1. ¿Keniuj techchijchiuak Jehová uan keyej?

 JEHOVÁ techchijchiuak kemej uelis titanemiliskej, timomachtiskej okseki taman uan kemej uelis tikajsikamatiskej keniuj tikchiuaskej tein timomachtiaj. ¿Keyej ijkon techchijchiuak? Porin yejua kineki maj tikixmatikan uan maj kuali tiknemilikan toni tikixpejpenaskej keman tiktekitiliskej (Prov. 2:1-5; Rom. 12:1).

2. 1) ¿Toni moneki tikajsikamatiskej? (Job 37:23, 24; no xikonita taixkopin). 2) ¿Keniuj techpaleuia komo tikajsikamatij ke amo nochi tikmatij?

² Jehová techchijchiuak kemej uelis timomachtiskej miak taman, maski ijkon ipa amo nochi tikmatij (xikonlero Job 37:23, 24). Maj itech titanemilikan Job. Jehová kitajtanij Job miak taman tein kipaleuij maj momaka cuenta ke sayoj kimatia seki taman. Keman monojnotskej, Job kiitak ke monekia kipatas kemej tanemiliaya (Job 42:3-6). Tejuan no techpaleuis komo tikajsikamatij ke amo nochi tikmatij. Keman tikelnamikij ke miak taman amo tikmatij, techpaleuia maj titakuaujtamatikan ke Jehová nochipa techmatiltis sayoj  tein monekis maj tikmatikan para maj kuali titaixpejpenakan (Prov. 2:6).

3. ¿Toni tikitaskej itech nejin tamachtilis?

³ Itech nejin tamachtilis tikitaskej seki taman tein amo tikmatij, uan keyej kemansa nejon ueliskia kichiuas maj peua tikchiuakan tein Dios amo kineki. No tikitaskej keyej techpaleuia maj amo tikmatikan seki taman. Tein tikitaskej techpaleuis maj okachi titakuaujtamatikan ke Jehová “akin nochi kimati”, techiluis sayoj tein monekis tikmatiskej (Job 37:16).

AMO TIKMATIJ KEMANIAN IXPOLIUIS NOCHI TEIN AMO KUALI

4. Kemej kijtoua Mateo 24:36, ¿toni amo tikmatij?

⁴ (Xikonlero Mateo 24:36). Amo tikmatij kemanian ixpoliuis nochi tein amo kuali. Keman Jesús yetoya nikan taltikpak amo no kimatia “tonal uan hora” keman mochiuaskia. a Satepan kiniluij itatitaniluan ke sayoj Jehová kinamiki kiixtalis kemanian mochiuas seki taman (Hech. 1:6, 7). Jehová kiixtalijya kemanian ixpoliuis nochi tein amo kuali, sayoj ke tejuan amo senkis tikmatij kemanian mochiuas.

5. Kemej ayamo tikmatij kemanian ixpoliuis nochi tein amo kuali, ¿toni uelis techpanos?

⁵ Tein Jesús kijtoj kinextia ke amo tikmatij kanachi tiempo moneki timochiaskejok hasta maj ixpoliui nochi tein amo kuali. Yejua ika xa tiyolijsiuiskej oso timosenkauaskej uan okachiok komo miak xiujmejya tiktekitilijtokej Jehová. Oso xa tel amo kuali timomachiliskej keman tochankauan uan oksekin techkejkeloskej porin ayamo ixpoliui nochi tein amo kuali (2 Ped. 3:3, 4). Xa hasta tiknemiliskej: “Komo nikmatiskia kemanian ixpoliuis nochi tein amo kuali, okachi amo ouij yeskia nimochias uan nitaxikos keman oksekin nechkejkeloskej”.

6. ¿Keniuj techpaleuia maj amo tikmatikan kemanian ixpoliuis nochi tein amo kuali?

