis tikchiuaskej komo amo tikinpaleuiaj nion tikinixnamikij tekiuanij. Sayoj ke nejin uelis yeski ouij porin tekiuanij kinekij maj tikinpaleuikan ika tein tikijtouaj uan ika tein tikchiuaj. Akin kinpaleuiaj kemej yeskia mokauaj maj kintalilikan se “neskayot” tein kinextia ke kinpaleuiaj tekiuanij (Apoc. 13:16, 17). Uan akin kipiaj nejon “neskayot” amo ueli kiyolpaktiajok Dios uan amo uelisok nemiskej nochipaya (Apoc. 14:9, 10; 20:4). Yejua ika moneki maj amo tikinpaleuikan nion tikinixnamikikan tekiuanij maski yejuan techchikaujkauiskej maj tikinpaleuikan.
SEMI TEPINAUJTIJ KEMEJ KIIXPOLOUAJ SIUAAUILNENKEJ
14. ¿Toni semi kimoujkaitak tatitanil Juan? (Apocalipsis 17:3-5).
14 Tatitanil Juan kijtoua ke kiitak okse taman tein semi kimoujkaitak. ¿Toni katka? Se siuat akin tokotsyetoya ipanko semej nejin koujtajtapialmej (Apoc. 17:1, 2, 6). Moixnextia kemej se “siuaauilnenke”, uan motokaytia “ueyi […] Babilonia”. Uan nejon siuat auilnemi iniuan tekiuanij itech taltikpak (xikonixtajtolti Apocalipsis 17:3-5).
15, 16. ¿Toni “ueyi […] Babilonia”, uan keniuj tikmatij?
15 ¿Toni “ueyi […] Babilonia”? Nejin siuat amo uelis kiixnextis se tekiuajyot porin Apocalipsis kijtoua ke auilnemi iniuan nochi tekiuajyomej (Apoc. 18:9). Kemej moijtoua ke tokotsyetiuj ipanko se koujtajtapial, nejon kinextia ke kitemoua kinixyekanas. Uan amo no uelis kinixnextis tanamakanij akin sayoj kitemouaj motomintiskej, porin Apocalipsis ininka tajtoua uan kintokaytia “tanamakanij de nochi taltikpak” (Apoc. 18:11, 15, 16, TNM).
16 Keman Biblia ika tajtoua auilnemilis, miakpa kiixnextia aksa akin kijtoua ke kitekitilia Dios, sayoj ke no kinueyichiua tiotsitsin oso kichiua okseki taman kemej akin amo kitekitiliaj Dios (1 Crón. 5:25; Sant. 4:4). Sayoj ke, keman ika motajtoua aksa akin kitakamati Dios, mokui tajtol chipauak (2 Cor. 11:2; Apoc. 14:4). Ne uejkauj itech xolal Babilonia, akin ompa nemiaj semi kinueyichiuayaj tiotsitsin. Yejua ika “ueyi […] Babilonia” kiixnextia nochi tataman taueyichiualis tein amo melauak. Tein melauj, kijtosneki nochi taneltokalismej tein amo melaujkej (Apoc. 17:5, 18; itech jw.org, xikonita tamachtilis “¿Qué es Babilonia la Grande?”).
17. ¿Toni kipanos “ueyi […] Babilonia”?
17 ¿Toni kipanos “ueyi […] Babilonia”? Apocalipsis 17:16, 17 itech Traducción del Nuevo Mundo, kijtoua: “Majtakti kuaomimej tein tikitak uan koujtajtapial kitauelitaskej siuaauilnenkej uan kitamikuiliskej nochi tein kipia uan kixipetsoskej. Kikuaskej inakayo uan kitamichichinoskej. Porin Dios kichiuak maj kiyolnemilikan kichiuaskej [...] tein Dios kinemilijtok”. Jiova kichiuas maj tekiuajyomej mopaleuikan iuan koujtajtapial chichiltik, tein kijtosneki Naciones Unidas, para kinixnamikiskej taneltokalismej tein amo melaujkej uan senkis kinixpoloskej (Apoc. 18:21-24).
18. ¿Toni moneki tikchiuaskej uan ijkon amo tipouiskej itech “ueyi […] Babilonia”?
18 Tein techmachtia. Semi moneki maj tikueyichiuakan Dios kemej yejuatsin kiita ke chipauak (Sant. 1:27). Maj amo keman tikauakan maj “ueyi […] Babilonia” techkajkayaua ika tein tamachtia, ika tein momattokej kichiuaskej akin ompa pouij, ika tein kijtouaj ke kuali yetok uan ika naualot. Uan maj tiksentokakan tikiniluikan nochin: “Xikisakan de [...] Babilonia”. Komo kichiuaj, Dios kiitas ke amo kipaleuijkej ika nochi tein amo kuali tein kichiuak (Apoc. 18:4).
