1, 2. Kemej kinextia Hechos 8:27-31, 35, 36, 38, ¿keyej moauij takat akin kayot Etiopía?

¿TIKONNEKI tionmoauis uan tionmochiuas itatojtokakauj Cristo? Miakej moauiaj porin kitasojtaj Jiova uan kitasojkamatiliaj nochi tein yejuatsin ininka kichiuani. Maj tikitakan tein kichiuak se takat ueyichiujkej akin kitekitiliaya siuat akin tekiuajtia Etiopía.

² Nejin takat niman moauij keman kiajsikamatik ika inepaleuil iTajtol Dios ke monekia ijkon kichiuas (xikonixtajtolti Hechos 8:27-31, 35, 36, 38). ¿Keyej? Senkis moita ke kipatiuitaya iTajtol Dios, porin keman yajtoya itech icarro kiixtajtoltijtiaya seki tajkuilolmej tein moajsij itech amatajkuilol Isaías. Uan keman Felipe kitapouij tein Jesús kichiuak, nejon takat semi motasojkamatik. Uan no, tikmatij ke kitasojtayaya Jiova, porin yajka Jerusalén kiueyichiuato uan axkan mokepayaya. Nejin kinextia ke kikaujkaya itaneltokalis uan peujka kiueyichiua Dios akin melauak iuan ixolal tein kiixpejpenka. Kemej kitasojtaya Jiova, kiixtalij kichiuas okse taman tein semi moneki. Moauij uan mochiuak itatojtokakauj Cristo (Mat. 28:19).

3. ¿Toni uelis kichiuas maj se taltikpaknenkej amo moaui? (Xikonita recuadro “ ¿Katiyejua tal mitsonixnextia tejuatsin?”).

³ Komo tikontasojta Jiova, nejon uelis kichiuas xikonneki tionmoauis. Sayoj ke moajsi seki taman tein uelis kichiuas amo xionmoaui. Kemej neskayot, tejuatsin xa tikontasojta mochankauan uan akin iniuan tionmouika akin amo itaixpantijkauan Jiova uan tikonnemilia ke komo tionmoauia amo mitsontasojtaskejok (Mat. 10:37). Oso xa  uejkaujya tikonchiua seki taman tein tikonmati ke Dios kitauelita uan ouij mitsonkisa amo tikonchiuasok (Sal. 97:10). Oso xa uejkaujya tikonchiuani iluimej tein mouikaj ika taneltokalis tein amo melauak uan tikonelnamiki ke semi tionyolpakia. Yejua ika ouij mitsonkisa amo tikonchiuasok nejon iluimej (1 Cor. 10:20, 21). Axkan moneki tikonixtalis toni okachi tikonpatiuitas oso akoni okachi tikontasojtas.

4. ¿Toni okachi moneki techolinis maj timoauikan?

⁴ Xa achto ke tionpeuaskia tionmomachtis iniuan itaixpantijkauan Jiova, tejuatsin tikonpatiuitayaya Biblia uan xa no tikontasojtaya Jesús. Uan axkan ke tikonixmati itaixpantijkauan Jiova, xa tikonuelita iniuan tionyetos. Sayoj ke nochi nejon tein tikonmachilia amo kichiuas xikonneki tionmotemaktis iuan Jiova uan tionmoauis. Tein okachi moneki techolinis maj timoauikan yejua netasojtalis tein tikpialiaj Jiova. Keman tejuatsin okachi tikontasojtas Jiova, amo tikonkauas maj nion akin uan nion teyi kichiua amo xikontekitili. Komo tikontasojta Jiova, tikonnekis tionmoauis uan mitsonpaleuis amo xikonkaua satepan ke tionmoauis.

5. ¿Toni tikitaskej itech nejin tamachtilis?

