1, 2. 1) ¿Toni techyolpaktia tiitekitikauan Dios itech nejin tonalmej? 2) ¿Toni uelis kichiuaskej tetatmej uan tayekananij tein ika kinpaleuiskej telpochmej maj kiajsikamatikan keniuj yeski ininnemilis satepan ke moauiskej?

CHRISTOPHER yekin kipiaya 12 xiujmej, uan kinekia moauisya. Se tayekankej kiluij: “Peuak nimitsixmati keman tikonetsinok tikatka. Uan semi nechyolpaktia nikakis ke tikneki timoauis, sayoj ke niknekiskia nimitstajtanis: ¿keyej tikneki timoauis?”. Tokniuj kuali kimatia keyej kitajtaniaya nejon. Tiitekitikauan Dios techyolpaktia tikitaskej ke nochi xiujmej moauiaj tel miakej telpochmej uan ichpochmej (Ecl. 12:1). Sayoj ke tetatmej akin kichiuaj kemej Cristo uan tayekananij itech nechikol moneki kiyekitaskej maj kinekikan moauiskej porin ininyolo kinolinia uan maj kiajsikamatikan tein kijtosneki se moauis.

² Biblia tamachtia ke keman aksa kimaktilia Jiova inemilis uan moauia, peua se yankuik nemilis kemej itekitikauj  Dios. Nejin kijtosneki ke Jiova semi kitatiochiuis, sayoj ke Satanás semi kiixnamikis (Prov. 10:22; 1 Ped. 5:8). Yejua ika, tetatmej akin itaixpantijkauan Jiova moneki kiixtaliskej kinpaleuiskej ininkoneuan maj kiajsikamatikan tein kijtosneki se mochiuas se itatojtokakauj Cristo. ¿Uan komo itatuan se telpoch amo itaixpantijkauan Jiova? Komo ijkon, tayekananij itech nechikol kipaleuiskej ika netasojtalis maj kiajsikamati tein kijtosneki se motemaktis uan se moauis (xikixtajtolti Lucas 14:28-30). Keman aksa kineki kichijchiuas se ueyi kali, moneki kipias nochi tein ika uelis kichijchiuas. No ijkon, komo se telpoch kineki moauis, no moneki kipias nochi tein kipaleuis maj kitekitili Jiova ika nochi iyolo hasta keman ejkos tamilis (Mat. 24:13). ¿Toni kinpaleuis telpochmej maj kitekitilikan Jiova nochipaya? Maj tikitakan.

3. 1) ¿Toni kijtojkej Jesús uan Pedro keman ika tajtojkej neauilis? (Mat. 28:19, 20; 1 Ped. 3:21.) 2) ¿Toni netajtanilmej tikitaskej itech nejin tamachtilis? 3) ¿Keyej motelneki se mochiuilis nejin netajtanilmej?

³ ¿Titelpoch uan tikneki timoauis? ¡Tel kuali! Se tel ueyi tatiochiualis se moauis uan se mochiuas se itaixpantijkauj Jiova. Jesús tamachtij ke nochin akin kichiuaj kemej yejua m̱oneki moauiskej. Uan tatitanil Pedro kijtoj ke nejin se taman tein motelneki tein tepaleuis maj se makisa itech okachi ueyi tajyouilis (Mat. 28:19, 20; 1 Ped. 3:21). Itech nejin tamachtilis tiknankiliskej eyi netajtanilmej tein mitspaleuiskej xikita ox uelis timoauisya: “¿Niyekyolmajsitok? ¿Keyej nikneki nimoauis? ¿Nikajsikamati tein kijtosneki se motemaktis iuan Jiova?”. Motelneki ximotajtani nejin. ¿Keyej? Porin keman timoauis, tiknextis ke timotenkauak tiktekitilis Jiova nochipaya. Nejin netajtanilmej mitspaleuiskej xikchiua tein timotenkauak.

4, 5. 1) ¿Keyej moneki amo se mochias maj se kiajxiti 18 xiujmej uan ijkon uelis se moauis? 2) ¿Toni kijtosneki maj se yekyolmajsito?