⁶ Kemej Jehová amo techiluia kemanian ixpoliuis nochi tein amo kuali, ueli tiknextiliaj ke tiktekitiliaj porin tiktasojtaj uan iuan titakuaujtamatij. Tiknekij nochipaya  tiktekitiliskej, amo sayoj hasta keman ixpoliuis nochi tein amo kuali. Yejua ika, maj amo sayoj tiknemilijtokan kemanian ejkos “itonal Jehová”, ta okachi kuali maj itech titanemilikan nochi tein kuali tein mochiuas satepan. Komo itech titanemiliaj nejon, techpaleuis maj okachi kuali timouikakan iuan Jehová uan maj timochikauakan tikyolpaktiskej (2 Ped. 3:11, 12).

7. ¿Toni kemaj tikmatij?

⁷ Semi kuali maj itech titanemilikan tein kemaj tikmatij. Uan tikmatij ke itech xiuit 1914 peuak tonalmej keman tatamitiya. Itech Biblia, Jehová kijtoj seki taman tein kinextia ke peuaskia itech nejon xiuit. Uan no kijtoj miak taman tein panoskia, yejua ika tikmatij ke “iueyi tonal Jehová amo uejka yetok” (Sof. 1:14). No tikmatij ke Jehová kineki maj tikinixmatiltikan nochin “kuali tanauatilmej tein ika tajtoua iTaixyekanalis Dios” (Mat. 24:14). Uan tikchiujtokej nejin tekit kemej itech 240 altepemej uan xolalmej, uan itech panoua mil tataman tajtolmej. Nejin kinextia ke amo moneki tikmatiskej “tonal uan hora” para tiknekiskej titanojnotsaskej.

AMO TIKMATIJ KENIUJ JEHOVÁ UELIS TECHPALEUIS

8. ¿Toni techmachtia tein kijtoua Eclesiastés 11:5?

⁸ Amo nochipa tikmatij “tein kichiua akin yekmelauj Dios” (xikonlero Eclesiastés 11:5). Amo nochipa tikmatiskej tein Jehová kichiua oso tein kikaua maj pano para maj mochiua tein kineki. Uan amo ueli senkis tikmatij toni kichiuas Jehová para techpaleuis (Sal. 37:5). Biblia kijtoua ke ijkon kemej amo tikmatij keniuj se konetsin moskaltia iijtik imomaj uan hasta motelmachtianij ayamo senkis kiajsikamatij nejin, tejuan amo no tikmatij nochi tein kichiua akin yekmelauj Dios.

9. Kemej amo senkis tikmatij keniuj uelis techpaleuis Jehová, ¿toni uelis peuas tiknemiliskej?

⁹ Kemej amo senkis tikmatij keniuj techpaleuis Jehová, xa okachi ouij techkisas tikixtaliskej tikchiuaskej seki taman. Xa amo tiknekiskej tikauaskej nochi tein tikpiaj para okachi titanojnotsaskej oso tiaskej titapaleuitiuij kampa monekij okachi tanojnotsanij. Oso xa tiknemiliskej ke amo tikyolpaktiaj Jehová porin maski timochikauaj okachi tiktekitiliskej amo ueli tikchiuaj tein tikixtalijtokej. Oso xa semi titanojnotsaj, sayoj ke ayamo akin ueli tikmachtiaj. Oso xa titapaleuijtokej maj mochiua se tekit itech inechikol Dios, sayoj ke onkak miak taman tein kitsakuilia maj amo mochiua. Nochi nejon uelis kichiuas maj tiknemilikan ke Jehová amo techpaleuijtok.

10. ¿Keniuj techpaleuia amo tikmatiskej toni kichiuas Jehová por tejuan?

¹⁰ Kemej amo senkis tikmatij toni kichiuas Jehová por tejuan, nejon techpaleuia maj tiyolyemankej uan maj tiknextikan okseki taman. Techelnamiktia ke sayoj Jehová kimati toni okachi kuali (Is. 55:8, 9). No techmachtia maj senkis titakuaujtamatikan ke Jehová kiitas maj mochiua teisa kemej moneki. Keman titanojnotsaj uan kuali techkakij oso keman kuali tikchiuaj se tekit itech inechikol Dios, nochipa tikueyitaliaj Jehová porin yejua techpaleuij (Sal. 127:1; 1 Cor. 3:7). Sayoj ke komo teisa amo mochiua kemej tiknemiliayaj, tikmatij ke Jehová kiita nochi (Is. 26:12). Tikchiuaj nochi tein tiuelij uan titakuaujtamatij ke Jehová nochipa techpaleuis. Tikyekmatij ke yejua techixyekanas maski amo kichiuas milagros ijkon kemej kichiuaya ne uejkauj (Hech. 16:6-10).