⁵ Jesús kijtoj ke moneki tiktasojtaskej Jiova ika nochi toyolo, tonemilis, totanemilil uan tochikaualis (Mar. 12:30). ¿Toni mitsonpaleuis ijkon xikontasojta uan xikonpoujkaita oso xikonmouiskaita? Komo tiontanemilia itech netasojtalis tein techpialia (1 Juan 4:19). Yejua ika, nejin tamachtilis ika tajtos toni moneki tikonchiuas tein mitsonpaleuis xikontasojta Jiova uan xionmoaui. *

6. Kemej kijtoua Romanos 1:20, ¿katiyejua se taman kemej uelis tikixmatiskej Jiova?

⁶ Xikonixmati Jiova ika itachijchiualis (xikonixtajtolti Romanos 1:20; Apoc. 4:11). Xiontanemili keniuj chijchiujtokej koujmej uan tapialmej, tein kinextiaj ke Jiova semi tamatkej. Xionmomachti keniuj semi kualtsin tichijchiujtokej (Sal. 139:14). Uan xiontanemili itech chikaualis tein kitalij itech Tonaltsin. Uan amo sayoj yejua, ta no kitalij chikaualis itech millones sitalimej (Is. 40:26). * Keman tiontanemilis itech itachijchiualis Jiova, okachi tikonpoujkaitas. Tikonmatis ke Jiova kipia tamatilis uan chikaualis mitsonpaleuia kuali xionmouika iuan, sayoj ke moneki okachi tikonixmatis porin nejon mitsonpaleuis okachi xikontasojta.

7. ¿Toni moneki tikonneltokas tein mitsonpaleuis okachi xikontasojta Jiova?

⁷ Moneki tikonneltokas ke Jiova mitsontasojta. ¿Mitsonouijmaka tikonneltokas ke akin kichijchiuak iluikak uan taltikpak kimati ke tionnemi uan ke mitsontasojta? Komo ijkon, xikonelnamiki ke Jiova “amo uejka yetika de cada senme de tejuan” (Hech. 17:26-28). Kemej David kiluij Salomón, Dios “kiita ininyolo nochin”. Yejuatsin kijtoua ke komo tikontemoua, mokauas xikonajsi (1 Crón. 28:9). Tein melauj, tionmomachtijtok Biblia porin yejuatsin kichiuak xionmotoki iuan, ijkon kemej kijtoua Jeremías 31:3. Keman okachi tikonajsikamatis  tein Jiova moka kichiuak, okachi tikontasojtas.

8. ¿Keniuj uelis tikonnextis ke tikontasojkamatilia Jiova inetasojtalis?

⁸ Ika netataujtil uelis tikonnextis ke tikontasojkamati inetasojtalis Jiova. Okachi tikontasojtas keman tikontapouis tein mitsontekipachoua uan tikontasojkamatilis tein moka kichiuani. Uan keman tikonitas ke kinankilia monetataujtiluan okachi kuali iuan tionmouikas (Sal. 116:1). Tikonneltokas ke Dios mitsonajsikamati. Sayoj ke, uelis okachi tionmouikas iuan Jiova komo tikonajsikamati keniuj tanemilia uan toni kineki xikonchiua. Uelis tikonmatis nejon komo tionmomachtia iTajtol, Biblia.

9. ¿Keniuj uelis tikonnextis ke tikonpatiuita Biblia?

⁹ Xionmochikaua tikonpatiuitas iTajtol Dios. Sayoj Biblia kijtoua akoni Jiova uan keniuj kiixtalijtok xionnemi satepan. ¿Keniuj uelis tikonnextis ke tikonpatiuita? Komo mojmostaj tikonixtajtoltia, komo tionmomachtia achto ke mitsonmachtiskej uan komo tikonchiua tein tionmomachtia (Sal. 119:97, 99; Juan 17:17). ¿Tikonixtalijtok se hora keman tikonixtajtoltis Biblia, uan mojmostaj ijkon tikonchiua?

10. ¿Toni kichiua maj Biblia semi taman ke okseki amatajkuilolmej?