⁴ Biblia amo kijtoua kanachi xiuit moneki se kipias uan ijkon uelis se moauis. Proverbios 20:11 kijtoua: “Hasta se okichpil kiixmatij ika tein kichiua, komo monejnemiltia ika chipaujkayot uan melaujkayot”. Nejin kijtosneki ke hasta se konet ueli kimati toni kuali uan toni amo kuali, uan ueli  kiajsikamati tein kijtosneki se motemaktis iuan Jiova. Yejua ika, komo se telpoch kinextia ke yekyolmajsitok uan motemaktijya iuan Jiova, motelneki uan kuali yetok maj moaui (Prov. 20:7).

⁵ ¿Toni kijtosneki maj aksa yekyolmajsito? Amo sayoj kijtosneki se kiajxitis oso se kipanauis 18 xiujmej. Biblia kijtoua ke kijtosneki se kimatis toni kuali uan toni amo kuali (Heb. 5:14). Kijtosneki se kimatis toni kuali uan se kinekis se kichiuas ika nochi se iyolo. Akin yekyolmajsitok mochikaua kiixnamikis tayejyekolismej uan amo moneki maj aksa kiluijto maj kichiua tein kuali. Komo timoauia, mochia xiueli xikchiua tein kuali hasta keman amo mitsitstoskej motatuan oso okseki taltikpakneminij (no xikita Filipenses 2:12).

6, 7. 1) ¿Toni tayejyekolismej kiixnamikik Daniel ompa Babilonia? 2) ¿Keniuj kinextij Daniel ke yekyolmajsitoya?

⁶ ¿Uelis se telpoch kinextis ke yekyolmajsitok? Xitanemili itech ineskayo se itekitikauj Dios akin motokaytiaya Daniel. Yejua xa katka se telpoch keman kiuikakej Babilonia iselti. Ompa kipanok miak tayejyekolismej. Kemej neskayot, moajsia iniuan taltikpakneminij akin amo kitakamatiaj Dios. Uan no, ompa peuak kiitaj kemej se aksa akin ueyichiujkej. Hasta pouik iniuan seki telpochmej akin kinixpejpenkej maj kitekitilikan tekiuaj (Dan. 1:3-5, 13). Moitaya ke Daniel ueliskia okachi kuali  nemis ompa Babilonia ke itech xolal Israel.

⁷ ¿Toni kichiuak Daniel keman kipanok nejon tayejyekolismej? Amo kikauak maj akin nemiaj Babilonia kipatanij inemilis oso kichiuanij maj amo kitakamatiniok Jiova. Biblia kijtoua ke Daniel “kiixtalij itech iyolo amo mopitsotilis”. Ika okseki tajtolmej, kiixtalij amo kichiuas nion teyi tein mouika ika taneltokalis tein amo melauak (Dan. 1:8). Ijkon kinextij ke yekyolmajsitoya.

8. ¿Toni uelis mitsmachtis tein kichiuak Daniel?

⁸ ¿Toni uelis mitsmachtis tein kichiuak Daniel? Ke komo tiyekyolmajsitok, moneki tiktakamatis Jiova hasta keman okachi ouij yeski. Amo moneki tiyeski kemej camaleón, se tapialtsin tein kipata kemej tamati inakayo ijkon kemej kampa yetok. Amo uelis timonejnemiltis kemej itasojikniuj Dios itech Kali kampa tiMosentiliaj uan taman timonejnemiltis kampa timomachtia, ta moneki nochipa tikyolpaktis Dios hasta keman tikpanos tayejyekolismej (xikixtajtolti Efesios 4:14, 15).

9, 10. 1) ¿Keyej moneki tiknemilis toni tikchiuak keman yankuixtok tikpanok se tayejyekolis? 2) ¿Toni se kinextia keman se moauia?

⁹ Tein melauj, tiyeskij titelpochmej oso tiuejueykejya, tinochin timopolouaj (Ecl. 7:20). Sayoj ke komo tikneki timoauis, moneki timotajtanis: ¿Nikixtalijtok niktakamatis Jiova, maski ouij yeski? Onkak se taman kemej uelis se kimatis: xiknemili toni tikchiuak keman yankuixtok tikpanok se tayejyekolis. ¿Uelik tikmatik toni kuali katka? Oso xa tikpanotok se taman kemej tein kipanok Daniel. Xa aksa mitsiluiani xiktekitilti tein ueli tikchiua uan ijkon tikpias se kuali nemilis itech nejin taltikpak. Keman tikpanoua tayejyekolismej kemej nejon, ¿ueli tikajsikamati toni kineki Jiova xikchiua? (Efes. 5:17.)