TEIN KIPANOS AKIN OKACHI KIIXNAMIKINI DIOS
UEYI KOUAT TAMOUILIL, CHICHILTIK KEMEJ TIT
Satanás kimaka tanauatil koujtajtapial tein kipia chikome itsontekonuan (Apoc. 12:3, 9, 13; 13:4; 20:2, 10). Satanás, akin okachi kiixnamikini Jiova, tsaktos mil xiujmej itech se ostok. Satepan kipantamotaskej “kampa kuakualakatok tit”. (Xikonita párrafo 19 uan 20).
19. ¿Akoni “ueyi kouat tamouilil, chichiltik kemej tit”?
19 Amatajkuilol Apocalipsis no ika tajtoua “se ueyi kouat tamouilil, chichiltik kemej tit” (Apoc. 12:3, TNM). Nejin ueyi kouat moteuia iuan Jesús uan iángeles (Apoc. 12:7-9). Uan no, kiixnamiki ixolal Dios uan kinmaka tanauatil koujtajtapialmej oso tekiuajyomej (Apoc. 12:17; 13:4). ¿Akoni nejin “ueyi kouat tamouilil”? Yejua ne kouat akin “kitokaytijke in amokuali, uan no kitokaytijke Satanás” (Apoc. 12:9; 20:2). Yejua akin kinixyekana nochin akin kiixnamikij Jiova.
20. ¿Toni kipanos “ueyi kouat tamouilil”?
20 ¿Toni kipanos “ueyi kouat tamouilil”? Apocalipsis 20:1-3 kijtoua ke se ángel kipantamotas Satanás itech se ueyi ostok oso tekoch uan ompa tsaktos mil xiujmej, uan amo oksepa kinkajkayauas taltikpakneminij hasta maj panokan mil xiujmej. Uan satepan, Satanás uan iamokuali ejekauan kinpantamotaskej “kampa kuakualakatok tit”. Nejin kijtosneki ke senkis kinixpoloskej (Apoc. 20:10, TNM). ¡Semi kualtsin tinemiskej keman Satanás uan iamokuali ejekauan amo nemiskejok!
21. ¿Keyej techyolpaktia tein axkan tikixtajtoltianij itech amatajkuilol Apocalipsis?
21 ¿Melauj ke semi techyolchikaua tikajsikamatiskej tein ika motajtoua itech amatajkuilol Apocalipsis? Tikmatkejya akonimej kiixnamikij Jiova uan toni kinpanos. Yejua ika, “yolpaktokke nochi nekes ten kileerojtinemiske nijin tajtolme. Uan no [...] nochi nekes ten kikaktinemiske [...] ten nikan ixnesi tech nijin tajkuilolamatsin” (Apoc. 1:3). ¿Uan toni tatiochiualismej kiseliskej akin kitakamatij Dios keman kinixpoloskej akin kiixnamikij? Nejin tikitaskej itech expatika tamachtilis tein ika tajtoua amatajkuilol Apocalipsis.
NEKUIKATIL 23 Jiova peuakya tekiuajti
^ párr. 5 Amatajkuilol Apocalipsis kinixnextia akin kiixnamikij Dios ika seki taman, uan amatajkuilol Daniel techpaleuia maj tikajsikamatikan toni kijtosneki sejse taman tein moixnextia. Itech nejin tamachtilis tikitaskej seki taman tein achto moijtoj itech amatajkuilol Daniel uan Apocalipsis. Nejon techpaleuis maj tikmatikan akonimej kiixnamikij Dios uan satepan tikitaskej toni kinpanos.
^ párr. 6 ‘Majtakti kuaomiyomej’ kiyeknextiaj ke tapial tein kipia chikome itsontekonuan kinixnextia nochi tekiuajyomej. Itech Biblia, tapoual majtakti miakpa mokui para monextis ke teisa ajsitok.
^ párr. 10 “Ten tamati keme ne achto okuilin” amo kipia coronas oso diademas itech ikuaomiyouan kemej tein kipia yekinika koujtajtapial (Apoc. 13:1). Uan amo kipia porin kisa itech chikome tekiuanij uan yejuan kimakaj tanauatil (itech jw.org, xikonita tamachtilis “¿Qué es la bestia de color escarlata del capítulo 17 de Apocalipsis?”).