¹⁰ Biblia semi taman ke okseki amatajkuilolmej porin seki taman tein ompa ijkuiliujtok kitetapouijkej akin kiitakej Jesús. Sayoj nejin amatajkuilol ika tajtoua tein Jesús moka kichiuak. Keman tikonmatis tein Jesús kijtoj uan kichiuak, tikonnejnekis kuali iuan tionmouikas.

11. ¿Toni mitsonpaleuis okachi xikontasojta Jiova?

¹¹ Xionmochikaua tikontasojtas Jesús. Nejin kichiuas okachi xikontasojta Jiova, porin Jesús kinextia kualtsitsin kualneskayomej tein kipia ipopaj (Juan 14:9). Yejua ika, komo okachi tikonixmati Jesús, okachi tikonixmatis Jiova uan okachi tikontasojtas. Xikonnemili keniuj Jesús kinextij ke kinikneliaya akin taltikpakneminij kintauelitayaj,  kemej akin kipanouayaj tatasojtilis, akin mokokouayaj uan akin amo kipiayaj chikaualis. No xiontanemili itech kuali tayolmajxitilis tein mitsonmaka uan keniuj mitsonpaleuiaj keman tikontakamati (Mat. 5:1-11; 7:24-27).

12. Keman tikonixmatis Jesús, ¿toni tikonnekis tikonchiuas?

¹² Keman tikonnemilis ke Jesús kitemakak inemilis uan ijkon Dios uelis techtapojpoluis, okachi tikontasojtas (Mat. 20:28). Keman tikonajsikamatis ke kinekik moka momikilis, nejon kichiuas xionmoyolnonotsa oso xionmoyolnemili uan xikontemo maj Jiova mitsontapojpolui (Hech. 3:19, 20; 1 Juan 1:9). Uan keman okachi tikontasojtas Jiova uan Jesús, okachi tikonnekis tionyetos iniuan akin no kintasojtaj.

13. ¿Toni mitsonmakani Jiova?

¹³ Xionmochikaua tikontasojtas akin kitasojtaj Jiova. Mochankauan uan akin iniuan tionmouikaya akin amo kitekitiliaj Jiova xa amo kiajsikamatiskej keyej tikonneki tionmotemaktis iuan Dios, uan xa hasta mitsontauelitaskej. Sayoj ke Jiova mitsonpaleuis keman kichiuas maj tokniuan mochiuakan kemej mochankauan. Komo tejuatsin tionmotokia iniuan, mitsontasojtaskej uan mitsonpaleuiskej keman monekis (Mar. 10:29, 30; Heb. 10:24, 25). Uan xa se tonal mochankauan no kitekitiliskej Jiova uan kitakamatiskej itanauatiluan (1 Ped. 2:12).

14. Kemej kijtoua 1 Juan 5:3, ¿toni tikonitani axkan ke tikonixmati itanauatiluan Jiova?

¹⁴ Xionmochikaua tikonpatiuitas uan tikontakamatis itanauatiluan. Achto ke tikonixmatiskia Jiova, tejuatsin xa tikonchiuaya tein tikonnemiliaya ke kuali yetok, sayoj ke axkan tikonita ke itanauatiluan Jiova okachi tapaleuiaj (Sal. 1:1-3; xikonixtajtolti 1 Juan 5:3). Xiontanemili itech tein Biblia kinyolmajxitia takamej uan siuamej akin kipiaj ininnamik, tetatmej uan konemej (Efes. 5:22-6:4). ¿Okachi nanyolpakij kemej kalyetouanij porin nankitakamatij nejon tayolmajxitilismej? ¿Okachi mitsonpaleuiani kuali tikonixpejpenas akin iniuan tionmouika? ¿Okachi tionyolpaki? (Prov. 13:20; 1 Cor. 15:33.)

15. ¿Toni uelis tikonchiuas komo amo tikonmati keniuj uelis tikontakamatis tein Biblia tayolmajxitia?