¹⁰ Motelneki ximochiuili nejin netajtanilmej, porin mitspaleuis xikita ke neauilis amo auil. Ijkon tikinnextilia oksekin ke timotenkauak iuan Jiova ke tiktasojtas uan tiktekitilis nochipaya ika nochi moyolo (Mar. 12:30). Nochin akin moauiaj, moneki kiixtaliskej kichiuaskej tein motenkaujkej iuan Jiova (xikixtajtolti Mateo 5:33).

11, 12. 1) ¿Toni moneki tikyekmatis komo tiknemilijtok timoauis? 2) ¿Toni mitspaleuis xikita neauilis kemej kiita Jiova?

¹¹ Biblia kijtoua ke nochin itekitikauan Dios kitekitiliskiaj ika nochi ininyolo, hasta telpochmej (Sal. 110:3). Yejua ika, komo tiknemilijtok timoauis, moneki tikyekitas ox tikchiua porin  tejua ijkon tikixtalij. Nejin motelneki, okachi komo motatuan katkajya itaixpantijkauan Jiova keman timoskaltij.

¹² Ijkon kemej timoskaltijtiyani, xa tikitani ke okseki taltikpakneminij moauianij. Xa moauijkejya seki motasojikniuan oso seki mokniuan. Sayoj ke ximoyekpia. Amo xiknemili ke tejua no moneki timoauisya sayoj porin tiueyiya oso porin oksekin moauijkejya. ¿Toni mitspaleuis xikita neauilis kemej kiita Jiova? Xitanemili keyej neauilis motelneki. Itech nejin tamachtilis uan itech okse tikajsis kuali tanankililmej.

13. ¿Keniuj uelis tikmatis ox yekmelauj tikneki timoauis?

¹³ ¿Keniuj uelis tikmatis ox yekmelauj tikneki timoauis porin moyolo mitsolinia? Se taman yejua keman tikita keniuj timotataujtia. Ximotajtani: “¿Miakpa niktataujtia Jiova oso amo? ¿Nikiluia tein yekmelauj nikmachilia, oso ika nitajtoua miak taman?”. Nejin mitspaleuis xikita ox kuali timouika iuan Dios (Sal. 25:4). Miakpa, Jiova kinankilia netataujtilmej ika Biblia. Yejua ika, okse taman tein mitspaleuis xikmati ox tikneki okachi timotokis iuan Jiova uan tiktekitilis ika nochi moyolo yejua komo tikita keniuj timomachtia Biblia (Jos. 1:8). Ximotajtani: “¿Nimomattok nimomachtis Biblia nochi semanas? ¿Amo nitapoloua keman ixyetok nitaueyichiuas iniuan nochankauan?”. Nejin netajtanilmej mitspaleuiskej xikita ox yekmelauj tikneki timoauis porin moyolo mitsolinia.

14. ¿Keniuj amo sayoj se taman kijtosneki se motemaktis uan se moauis?

¹⁴ Seki telpochmej kijtouaj ke motemaktijkejya iuan Jiova, sayoj ke kiitaj ke ayamo uelis moauiskej. Sayoj ke nejon amo taixejekol. Tein melauj, nejon telpochmej amo kiajsikamatij ke se motemaktis uan se moauis amo sayoj se taman kijtosneki. Keman se motemaktia se kichiua se netataujtil kampa se motenkaua iuan Jiova ke se kitekitilis nochipaya. Uan satepan se moauia uan ijkon nochin kimatiskej ke se kimaktilijya Jiova nemilis. Yejua ika, achto ke timoauis moneki kuali tikajsikamatis toni kijtosneki se motemaktis iuan Dios.

15. ¿Toni kijtosneki se motemaktis?