11. ¿Toni tein tikmatij uelis techpaleuis?

¹¹ Semi techpaleuis komo tikelnamikij tein  kemaj tikmatij. ¿Toni tikmatij? Ke Jehová semi tetasojta, kichiua tein kuali yetok uan tamatkej. No tikmatij ke yejua semi kipatiuita nochi tein tikchiuaj para tiktekitiliskej uan para tikinpaleuiskej tokniuan, uan ke nochipa kintatiochiuia akin amo keman kikauaj (Heb. 11:6).

AMO TIKMATIJ TONI UELIS PANOS

12. Kemej kijtoua Santiago 4:13, 14, ¿toni amo tikmatij?

¹² (Xikonlero Santiago 4:13, 14). Amo tikmatij toni uelis techpanos. Tinochin uelis ‘techpanos tein amo kuali uan tein amo tikchiaj’ (Ecl. 9:11). Yejua ika amo tikmatij ox uelis tikchiuaskej tein tikixtalijtokej oso ox tiyoltoskejok para tikchiuaskej.

13. ¿Keniuj timomachiliaj keman amo tikmatij toni panos satepan?

¹³ Kemej amo tikmatij toni mochiuas satepan, xa ouij yeski titaxikoskej. Porin komo semi techtekipachoua tein uelis panos, amo tiyolpakiskejok. Xa ijsiujka uelis techpanos tein amo tikchiayaj oso teisa tein amo kuali uan nejon uelis kichiuas maj timotayokoltikan uan maj timotekipachokan. Oso xa timoyolkokoskej uan timosenkauaskej keman amo mochiua teisa ijkon kemej tikchiayaj (Prov. 13:12).

14. ¿Toni techpaleuis maj tiyolpakikan? (No xikonita taixkopimej).

¹⁴ Keman titajyouiaj uan titaxikouaj, tiknextiaj ke tiktekitiliaj toTajtsin porin tiktasojtaj uan amo porin tikchiaj maj techmaka teisa. Tein Biblia kijtoua kinextia ke amo moneki tikchiaskej maj Jehová nochipa techpaleui para maj amo techpano nion teyi, uan ke amo moneki tiknemiliskej ke kiixtalijya toni techpanos satepan. Jehová kimati ke tiyolpakiskej komo timokauaj maj techixyekana uan tiktakamatij, uan amo komo tikmatij toni techpanos satepan (Jer. 10:23). Keman tiktemouaj maj Jehová techixyekana keman tikixpejpenaj teisa, kemej yeskia tikiluiskiaj: “Komo Jehová kineki, tiyoltoskej uan tikchiuaskej nejin oso ne okse taman” (Sant. 4:15).

15. ¿Toni tikmatij ke panos satepan?

¹⁵ Maski amo tikmatij toni uelis panos, tikmatij ke Jehová kijtoua ke uelis tinemiskej nochipaya ne iluikak oso nikan taltikpak. No tikmatij ke yejua amo takajkayaua uan ke amo teyi kitsakuilia maj kichiua tein  motenkaujtok (Tito 1:2). Sayoj yejua ueli kijtoua nejin: “Nikijtoua keniuj tamis teisa uan desde achtook nikijtoua tein ayamo mochiua”. Nochi tein Jehová kijtojka mochiuakya uan mochiuatiok (Is. 46:10). Tikmatij ke amo teyi kitsakuilia maj Jehová techtasojta (Rom. 8:35-39). Yejua techpaleuis maj titamatinij, maj tiyolseujtokan uan maj tichikaujkej para uelis tikxikoskej tein yeski tein techpanos. Tikmatij ke Jehová techpaleuis uan techtatiochiuis (Jer. 17:7, 8).