¹⁵ Kemansa amo tikmatij keniuj tiktakamatiskej tein tayolmajxitia Biblia. Yejua ika Jiova itechkopa inechikol techmaka amaixmej tein ika tajtouaj Biblia tein techpaleuiaj maj tikmatikan toni kuali uan toni amo kuali (Heb. 5:13, 14). Keman tikonixtajtoltis uan tionmomachtis nejin amaixmej, tikonitas keniuj semi techpaleuiaj uan tikonmatis itech toni taman itech monemilis moneki tikonchiuas. Nejon kichiuas xikonneki tionmoajsis itech inechikol Jiova.

16. ¿Keniuj kiixtaliani Jiova maj moajsi ixolal?

¹⁶ Okachi xikonixmati inechikol Jiova uan xikontakamati. Jiova kiixtaliani maj ixolal moxejxelo itech nechikolmej, uan iKonetsin, Jesús, kinixyekana nochi nejon nechikolmej (Efes. 1:22; 5:23). Uan Jesús kinixtalij seki takamej taixpejpenalmej maj kiixyekanakan tekit tein kineki maj mochiua axkan. Nejin tokniuan, akin Jesús kintokaytij “takeual ten yolkuali uan ten kuatamatke” oso takuaujtamach uan tamatkej, kiitaj ke amo auil tekit tein kipiaj uan yejua ika mitsonpaleuiaj xionmotoki iuan Dios uan xikonsentoka kuali xionmouika iuan (Mat. 24:45-47). Se taman kemej nejin takeual mitsonpaleuia  yejua keman kinixtalia takamej akin yekyolmajsitokej kemej tayekananij. Yejuan uelis mitsonixyekanaskej uan mitsonmatampauiskej (Is. 32:1, 2; Heb. 13:17; 1 Ped. 5:2, 3). Nejin tayekananij kinekij mitsonpaleuiskej itech nochi tein monekis, kinekij mitsonyolseuiskej uan mitsonpaleuiskej okachi xionmouika iuan Jiova. Sayoj ke tein okachi moneki, mitsonpaleuiaj xikontapoui oksekin akoni Jiova (Efes. 4:11-13).

17. Kemej kijtoua Romanos 10:10, 13, 14, ¿keyej tikintapouiaj oksekin akoni Jiova?

¹⁷ Xikonpaleui oksekin maj no kitasojtakan Jiova. Jesús kiniluij imomachtijkauan maj kinmachtikan oksekin akoni Jiova (Mat. 28:19, 20). Uelis tiktakamatiskej nejon tanauatil porin tikmatij ke moneki ijkon tikchiuaskej. Sayoj ke keman tejuatsin okachi tikontasojtas Jiova, no tionmomachilis kemej tatitanilmej Pedro uan Juan, akin kijtojkej: “Amo uelis tikauaske de amo titetapouiske nochi nijin ten tikitakke uan ten tikakke” (Hech. 4:20). Semi tiyolpakij keman ueli tikpaleuiaj se taltikpaknenkej maj kitasojta Jiova. ¿Ueli tikonnemilia keniuj semi yolpakik Felipe keman kipaleuij takat kayot Etiopía maj kiixmati tein melauak uan maj moaui? Keman tikonchiuas kemej Felipe uan tiontanojnotsas ijkon kemej tanauatij Jesús, tikonnextis ke tikonneki tionmochiuas itaixpantijkauj Jiova (xikonixtajtolti Romanos 10:10, 13, 14, TNM). Ijkuak, xa no tikonijtos tein kijtoj takat kayot Etiopía: “¿Xe amo uelis ma xinechaui[?]” (Hech. 8:36).

18. ¿Toni tikitaskej itech okse tamachtilis?

¹⁸ Keman tikonixtalis tionmoauis, tikonchiuas tein okachi moneki itech monemilis. Kemej nejin amo auil, moneki kuali tikonnemilis toni kijtosneki se moauis. Itech okse tamachtilis ika titajtoskej neauilis uan toni moneki se kichiuas achto ke se moauis uan satepan.