¹⁵ Keman se motemaktia iuan Jiova, se kiluijtok ke axkan iaxkaya se inemilis. Se motenkaua ke nochipa se kitayekanaltis se kitekitilis (Mat. 16:24). Yejua ika amo auil keman se motemaktia iuan Jiova (Mat. 5:33). ¿Keniuj uelis tiknextis ke tikmati ke monemilis iaxka Dios? (Rom. 14:8.)

16, 17. 1) Xikmelaua ika se neskayot ke monemilis amo moaxkaok. 2) ¿Toni aksa kiluia Dios keman kimaktilia inemilis?

¹⁶ ¿Keniuj uelis tiknextis ke monemilis amo moaxkaok? Maj tiktalikan se neskayot. Ximonemili ke se motasojikniuj mitstayokolia se carro. Mitsmaka amamej uan mitsiluia ke axkan moaxkaya.  Sayoj ke satepan mitsiluia ke yejua mokauilis llaves uan ke sayoj yejua uelis kinejnemiltis. ¿Tikijtoskia ke motasojikniuj yekmelauj mitstayokolij nejon tepos? ¿Oso tein melauj kisentoka yejua iaxka?

¹⁷ Keman aksa motemaktia, kiluia Dios: “Nonemilis moaxka”. Uan Jiova kinamiki kichias maj nejon taltikpaknenkej kichiua tein motenkauak. Sayoj ke xiknemili ke nejon taltikpaknenkej peua moixmati ichtaka iuan aksa akin amo itaixpantijkauj Jiova. Oso ximonemili ke kiselia se tekit tein kichiua maj amo semi youi tanojnotsati oso monechiko. Nejon taltikpaknenkej amo kichiujtoskia tein motenkauak iuan Dios. Yeskia kemej akin mokauilia llaves tein ika se kinejnemiltia carro. Yejua ika, komo tikiluia Jiova ke monemilis iaxka, nochipa monekis tikchiuas tein yejuatsin kineki, maski kemansa amo yeski tein tejua tikneki. Nochipa moneki tikchiuaskej kemej Jesús, akin kijtoj: “Nejuatsin niualpantemok de ne eluiyaktsinko amo para nikchiuakiu tensa de nejua notanejnekilis san. Ta, niuala para nikchiutinemis ten Notajtsin Dios kimonekiltia, porin Yejuatsin nechualtitanik nikan taltikpak” (Juan 6:38).

18, 19. 1) ¿Toni kijtouaj Rose uan Christopher keman kiixtalijkej moauiskej? 2) ¿Keniuj tikita neauilis?

¹⁸ Senkis moita ke amo auil se kiixtalis se moauis. Se tel ueyi tatiochiualis se motemaktis iuan Jiova uan se moauis. Komo tiktasojta Jiova uan tikajsikamati toni kijtosneki se motemaktis, amo tiomeyolouas timoauis. Uan amo timoyolnonotsas porin tikixtalij tikchiuas nejon. Se ichpoch akin motokaytia Rose kijtoua: “Nikteltasojta Jiova, uan amo onkak okse taman tein okachi nechyolpaktia ke niktekitilis. Keman nikixtalij nimoauis, senkis nikmatia ke yejua tein okachi kuali tein ueliskia nikchiuas”.

¹⁹ Itech yekinika párrafo ika titajtojkej se telpoch akin motokaytia Christopher. Yejua moauij keman kipiaya 12 xiujmej. ¿Keniuj momachilia ika tein kiixtalij kichiuas? Yejua kijtoua ke semi yolpaki. Keman kipiaya 17 xiujmej mochiuak precursor regular uan kiixtalijkej kemej tapaleuijkej itech nechikol keman kipiaya 18 xiujmej. Axkan tapaleuia itech kali Betel. Yejua kijtoua: “Nikixpejpenak nikchiuas tein okachi kuali keman nimoauij. Niktekitilia Jiova uan inechikol, uan amo onkak okse taman tein nechualkuiliskia okachi yolpakilis”. ¿Uan tejua? ¿Tiknemilijtok timoauis? Komo ijkon, ¿toni uelis tikchiuas tein mitspaleuis ximoaui? Tikitaskej itech okse tamachtilis.