AMO SENKIS TIKAJSIKAMATIJ KENIUJ JEHOVÁ TEL KUALI TECHIXMATI

16. ¿Toni kimati Jehová de tejuan, uan keniuj timomachiliaj? (Salmo 139:1-6).

¹⁶ (Xikonlero Salmo 139:1-6). Akin techchijchiuak kuali kimati keniuj tichijchiujtokej, keniuj timomachiliaj uan toni tiknemiliaj. Kimati tein tikijtouaj uan tein amo ueli tikijtouaj, tein tikchiuaj uan keyej tikchiuaj. Tekiuaj David kijtoj ke Jehová nochipa yetok para techpaleuis. Tel kualtsin timomachiliaj porin tikmatij ke tel motekipachoua por tejuan akin okachi ueyi chiujkej, akin kichijchiuak iluikak uan taltikpak, uan akin kipia nochi chikaualis. David kijtoj: “Tejua tel kuali tinechixmati, hasta amo ueli nikajsikamati” (Sal. 139:6).

17. ¿Keyej kemansa xa amo tikneltokaskej ke Jehová kuali techixmati?

¹⁷ Xa ouij yeski tikitaskej Jehová kemej toTajtsin akin semi techtasojta uan motekipachoua por tejuan porin tataman kemej techiskaltijkej, kampa tinemij oso tein achto tikneltokayaj. Oso xa tel amo kuali timomachiliaj porin tikchiujkaj tein amo kuali uan yejua ika tiknemiliaj ke amo uelis kuali timouikaskejok iuan Jehová uan ke amo kineki  touan motokis, hasta David kemansa no ijkon momachiliaya (Sal. 38:18, 21). Oso xa aksa akin mochikaujtok kipatas kemej nemi para kiyolpaktis Jehová, motajtania: “Komo Dios kuali nechixmati, ¿keyej amo nechselia kemej ninemi uan kineki maj nimopata?”.

18. ¿Keniuj techpaleuia komo tikajsikamatij ke Jehová okachi techixmati ke tejuan? (No xikonita taixkopimej).

¹⁸ Moneki timochikauaskej tikajsikamatiskej ke Jehová okachi techixmati ke tejuan. Uan maski tejuan amo tikitaj tein kuali tein tikchiuaj, yejua kemaj kiita. Jehová kiita ke timopolouaj, sayoj ke no kiajsikamati keniuj timomachiliaj uan keyej tikchiuaj teisa, uan techtasojta (Rom. 7:15). Keman tikajsikamatij ke Jehová kiita ke uelis timopataskej uan tikyolpaktiskej, nejon techpaleuia maj tiksentokakan tiktekitilikan uan maj tiyolpakikan keman ijkon tikchiujtoskej.

19. ¿Toni tikmatij de Jehová?

¹⁹ Senkis tikmatij uan tikneltokaj ke Jehová tetasojtalis (1 Juan 4:8). Tikmatij ke tein technauatia kinextia ke semi techtasojta uan kineki maj kuali tietokan. No tikmatij ke kineki maj tinemikan nochipaya, yejua ika kiualtitanik iKonetsin para taxtauas uan techmakixtis. Kemej Jesús momikilij por tejuan, tikmatij ke uelis tiktekitiliskej Jehová kemej kineki maski titajtakolejkej (Rom. 7:24, 25). Uan tikmatij ke “okachi ueyi ke toyolo uan nochi kimati” (1 Juan 3:19, 20). Jehová kuali techixmati uan kimati ke uelis tikchiuaskej tein kiyolpaktia.

20. ¿Toni techpaleuis maj amo techtekipacho tein amo tikmatij?

²⁰ Kemej tikitakejya, Jehová techiluia sayoj tein moneki tikmatiskej, yejua ika maj amo techtekipacho tein amo tikmatij uan maj timochikauakan tikchiuaskej tein okachi moneki. Ijkon tiknextiaj ke senkis titakuaujtamatij iuan Jehová “akin nochi kimati” (Job 36:4). Maski axkan amo tikajsikamatiskej seki taman, tikmatij ke Jehová kisentokas techmachtijtos nochipaya, uan tiyolpakij porin nochipa timomachtijtoskej miak taman de toDios (Ecl. 3:11).